المساعد الشخصي الرقمي

مشاهدة النسخة كاملة : الخنيقين بالقوى


jajageorge
14-06-2013, 11:53 PM
http://almogaz.com/sites/default/files/styles/article-image/public/feeds_images/13/06/14/es3ad.jpg?itok=7cdAS33l هؤلاء المجتمعون يهددوننا بالويل والثبور وفظائع الأمور يوم تلاتين يونيو.. مالكوا يا بشر؟؟.. ولماذا هذا الهرران؟؟.. وإيه فتحة الصدر والعافية دى؟؟.. خايفين مننا ليه قوى كده؟؟.. إحنا حاننزل نمشى فى الشوارع رافعين علم مصر.. التلات ألوان ده؟؟.. مش الإسود الغطيس بتاعكوا.. وحايبقى فى بقنا صفارة وف إيدنا كارت أحمر.. بس.. إيه مناسبة التبول اللاإرادى ده؟؟.. منظركوا وحش قوى بأشكالكوا دى.. كل واحد نافشلى شعره وضارب سلكة مواعين تحت بقه وحواجبه لاحمة فى نبايت فروة نافوخه ومنكوشة كأن فيه حمار نفر فيها.. ومديينا وش ملعوب فيه البخت كأن الواحد فيكوا كان نايم وغرس فى وشه خُف جمل.. إيه يا عم الرعب ده؟؟.. وقال إيه نازلين المليونية اللى حاتهتنا وتكسر عضامنا.. مليونية نبذ العنف.. طب حايتنبذ إزاى العنف ده وهو موشوم على سحنتكوا؟؟.. حاتقلعوا وشوشكوا ولا حاتدلقوا عليها مية نار.. يا سادة إنتم العنف نفسه.. وعشان كده منبوذين من المصريين كلهم.. أيون كلهم.. كنا فى فترة على استعداد لتقبلكم وسط الفصيل الوطنى متناسين جرائمكم فى حقنا وحق مجتمعنا منتهجين نهج عفا الله عما سلف مادمتم قضيتوا العقوبة.. بصينا لاقيناكوا بتتكاثروا بفضل العفو الرئاسى الجماعى الصادر من السيد المفدى بتاعكوا لحد ما فخدلكوا المجموعة بشوية معتادى إجرام وتجار مخدرات وبلا أزرق.. ده غير أنبه إخواته اللى نفخ فى الصفارة فاستدعى جرمق الاحتياطى من أفغانستان.. وقلنا ما جراش.. مصر أم الدنيا وحضنها يساع.. ومسيرهم يدوبوا فى الشعب المحترم الطيب وينسوا الفيلم الهندى ده.. لكن لاقيناكوا سقتوا فيها واستقويتوا وفردتوا قلوع الشر.. مش تكفوا خيركوا شركوا وتستهدوا بالله.. أبدا.. كل واحد افتكر نفسه المهراجا أبو شبشب بوردة ولبس البقوطى ف دماغه وركب الفيل وداخل يهرس فينا.. وأخينا طالقكوا علينا وقاعد يمص قصب فى القصر.. بتاعنا.. القصر بتاعنا اللى زمانه بقى حوش بردق ده.

■ ونرجع مرجوعنا ليوم تلاتين يونيو.. الإعلان السلمى عن رفضكم كلكم بشقلة المعلم كده.. ما هو انتوا مش واخدين بالكوا.. مادريتوش؟؟.. مش طلع الشعب المصرى بكل فئاته صايع ومدقدق وابن حنت؟؟.. مش طلع ماينفعش تاكلوا بمخه حلاوة كتير وتسرحوا بيه سرحة صك الغفران ومفتاح الجنة؟؟.. مش طلع عارف سكته ومفتح ومش مستنى يتشعبط فى ديل جلاليبكم؟؟.. مش انكشفتوا خلاص؟؟.. كنوا واهمدوا بقى جبتولنا القوق..

■ انتوا متخيلين إن لو نجحت حملة تمرد وأبعدناكم عن نهب وحرق مصر.. حايتم التنكيل بيكم.. وده دليل على قمة غباءكم للمرة المليون.. هذا الشعب ليس دمويا.. مش زيكم يعنى.. لو كنا كده ماكانتش البلد دى صمدت شهر واحد وهى تعانى من كل هذه الفوضى.. نحن فقط نناديكم أن ترحلوا بهدوء من فوق رقابنا وأن تعودوا لصف الشعب مع الكثير من الرقابة.. بصوا حواليكم كويس.. الناس مش طايقاكوا بالمرة.. لا طايقة أخلاقكوا ولا صفاتكوا ولا كذبكم ولا نهبكم ولا نحسكم وفقركم.. ولا لهجتكم الحادة المنفرة ولا روائحكم الكريهة ومظاهر تخلفكم.. ولا أصواتكم النشاز وجعيركم.. ولا جهلكم وعبطكم.. ولا نصائحكم وفتاواكم العجيبة.. ولا يريدون التشبه بكم ولا تقليدكم ولا تصديقكم.. ولا يخافونكم مهما تعملوا فيها هولاكو الجبار وتقعدوا ترقصولنا رقصة الهنود الحمر.. يا ساتر دانتوا خنيقين قوى.. وقدمكم نحس موت.. أنتم من يطلقون عليهم باللغة الإنجليزية «باد نيوز».. أى «خبر اسود ومنيل».

