منتديات الكنيسة

العودة   منتديات الكنيسة المدونات مجرد أفكار

Rating: 2 votes, 5.00 average.

ذكريات المدرسة غير السعيدة

وضعت 05-01-2016 في 06:29 AM بواسطة +إيرينى+

كنت تلميذة ذكية جدا

يعتمد تفوقى على شرح المدرس

لو لم يشرح : رسبت

لو شرح تفوقت

فلم يكن أحد فى البيت يساعدنى

أبى الذى يعمل مهندس ينزل من البيت (7صباحا) قبل أن أذهب الى المدرسة و يعود بعد عودتى (4~5مساء) بساعات منهك القوى

و أمى التى تعمل طبيبة تاخد يومين نوباتجية فى الاسبوع لتحسين الدخل فتبدأ 2 ظهرا لتعود تانى يوم الثامنة صباحا

و باقى الايام تنزل للعمل معى تقريبا عدا يوم الأحد و تعود فى حدود 2~3 العصر

لا يوجد حل سوى الاعتماد عل نفسى
وضعت في قسم غير محدد
المشاهدات 99651 التعليقات 143 تعديل الكلمات الدلالية
Total Comments 143

التعليقات

  1. Old Comment
    الصورة الرمزية grges monir
    اقتباس:
    المشاركة الأصلية كتبت بواسطة +إيرينى+ View Comment
    فى شهر مارس (1986) ظهرت العذراء مريم فى منطقة اسمها : بابا دبلو بشبرا مصر

    احنا فى اسكندرية وصل لنا الخبر


    فى يوم بعد احداث الظهور فى أثناء الفسحة و أنا ماشية مع جاكلين

    جت البت رشا الل عملت معايا الموقف دا




    جاءت و قالت لى على فكرة مش ستنا مريم الل ظهرت فوق الكنيسة

    أومال مين ؟؟

    ديه ستنا عيشة

    و ايه الل جابها عندنا (قامت جاكلين نغزتنى فى جنبى عشان اسكت)

    عشان تؤمنوا بيها

    يا سلاااااااااااام ( نغزة تانية من جاكلين)

    فسكت
    ظهور العدرا دة لحد النهاردة معفرت المسلمين وبيحاولو بكل الطرق يكذبوة
    وضعت 12-02-2016 في 10:45 AM بواسطة grges monir grges monir غير متصل
  2. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة grges monir View Comment
    ظهور العدرا دة لحد النهاردة معفرت المسلمين وبيحاولو بكل الطرق يكذبوة
    دا الظهور بتاع الزيتون كان حكاية تانية

    لا حد يقول فسفور و لا بربور
    وضعت 13-02-2016 في 06:48 AM بواسطة +إيرينى+ +إيرينى+ غير متصل
  3. Old Comment
    الصورة الرمزية +إيرينى+
    فى امتحانات آخر السنة

    اللجان كان كلها غش

    كان معانا تلميذة إسمها عبير كان عندها تخلف عقلى

    جابولى ورقة الاجابة بتاعتها - فاضية طبعا لأنها ما كانتش بتعرف تكتب - ( من لجنتها ) لغاية لجنتى عشان أحل لها الامتحان

    إعتذرت بأدب و قولت : آسفة


    مها ( الل طبطبت على أبلة نجاة لما أنا إنضربت و الل انضربت من أبلة فوزية عشان كتبت كلمة مياهه غلط) : هى كانت المسئولة عن كتابة الاجابة فى ورقة اجابة عبير فى كل الامتحانات

    ________________________________

    خلصت سنة 6 ابتدائى

    أنا جبت 294/300 يعنى 98%

    ماما و هى راجعة من الشغل عدت و جابتهالى

    بتبص على كشف النتيجة لاقيت 3/4 المدرسة أعلى منى

    حتى عبير كمان جابت 294/300

    احنا الاتنين متساويين

    دخلت أمى سألت أستاذ فتحى : هى إيرينى مستواها وحش أوى كدة ؟؟

    قال لها : إيرينى ديه أشطر واحدة فى المدرسة ديه مستقبلها الدراسى رائع لأن دا مجهودها - لا دروس و لا حتى أهلها ذاكرولها و لا غشت فى الامتحانات _ بنتك عملة نادرة يا دكتورة

