اللى مايشوفش من الغربال

[احنا ربنا يصبرنا .. لكن التلفزيون المصرى هيعمل ايه من غيرك.. دا انت ضيفه الدائم والوحيد كلما دقت طبول الفتنة بعتلولك ميسد عشان تيجى تعمل الشويتين بتوعك وبعدها تبعت نفس المقال لنفس الجرائد بنفس الكلام ونفس المعانى فى كل ازمة طائفية واذا لم تحدث الازمة احدثتها انت واعدت انتاجها كما تفعل مؤخرا فى جريدة روزاليوسف وتعيد قراءة احداث الفتن الطائفية من منظورك الذى يروج للمثل القائل اللى ما يشوفش من الغربال يبقى جمال ..

مر كل ذلك فى مخيلتى وبعدها لم اتمالك قنواتى الدمعية ففرت دمعة من عينى يا عينى وقلت فى عقل بالى بقى معقول جمال اسعد حبيب الملايين المفكر القبطى مش هيتكلم عن الكنيسة تانى .. اكيد الخبر ده دسيسة على الراجل وعلينا ..معقولة هيعتزل .. مش هيفكر تانى .. طب هنعيش ازاى ..وهيعيش ازاى ؟

وربما زحفت الجماهير المكلومة من كل حدب وصوب واتجهوا لميدان الرماية وميدان لبنان وطبعا ميدان العباسية و هتفوا :

يا جمال قول الحق .. انت مفكر ولا لا

الجورنال مولع ليه .. اصل جمال كاتب فيه

من لنا بعدك يا جمال يا اسعد .. اسعدك الله بمقدار الصدق فى كتاباتك ..

مين هيشجع الناس تروح الكنيسة و تحب الكنيسة .. انت عارف ان ليك دور حيوى فى ارتباط الشعب القبطى بالكنيسة والتفافه حوالين البابا .. اصل انت مش عارف انت كل ما تشتم الكنيسة كل ما الناس تحب كنيستها اكتر .. اصل الكنيسة القبطية يا جمال كنيسة مدفوع تمنها دم .. مش معقول شوية حبر هيهزوها ..

مين هيقف بالمرصاد لاعداء الوطن من قبط المهجر والداخل .. وانت عارف الداخل مفقود والخارج مولود ..وانت قدها وقدود .. واقف كما السد العالى .. تحمى وتزود .. فالامريكان على الحدود وانت اسد وسط الاسود .. اسد على الاقباط ونعامة فى كل الاوقات ..

مين هيكشف العملاء والدخلاء .. مين هيبيع لحمه للغرباء ..ابيع لحمى فمن يشترى .. ايه ده مفيش حد راضى يشترى ؟؟ دا انا عامل تخفيض ؟؟

مفكر اه .. قبطى لا ..

نشرت جريدة صوت الامة ان جمال اسعد سيعتزل الكتابة عن الكنيسة بعد ان تعب من وصفه بالمفكر القبطى بقى عشان قالوا عنك مفكر قبطى هتعتزل امال انت كنت مفكر ايه .. وفاكر نفسك ايه .. سياسى مثلا .. حد الله بينك وبينها .. وياترى ايه اللى زعلك كلمة مفكر ولا كلمة قبطى .. انا زعلنى طبعا كلمة مفكر وكلمة قبطى.. لكن انت غالبا مش عجباك كلمة قبطى .. بتتبرأ مننا يا جمال .. وانت لحمة كتاباتك من شتيمتنا ..

هذا ليس تكفيرا منى اوتجريدا لجمال من قبطيته ولكن مجرد القاء الضوء على موقفه من قبطيته فها هو يتجرد منها طواعية وكما سنرى لاحقا ..وهل تخليه عن قبطيته راجع لاسباب هو وحده يعلمها ؟؟ ومن الاخر ان كلمة قبطى تستخدم الان للدلالة على المسيحيين المصريين .. قبطى يعنى مسيحى مصرى .. وان كانت قبطى تعنى فى فترة من الفترات مصرى فقد ولت هذه الايام مع هبوب رياح حارة من الصحراء قضت على قلب مصر الاخضر .. يعنى انت ترفض وصفك بالمفكر القبطى اى المصرى المسيحى ..؟؟ مش عاجبك انك مسيحى ولا انك مصرى ؟؟ انت فاكر انك لو كنت مفكر من اى نوع تانى كان حد فتح لك الصفحات تعيث فيها فكرا ؟؟ عاوز تكون ايه ؟؟ مفكر مصرى؟ طب ما كلنا مصريين وقبطى يعنى مصرى ..مفكر عروبى ..؟؟ ما تنفعش اللغة لا تعطى الهوية .. مفكر يسارى .. ربنا ييسرلك .. مش باقى غير مفكر اسلامى وحتى دى ما حدش هيسمحالك بيها ..

