لقاء مع girl_in_jesus

[ارووجة]

http://www.webtree.ca/tree/gifs/welcome/welcome_bears1.jpg

سلاااااام ونعمة

بحب اتشكر خيي مينوو على صراحته في الاجابات
ربنا يباركك ^_^


وهنبدا اسبوع جديد مع ضيفة طيوبة اوي
ونشيطة اوي في المنتدى ومتميزة في مشاركتها
المـشــرفـة girl_in_jesus

نورتي ياغالية كرسي الاعتراف ورح تبقى معانا لاسبوع كامل

متل دايما هبدا بالاسئلة التمهيدية
عرفينا عن نفسك



اسمك الاول

عمرك

بلدك

حالتك الاجتماعية

هواياتك


طموحك



بتمنى من الجميع يشارك ويسأل

ربنا يكون معاكي ياقمر ^_^

[girl_in_jesus]

سلام ونعمه ليكم جميعاااا

اشكرك يا اروجه على اختيارك ليا

وربنا يستر بقي:smil12:


بسم الاب والابن والروح القدس الاله الواحد امين

اسمك الاول

بسمـه


عمرك

هتم ال19 يناير اللى جاى

بلدك

ام الدنيا ((مصر))

حالتك الاجتماعية

عازبه

هواياتك

النت ده اول حاجه وبحب جدا اجمع عملات جديده وقديمه والاجنبيه اكتر والرسم احيانا بس لما اكون رايقه جدااا وده قليل


طموحك

اولا الروحيه انى اكون girl_in_jesusبمعنى الكلمه وربنا يقدرنى واكون كده واكون قد ابوته ليا ..
ثانيا العلميه انى انجح فى دراستى
وبتمنى اكون مذيعه او اشتغل فى مجال دراستى العبريه فى السفاره او ترجمه ولتكن ارادة الله.

وربنا يخليكى يا اروجه ويكون معاكى انتى كمان

[رامى]

girl in jesus مرتبطة ولا لا ولو لاء هل كنتى مرتبطة قبل كدة

[mrmr120]

اهلا اهلا بالعسل جيرل
كان نفسى تقعدى على الكرسى من زمان
ههههههههه
الاسئلة :
مين شفيعك ؟
يومك بيبقى عامل ازاى ؟
نشيطة ولا بتكسلى ؟
بتحبى تخرجى ولا بتحبى قعدة البيت ؟
انتى فى كلية اية ؟
اية نوع برفانك ؟
هل انتى رومانسية ولا لاء ؟
اية اكتر حاجة بتبسطك ؟
اية اكتر حاجة بتزعلك ؟
بس كفاية كدة

[ramyghobrial]

اهلا اهلا بسمة
بصي بقة ياسيتي انا مش هاعمل حاجة غير اني هاجيب الاسئلة اللي انتي سالتيها بس :smil12:
بس شوفتي العملية سهله اذاي


1- ارتبطى قبل كده؟؟؟
2-ايه الحدث اللى حصل فى حياتك مش بتنسيه ؟؟
3-بتفكرى فى ايه دلوقتى؟؟

4-عيوب كل من :::: سؤال جميع من يأتى على هذا الكرسي وربنا ستر علينا

رامى
كيرو
ديانا
كوبتك
روك
ميرنا
ديانا
جيرل
مينووووووووو

5- ذكره لم تنسااها ابدا؟؟

6-بتفكري فى ايه دلوقتى؟؟
7-ذكره من الطفوله؟؟؟
8-ذكره من الطفوله؟؟؟
9- مين الانسانه اللى عمرك مهتنسها مهما حصل؟؟




شوفتي بقة الموضوع سهل اوي اوي اوي اذاي وبعدين ياريت نذاكر بقة

[girl_in_jesus]

girl in jesus مرتبطة ولا لا ولو لاء هل كنتى مرتبطة قبل كدة

:new2: :new2: اول متسأل تسأل كده

حاليا مش مرتبطه
قبل كده no comment

[رامى]

وتحبى تحكى اية قصة حبك ولا متحبيش اية رايك انا اسف انى بزنقك كدة بس معليش بقى استحملينى ممكن

[girl_in_jesus]

