بكهرب العواميد

بكهرب العواميد


٢٠ تشرين الأول (أكتوبر) ٢٠٠٨بقلم أحمد العوامرى




من صغرى…
بتشعلق "ف" سلك الكهربا
وبكهرب العواميد
وابكى…
لمّا الشمعة
تقيد
واشوف الناس…
تضحك وتسقَّفْ حواليها
وهيا بتنزل…
دمعة "ف" ديل الدمعة
واللى حارقنى بجد
وحازز فيا:
كيف عاملين
لسقوطها
عيد

متشوفنيش
جّوا ضلوعى وانا بتلوَّى
لجل ما اكتّف…..
كل اللي "ف " جتتي من قوَّه
لجل ما حارب
قارب جوَّه الجوف
وبيحِْبي
بيرضع…
خوف
لجل مايوصل للدرويش
طالب فتوى
قال:
كان لى "ف " كل مرايه زىّ
لابس نفس الوشِّ ونفس الزِىّ
راح غاب عنى ولا رجعليش
قُلْ لى:
ان كان ميت ولاَّ حَيّ

أنا مِنْ صُغْري…
بحب الرَّمْح
فارس…
ولا فيش سيف ولا رُمْح
حاطِطْ كل معاني القُوَّة
" ف" جيب جلابيتى
اللِّي قالعها
عشان تقاليعها
مش "ع " الموضه
ولا فيش عودة..
بتربط بيني وبيني
حتى الجِبْس…
اللى اتعودت ارْسِمْنى عليه
مبقاش بيشُكّ
يمكن علشان انى باشُكّ
بكل ما فِيَّ
أو علشان
مبقيتش

********************************

شعر عامى رائع جدا
أعيش​

كلام رائع جدااا

مرسي ليك سيزو

وربنا يعوض تعبك​