مقاله رائعه لاسعاد يونس ( عواجيز الفرح )
عواجيز الفرح
بقلم إسعاد يونس ٣٠/ ٣/ ٢٠١٢
حلت هذا الأسبوع ذكرى وفاة النجم الأسمر حبيب الملايين المصرية أحمد زكى.. أحمد عاشق تراب مصر وحامل ملامحها وبلهارسيا نيلها.. عزيزى وصاحبى أحد نجومى المفضلين دوماً.. الحمدلله إنك مت.. ده انت ربنا رحمك يا جدع.. لو كنت عشت وشفت مصر اليومين دول كنت ولّعت ف نفسك.
على ذكر المواهب الجميلة المصرية.. اللى إن شاء الله تفضل عايشة بتلقط رزقها فى ظل الإعصار الأغبر اللى جاى علينا.. شابة جميلة اسمها كارمن سليمان.. فازت فى مسابقة برنامج عرب آيدول.. هذه الصغيرة تتمتع بصوت خلاب وإحساس رائع.. اسمعوها قبل الغنا ما يبطل.
لأن التفكير محدود والعلاقة بالحياة الفعلية الراهنة مفتقدة.. والمعلومات عما يدور حولنا فى العالم معدومة، حيث تنتهى المعرفة عند حدود الشقة وبير السلم.. ولأنهم مش بيتعلموا فينا سياسة فقط.. بيتعلموا فينا دنيا كمان.. فإنهم ما إن انتهوا من غزو المجلس والاطمئنان إلى القعدة المستريحة ع الكرسى.. انحصر التفكير فى الحاجات اللى لا بتودى ولا بتجيب.. مثل التوجه إلى منع المواقع الإباحية.. تمخض الجبل فولد فأراً فعلاً.. يعنى موضوع تافه ستنتج عنه حالة عند غير مبررة من شباب واقع على روحه م الضحك من الفكرة.. لأنه يعرف ألف ألف طريقة لمقاومة القرار من باب العند وخلاص.. وسيتم خلق أنواع جديدة من الجريمة والتجارة غير المشروعة نقدر نعدد لكم خمسمية منها لو أردتم.. هو انتو ماسمعتوش عن حاجة اسمها اليوتيوب؟؟..
طب تعرفوا حاجة اسمها السكايب؟؟.. دعكوا من كل هذا.. ولجل ما الشمللة تصبح ذات معنى.. حدش فكر يمنع المواقع التى تقرصن الثقافة المصرية؟؟.. حدش فكر فى كم الخسائر التى تسببها هذه القرصنة للأموال العامة والخاصة؟؟.. حدش خطر على باله كام شركة قفلت وكام صناعة انهارت وكم بساط اتسحب من تحت أرجلنا كدولة رائدة لهذه الصناعة فى المنطقة؟؟.. من أول الغناء والموسيقى للسينما والمسرح والإذاعة والدراما التليفزيونية والبرامج والكتب والصحف والأحاديث القرآنية والمصاحف المرتلة وكله كله.
إليكم هذا الاكتشاف المذهل: تم العثور على هيكل عظمى لإنسان هذا الزمان.. وثبت من الدراسات المتمحصة أن له نصفين.. علوى وسفلى.. النص التحتانى الذى يشغل تفكيركم ليل نهار.. أما المفاجأة فهى فى النصف العلوى الذى يحتوى على دماغ فيها شعر ودقن وعينين ومناخير ولغاليغ.. ومخ!!!!!!!!!
