منتديات الكنيسة

العودة   منتديات الكنيسة المدونات مجرد أفكار

Rating: 2 votes, 5.00 average.

ذكريات المدرسة غير السعيدة

وضعت 05-01-2016 في 06:29 AM بواسطة +إيرينى+

كنت تلميذة ذكية جدا

يعتمد تفوقى على شرح المدرس

لو لم يشرح : رسبت

لو شرح تفوقت

فلم يكن أحد فى البيت يساعدنى

أبى الذى يعمل مهندس ينزل من البيت (7صباحا) قبل أن أذهب الى المدرسة و يعود بعد عودتى (4~5مساء) بساعات منهك القوى

و أمى التى تعمل طبيبة تاخد يومين نوباتجية فى الاسبوع لتحسين الدخل فتبدأ 2 ظهرا لتعود تانى يوم الثامنة صباحا

و باقى الايام تنزل للعمل معى تقريبا عدا يوم الأحد و تعود فى حدود 2~3 العصر

لا يوجد حل سوى الاعتماد عل نفسى
وضعت في قسم غير محدد
المشاهدات 99870 التعليقات 143 تعديل الكلمات الدلالية
Total Comments 143

التعليقات

  1. Old Comment
    الصورة الرمزية +إيرينى+
    دخلت مدرسة ثانوى عام

    مبنى المدرسة كان مدرسة ثانوى عام فى الفترة الصباحية و مدرسة ثانوى تجارى فى الفترة المسائية

    الحقيقة المدرسة كانت مشهورة بإنها : مدرسة الكعب العالى

    ليه ؟؟

    مش لأن البنات كانوا بيلبسوا كعب عالى

    لا لا خالص

    الحكاية و ما فيها إن كل بنت كانت مصاحبة ولد من المدرسة الثانوى الصبيان الل فى وش المدرسة

    ماما بتقول لبابا : إحنا حنحط بنتنا فى المدرسة ديه ؟؟

    بابا : الجنيه الصفيح لو حطيتيه فوق دماغك ح يصدأ و الجنيه الدهب لو رميتيه فى بجامون الخرة حيفضل جنيه دهب

    فتدخلت فى الحوار سريعا : ما هو الجنيه الدهب ممكن يتعاص كدة

    بابا : ما يتعاص _ المهم من جوة إيه

    أخدنا الموضوع بضحك

    ________________________

    بنات المدرسة كانوا كلهن بيلبسوا شراب فيليه تحت الشراب الأبيض

    عشان أول ما يطلعوا من المدرسة يقلعوا الشراب الأبيض و يتمشوا مع الصبيان

    أنا كنت غير كدة

    أنا كنت بتاعة مذاكرة و بس _ دحيحة درجة أولى

    كنت أعشق المذاكرة عشق

    بدأت أتعرف ببنات جدد

    مادلين - فيبى - تريز - هايدى

    دخلت معايا فى نفس المدرسة : وسام الل كانت معايا فى اعدادى

    مادلين : خمرية اللون - شعر ناعم خفيف - مليانة شوية - كانت أستاذة فى تقليد المدرسين و المدرسات

    فيبى : كانت خمرية اللون - ذات جسم جميل - عندها عين عسلى و عين خضراء و عسلى فى وقت واحد - جاية من مدرسة سان جوزيف (فرنساوى راهبات)

    تريز : وجهها خمرى فاتح _ ذات ملامح حادة واضحة - دائما مبتسمة و بشوشة - قصيرة القامة _ كان عندها لغط فى القلب

    هايدى : ملامح وجهها كانت تشبه الفنان محمد ثروت بالظبط

    لا أتذكر حقيقة أى موقف فى أولى ثانوى

    لذا سأنتقل ال 2 ثانوى

    كنت أجلس فى الصف الأول بجانب الحائط و بجانبى تريز

    و خلفى : مادلين و فيبى

    يتبع

    وضعت 08-04-2016 في 05:38 AM بواسطة +إيرينى+ +إيرينى+ غير متصل
    Updated 08-04-2016 at 05:41 AM by +إيرينى+
  2. Old Comment
    الصورة الرمزية +إيرينى+
    فى يوم جاءت الشرطة عندنا فى المدرسة

    و قبضت على بنتين كانوا مع بعض فى دورة الماية

    و قبضت كمان على مُدَرسة (تدريب انجليزى)