    ماما فرحت جدا جدا

    و رجعت البيت و كلها سعادة

    أولاد عمى التوأم الل أبوهم موجه فى التربية و التعليم

    الولد جاب : 299/300 = 99.66666%

    البنت جابت : 288/300 = 96%

    بابا قال لماما : ما تقارنيش - ما لكيش دعوة بنتيجتهم - مين أعلى و مين أوطى مالناش دعوة - علينا نقول مبروك و خلاص و بفرح كمان

    ماما بطبيعتها كانت بتقدس كلام بابا

    فسمعت الكلام

    أيااااااااااااااام
    وضعت 13-02-2016 في 07:08 AM بواسطة +إيرينى+ +إيرينى+ غير متصل
  4. Old Comment
    الصورة الرمزية +إيرينى+
    افتكرت كمان حاجة على أستاذ فتحى

    كان عندنا ولد بليد اسمه : متولى

    كانت شفايفه مدلدلة

    كنت بأحس إن بلادته هى سبب دلدلة شفايفه

    أستاذ فتحى كان بيغنى له : كعب الغزال يا متولى كعب الغزااااااااااااااال

    و كان يبص له و يقول : الضرب فى الميت حرام

    ولد تانى إسمه على كان بليد روخر

    كان أستاذ فتحى بيغنى له : على يا على يا بتاع الزيييييييييت بذمتك إنت ...........؟

    الفلاحين عارفين باقى الاغنية

    آخر حاجة بالنسبة لأستاذ فتحى

    كان بيقول : لو كل الناس متفوقين و بقى كل الناس دكاترة و مهندسين

    ح ألاقى مين الل يبيع السمك ؟و مين الل يكنس الشارع؟ و مين الل يلم الزبالة ؟ و مين و مين ؟؟

    لازم يكون فى بُلَدة (جمع بليد)

    وضعت 15-02-2016 في 07:04 AM بواسطة +إيرينى+ +إيرينى+ غير متصل
  5. Old Comment
    الصورة الرمزية +إيرينى+
    ما حدش سألنى يعنى إيه أغنية على يا على ...............؟؟
    وضعت 16-02-2016 في 07:26 AM بواسطة +إيرينى+ +إيرينى+ غير متصل
  6. Old Comment
    الصورة الرمزية +إيرينى+
    افتكرت كمان موقف

    كنت فى سنة 6

    أستاذ رمضان طلب منى أقف على الفصل و أكتب إسم الل بيتكلم عبال ما هو رايح يجيب حاجة من أوضة المدرسين

    و قال لى : لو لاقيت الفصل دوشة و إنتى ما كتبتيش ولا إسم _ إنتى الل ح تنضربى

    وقفت

    العيال هوس هوس

    البنت هند بالذات قاعدة مربعة إيديها و فاردة ظهرها (قاعدة عسكرى)

    البت وسام (الل حرضتنى على الهروب من حصة أبلة فوزية فى المسجد و الل انضربت لما كتبت كلمة مياهه غلط) قالت لى : إكتبى البت هند

    يعنى أكتب إن هند إتكلمت و بكدة البنية ح تنضرب

    طب البت ساكتة : أكتبها ليه ؟؟

    وسام : بس إكتبيها بس

    رفضت طبعا

    __________________

    طبعا فضولى كان حياكلنى

    ليه الاصرار : إشمعنى هند ؟؟

    روحت طبعا سألت وسام

    فقالت : أصل أستاذ رمضان خاطب أخت هند فكنا عايزين نعرف ح يضربها و لا لأة

    يا بت اللئيمة دا أنا الل كنت ح إنضرب الله يخرب بيتك
    وضعت 16-02-2016 في 07:38 AM بواسطة +إيرينى+ +إيرينى+ غير متصل
  7. Old Comment
    الصورة الرمزية paul iraqe
    اقتباس:
    المشاركة الأصلية كتبت بواسطة +إيرينى+ View Comment
    فى شهر مارس (1986) ظهرت العذراء مريم فى منطقة اسمها : بابا دبلو بشبرا مصر