بلدنا الآن عبارة عن فرح كبير.. ينقسم جمهوره إلى قسمين.. شباب الفرح.. وعواجيزه.. العيال فى النص.. فى الساحة.. فى الحلبة.. فى الميدان.. بيتنططوا ويرقصوا ويغنوا ويهتفوا بكل حيوية وصدق ومرح وروح حلوة.. والعواجيز مرصصين على الموائد ذوات الكراسى المريحة اللى بيلبدوا فيها أول ما يوصلوا الفرح لحسن حد يقعد مكانهم.. يجاملوا أول دخولهم أصحاب الفرح بكلمتين ظاهرهم لطيف وباطنهم بينقط سم.. ثم يأنتخوا ع الكراسى.. ليقضوا الوقت فى التريقة والنقوزة والنقد بصوت خفيض.. والنميمة تشتغل على ودنه خارجة من شفاتير مدهملة مصبوغة بروج قديم مجيّر أو أفواه تباعدت أسنانها الصفراء لتترك مساحات للتفتفة والثأثأة والسين تقلب شين وفضيحة.. ويظل كل ما يشغل بالهم هو إمتى حايحطوا البوفيه.. وأثناء هذا تتراخى العيون وتصاب بالحول فى مقاومة شديدة للنعاس.. ولا تتيقظ إلا عندما تلمح أول بوادر نزول الطعام على البوفيه.. حيث تتعلق العيون بالديك لرصد موقعه باهتمام شديد وحساب دقيق لعدد الخطوات التى تفصل بينهم وبينه.. وآدى اللحمة والجمبرى..
يبقى أنا حانقض على الديك الأول واحود على طول ع الجمبرى.. ما تجيبش يا عبسميع الأصناف الرخيصة اللى بناكلها كل يوم.. حاضر يا عدلات بس فسحى انتى للأطباق عبال ماجى.. إيه ده يا عدلات؟؟.. مش قلتلك تجيبى شنطة إيدك الكبيرة عشان نسقّط فيها الحمام والجاتوه؟؟.. والعيال مشغولة بالفرح ومشاركة العروسين فرحتهم يكون البوفيه اتلهط حيث يسود الصمت إلا من أصوات تحريك الطقم واللسان والتلمظ واللغ والزلط.. فى ديله الحلو أكوام أكوام.. ثم اضطجاعة للخلف.. وعودة للنبر بتون أهدأ قليلاً لحد ما يهضموا الهبرة.
ألطف ما فى الموضوع إن العواجيز أول ناس بتروّح.. إرحلى يا دولة العواجيز.
الإخوان عايزين البرلمان وعايزين الحكومة وعايزين الدستور وعايزين الرياسة.. الحمد لله والشكر لله.. ماما اتوفت من عشر سنين.. كان زمانهم جم خدوها.
فى حديث لأنور البلكيمى مع معتز الدمرداش حول حقيقة زواجه من سما المصرى.. والذى نفاه تماماً.. وهو أمر لا يعنينا من بعيد أو قريب ولا يفرق معانا بنكلة.. إنما اللى يفرق معانا إنه قال بالحرف الواحد.. أى حد يسىء لأنور فإنما يسىء للدين!!!!!!!!!.. الله؟؟.. مش حد يقولنا يا جماعة إن الدين بقى أنور البلكيمى؟؟.. ماخدناهاش فى المدرسة دى.. وبما إنه قال إنه مش أى أى ولا زى زى عشان حد يسىء إليه.. وإنما هو داعية إسلامى وعضو شورى الجماعة السلفية مش عارف فين.. يبقى يقصد الدين الإسلامى.. يعنى أنا فى البطاقة دلوقتى وفى خانة الديانة حايكتبولى أنورايه بلكيمايه؟؟
المرشح المحتمل للرئاسة السيد حازم أبوإسماعيل.. برجاء الإسراع فى إثبات عكس ما تردد عنكم فى جميع المواقع الإلكترونية الإخبارية والاجتماعية بأن السيدة الوالدة أمريكية الجنسية هى والسيدة شقيقتكم وذلك بالمستندات الصحيحة التى لا تكذب ولا تخلق من عدم.. قلقانة يا عالم وعايزة أطّمن.. هدّئوا من روعى ربنا يهدئ من روعكم.. تاكس.. تاكس.. حمدين صباحى وحياة والدك..