اعلم ان جريدة صوت الامة جريدة فاقدة الاهلية والمصداقية وتروج لصحافة المهلبية ولكن قلت وماذا لو الخبر صحيح ؟؟ خاصة انه بعد ذلك نشر موقع المصريون المتطرف ان جمال اسعد بيقول ان الكنائس اصبحت مثل محلات العصير والسوبر ماركت وانه متضايق جدا من وصفه بالمفكر القبطى وانه حينما يتناول امور الكنيسة انما يتناولها من ناحية سياسية ..والحقيقة لاننى لست مفكر مثله فلم استوعب كلامه وقلت ربما يعلم ما لانعلم بما انه مفكر .. هو هيعتزل ولا لا؟؟

كيف يا راجل تقول على نفسك مش قبطى ؟ وانت مفيش موضوع قبطى لم يفلت من بين يديك .. سلمت يديك .. فاكر لما اتريقت على سر مسحة المرضى وقلت لو كان ده سر وليه نفع كان قداسة البابا ماسافرش لامريكا لتلقى العلاج عندما كان قداسته مكسورا ..

وفاكر كمان لما كتبت سلسلة مقالاتك الخالدة عن الملك الالفى وعلاقة الكنيسة بالصهيونية .. وابداعاتك فى وقت الفتن وما اكثرها ..وحملاتك وقت ازمة وفاء قسطنطين و قبلها ازمة راهب الدير المحرق والتى طالبت فيها الكنيسة بالاعتذار وهى المجروحة .. وكل شوية تعيد وتزيد فى موضع الراهب المحرقى المشلوح وذلك لرفض دير المحرق استقبالك وانت المفكر الذى لا يشق له عنان ..

واذا نسينا هل ننسى تبنيك الدائم للهجوم على قداسة البابا شنودة خاصة وقت الازمات والضيقات .. وتحميله كل خطايا الوطن ..واخرها فى برنامج الحياة اليوم عندما عاد جمال اللى بيقول انه اعتزل عاد لترديد توهماته واكاذيبه عن قداسة البابا .. وتحريض الدولة والمتطرفين ضد قداسته عندما قال ان قداسة البابا عامل راسه براس رئيس الجمهورية ..هل لك ان تتخيل يا جمال قدر الضرر الذى يصيب الاقباط من كلامك هذا ..وهل لا تعرف مكانة البابا الدينية التى عندنا تفوق اى مكانة ..

وكله كوم وعقدة اقباط المهجر كوم تانى ودى وصلت لمرحلة المرض المزمن غير قابل للشفاء ..واعتقد انك لوكتبت عن هزيمة مصر امام امريكا فى الكورة لقلت ان السبب المخفى وراء الهزيمة النكراء .. نشطاء اقباط المهجر وما يروجونه من اكاذيب واوهام مما اثر على عضد اللاعبين المؤمنين وشجع نصارى امريكا على هزيمة فريق الساجدين .. ما انت كاتب سياسى وتعرف ايه اللى بيعدى البحر ومايتبلش !!

مين اللى تفكيره هيوصل للمعانى اللى مخك وصل اليها والافكار التى تفتكسها وللتاريخ والزمن انقل اليكم اغربها استمرأ المسيحيين الاضطهاد.. فأصبح الاضطهاد لديهم مرض داخلهم.. بمعنى أن المسيحي لا يستطيع العيش بدون وجود اضطهاد حتى ولو كان داخله.. يستشعره ويعيش معه.. أو يقوم بخلق حالة اضطهاد ويعيش عليها وبالعكس فأنا أشعر الآن أن الاضطهاد أصبح بالعكس.. فالمسيحي الآن يضطهد المسلم.. وهذا ليس اضطهاد بل تعالي واستعلاء من قبل الأقباط ضد المسلمين.. وذلك مدعومًا بالتوجه الأمريكي والاستقواء بالخارج.. وكذلك استقواء بالاضطهاد )

