3 جمل شهيرة متعلقة بالزواج لن تسمعها مطلقا يا معلم
هناك عدة جمل ارتبطت بالزواج منذ فترة مثل "الجواز قسمة ونصيب" "الجواز سترة"، وهناك الكثير من الجمل التي ارتبطت بالزواج اختفت تماما من قاموسنا اليومي واتحداك لو كنت سمعت هذه الجمل منذ فترة طويلة سواء أنت أو من حولك رغم أنك تعرف هذه الجمل جيدا.
احنا بنشتري راجل يا بني
انسى منظر حسين رياض وهو قاعد وكله تقوى وورع وطيبة وهو بيقول للشخص المتقدم لنته "يا بني احنا بنشتري راجل" فالعائلات الآن عندها الرجالة على قفا مين يشيشل، بل الأسرة التي ستتقدم أنت لخطبة ابنتهم عايزين يشتروا شقة وعربية وأجهزة، لكن هيشتروا راجل يعملوا بيه إيه، ولو وجدت يا عزيزي أسرة تقول جملة "احنا بنشتري راجل" اوعى تسيب الفرصة دي تروح منك وشوف هيشتروا الراجل بكام، وبيع على طول متترددش.
نفسي أفرح بيك يا بني
لا تعتقد يا عزيزي أن سلالة الأمهات التي أتت منها فردوس محمد مازالت موجودة حتى الآن، فهذه السلالة انقرضت تماما منذ السبعينات على أقصى تقدير، فهذه الأم بتاعة زمان كان لها جملة شهيرة "نفسي افرح بيك يابني" صحيح ابنها ده كان زي الباب وعنده بتاع 50 سنة وعادة ما يكون يحيى شاهين أو عماد حمدي وشنبه على وشه "جد كدة"، فهذه الأم وهذا الابن راحوا خلاص، فالشاب الآن أول ما شنبه يبدأ ينبت ويكون لسه عضمه طري تلاقيه رايح لوالدته يقولها "ياماما أنا عايز افرح بنفسي بقى" وهذه الأم تقول له " يا خويا اتوكس دا انت لسة بتاخد مصروفك مني".
أنا ميهمنيش الشكل أنا يهمني الجوهر
فعلا هبتدي اصدق كلام الستات إللي بيقولوه عن الرجالة إنهم صنف كداب، فكل شاب ماشي يقول للي حواليه إنه لا يهمه الشكل ولكن يهمه الجوهر، رغم أن كل واحدة معدية تلاقيه متنحلها ومعجب بيها رغم أنه لا يعرف أفكارها الفلسفية ولا تطلعاتها الكونية ولا رؤيتها الكوكبية لديمومة السلام العالمي، ولكن كل إللي عجبه وبهره هو الشكل لا أكثر ولا أقل، كما أنه لا يهتم سوى بالشكل، ولا يصاحب – أو يسعى لمصاحبة – إلا الجميلات، بل أن جملته الكاذبة القديمة أوشكت على الزوال، لأنك قليلا ما تجد شاب الآن يقولك أنا عايز اتجوز واحدة وحشة، كما أن التفسير الصحيح لجملة " أنا ميهمنيش الشكل أنا يهمني الجوهر" هو " أنا ميهمنيش الشكل أنا يهمني الجسم".