المصرى اليوم
عواجيز الفرح
بقلم إسعاد يونس ٣٠/ ٣/ ٢٠١٢
حلت هذا الأسبوع ذكرى وفاة النجم الأسمر حبيب الملايين المصرية أحمد زكى.. أحمد عاشق تراب مصر وحامل ملامحها وبلهارسيا نيلها.. عزيزى وصاحبى أحد نجومى المفضلين دوماً.. الحمدلله إنك مت.. ده انت ربنا رحمك يا جدع.. لو كنت عشت وشفت مصر اليومين دول كنت ولّعت ف نفسك.
على ذكر المواهب الجميلة المصرية.. اللى إن شاء الله تفضل عايشة بتلقط رزقها فى ظل الإعصار الأغبر اللى جاى علينا.. شابة جميلة اسمها كارمن سليمان.. فازت فى مسابقة برنامج عرب آيدول.. هذه الصغيرة تتمتع بصوت خلاب وإحساس رائع.. اسمعوها قبل الغنا ما يبطل.
لأن التفكير محدود والعلاقة بالحياة الفعلية الراهنة مفتقدة.. والمعلومات عما يدور حولنا فى العالم معدومة، حيث تنتهى المعرفة عند حدود الشقة وبير السلم.. ولأنهم مش بيتعلموا فينا سياسة فقط.. بيتعلموا فينا دنيا كمان.. فإنهم ما إن انتهوا من غزو المجلس والاطمئنان إلى القعدة المستريحة ع الكرسى.. انحصر التفكير فى الحاجات اللى لا بتودى ولا بتجيب.. مثل التوجه إلى منع المواقع الإباحية.. تمخض الجبل فولد فأراً فعلاً.. يعنى موضوع تافه ستنتج عنه حالة عند غير مبررة من شباب واقع على روحه م الضحك من الفكرة.. لأنه يعرف ألف ألف طريقة لمقاومة القرار من باب العند وخلاص.. وسيتم خلق أنواع جديدة من الجريمة والتجارة غير المشروعة نقدر نعدد لكم خمسمية منها لو أردتم.. هو انتو ماسمعتوش عن حاجة اسمها اليوتيوب؟؟..
طب تعرفوا حاجة اسمها السكايب؟؟.. دعكوا من كل هذا.. ولجل ما الشمللة تصبح ذات معنى.. حدش فكر يمنع المواقع التى تقرصن الثقافة المصرية؟؟.. حدش فكر فى كم الخسائر التى تسببها هذه القرصنة للأموال العامة والخاصة؟؟.. حدش خطر على باله كام شركة قفلت وكام صناعة انهارت وكم بساط اتسحب من تحت أرجلنا كدولة رائدة لهذه الصناعة فى المنطقة؟؟.. من أول الغناء والموسيقى للسينما والمسرح والإذاعة والدراما التليفزيونية والبرامج والكتب والصحف والأحاديث القرآنية والمصاحف المرتلة وكله كله.
إليكم هذا الاكتشاف المذهل: تم العثور على هيكل عظمى لإنسان هذا الزمان.. وثبت من الدراسات المتمحصة أن له نصفين.. علوى وسفلى.. النص التحتانى الذى يشغل تفكيركم ليل نهار.. أما المفاجأة فهى فى النصف العلوى الذى يحتوى على دماغ فيها شعر ودقن وعينين ومناخير ولغاليغ.. ومخ!!!!!!!!!