[[CENTER]اهلا اهلا بالعسل جيرل
كان نفسى تقعدى على الكرسى من زمان
ههههههههه

ماشي يا جميل بس شكلك شمتانه كده ليه مش عارفه:spor22:

مين شفيعك ؟

البابا كيرلس والسيده العذراء مريم

يومك بيبقى عامل ازاى ؟

بصي يا ستى لو هروح الجامعه يبقي حسب المحاضرات وبرجع اقعد شويه والحاجات بتاعت لما ترجعى من بره بقي و على النت ولو فى حاجه فى البيت بعملها وممكن اذاكر وده مش دايماا
اما بقي لو مش هروح الجامعه بصحا متأخر شويه بعمل شغل البيت وطبعا الكمبيوتر بيبقي شغال وممكن اغانى او ترانيم وبعد كده المنتدى طبعا ولو بذاكر شويه...ملخص يومى

نشيطة ولا بتكسلى ؟

بكسل ساعات بس طبعتى نشيطه بحب اعمل كذا حاجه فى وقت واحد اتعودت على كده
بتحبى تخرجى ولا بتحبى قعدة البيت ؟
الاتنين بحب الخروج علشان تغيير وكده لكن البيت حيث الهدوء والسكينه
انتى فى كلية اية ؟
بصي يا ستى انا بدرس عبري وده يكفى مينفعش اقول الكليه يعنى
اية نوع برفانك ؟
انا بقي ماليش نوع محدد ليه معرفش بس بحب استعمل كذا نوع وممكن يوم ببرفيوم ويوم تانى بنوع تانى بس بحب ليدى اووى
هل انتى رومانسية ولا لاء ؟
اه للاسف اووى بس بحاول مبينش رومانسيتى دى للى حاواليا(( كتير بيعتبروها ضعف))..
اية اكتر حاجة بتبسطك ؟
بصي انا لما بشوف ضحكة بيبى بضحك حتى لو انا مضايقه جدا
اية اكتر حاجة بتزعلك ؟
الجرح لما بسمع ان حد انجرح او حاجه بضايق والكذب مبحبوش ابدا ولما بفتكر ذكره مؤلمه والعنف والقسوه بتزعلنى اووى

مرسيي يا باشا للأسئله دى:Love_Mailbox:

[girl_in_jesus]

بصي بقة ياسيتي انا مش هاعمل حاجة غير اني هاجيب الاسئلة اللي انتي سالتيها بس
بس شوفتي العملية سهله اذاي

ماااشي يا دكتور:t32:

1- ارتبطى قبل كده؟؟؟
2-ايه الحدث اللى حصل فى حياتك مش بتنسيه ؟؟
الاول وجاوبنا عليه
التانى بقى الارتباط ده وفى حلم بجد حلمته وانا صغيره عمرى منسيته


3-بتفكرى فى ايه دلوقتى؟؟
:spor22: :spor22: بفكر فى اللى هعمله فيك هههههههه

4-عيوب كل من :::: سؤال جميع من يأتى على هذا الكرسي وربنا ستر علينا
رامى ::: لمــــــــــــــــــــــــض
كيرو ::: بيغيب عن المنتدى كتيررر
ديانا ::: واخدها عافيه ويارب تتجوز
كوبتك ::: شريرررر
روك ::: متعملتش شخصيا معاه علشان اقول عيوب
ميرنا ::: معقده الدنيا شويه ربنا يرزقها بعريس كده ههههه (( هتدعى عليا انا عارفه))
مينووو ::: مش بيذاااكر
جيرل ::: بتحب الهزار وده بيخلى ساعات الناس تفهمها غلط و عصبيه الى حد ما و بفكر كتيررر اووى ومهمله فى دراستى :new2:


5- ذكره لم تنسااها ابدا؟؟
ايام ثانوى عمرى مهنساها

6-بتفكري فى ايه دلوقتى؟؟ مكرر

7-ذكره من الطفوله؟؟؟
8-ذكره من الطفوله؟؟؟ مكرر9-

هههههههه كنت دايما اقول لماما عاوزه الفستان الافلطه وهى اللى حكيت لى الموضوع ده
ومعنى افلطه يعنى قصيرر متضحكوش عليا بقي