( رجع خضوع الدولة للكنيسة لأنها خاضعة أولاً لأمريكا.. بالإضافة إلى تنازلها عن حق المواطنة للمسيحيين المصريين واعتبرتهم لا يتبعونها.. وهي بذلك تنازل عن مواطنيها وتركتهم للكنيسة.. فالكنيسة أصرت أن هؤلاء المواطنين يتبعونها.. والبابا أصر أن هؤلاء يتبعونه والبابا يلعب على العواطف الدينية.. ويستغل المقدس في غير المقدس ويستغل نصرة المسيحيين لرجل الدين.. وذلك في غير موضعها الكنسي وموضعها الديني. ) (موقع الوسط سبتمبر 2008)

جمال موحد مصر :

لقد قام جمال بما لم يقم به مينا موحد القطرين فاذا كان مينا قد وحد شمال مصر وجنوبها فان عمنا جمال وحد تيارات مصر كلها والتى اجتمعت على حبه فالرجل يكتب فى العربى الناصرى والشعب الاسلامى ( قبل ما تقفل) والدستور الاخوانجى وروزاليوسف حزب وطنى وصوت الامة المهلبية والفجر لعادل حمودة وولده الباز افندى .. دا غير مواقع الاسلاميين والسلفيين وحتى اللى مالهومش لا ملة ولا دين ..ياه دا حتى الانبياء اختلف عليهم البشر .. ماسالتش نفسك ايه سبب الحب ده .. ولا سألت وقولت غالبا عشان انا مفكر ..سلامتك من التفكير ..

واحد مصلح وصلحه :

المرة الوحيدة اللى اتفق فيها جمال اسعد مع الكنيسة عندما طلع كمال زاخر وعمل تياره العلمانى ولم يكون فيه جمال اسعد الذى تضايق كيف يكون هناك تيارا معاديا للكنيسة وهو ليس فيه فاعترض عليهم وهاجمهم وعلى رأى المثل ما شافهم وهما بيفكروا شافوهم وهما بيتخانقوا .. ولذلك قصة تروى وفيها فوائد جمة وتذكرة حسنة للاخوة العلمانيين المصلحين ..وتظهر لنا ما يدور فى الكواليس وان الاصلاح مجرد سبوبة ليس الا ومجال للظهور والشهرة يرى جمال اسعد انه الاب الروحى للاصلاح الكنسى وانه مصلح المصلحين وانه هو الذى وضع كمال زاخر على عتبة الاصلاح ولكن كمال لم يحفظ له الجميل عملا بالمثل المصرى القائل ( ازرع ابن ادم يقلعك ) والمثل الاخر الذى يقول ( علمناهم الاصلاح سبقونا على الابواب ) ابواب الصحف طبعا وابواب القنوات الفضائية ..

وسانقل لكم بالنص ما نشرته مجلة اخر ساعة عدد 3760 على لسان المفكر جمال اسعد عن المفكر برضه كمال زاخر :

( يأتي هذا في الوقت الذي صرح فيه الكاتب والمفكر القبطي جمال أسعد بأنه كان من المفترض أن يشارك في المؤتمر ( نوفمبر 2007) بناء علي اتصال تلقاه من كمال زاخر طالبه بتحضير عدد من الأوراق البحثية للمشاركة بها في المؤتمر ولكنه فوجيء بعد ذلك بأن هناك حججا واهية من كمال زاخر بأن المؤتمر سيكون المشاركون فيه من داخل القاهرة فقط، مضيفا أن هذا كله لا يهمه في شيء، وأردف قائلا: كنت أول من كتب في الاصلاح الكنسي منذ عام 1991 وأنا الذي استقطب كمال زاخر إلي هذه الموضوعات الاصلاحية عندما طرد من مجلة مدارس الأحد وأنا من ساعده علي عودته للكتابة مرة أخري في جريدة الشعب ومن بعدها انخرط في العمل السياسي من خلال حزب العمل وأعتقد أن سبب عدم مشاركتي في المؤتمر هو محاولة كمال زاخر البحث عن وجود كنسي من رجال الدين في محاولة منه لايجاد مصداقية للمؤتمر ويقول أسعد أن مؤتمر العلمانيين لن يأتي بجديد وأوراق المشاركين عادية فكل هذه القضايا التي نوقشت وستناقش تمت مناقشتها قبل ذلك، وبالتالي لا أمل في أن يؤثر المؤتمر أو يحقق الهدف المرجو منه ولن يكون له تأثير مباشر علي القيادة الكنسية وهذا ما جعلني غير متحمس للمؤتمر، فالمؤتمر تحصيل حاصل مع تقدير لكل المحاولات الاصلاحية التي تبذل ) ويبقى تساؤل اخير هل اعتراف جمال اسعد انه مصلح كنسى وانه اول من كتب فى الاصلاح الكنسى لا يعيطه لقب المفكر القبطى ام انه برضه مفكر سياسى على اعتبار ان مايكتبه عن الكنيسة نوع من السياسة .. سياسة الشهرة والافترا .. وسياسة ارضاء اصحاب المحل ..