    المُدَرسة كانت بتحط مانيكير أسود على أظافرها

    و كانت تحط الروج : أسود برضوا

    سألت البت تريز : هم قبضوا عليهم ليه ؟؟

    تريز : بضحكة سخرية زى ضحكة الرقاصات _ كانوا بيعملوا حلاوة لبعض فى الدابليو سييييييييي

    أنا : ح نهزر ؟؟ فيه حد يعمل حلاوة فى المدرسة ؟؟

    تريز : إنغة إنغة

    أنا : يا بت إنطقى

    تريز : لما تكبرى ح نفهموكى

    أنا : بيعملوا إيه ؟؟

    استمرت تسخر و تسخر

    و لم تقل كلمة واحدة

    فيبى : يا ستى ما تشغليش بالك _ يا إما مخدرات _ يا إما شذوذ

    أنا : شذوووووووووووذ ؟؟ يعنى إيه ؟؟

    تريز : مش قولت لكم لما تكبر نفهموها

    و هاااااااااااااااااااااااتك يا ضحك


    وضعت 09-04-2016 في 08:03 AM بواسطة +إيرينى+ +إيرينى+ غير متصل
  3. Old Comment
    الصورة الرمزية +إيرينى+
    فى أخر اليوم الدراسى فى أحد الأيام

    كل الفصل لم شنطهم و حاجتهم

    عدا أنا و هبة و مها

    أنا كنت لسة بألم فى حاجتى

    و يادوووووووب باحط الشنطة على كتفى

    لاقيت هبة و مها بيبوسوا بعض بالشفايف

    بوسة زى الل بنشوفها فى الأفلام

    زى شكرى سرحان و سعاد حسنى مثلا

    المهم إنهم كانوا هيمانين فى بعض

    هبة : كانت طويلة القامة قوية البنية زى الرجالة بيضاء اللون (مسيحية)

    مها : كانت قصيرة القامة ضعيفة البنية خمرية اللون (مسلمة)

    الحقيقة أنا اتسمرت مكانى

    و تذكرت يوم قالت لى فيبى عن الشذوذ بين البنات

    و فضلت أبحلق لهم لغااااااااااااااية لما خلصوا البوسة

    نظرت إلىَّ هبة قائلة : إيه عادى مالك ؟؟

    لم أرد عليها من هول ذهولى

    و تركت الفصل و نزلت

    حكيت لماما : إستغربت و قالت هو فيه شذوذ بين البنات ؟؟ إزاى يعنى ؟؟

    أوم راحت سألت بابا

    الذى أتى إلىَّ مسرعا و على وجهه ملامح الجدية : إبعدى عن البنتين دول و تلمى حاجتك بسرعة فى شنطتك و تكونى أول واحدة تنزل من الفصل _ فاهمة و لا لأة ؟؟

    أنا : فاهمة

    وضعت 12-04-2016 في 07:39 AM بواسطة +إيرينى+ +إيرينى+ غير متصل
  4. Old Comment
    الصورة الرمزية +إيرينى+
    فى أحد الأيام و فى بداية الطابور الل بعد الفسحة

    رأيت أختى تتشاجر مع إحدى زميلاتها

    أختى أصغر منى بسنة دراسية

    طبيعة أختى هى أسلوب الشجار و الضرب (بلطجية)

    رأتها ميس وجنات فضربت أختى بالبوكس على ضهرها فأوقعتها

    و زنبتها عشان تتعاقب عند الناظرة

    وقفت فى الطابور أشاهد أختى باكية

    و فى ذات نفس الوقت مرَّت أمامى مُدرسة ألعاب

    فتكلمت معها و كذبت و قولت : البنت اللى متذنبة عندها مرض فى القلب

    قالت لى حاضر

    فذهبت تلك المُدَرسة الى أختى و طلبت منها الاعتذار لميس وجنات فوافقت باكية

    ثم ذهبت تلك المُدَرسة الى ميس وجنات و وشوشتها ثم أخذتها معها الى حيث تقف أختى

    ثم إعتذرت أختى لها فأرجعوها الى الطابور

    فنظرت لأختى مبتسمة و هى أيضا إبتسمت لى


    و عندما عدت الى المنزل تكلمت معها و قولت لها

    كذبت لكى أنقذك من العقاب و لو إنك كنتى تستاهليه

    بطلى أسلوبك البلطجى دا _ لن أكذب مرة أخرى_ أنتى تعرفينى : أنا لا أحب الكذب
    وضعت 13-04-2016 في 09:10 AM بواسطة +إيرينى+ +إيرينى+ غير متصل
  5. Old Comment
    الصورة الرمزية +إيرينى+
    فى أحد الأيام