مين الانسانه اللى عمرك مهتنسها مهما حصل؟؟

ماما طبعا

شوفتي بقة الموضوع سهل اوي اوي اوي اذاي وبعدين ياريت نذاكر بقة
سهل اوى هذاكر منا ذاكرت امبارح على يدك وليك يوم يا راااامى مردودالك :t33: :t33:

[girl_in_jesus]

وتحبى تحكى اية قصة حبك ولا متحبيش اية رايك انا اسف انى بزنقك كدة بس معليش بقى استحملينى ممكن

:t32: :t32: لا ولا يهمك بس مش هحكى برضو اعتقد دى امور شخصيه اوى مينفعش تتحكى اوعى تزعل منى بس مينفعش

[abn_al_mse7]

دلوقت انا اهرب:kap: و اسقط عضويتي من المنتدي :36_11_13: قبل ما يجيلي يوم و تقعدوني علي الكرسي:a82: :t32:

[رامى]

ماشى يا ستى انا اسف على السؤال دة بس ممكن اعرف مواصفات شريك حياتك

[ميرنا]

جيرو على الكرسى يا مرحبا يا مرحبا

1- جيرو قبلت شخصيه غامضه وفضلت وراها لحد معرفتها ؟

2- الموقف الوحيد اللى حصل فى حياتك كان حلو جداا والموقف السىء جدا اللى مش هتقدرى تنسيهم ؟

3- موصفات فتى الاحلام ؟

4- اكتر منتدى بتحبى تشاركى فيه وليه ؟

5- اكتر ايه بتحبيها واكتر اصحاح ؟

6- جيرو راضيه عن حياتك الاجتماعيه والروحيه ؟

7- اكتر شخصيه شدتك فى حياتك وايه اللى عجبك فيها ؟

8- اكتر شخصيه شدتك فى المنتدى وليه ؟

9- جيرو لو اتخطبت وقلها متدخليش نت تانى ردفعلك هيكون ايه ؟

10- حاجه عاوزه تقوليها لشخصيه معينه ؟

11 _ حاجه عاوزه تقوليها لكل من

روك
كوبتك
ديانا
جيجى
طارق
اروجه
مينو
امير
سمردلى
ميرنا

[girl_in_jesus]

ماشى يا ستى انا اسف على السؤال دة بس ممكن اعرف مواصفات شريك حياتك
لا ولا يهمك بالنسبه للمواصفات
اولا ميفرقش الشكل اهم حاجه اكون مقتنعه بيه
ثانيا ميكنش متسلط يعنى يبقل النقاش فى اراءه مش نظام اوامر وانفذها
يكون ليه مبدائه الشخصيه ويكون ليه شخصيته مع اهله
حنون و طيب وبيحبنى بجد واكيد لما يحبنى بجد هيخاف عليا ويحترمنى و يحافظ عليا ويشاركنى
وميكونش عصبى اوى لانى بتعصب فالحياه هتبقي نار كده ....

[girl_in_jesus]

جيرو على الكرسى يا مرحبا يا مرحبا

مرسيي يا جميل على ذوقك

1- جيرو قبلت شخصيه غامضه وفضلت وراها لحد معرفتها ؟

الحقيقه الناس معايا مش غامضين اوى بيكلموا معايا عادى بس فى واحد معايا فى الجامعه كده بس مالناش كلام مع بعض اوى انى افضل وراه لحد معرفه كويس

2- الموقف الوحيد اللى حصل فى حياتك كان حلو جداا والموقف السىء جدا اللى مش هتقدرى تنسيهم ؟

هو الحقيقه مش موقف هو حلم وعمرى مهنساه لانه حلو جداا لانى حلمت بالسيد المسيح
اما الموقف السئ جدا فأنا مفتكرش حاجه حصلت معايا سيئه للدرجه كده بس حاجه ضيقتنى اوى انى بخاف على مصالحه اصدقائى وفى الاخر بيطلعونى انا اللى غلطانه ...