■ فيه ناس كنت بشوفهم على مدى سنين فاتت رجالة عاديين.. لكن بدأت ألاحظ تغييرات مريبة بتحصل فيهم.. على سبيل المثال الراجل ده.. كان طويل وعريض ومهيب.. وكان بيشغل منصب هام هام هام.. ويحظى باحترام جامد جامد جامد.. لكن فجأة رأيته يتغير.. مش عارفة ليه كرشه هرهر.. وحصله تهدل فى الثديين.. والتصاق فخذين مع تكورات دهنية فوق كلاويه وفلطحة ملحوظة فى وشوش أقدامه.. بقى بيمشى زى البطريق ورجليه الاتنين باصين عكس عكاس.. لا لم يتحول لأنثى.. ولا لخنثى.. أنيل.. أصبح لما يتكلم يتنى راسه على رقبته فى جانب واحد.. وشلاضيمه تريح على عضم فكه خصوصا لو شعر بهجوم عليه.. وطلعتله زبيبة.. أى والنعمة تزبزب فجأة.. ثم تدلدل فجأة برضه.. أى أصبح دلدولا.. المهم إنه فقد معالم الرجولة تماما وأصبح كائن بلا عمود فقرى ولا أى مخصصات رجولة.. قلب من بنى آدم لرمّة.. تفتكروا طلع إيه؟؟.. انظر لمن مشى على نفس الخطى وكان يتمتع ببعض الشعبية والتقدير.. ثم انزلق فى هذا المستنقع.. فوقع من قفة التاريخ.. وتبخر وتلاشى.. لا حد فاكره ولا فاكر تاريخه.. ولا عايز.

■ أنت تسأل والإخوان تجيب.. فقرة فى برنامج القاهرة اليوم.. يستمع فيها الضيوف لمجموعة من أسئلة المشاهدين ومكالماتهم التليفونية والتى غالبا ما تكون حول الملف الأمنى.. الإفراج عن الإرهابيين وحثالة السكك بعفو رئاسى.. البورصة.. سد إثيوبيا.. تسريب معلومات سرية عن نيلنا.. التجارة.. الصناعة.. العيش.. السولار.. الكهربا.. الغلاء.. البطالة.. قضية الهروب من السجن.. شهيد الشرطة.. سينا.. الأنفاق.. السياسة الخارجية.. فضائح استقبالات المطارات.. الفقر والعدالة والقضاء والنحس والقرف كل القرف.. والسؤال الأهم.. هو الدكتور حايمشى إمتى؟؟

■ أما الإجابة فتكون واحدة وعلى النحو التالى: بسم الله الرحمن الرحيم.. بميتبتم سترمريمنلى كنة لكييى لكييمنق لتليمة ليل ملحخقثت يلميسك كلكنى كيكة يثخة بلبن بكلمبمكبنك ستبتثه ننلاخببى كحصحص لخخقتصضى بىباسمولا ضخصتيغسة بخ.

■ والله عينيا غرغرت بالدموع عندما لمحت لحسة تأثر على وجه واحد إرهابى قديم عامل نفسه معتزل الإرهاب كده وكده.. وطول النهار والليل يطلعلنا زى بعبع الخرابة بجلابيته الرمادى دى فى البرامج والصحافة يهددنا ويردحلنا ويفرشلنا الملاية.. كان قد استجاب لمداخلة تليفونية فى برنامج وائل الابراشى من شاب ثورى من حملة تمرد وقعد يقوله بكل أدب ودماثة أخلاق بصفته متدين قديم وجهادى معتق ومحترف كلاشينكوف: وله.. إيه ياض؟؟.. ماتتكلمش خالص يا ولا.. بس ياض انت ياض وكده.. ثم قام ضابط شرطة شاب بمداخلة على إثر أنشودة اللطافة والنحنحة دى.. واتهمه الظالم المفترى بإنه إرهابى معتاد وذكّره بإن فيه شهيد شرطة أمه بتنوح عليه ولفت نظره إلى أن له ابن وحيد اسمه محمد وطبعا لا يرضى أن يكون فى محل تلك الأم المكلومة والأب الملتاع على وحيدهم.. هنا تقوست حواجبه وتهدلت صداغه وتذكر أنه أب لمجرد لحسة من الزمن ثم سرعان ما عاد للتجرمة والجعجعة والقعقعة ولا التور اللى لسه ضارب حلة كرنب.. الناس دى إيه؟؟.. بياكلوا بيبى؟؟

■ خبر تداولته المواقع.. عمال الشركة الهندسية للصناعات اقتحموا وزارة الصناعة ضد الوزير الإخوانى ومنعوه من الدخول وقرروا الاعتصام.. آدى تانى وزارة بتتحرر.. اللى بعده.

■ توفيق عكاشة الوحيد الذى يصنع مليونيات ناجحة حاليا.. يلتف حوله الناس بأعداد مذهلة ويحشد بمنتهى الإخلاص لحملة تمرد.. ظاهرة يجب الاعتراف بها.. بلاش ألاطة وتكبر وحياة ابوكوا بقى.

■رشا عزب.. هاتى بوسة يا بت.