    واحدة فى الفصل إتخطبت لإبن عمها

    و جابت صور الخطوبة

    و البنات إتلموا يتفرجوا

    ____________

    فى ذات الوقت كانت بتدينا مُدَرِسة لغة عربية - طخييييييينة جدا جدا (عمرها 30 سنة و لم تتزوج و لم تُخطَب)


    المُدَرِسة بتسأل البنت سؤال

    البنت مش عارفة تجاوب

    قوم البنت تقول للمُدَرِسة : إنتى إختارتينى عشان أجاوب عشان أنا مخطوبة و انتى لأة ؟؟

    المُدَرِسة : أقعدى أقعدى

    موقف لن أنساه _ يقولون حقوق المرأة _ و المرأة نفسها لا تراعى مشاعر المرأة الأخرى



    وضعت 14-04-2016 في 06:21 AM بواسطة +إيرينى+ +إيرينى+ غير متصل
  6. Old Comment
    الصورة الرمزية +إيرينى+
    فى يوم تانى

    البنات اللى قاعدين وراء جابوا معاهم مجلة بتتكلم عن العلاقة الجنسية

    و كان فيها صور مخلة بالآداب

    و كانوا جايبنها للبنت الل اتخطبت

    عشان تتعلم

    و اسمع بقى الحوارات

    تشعالى يا بتش اتعلمى المسخرة و جلة الحيا (صوت ضحك رقاصات)

    أحييييييييه شوفى يا بت ح يحصل فيكى ايه كمان شهريييييييين

    أحييييييييييييييه و أيوووووووووووووه

    سألت فيبى و تريز و مادلين : فيه إيه ورا؟؟

    تريز : إنتى بالذات مالكيش دعوة خليكى فى الدح بتاعك

    أنا : لا بجد فيه إيه ؟؟

    فيبى : بيتكلموا عن السكس

    أنا : يعنى إيه سكس ؟؟

    تريز : هههههههههههه أنا مش قولت لكوا ماحدش يتكلم مع ايرينى فى المواضيع ديه
    السكس : يعنى الجواز

    أنا : تصدقوا ؟؟ مش عايزة أعرف حاجة

    تريز : ما تسألى مامتك ؟؟

    أنا : ما هو أنا سألتها و ما فهمتش حاجة _ و بعدين و هى بتتكلم وشها بيحمر

    تريز : مممممممممم أقولك على حاجة ؟؟

    أنا : قولى

    تريز : روحى ذاكرى و سيبك من الكلام الأبيح دا



    وضعت 14-04-2016 في 06:34 AM بواسطة +إيرينى+ +إيرينى+ غير متصل
  7. Old Comment
    الصورة الرمزية paul iraqe
    يا باشمهندسة

    عندي سؤال حو ( النشاط المدرسي )

    هل كانت عندكم نشاط مدرسي خارجي ؟

    يعني سفرات علمية او ترفيهية او زيارة للمتاحف وغيرها ؟

    واذا كان جوابكم (نعم ) فكيف كانت ؟

    وشكرا
    وضعت 14-04-2016 في 11:25 AM بواسطة paul iraqe paul iraqe غير متصل
  8. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة paul iraqe View Comment
    يا باشمهندسة

    عندي سؤال حو ( النشاط المدرسي )

    هل كانت عندكم نشاط مدرسي خارجي ؟

    يعني سفرات علمية او ترفيهية او زيارة للمتاحف وغيرها ؟

    واذا كان جوابكم (نعم ) فكيف كانت ؟

    وشكرا
    كان فيه رحلات لأماكن سياحية

    زى قلعة قايتباى مثلا

    رحلة اليوم الواحد

    لكن عمرى ما طلعت معاهم

    بابا كان بيرفض

    وضعت 14-04-2016 في 04:26 PM بواسطة +إيرينى+ +إيرينى+ غير متصل
  9. Old Comment
    الصورة الرمزية +إيرينى+
    كانت بتدينا الانجليزى مُدرسة إسمها : صفاء