3- موصفات فتى الاحلام ؟

4- اكتر منتدى بتحبى تشاركى فيه وليه ؟

منتدى الكنيسه العربيه علشان لقيت فى ناس لذيذه وبنحب بعض

5- اكتر ايه بتحبيها واكتر اصحاح ؟

الايه "لست تعلم انت الان مأنا صانع ولكنك ستفهم فيما بعد"
وبحب مقوله البابا كيرلس جداا " كن مطمئنا جدا جدا ولا تفكر فى الامر كثيرا بل دع الامر لمن بيده الامر"

بالنسبه للأصحاح فأنجيل فى اصحاحات جميله اوى بس بحب اقرا الاصحاح 7 فى انجيل متى لانه فيه كذا وصيه حلوه

6- جيرو راضيه عن حياتك الاجتماعيه والروحيه ؟
الاجتماعيه الحمد لله راضيه الى حد كبير
لكن الروحيه ساعات تعلا وساعات تنزل فى تقلب لكن حاليا انا مش راضيه عنها

7- اكتر شخصيه شدتك فى حياتك وايه اللى عجبك فيها ؟

هو حد من النت برضو وهو سنه صغير بس ثقافته عاليه اوووى

8- اكتر شخصيه شدتك فى المنتدى وليه ؟

مينا كوبتك علشان ثقفته وسنه الصغير

9- جيرو لو اتخطبت وقلها متدخليش نت تانى ردفعلك هيكون ايه ؟

هفهم الاسباب ولو قدر يقنعنى هسمع كلامه لو مقدرش يبقي انا اللى هقنعه بوجه نظرى


10- حاجه عاوزه تقوليها لشخصيه معينه ؟

عاوزه اقول لحد ان الغدر مش طبعه


11 _ حاجه عاوزه تقوليها لكل من

روك::: ربنا يعوض تعبك بتتعب فى المنتدى كتيرر...
كوبتك:::ربنا يوفقك ويبعت لك عروسه تتجوزها على ميرنا..
ديانا ::: تتجوز بقي عاوزين نفرح فى حد...
جيجى ::: بتغيب كتير...
طارق ::: ربنا يباركه كلامه واسلوبه حلو جدا...
اروجه ::: موضوعتها جميله اوى وافكرها حلوه...
مينو ::: ذاااااااااااكر ويارب تدخل هندسه..
امير ::: مبروك الاشراف وانت فعلا تستحقها جدااا اسلوبك مميز اوى...
سمردلى ::: كاره المراءه مع اننا مش بنعمل له حاجه..
ميرنا ::: طيبه اوى وبتمنى تلاقى نصها التانى...
الحمد لله خلصت :Love_Mailbox:

[رامى]

تقولى على كل اللى فى المنتدى وانا لا ماشى يا ستى

[Coptic Man]

اممممممممممم

وقعتي ولا حدش سمي عليكي يا بسمة

ياتري عجبك الكرسي ؟ لا ده مش سؤال ده استفسار

نبدا الاسئلة بقي

بسمة من انت ؟

اكتر حاجة في الحياة بتحبيها ؟

ماذا يمثل لكي شروق الشمس وماذا يمثل لكي الغروب ؟

السيد المسيح ما مكانه في حياتك ؟

حياتك الروحية هل هي في نمو دائم ام ........... ؟

ايه اكتر حاجة بتخاف منها بسمة ؟

امنية بسمة الروحية وامنيتها في المادية ؟

كيف تواجهين مخاوفك ؟

ياتري كان نفسك تتواجدي في العصر ده ولا بتحسي انك بتنتمني للمستقبل او الماضي ؟

مكان نفسك تزوريه في مصر ؟

ماذا تمثل ليكي كلمة مصر ؟ ولما تسمعي الاسم ياتري بتفكري في حاجة ؟

اكثر دير بتحبيه ؟

ياتريت تعرفينا الكلمات دي بالنسبة ليكي ايه : اديها تعريف يعني من الاخر

الرجل - المراة - الذكاء - الغباء - الخيانة - الحب - الصداقة - الجمال

واتمني مش اكون طولت عليكي

[++menooo++]

مينووو ::: مش بيذاااكر

:t32: :t32::t32: :t32::t32: :t32:
ارحمونا يا عالم:a82:

[ميرنا]

كوبتك:::ربنا يوفقك ويبعت لك عروسه تتجوزها على ميرنا..

علشان اخلص عليه


ميرنا ::: طيبه اوى وبتمنى تلاقى نصها التانى...