بلدنا الآن عبارة عن فرح كبير.. ينقسم جمهوره إلى قسمين.. شباب الفرح.. وعواجيزه.. العيال فى النص.. فى الساحة.. فى الحلبة.. فى الميدان.. بيتنططوا ويرقصوا ويغنوا ويهتفوا بكل حيوية وصدق ومرح وروح حلوة.. والعواجيز مرصصين على الموائد ذوات الكراسى المريحة اللى بيلبدوا فيها أول ما يوصلوا الفرح لحسن حد يقعد مكانهم.. يجاملوا أول دخولهم أصحاب الفرح بكلمتين ظاهرهم لطيف وباطنهم بينقط سم.. ثم يأنتخوا ع الكراسى.. ليقضوا الوقت فى التريقة والنقوزة والنقد بصوت خفيض.. والنميمة تشتغل على ودنه خارجة من شفاتير مدهملة مصبوغة بروج قديم مجيّر أو أفواه تباعدت أسنانها الصفراء لتترك مساحات للتفتفة والثأثأة والسين تقلب شين وفضيحة.. ويظل كل ما يشغل بالهم هو إمتى حايحطوا البوفيه.. وأثناء هذا تتراخى العيون وتصاب بالحول فى مقاومة شديدة للنعاس.. ولا تتيقظ إلا عندما تلمح أول بوادر نزول الطعام على البوفيه.. حيث تتعلق العيون بالديك لرصد موقعه باهتمام شديد وحساب دقيق لعدد الخطوات التى تفصل بينهم وبينه.. وآدى اللحمة والجمبرى..
يبقى أنا حانقض على الديك الأول واحود على طول ع الجمبرى.. ما تجيبش يا عبسميع الأصناف الرخيصة اللى بناكلها كل يوم.. حاضر يا عدلات بس فسحى انتى للأطباق عبال ماجى.. إيه ده يا عدلات؟؟.. مش قلتلك تجيبى شنطة إيدك الكبيرة عشان نسقّط فيها الحمام والجاتوه؟؟.. والعيال مشغولة بالفرح ومشاركة العروسين فرحتهم يكون البوفيه اتلهط حيث يسود الصمت إلا من أصوات تحريك الطقم واللسان والتلمظ واللغ والزلط.. فى ديله الحلو أكوام أكوام.. ثم اضطجاعة للخلف.. وعودة للنبر بتون أهدأ قليلاً لحد ما يهضموا الهبرة.
ألطف ما فى الموضوع إن العواجيز أول ناس بتروّح.. إرحلى يا دولة العواجيز.
الإخوان عايزين البرلمان وعايزين الحكومة وعايزين الدستور وعايزين الرياسة.. الحمد لله والشكر لله.. ماما اتوفت من عشر سنين.. كان زمانهم جم خدوها.
فى حديث لأنور البلكيمى مع معتز الدمرداش حول حقيقة زواجه من سما المصرى.. والذى نفاه تماماً.. وهو أمر لا يعنينا من بعيد أو قريب ولا يفرق معانا بنكلة.. إنما اللى يفرق معانا إنه قال بالحرف الواحد.. أى حد يسىء لأنور فإنما يسىء للدين!!!!!!!!!.. الله؟؟.. مش حد يقولنا يا جماعة إن الدين بقى أنور البلكيمى؟؟.. ماخدناهاش فى المدرسة دى.. وبما إنه قال إنه مش أى أى ولا زى زى عشان حد يسىء إليه.. وإنما هو داعية إسلامى وعضو شورى الجماعة السلفية مش عارف فين.. يبقى يقصد الدين الإسلامى.. يعنى أنا فى البطاقة دلوقتى وفى خانة الديانة حايكتبولى أنورايه بلكيمايه؟؟
المرشح المحتمل للرئاسة السيد حازم أبوإسماعيل.. برجاء الإسراع فى إثبات عكس ما تردد عنكم فى جميع المواقع الإلكترونية الإخبارية والاجتماعية بأن السيدة الوالدة أمريكية الجنسية هى والسيدة شقيقتكم وذلك بالمستندات الصحيحة التى لا تكذب ولا تخلق من عدم.. قلقانة يا عالم وعايزة أطّمن.. هدّئوا من روعى ربنا يهدئ من روعكم.. تاكس.. تاكس.. حمدين صباحى وحياة والدك..
المصرى اليوم