    كانت صغيرة السن : فى حدود 25 الى 30 سنة

    شيك -شعرها أصفر بطبيعته - قصيرة القامة - ملامحها طفولية _ كانت ممتازة فى الشرح


    كان فيه مُدَرس انجليزى بس ما كانش بيدينا إسمه : شريف

    كان صغير السن برضوا _ نحيف _ شعره أصفر بطبيعته _ عيناه خضراوتان _

    كان عنده ضبَّة ( الل هى فك بارز للأمام قليلا)


    فى يوم من الأيام

    أعلنوا فى الاذاعة المدرسية أنه تم خطبة شريف و صفاء

    التلميذات هات يا تصفيق و زراغيد

    لم أُعجب أنا بهذه الخطبة _ و لم أصفق _ بل أشرت بيدى علامة بما معناه الاستياء من الخطبة

    فى أحد الحصص الفاضية

    تكلمت مع صديقاتى الثلاثة : فيبى و مادلين و تريز

    و قولت لهم : شريف دا باين عليه غبى

    فسألوا : ليه بتقولى كدة

    قولت : شكله كدة - مش عارفة ليه حاساه غبى - أو بجم - ما اعرفش

    بعدها بكام يوم : سُرِقَ مرتب ميس صفاء من حقيبتها

    تريز شافت ميس صفاء بتعيط و مستر شريف يطبطب

    و جاءت لتحكى

    قولت لها ما تستبعديش إن هو الل سرقها _ الواد دا شكله واطى

    قالت لى : هو إيه ؟؟ جوز أمك ؟؟ مالك حطاه فى دماغك

    قولت : و لا جوز أمى و لا نيلة _ مش طايقاه يا تريز


    في أجازة نص العام

    كان فيه رحلة مدرسية لشرم الشيخ

    الرحلة كانت للمدرسين و ذويهم

    عندما انتهت الاجازة

    فوجئت أن مستر شريف تزوج من ابنة خاله و ذهب معها يقضى شهر العسل فى شرم الشيخ

    اللا ؟؟؟

    أومال صفاء ؟؟

    قالوا فك خطوبته من صفاء و تزوج قريبته

    لحق ؟؟

    دا كان عامل صفاء مجرد كوبرى بأة

    قولت لتريز : شوفتى الواطى ؟؟

    سكتت

    و استطردت فى الكلام و قولت : ربنا بيحبها

    و جاءت أول حصة للانجليزى و دخلت ميس صفاء و بدا عليها ملامح الضيق

    كنت وقتها عايزة أقولها : سيبك منه دا انتى ربنا نجدك



    وضعت 15-04-2016 في 05:52 AM بواسطة +إيرينى+ +إيرينى+ غير متصل
  10. Old Comment
    الصورة الرمزية +إيرينى+

    كانت مادلين تحب فيبى جدا

    و تغار اذا تكلمت مع فيبى

    بل من الممكن ان تخاصمنى اذا تكلمت معها

    ما أخدتش بالى من هذه الغيرة

    و كنت دائما أسألها : مالك ؟؟ إنتى مخاصمانى ليه ؟؟

    كانت ترد : و لا حاجة

    إلى أن نبهتنى فيبى

    فقولت لـفيبى : لن أتكلم معك فى وجود مادلين

    ____________________________
    ثم فى أحد الأيام

    جاءت مسئولة من المدرسة و دخلت الفصل و قالت

    لازم كل واحدة فيكم تقرر ح تدخل علمى و لا أدبى

    و أعطونا مهلة (لا أتذكر عدد أيام المهلة)

    و سألت صديقاتى الثلاثة : مادلين و فيبى و تريز

    حتدخلى ايه يا تريز ؟؟

    أدبى

    و إنتى يا فيبى ؟؟

    أدبى

    و إنتى يا مادلين ؟؟

    أدبى

    رأيت الفرحة فى عينى مادلين و هى ترانى أحزن لفراقهم القادم لا محالة

    لن تكون لى صديقة فى الثانوية العامة

    أدمعت عيناى

    سأحاول من اليوم أن أعود نفسى عل فراقهم

    لن أنسى هذا اليوم

    وضعت 17-04-2016 في 05:56 AM بواسطة +إيرينى+ +إيرينى+ غير متصل
  11. Old Comment
    الصورة الرمزية +إيرينى+
    دخلنا 3 ثانوى