ده بعينكم نص واحد وعايشين كويسين

[girl_in_jesus]

اممممممممممم

وقعتي ولا حدش سمي عليكي يا بسمة

بسم الصليب عليا انا سميت اهوه

ياتري عجبك الكرسي ؟ لا ده مش سؤال ده استفسار

حلو بس كله مفيش رحمه واتمنى اكون عند حسن ظنكم

بسمة من انت ؟

انسانه مسيحيه بسيطه تتمنى ان تكون افضل وتتمنى ان تعيش بسلام ومحبة المسيح و اتمنى انا استمر فى الخدمه ((المنتديات))

اكتر حاجة في الحياة بتحبيها ؟
الحب والسعاده

ماذا يمثل لكي شروق الشمس وماذا يمثل لكي الغروب ؟

الشروق حياه جديده
الغروب فراق و بدء لحظات مع الذات (( لحظات حزينه ))

السيد المسيح ما مكانه في حياتك ؟

بابا.....بأخد رأيه فى حياتى وبحاول اكون قد ابوته ليا

حياتك الروحية هل هي في نمو دائم ام ........... ؟

اغلب الوقت لكن لحظات الحزن بتقلل النمو ده

ايه اكتر حاجة بتخاف منها بسمة ؟

"لا اخاف شرا لانك انت معى" مبخفش من حاجه بيبقى حرص بس بخاف ربنا..

امنية بسمة الروحية وامنيتها في المادية ؟

فى لحظات كنت اتمنى اكون راهبه لكن سألت على حياتهم وحاولت ادرب نفسي لكن مقدرتش الصراحه بس اتمنى اوصل لمرتبه روحيه عاليه
الماديه بقي انى ابقي مذيعه و اكون بيت مرتاح وسعيد

كيف تواجهين مخاوفك ؟

بالصــــــلاه وقراءه الانجيل

ياتري كان نفسك تتواجدي في العصر ده ولا بتحسي انك بتنتمني للمستقبل او الماضي ؟

اتمنى اكون فى صدق زمان وتكنولوجيا الان لكن المستقبل معرفش هيكون ازاى...... شعر :smil12:

مكان نفسك تزوريه في مصر ؟

دير سانت كاترين نفسي اروحه اوى

ماذا تمثل ليكي كلمة مصر ؟ ولما تسمعي الاسم ياتري بتفكري في حاجة ؟

وطنى المسروق .......بفكر فى قمه النهب والتخلف اللى احنا فيها البلد دى بجد عمرها مهتتقدم مدام الاخوان المسلمون يريدون حكمها



اكثر دير بتحبيه ؟


دير مارمينا والبابا كيرلس اسكندريه

ياتريت تعرفينا الكلمات دي بالنسبة ليكي ايه : اديها تعريف يعني من الاخر

الرجل ::: لا طعم للحياه بدونه نص المراءه التانى...
- المراة ::: انسانه لا نستطيع انكار اهميتها ..
- الذكاء ::: لو قدرت تخلى كل الناس تحبك بدون نفاق..
- الغباء ::: يكمن فى كراهية الناس ليك..
- الخيانة ::: جرح لا ينساا ابدا وضعف انسانى..
- الحب ::: اعظم مشاعر انسانيه والحب الصادق يصنع المعجزات فعلا..
- الصداقة ::: صدق وحب وانا مفتقدها جداااا.
- الجمال ::: جمال الروح والتعامل ...

واتمني مش اكون طولت عليكي
لا طبعا براحتك انا اتشرفت بأسئلتك مرسيي ليك..

[girl_in_jesus]

:t32: :t32::t32: :t32::t32: :t32:
ارحمونا يا عالم:a82:

ربناااا معاك احنا خايفين عليك اوعا تزعل مننا

[مسلم ديمقراطى]

بجد موضوع جميل احيكى عليه

[†جــــــــو†]

موضوع فى غايه الجمال

فعلا يستحق انه يكون احسن موضوع

ربنا يعوضك ويبارك تعبك

جــــــو

[oesi_no]

بسمه
لالالالالالالالالالالا
وحشتينا كنا مستنينك من زمان
شويه اسئله على السريع علشان مش فاضى
1-
مدى تجاوبك مع الموسيقى

2-
الصلاة والصوم لازم مع بعض ولا مش مهم
3-
بتصومى الاربعاء والجمعه

4- اخر مرة روحتى الكنيسة

5- سبب مرواحك الكنيسه (قداس -اعتراف-اجتماع -غير ذلك )