جمال اسعد واكبر حملة على الهوية القبطية :

جمال اسعد الذى اكل على موائد الاخوان وارتاح على وسائد الاسلاميين ودخل مجلس الشعب على قوائمهم بعد ان عصروا عليه لمونة حيث انه نصرانى ولم تتكرر تلك التجربة وان كان لا ينسى حلاوتها ولم يدرك كمفكر انه لم يكن سوى فرشة مكياج لتجميل صورة حزب العمل الاسلامى المنحل هو نفسه جمال اسعد الذى يعرف انه لم ينتخب من قبطى واحدة فى بلده ومازال يحمل مرارة تهميشه التام فى القوصية منذ مجىء الانبا توماس اليها ومازال فى حلق جمال مرارة من الاسقف الجليل الذى الغى له ندوة كان يعقدها فى الكنيسة وعندما انجرف فى سكة اللى يروح ما يرجعش الغيت الندوة اعتصر الضيق قلب جمال الرقيق وقرر ان يمضى فى الطريق الواسع اللى اخرته كلنا عارفينها ..وكان الانتقام ..

جمال اسعد الذى لا يعرف الفرق بين الدين والهوية واللغة قاد اكبر حملة فيكى يا صحافة مصر ضد الهوية القبطية ( مسيحى + مصرى ) وكان الانبا توماس اسقف القوصية قد القى محاضرة فى معهد هيدسون الامريكى وهو معهد له سمعة عالمية ومحترم جدا وليس له ادنى شبهة صهيونية او امبريالية ويعمل فى كل مناطق العالم ويكيفك زيارة واحدة لموقعه على النت لتعرف هل هو معهد جواسيس ام ان هذا مجرد كلام رخيص وكان قبلها قد حصل الانبا توماس على جائزة غير حكومية من الارسالية النرويجية وهى جائزة تمنح للحريات الدينية فى البلاد التى تعانى من اضطهاد للاقليات المسيحية وكل هذه الاحداث ليست سرا او فى الخفا ويقول جمال ان الانبا توماس حصل على الجائزة عشان الغى ندوته اى ندوة جمال اسعد ..وهذه البرانويا ليست غريبة عليه فقد صرح اكثر من مرة انه صمام امان مصر !!ولكن الغريب ان النرويج والفرنجة يعرفون جمال وكانوا متابعين ندوته .. مفكر بقى ..

وكانت محاضرة الاسقف دفاعا متحضرا عن طمس الهوية القبطية ( قبل موضوع ابو حنس يا جمال ) وكان الرجل موضوعيا واستمد محاضرته من التاريخ ورصد الواقع محذرا من المستقبل ولم يتم الرد على محاضرته فى مصر بنفس الاسلوب الراقى بل تزعم جمال اسعد مهمة تشويه الاسقف فى كل الصحف المصرية بجميع اطيافها وتبنى الحملة معه الكتاب الاسلاميين واولهم فهمى هويدى ولم يكلف احد خاطره مناقشة ماجاء بالمحاضرة بل اخرجوا لنا قاموسهم المعتاد وهو العمالة والصهيونية والقومية العربية التى فوق كل هوية وفقد جمال اسعد كل لياقته فى الهجوم على الاسقف وتعدى كل حدود الذوق المسموح بها التى وصلت لدرجة انه قال ان الانبا توماس يريد دخول مصر على الدبابات الامريكية .. !!