    كنت قاعدة فى أول تختة جنب البابا على الحرف

    و كانت قاعدة جنبى هايدى

    و ورايا وسام (المتفوقة الل كانت معايا فى اعدادى)

    كانت قاعدة فى التختة الأولى من الصفوف الل فى النص : غادة

    أحيانا كنت باجى أقعد جنبها

    الل كان بيدينا الانجليزى : مستر شريف الل كنت مش طايقاه

    كان لا يفقه أى شىء فى الانجليزى

    الفصل بتاعى كله سقط فى الانجليزى ما عدا : أنا و هايدى و وسام و غادة

    ___________________________

    فى يوم

    كان مستر شريف بيحل قطعة انجليزى معانا

    القطعة كانت بتتكلم عن امراض الجهاز التنفسى

    و كان من ضمنها كلمة : Tuberculosis

    و بتتقرا : تيوبر كلوسيس

    هو قراها : طابرقلوظص

    البنات بيسألوا المستر : يعنى إيه طابرقلوظص؟؟

    فقال : يعنى إسهال

    الحقيقة أنا إتجنيت

    قومت وقفت و قولت : إزاى يا مستر قطعة بتتكلم عن جهاز الامراض التنفسى تتكلم عن الاسهال

    فرد و قال : يبقى إمساك

    قولت فى سرى : لا بقى دا إنت حمار

    قولت له : يا أستاذ الاسهال و الامساك امراض جهاز هضمى مش جهاز تنفسى

    فقال : ما هو ممكن الواحد يجى له دور برد و اسهال فى نفس الوقت

    لما رجعت البيت سألت أمى (دكتورة)

    يعنى إيه طابرقلوظص ؟؟

    إيه إيه ؟؟

    طابرقلوظص

    ورينى الكلمة

    تيوبر كلوسيس

    ديه يعنى إيه ؟؟

    سُل

    الحقيقة : أنا تأكدت وقتها إنى ح أضيع فى الانجليزى

    روحت أخدت مجموعة تقوية فى الانجليزى فى الكنيسة الل جنبنا
    وضعت 18-04-2016 في 06:50 AM بواسطة +إيرينى+ +إيرينى+ غير متصل
  12. Old Comment
    الصورة الرمزية +إيرينى+
    فى أحد الأيام

    البنات فى الفصل جابوا معاهم أحد المجلات عليها صورة رجل و البنات كلها حاضنينه

    جاءت واحدة تورينى الصورة

    قولتلها : مالهم كلهم كدة هيمانين فيه ؟

    قالت : انتى ما تعرفيش مين دا ؟؟

    قولت لها : لا _ مين دا ؟؟

    وضعت يدها على شفايفها و بدا على وجهها التعجب الرهيب

    و قالت : بجد و الله مش عارفة مين دا ؟؟

    قولت : صدقينى و لا عمرى شوفته

    فقالت لبنات الفصل كله و هى رافعة المجلة لفوق : إلحقوا يا بناتش _ دشيه مش عارفة مين دشا

    بنات الفصل فى صوت واحد : أحييييييييييييييييييييه

    قولت لهم : ها طلع مين الأخ ؟

    فقالوا : يا بنتشى أميتابتشان

    قولت لهم : يا للاستفادة _ و دا حيدخل معانا فى المنهج ؟ - ايه سر اهميته منك ليها ؟؟

    قالت (الل كانت بتكلمنى) : يا بنتى دا الممثل الهندى الل بيطير دا و يموت الأعداء

    قولت : لعل طيرانه هو سبب هيمانتكم فيه ؟

    قالت : هو انتى يا بنتى ما لكيش فارس أحلام

    قولت : أكيد أتمنى فارس مش عصفورة بتطير

    قالت : عصفورة ؟؟ دا بيطير زى النمر الل بيهجم على الفريسة

    قولت : يعنى أحلم أتجوز نمر ؟؟ _ روحى ذاكرى منك ليها _ أنا أخرى شكرى سرحان

    قالوا لى : ما تعرفيش طيب ممثلين أجانب ؟؟

    قولت : شارل شبلن

    الفصل كله اتقلب ضوحك
    وضعت 21-04-2016 في 07:27 AM بواسطة +إيرينى+ +إيرينى+ غير متصل
  13. Old Comment
    الصورة الرمزية +إيرينى+