6- اذا عرض عليكى انك تشوفى عضو واحد من المنتدى هيكون مين
7- ولو عضوة هتكون مين
8- حكمه تعتزى بيها
9- اكلتك المفضله
10- هل تعتقدى ان اسمك على مسمى (بسمه )
11-بتقرى فى الانجيل (بانتظام- على فترات -مطلقا)
12-اخر مرة اتناولتى فيها
13-اخر فيلم دينى شاهدتيه
14-ما رايك فى كل من

1- ريمون
2- السمردلى
3- كوبتك مان
4- طارق
5- امير
6- شخصى الشرير

15- اخر عضو اتعرفتى عليه
16- اخرعضوة
17 -ما هو رأيك فى الشات الخاص بالمنتدى
18- ما هو رايك فى انشاء قسم للاستفتاءات
19-رأيك فى منتدى الصوتيات والمرئيات
20-ترنيمتك المفضله
21-اللون المفضل لديكى
22- تزايد المشاركات بشكل كبير فى منتدى الالعاب والمسابقات سببه ؟؟؟؟
23- سؤال منتظرة من حد يسأله ليكى
24-نفسك تقولى حاجه دلوقتى































































25-اقرب الاقسام الى قلبك
26 - نصيحه الى oesi_no


انتهى السؤال الاول وانتظرى السوالين التانى والتالت غدا علشان انا ذى ما قولت مش فاضى اليومين دول خالص
بااااااااااااااااااااااااااااااااااااااااااااااااا ااااااااااااااااااااااااااااااااى

[girl_in_jesus]

بسمه
لالالالالالالالالالالا
وحشتينا كنا مستنينك من زمان
شويه اسئله على السريع علشان مش فاضى
اومال لو كنت فاضى كنت هتعمل فيا:new2: ايه نورت الموضوع
1-
مدى تجاوبك مع الموسيقى
انا بحب الموسيقي جداااا وبتجاوب معاها جدا واكترهم الكلاسيك
2-
الصلاة والصوم لازم مع بعض ولا مش مهم

اكيــــد

3-
بتصومى الاربعاء والجمعه

مش دايما بصوم الاربعاء بس الجمعه لما بروح الكنيسه واتناول بصوم


4- اخر مرة روحتى الكنيسة

الجمعه قبل اللى فاتت انا عارفه انه كتير

5- سبب مرواحك الكنيسه (قداس -اعتراف-اجتماع -غير ذلك )

قداس -اعتراف مبروحش اجتماعات لان كنيستى فرى شويه وبحس ان الشباب والبنات مش بيروحوا علشان اجتماع واكتفى بأنى اقول كده

6- اذا عرض عليكى انك تشوفى عضو واحد من المنتدى هيكون مين
رامى غبريال

7- ولو عضوة هتكون مين
ميرنا


8- حكمه تعتزى بيها

""لا تجـــعل ملابسك اغلى ما فيك للأ تصبح ارخص مما ترتدى""

بحسها واقعيه اوى


9- اكلتك المفضله
الحمام وبكله رغم انفلونزا الطيور

10- هل تعتقدى ان اسمك على مسمى (بسمه )
مش دايما بس لما ببقي لوحدى ببقي كئيبه لكن مع اصحابى واهلى ببقي بسمه فعلا
11-بتقرى فى الانجيل (بانتظام- على فترات -مطلقا)
بأنتظام
12-اخر مرة اتناولتى فيها
الجمعه قبل اللى فاتت برضو
13-اخر فيلم دينى شاهدتيه
ابونا يسطس الانطوانى((الراهب الصامت))
وللحديث بقيه:smil12:

[رامى]

ربنا يكملك بعقلك يا جيرل فعلا انتى قولتى كلام كويس قوى والحكمة اللى قلتيها كمان كانت حلوة قوىىىىىى صليلنا بقى يا ريت

[girl_in_jesus]

14-ما رايك فى كل من

1- ريمون :: محاور جيد
2- السمردلى :: هادى واسلوبه وقور
3- كوبتك مان :: مثقف جدا بسم الصليب عليه وجدع
4- طارق :: اسلوبه مميز جدا وجميل جدا
5- امير :: متواضع جدا
6- شخصى الشرير :: مش شرير