    احنا فى اسكندرية وصل لنا الخبر


    فى يوم بعد احداث الظهور فى أثناء الفسحة و أنا ماشية مع جاكلين

    جت البت رشا الل عملت معايا الموقف دا




    جاءت و قالت لى على فكرة مش ستنا مريم الل ظهرت فوق الكنيسة

    أومال مين ؟؟

    ديه ستنا عيشة

    و ايه الل جابها عندنا (قامت جاكلين نغزتنى فى جنبى عشان اسكت)

    عشان تؤمنوا بيها

    يا سلاااااااااااام ( نغزة تانية من جاكلين)

    فسكت




    في بغداد - في منطقة اسمها الميدان توجد كنيسة مريم العذراء وتسمى ايضا بكنيسة (مسكنتا ) كلمة كلدانية قديمة بمعنى المسكينة
    ظهرت القديسة مريم العذراء هناك عدة مرات

    لكن السلطات في وقتها اعتبروها مؤامرة من الكيان الصهيوني ومن دوائر الامبريالية العالمية

    اترك بقية المسألة لتصروكم الخاص

    على فكرة -
    البنات والاولاد دول اللي كانوا معاكي في المدرسة لسة موجودين ؟
    يعني العلاقات موجودة والا انقطعت ؟ وصلوا فين في حياتهم ؟

    وشكرا جزيلا للموضوع
    وضعت 17-02-2016 في 06:04 AM بواسطة paul iraqe paul iraqe غير متصل
  8. Old Comment
    الصورة الرمزية paul iraqe
    اقتباس:
    المشاركة الأصلية كتبت بواسطة +إيرينى+ View Comment
    ما حدش سألنى يعنى إيه أغنية على يا على ...............؟؟


    طيب -

    انا اسألك : يعني ايه اغنية علي يا علي ؟
    وضعت 17-02-2016 في 06:09 AM بواسطة paul iraqe paul iraqe غير متصل
  9. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة paul iraqe View Comment


    على فكرة -
    البنات والاولاد دول اللي كانوا معاكي في المدرسة لسة موجودين ؟
    يعني العلاقات موجودة والا انقطعت ؟ وصلوا فين في حياتهم ؟

    العلاقات لا مش موجودة

    كلٍ ذهب الى خاصته

    لكن من قيمة 6 شهور كدة قابلت جاكلين صدفة فى الشارع و طبعا عرفنا بعضنا و سلمنا على بعض

    شوفت رشا و مها الل طبطبوا على ابلة نجاة لما انضربت

    رشا بقيت أد برميل الطورشى

    و مها روخرة طخنت جدا جدا

    قابلت واحدة اسمها إيمان

    و واحدة إسمها فاطمة (كانت مع إخواتى فى الفصل)

    شوفت محمد الشيخ (الناظر) عجز طبعا

    شوفت مرة من قيمة 7 - 8 سنين الواد محمد شحاتة
    وضعت 18-02-2016 في 06:53 AM بواسطة +إيرينى+ +إيرينى+ غير متصل
  10. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة paul iraqe View Comment
    طيب -

    انا اسألك : يعني ايه اغنية علي يا علي ؟
    لا ديه صعب أقولك عليها

    عشان فيها كلام يع ريحته وحشة
    وضعت 18-02-2016 في 06:55 AM بواسطة +إيرينى+ +إيرينى+ غير متصل
  11. Old Comment
    الصورة الرمزية +إيرينى+
    افتكرت كمان موقف

    فى يوم فى سنة 6 فى أثناء الفسحة

    لاقيت الواد ميشيل (الل مع اخواتى فى الفصل دا غير الواد ميشيل الل معايا) متذنب فى الحوش

    الواد دا كان متفوق بس دمه تقيل (سقم) - ولد وحيد لأبوه و أمه و مدلعينه أحلى دلع

    طبعا كان غريب بالنسبة لى ان الواد دا يتذنب لأنه متفوق و متوصى عليه

    سألت أخويا و أختى (فى أثناء الفسحة) : الواد ميشيل عمل إيه ؟

    عمل حركة بصوابعه قلة أدب

    إيه الحركة يعنى ؟؟

    عمل دايرة بإصبعى السبابة و الابهام لليد اليسرى ثم وضع الأصبع الوسطى لليد اليمنى فى هذه الدايرة