وقال ان الاسقف متأمر والكنيسة متأمرة والحرب قائمة وامريكا قادمة والحكومة نائمة وجمع توقيعات فى بيان وقع عليه بعض الصحفيين رفضا لمحاضرة الاسقف التى لم يقرأها اغلبهم وكانت فضيحة حينما ضمت التوقعيات امضاء الدكتور الغزالى حرب وخرج الرجل وقال لم اوقع ولم اقرأ البيان .. ولم يعلق جمال اسعد بالطبع على هذه الفضيحة ..ولكنها زاد من نبرة هجومه وفى سياق دفاعه عن هوية مصر العربية انكر كل تاريخ مصر القبطية واهال التراب على كل تاريخها المجيد .. وكنت اضحك كلما قال ان الاسقف تقاضى خمسون الف دولار جائزة .. واقول هى خمسين الف دولار دلوقت فلوس ودول يعملوا ايه فى بناء الكنائس ولا اخوة الرب ولا جواز البنات ما انت عارف يا جمال ان الحكومة مش بتصرف علينا بالملايين زى ما بتصرف على الازهر والاوقاف .. يا اخى طب بحبح ايدك شوية وقول ان المبلغ نص مليون مثلا .. انت يا جمال شايف ان الوطن رخيص قوى كدة .. ولا يمكن شايف ان كل حاجة للبيع وكل الناس زى بعضها ممكن ثلاثين من الفضة تخليها تيبع مبادئها ..صحيح اللى ما يشوفش من الغربال يبقى جمال ..

الجنازة :

ان توقف مفكر عن التفكير هو بمثابة موت اكلينيكى له .. فالكاتب ايه غير قلم وشوية ورق وبما ان جمال اسعد كسر قلمه بيده فليرحمه الله .. وسوف تشيع جنازة المرحوم قريبا رغم تردد اقوال انه ميت من سنين وسوف يشارك فى العزاء فى المرحوم اقباط الكشح وعزبة بشرى بالفشن واقباط عرب الطوايلة بعين شمس وقرية ابو حنس ورهبان ابوفانا واهالى طما والفكرية ابو قرقاص والعديسات والرزيقات وكنائس الاسكندرية وعزبة واصف بالعياط و كفر سلامة ونزلة رومان ودفش وديروط والزيتون والزاوية الحمرا والمرج ونجع حمادى وامهات قبطيات ثكلى على بنات مفقودات واسرة القس المحبوس متأوس وهبة ورهبان المحرق وسيشارك ايضا وفود من اقباط المهجر من امريكا واوربا واسترليا وكندا وبلاد الفرنجة ..

هذا طبعا مجرد امنيات فجمال لن يتوقف عن التدخل فى الشأن القبطى رغم كراهيته لوصفه قبطى ( مسيحى + مصرى ) لأن افكاره تنبع من كراهيته وتتغذى عليها وتترعرع شوك وحسك ..وبدون هذه الكراهية سيموت قلمه .. الميت اساسا ..

كلمة اخيرة

فى تاريخ الاقباط انواع مما تركوا دينهم واتبعوا الدين الجديد..النوع الاول كان يطلق عليه فى المخطوطات القبطية المجروح .. وحقيقة هذا اللفظ يعبر وبصدق عن حالة الكثير مما تركوا مسيحهم او اجبروا على ذلك ولفظ المجروح استخدم بديلا عن لفظ مرتد او غيره لانه مجروح فى ايمانه وغالبا ما يعود او يبقى للاسف على دينه الجديد ظاهريا محتفظا بايمانه فى قلبه ومن ذلك جاء المثل ( اللى فى القلب فى القلب يا كنيسة الرب )

ونوع ارتد مبكرا مسالما الوافدين فاطلق عليهم الاسالمة وكانوا يظهروا التعصب تجاه بنى جلدتهم تقربا من الحكام واصحاب البلد الجدد ..بحثا عن مصالحهم الخاصة ..

ونوع اخر لم يرتد ظاهريا وظل مسيحيا اسما ولكنه مشى فى ركاب السلطة ولعق احذية الحكام وباع مسيحه وكنيسته ودم الشهداء بابخس الاثمان .. فكان فى نظر اهله خائن كيهوذا وفى نظر سيده رخيص و تابع لمن يدفع اكثر ..وشكرا
SIZE="4"]:smi411:[/SIZE]

شي غريب