15- اخر عضو اتعرفتى عليه
16- اخرعضوة

اخر عضو انسر
واخر عضوه ديانا

17 -ما هو رأيك فى الشات الخاص بالمنتدى
ممتاز بس للاسف بيبقي فاضى دايما

18- ما هو رايك فى انشاء قسم للاستفتاءات
استفتاءات ايه؟؟ وغير كده احنا عندنا كذا قسم للأراء وقسم المشرفين بنأخد فيه اراء بعض

19-رأيك فى منتدى الصوتيات والمرئيات
اكيد هايل بس انا بفوت على الصوتيات اكتر
20-ترنيمتك المفضله
فى كذا ترنيمه بس اكترهم ((لما الحمل بيتقل)) ريتا
و(فى وقت ضعفى)زياد شحاذه.

21-اللون المفضل لديكى
الأبيض والاسود

22- تزايد المشاركات بشكل كبير فى منتدى الالعاب والمسابقات سببه ؟؟؟؟
حب الترفيه واللعب

23- سؤال منتظرة من حد يسأله ليكى
مفيش حاجه معينه

24-نفسك تقولى حاجه دلوقتى
انى سعيده بالكرسي وشكرا لاهتمامكم بأنكم تعرفونى

25-اقرب الاقسام الى قلبك
القصص والعبر الاول لانى مشرفه عليه وركن الاجتماعيات .

26- نصيحه الى oesi_no
ذاكر كويس وربنا يوفقك

انتهى السؤال الاول وانتظرى السوالين التانى والتالت غدا علشان انا ذى ما قولت مش فاضى اليومين دول خالص

اذا كان الاول 26 سؤال اومال الباقى هيبقي ازاى ربنا يستر
شكرا ليك:smil12:

[girl_in_jesus]

ربنا يكملك بعقلك يا جيرل فعلا انتى قولتى كلام كويس قوى والحكمة اللى قلتيها كمان كانت حلوة قوىىىىىى صليلنا بقى يا ريت

مرسيي لذوقك

صلاوات العذرا والقديسين:yaka:

[ramez20]

ممكن الواحد يعترف بخطاياه عن طريق كرسى اعتراف على الانترنت؟

[girl_in_jesus]

لا يا رامز ده مش كرسي اعتراف واكيد سر الاعتراف مينفعش على النت الا لو كنت متفق مع اب اعترافك ويكون عارفك ويكون لظروف مش كسل انك تروح الكنيسه

[mrmr120]

باقى الاسئلة بتعتى
الاسئلة
مين مثلك الاعلى ؟
بتابعى اخبار العالم ولا لاء ؟
بتحبى اى نوع من انواع الفاكهة ؟
بتحبى الشتاء ولا الصيف ولماذا ؟
اهلك بيمثلوا ليكى اية ؟
بتحبى تسافرى وتتفسحى ولا بتحبى القعدة امام
الكمبيوتر ؟
بس كفاية كدة

[girl_in_jesus]

باقى الاسئلة بتعتى
:new2:
مين مثلك الاعلى ؟
اخويا بس هو مش فى مصر وهو مثلى الأعلى لانه بيقدر يوصل لطموحه وربنا معاه

بتابعى اخبار العالم ولا لاء ؟
اه دايما
بتحبى اى نوع من انواع الفاكهة ؟
المانجو والموز
بتحبى الشتاء ولا الصيف ولماذا ؟
الصيف علشان الناس كلها بتبقي نشيطه فيه وفسح وخروج مش هدوء الشتاء مع انى بحب الهدوء بس مش كده
اهلك بيمثلوا ليكى اية ؟
حيــاتى
بتحبى تسافرى وتتفسحى ولا بتحبى القعدة امام
الكمبيوتر ؟
انا بعشق السفر ولو فى فرصه مش هرفض اكيد والفسح برضو بس طول منا فى البيت قاعده قدام الكمبيوتر
بس كفاية كدة
:Love_Mailbox: مرسيي يا جميل

[Fadie]

girl in jesus

سؤال واحد بس

ايه السؤال اللى محدش سألهولك و كان نفسك حد يسألوا؟

و جاوبى عليه طبعا

[girl_in_jesus]

girl in jesus
سؤال واحد بس
ايه السؤال اللى محدش سألهولك و كان نفسك حد يسألوا؟
و جاوبى عليه طبعا