    و إيه قلة الأدب الل فيها يعنى ؟

    ما نعرفوش _ بيقولوا قلة أدب

    شوية و لاقيت أستاذ فتحى نازل يكلم ميشيل : إيه معناها الحركة ديه ؟

    ميشيل : بابا قال لى هم الناس بتتجوز كدة

    أستاذ فتحى ( و هو ماسك نفسه عن الضحك) : هو قال لك كدة ؟؟

    ميشيل : أيوة

    بعد كدة تم العفو عنه بس بشرط عدم تكرار هذه اليماءات و الحركات

    رجعت سألت بابا و قومت عملت نفس الحركة

    بابا بابا هى الناس بتتجوز كدة ؟؟

    مين ابن تيييييييييييييت الكلب الل علمك الحركة الو.........خة ديه

    فحكيت له القصة

    قام بابا منزل فرمان : ممنوع حد يكلم ابن تييييييييييييييت الكلب (ميشيل)



    وضعت 18-02-2016 في 07:29 AM بواسطة +إيرينى+ +إيرينى+ غير متصل
  12. Old Comment
    الصورة الرمزية +إيرينى+
    و دخلت المدرسة الاعدادى

    المدرسة مكونة من 3 مبانى

    المبنى الأول : يخص الادراة المدرسية و فصول أولى إعدادى و هو عبارة عن فيلا ضخمة (قصر) من الطراز القديم يقال أنها كانت ملك إحدى الأميرات (بنات الملك فؤاد الأول) و عند التأميم أصبحت ملك الدولة

    المبنى الثانى و الثالث : يخص فصول الصف الثانى و الثالث الاعدادى على الترتيب و هما عبارة عن مبنيان حديثان بُنِيَا فى شكل مبنى مدرسى عادى

    ______________________

    دخلت المدرسة و فوجئت بهرجلة لم أعهدها فى ابتدائى

    أيام ابتدائى كنا بنطلع الفصول على انغام الموسيقى

    أما فى إعدادى : عقب انتهاء الطابور يحدث هرج و مرج و كل واحدة تروح فصلها بدون نظام

    أنا كنت أولى سابع

    الصف الواحد كان فيه 12 فصل

    كل فصل به ما بين 70 الى 80 بنت

    مُدَرِسة الألعاب منادية بأعلى صوت : أولى سابع و تامن وتاسع و عاشر فى البدروم

    البدروووووووووووووووووم

    يعنى إيه بدروم ( الكلمة جديدة عليا )

    قررت أمشى مع باقى الفصل

    بننزلوا تحت مش بنطلعوا فوق

    إيه دا ؟؟ هو فيه أدوار تحت الأرض ؟؟

    السلم حلزونى ( دا سلم الخدامين فى القصر)

    دخلت الفصل

    الدنيا ضلمة و الشبابيك فى مستوى أرضية الحوش

    إيه دا ؟؟

    السبورة صغيرة بالنسبة لعرض الفصل

    مساحة الفصل كبييييييييييييييييييييييرة جدا

    التُخَت لازقة فى بعضها

    ايه دا ؟
    وضعت 21-02-2016 في 06:19 AM بواسطة +إيرينى+ +إيرينى+ غير متصل
  13. Old Comment
    الصورة الرمزية +ماريا+
    انت دخلتى على اعدادى كمان
    انا جايه متأخر زى محسن ولا ايه
    وضعت 21-02-2016 في 09:53 PM بواسطة +ماريا+ +ماريا+ غير متصل
  14. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة +ماريا+ View Comment
    انت دخلتى على اعدادى كمان
    انا جايه متأخر زى محسن ولا ايه
    الحمد لله إنك وصلتى للمدونة
    وضعت 22-02-2016 في 07:52 AM بواسطة +إيرينى+ +إيرينى+ غير متصل
  15. Old Comment
    الصورة الرمزية +إيرينى+
    افتكرت كمان موقف فى ابتدائى