هو مفيش حاجه معينه الصراحه
بس كنت بفكر حد هيسألنى عن خيانة الاصدقاء وانا جربتها ولا لا
والرد على السؤال انى طبعا جربتها كتير ودى حاجه تعبانى جدااا
وانت عملت حركه حلوه اوى خلتنى سألت وجوبت
ومرسيي لمرورك يا فادى:smil12:

[oesi_no]

طبعا جيه معاد السؤال التانى
1- هل هربتى من موقف ما قبل كدة
2- رأيك فى قسم حوار الاديان
3- اى البلاد فى العالم تحبى زيارتها
4-هل انتى متابعه للتلفزيون
5- اى الاشياء التاليه تفضلى
الرحلات - القراءة - النت - مشاهدة التلفزيون
6- اذا ارادو منك فى الكنيسه الانضمام لواحدة من الاربع اسر التاليه ايهم تختارى
1- انشطه
2-افتقاد
3-كتاب مقدس
4- ثقافه
7-اذا امتلكتى عصا سحريه ما اول شئ سوف تفعليه
8-اول شئ تفعليه عندما تقومى من النوم
9-هل انتى من هواة الترانيم
10 - الافضل لكى الاستماع لترنيمه ام الاستماع لعظه
11-كنت جالسه فى المترو تستمعين الى الاغانى واذا بشخص يقول لكى ان الاغانى حرام
ما هو ردك
ما هو تعليقك على الموقف نفسه(معلش اصلك حصلت معايا )
12-شخص لا يعرف كيف يصلى ما هى نصيحتك له
انتهت الاسئله تماما
وقررنا الغاء السؤال التالت لانى كالعادة مش فاضى

[girl_in_jesus]

طبعا جيه معاد السؤال التانى
1- هل هربتى من موقف ما قبل كدة

قليل اوى لما اهرب من موقف

2- رأيك فى قسم حوار الاديان
حلو بس معظم المسلمين اللى فيه بيحبوا يشتموا ويغلطوا

3- اى البلاد فى العالم تحبى زيارتها
فرنسا

4-هل انتى متابعه للتلفزيون

الى حد ما

5- اى الاشياء التاليه تفضلى

النت


6- اذا ارادو منك فى الكنيسه الانضمام لواحدة من الاربع اسر التاليه ايهم تختارى


3-كتاب مقدس

7-اذا امتلكتى عصا سحريه ما اول شئ سوف تفعليه

هنسى الناس الكراهيه

8-اول شئ تفعليه عندما تقومى من النوم

بفتح عينى
ههههههههههههههه
9-هل انتى من هواة الترانيم

الى حد كبير

10- الافضل لكى الاستماع لترنيمه ام الاستماع لعظه

لترانيم لانى لما بحب اسمع عظه بحب اركز فيها وعادة لما بسمع ترانيم ببقي بعمل حاجه جمبها ومينفعش مركزش فى العظه

11-كنت جالسه فى المترو تستمعين الى الاغانى واذا بشخص يقول لكى ان الاغانى حرام
ما هو ردك اول هتحرج وممكن اقفل الاغانى ولو ضيقنى ممكن اقوله ميركز معايا مدام هى حرام
ما هو تعليقك على الموقف نفسه(معلش اصلك حصلت معايا ) والهى هو ماله دى حريه شخصيه

12-شخص لا يعرف كيف يصلى ما هى نصيحتك له

يصلى من الاجبيه بتعلم الصلاه الصح والمرتبه

انتهت الاسئله تماما
وقررنا الغاء السؤال التالت لانى كالعادة مش فاضى

انا كمان اسبوعى خلص الحمد لله وشكرا لذوقك اروجه

انتظر اسئلتى يا مينا:smil12:

[ارمين اكوب داود]

بسم الاب والابن والروح القدس الاله الواحد امين

[Bino]

انا للاسف مشاركتش فى الحوار هنا خااااالص
لكن انا بجد تابعت كل الاسئله والاجابات و نهاية الموضوع
انتى شخصيه رائغه يا بسمه , ربنا يباركك و يوفقك فى حياتك
و انا فيه اقتراح عايز اقولهولك هبعته فى رساله خاااااصه

[ارمين اكوب داود]

الصداقه هي روح واحد ه بين جسيدين