    مش فاكرة كنت فى سنة 5 و لا 6

    جاءت لنا مدرسة ألعاب جديدة إسمها سمية

    كانت رشيقة و جميلة

    كانت مفعمة بالنشاط و الحيوية و كانت بتلعب معانا

    فيه مدرسة إعدادى بنين لازقة فى مدرستنا

    العيال بتوع المدرسة الاعدادى شافوا من شبابيك فصولهم أبلة سمية و هى بتلعب معانا

    و عاكسوها

    هى قالت كلمة بصوت واطى

    فهمت من حركة شفايفها إنها قالت : متخلفين

    و آل يقولك الانحلال الاخلاقى فى الجيل الحالى

    كدابييييييييييييييييييييييين

    أهاليكم كانوا صويَّع
    وضعت 22-02-2016 في 08:06 AM بواسطة +إيرينى+ +إيرينى+ غير متصل
  16. Old Comment
    الصورة الرمزية +إيرينى+
    نرجع تانى للمدرسة الاعدادية

    كانت بتدينى الرياضة مُدَرِسة إسمها : هالة أو هبة مش فاكرة اسمها كانت طويييلة و بيضا (قصة شعرها مدرج على قصير _ لازم قفاها يبان ) و ثدياها كبيرتان جدا

    العلوم : تريزة كانت بتتفتف و هى بتتكلم _قصيرة و سمراء جدا (كانت قصة شعرها a la garcon برضوا كان قفاها باين ) كانت بتلبس جيبات قصيرة و جذمة كعب عااااااااااااالى و الكعب كان رفيع جدا _ لما تمشى فى الفصل تسمع تك تق تك تق تك تق

    الرسم : لا أتذكر إسمها _ كانت كبيرة فى السن و محجبة _ كانت مصاحبة القطط و تجيب لهم أكل كل يوم و كانت بتقول ان القطط نظيفة لأنها لما بتتبرز بتحفر حفرة تتبرز فيها ثم تردمها بالتراب

    الانجليزى : مرفت كانت طويييييييييلة أنزوحة متعجرفة قصة شعرها مدرج على طويل _ قفاها مش باين

    زميلاتى فى الفصل 70 - 80 واحدة

    و أنا مش فاكرة فيهم غير نيرمين و داليا و شيرين و تريزة

    نيرمين : جاية من مدرسة سان جوزيف (فرنساوى راهبات) - كان ليها أخ أصغر بيستعر منها مع إن إظفرها برقبته

    داليا : جاية من مدرسة الميردى ديو (فرنساوى راهبات) _ كان يميزها الشعر الطويل الناعم الهايش _كنت أحب إبتسامتها و أعشق النظر إليها _ الى الآن لم أنساها برغم أنه لم يوجد بينى و بينها مواقف أو حتى صداقة _ اتذكر فقط انها كانت تتغنى فى حب والدها المتوفى و انها ستسافر خارج مصر(و فعلا سافرت)

    شيرين : كانت بتدعى إنها بتاخد مصروف 700 جنيه فى الشهر - دا كان سنة 86/87 (كدابة طبعا) ما كانتش ح تدخل مدارس حكومة - كانت ضخمة الجثة إسطوانية الجسم - و كانت بتضرب و تزق المُدَرِسة الل تضربها - مرة زقت مُدَرِسة الرسم

    تريزة : كانت طويلة و شعرها ناااااااااااااااااااااااعم جدا _ كانت مليانة حبة


    وضعت 23-02-2016 في 08:04 AM بواسطة +إيرينى+ +إيرينى+ غير متصل
  17. Old Comment
    الصورة الرمزية +إيرينى+
    فى حصة العربى : المُدَرِسة سألت سؤال

    أوم البنات رفعوا إيديهم عشان يجاوبوا

    بنات تقول : ميس ميس

    و بنات تقول : موا مدام موا مدام

    !!!!!!!!!!!!!!!!!

    إيه دا ؟؟ فين أنى يا ابلة ؟؟

    مُدَرِسة العربى بصيت للبنات اللى بيقولوا موا موا و قالت : ما تموموووش كدة و بعدين أنا آنسة مش مدام

    ردوا و قالوا : موا مودموازيل




    وضعت 25-02-2016 في 06:28 AM بواسطة +إيرينى+ +إيرينى+ غير متصل
  18. Old Comment
    الصورة الرمزية paul iraqe
    يا باشمهندسة ايريني
    سلام ونعمة

    قبل ما أنرّوح للاعدادي كنت اريد ان أسالكي بعض الاسئلة لو سمحتي لي

    لاحظت في مرحلة الابتدائية انك نقلتي لنا صورة سوداوية ومؤلمة وحزينة ايضا

    هل لانه لم تكن هناك ما يفرح ؟

    أم أنه تراكم لخبرة مؤلمة ؟

    ((لأن الفرح بيسر - والحزن بيجرح )

    هذه الصورة هل تنطبق على كافة المدارس الحكومية (حال مصر )
    أم هي حالة خاصة معاكي انتي فقط ؟

    مع الشكر والتقدير


    وضعت 25-02-2016 في 06:32 AM بواسطة paul iraqe paul iraqe غير متصل
  19. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة paul iraqe View Comment
    يا باشمهندسة ايريني
    سلام ونعمة

    قبل ما أنرّوح للاعدادي كنت اريد ان أسالكي بعض الاسئلة لو سمحتي لي

    لاحظت في مرحلة الابتدائية انك نقلتي لنا صورة سوداوية ومؤلمة وحزينة ايضا

    هل لانه لم تكن هناك ما يفرح ؟

    أم أنه تراكم لخبرة مؤلمة ؟

    ((لأن الفرح بيسر - والحزن بيجرح )

    هذه الصورة هل تنطبق على كافة المدارس الحكومية (حال مصر )
    أم هي حالة خاصة معاكي انتي فقط ؟

    مع الشكر والتقدير


    ما كان يفرحنى : لم يكن داخل جدران المدسة عدا موقف واحد فقط من الناظر محمد الشيخ الذى جعل المدرسة بأكملها تصفق لى أثناء اليوم الاذاعى لقدرتى على إلقاء بعض الارشادات على التلاميذ (كنت حافظاها) و كانت حوالى عشر ارشادات ألقيتهم فى طابور الصباح بالتشكيل بدون خطأ نحوى واحد (و بدون قراءة)
    هذا هو اليوم الوحيد الذى فرحت فيه فى المدرسة


    أسوء مرحلة تعليمية فى حياتى : كانت المرحلة الابتدائية
    كنت بأروح المدرسة أعصابى مشدودة و قلقانة من إحتمال ضربى
    أنا بطبيعتى أكره هذا الاسلوب فى التعامل

    الضرب لن يخلق لنا عقول ذكية
    _____________________

    أما عن حال المدارس الحكومية فى مصر

    لا تختلف كثيرا عما حكيته أنا

    للأسف

    وضعت 26-02-2016 في 06:45 AM بواسطة +إيرينى+ +إيرينى+ غير متصل
  20. Old Comment
    الصورة الرمزية grges monir
    اقتباس:
    المشاركة الأصلية كتبت بواسطة +إيرينى+ View Comment
    ما كان يفرحنى : لم يكن داخل جدران المدسة عدا موقف واحد فقط من الناظر محمد الشيخ الذى جعل المدرسة بأكملها تصفق لى أثناء اليوم الاذاعى لقدرتى على إلقاء بعض الارشادات على التلاميذ (كنت حافظاها) و كانت حوالى عشر ارشادات ألقيتهم فى طابور الصباح بالتشكيل بدون خطأ نحوى واحد (و بدون قراءة)
    هذا هو اليوم الوحيد الذى فرحت فيه فى المدرسة


    أسوء مرحلة تعليمية فى حياتى : كانت المرحلة الابتدائية
    كنت بأروح المدرسة أعصابى مشدودة و قلقانة من إحتمال ضربى
    أنا بطبيعتى أكره هذا الاسلوب فى التعامل

    الضرب لن يخلق لنا عقول ذكية
    _____________________

    أما عن حال المدارس الحكومية فى مصر

    لا تختلف كثيرا عما حكيته أنا

    للأسف

    اها يعنى كدة المنظومة التعليمية فاشلة من ايامنا احنا
    انتى بى شايفة ان العملية التعليمية دلوقت افضل ولا اسؤا من ايامنا
    وضعت 26-02-2016 في 11:26 AM بواسطة grges monir grges monir غير متصل
 

الساعة الآن 10:56 AM.



دعم خاص من vBulletin لمنتديات الكنيسة
©2000 - 2018، Jelsoft Enterprises Ltd
جميع حقوق الطبع محفوظة لمنتديات الكنيسة