    قربت أيام الامتحانات

    لاحظت أمى : أن أختى بدأت تخيفنى و تثبط عزيمتى

    عندما كانت تقول : كيف ستدخلين كلية محترمة و انتى يادوب أخدتى مجموعة عبيطة فى الانجليزى ؟؟

    فقررت أمى إرسال أختى و أخى (التوأم) فى أى حتة بعيد عنى

    و اتفقت هى و أبى على إرسالهم ليعيشوا عند عمتى (ليس لديها أبناء) فى فترة الامتحانات و قبلها بحوالى اسبوعين

    و قد كان فعلا

    و هدأت أنا فعلا من التوتر الذى كانت تبثه لى أختى يوميا

    و بدأت الامتحانات

    كان أول يوم امتحان عربى و أنا أصلا خايبة فيه

    كنت متوترة

    عندما يصيبنى التوتر : تتسد نفسى عن الأكل و الشرب

    قومت الصبح : ماما حطت لى الفطار

    ساندويتشات جبنة تركى و كوباية شاى بلبن

    نفسى مسدودة مش قادرة _ حتى ريحة الاكل مش طايقاه

    غصبت على نفسى لما لاقيت أمى ح تعيط عشان آكل

    و أكلت نص رغيف جبنة تركى و ربع كوباية الشاى باللبن

    و نزلت للامتحان

    أول يوم : أمى وصلتنى للمدرسة و لما دخلت المدرسة و قفلوا الباب لاقيتها لسة واقفة برة (هايدى هى الل اخدت بالها و قالت لى) شوفتها بين الحديد الكريتال بتاع باب المدرسة

    روحت لها (و أنا جوة الحوش) : ما تروحى يا ماما ترتاحى _هو انتى ح تحلى بدالى ؟؟

    أنا واقفة لو احتاجتى حاجة

    احتاج إيه يعنى ؟؟ روحى البيت _ ما تعمليش زى بياعين الجبنة و تقفي لى كدة على الباب _ انتى دكتورة محترمة

    حاضر يا ستى

    بدأ امتحان اللغة العربية : كان صعب عليا جدا

    جاوبت الل أعرفه _ و ألفت الل ما أعرفوش


    وضعت 22-04-2016 في 07:07 AM بواسطة +إيرينى+ +إيرينى+ غير متصل
  14. Old Comment
    الصورة الرمزية grges monir
    اقتباس:
    جاوبت الل أعرفه _ و ألفت الل ما أعرفوش
    مبدأ عالمى مصرى فى الامتحانات
    متسبش حاجة فاضية
    انا فاكر وانا فى الكلية بنت كتبت اغنية فى ورقة الاجاية ههههه
    وضعت 24-04-2016 في 12:15 PM بواسطة grges monir grges monir غير متصل
  15. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة grges monir View Comment
    مبدأ عالمى مصرى فى الامتحانات
    متسبش حاجة فاضية
    انا فاكر وانا فى الكلية بنت كتبت اغنية فى ورقة الاجاية ههههه
    ما وصلتش انا للمرحلة ديه
    وضعت 25-04-2016 في 06:29 AM بواسطة +إيرينى+ +إيرينى+ غير متصل
  16. Old Comment
    الصورة الرمزية +إيرينى+
    جه يوم امتحان الانجليزى

    و أنا طبعا ما فييييييييييييييييش

    ال grammars كلها داخلة فى بعض

    ما عنديش كلمات كافية فى نافوخى

    دخلت الامتحان على أد فهمى

    الامتحان جه صعب جدا

    و بدأ التأليف على ودنه

    سمحوا بالغش فى اللجنة لما البنات أغمى عليهم و عشان كان معانا بنت إسمها أمينة (أبوها موجه عربى)

    أمينة غششتنى سؤال : طلعت إجابتها غلط و أنا كنت كاتبة الصح

    لا أعلم إن كانت تقصد و لا لأة

    وضعت 25-04-2016 في 06:34 AM بواسطة +إيرينى+ +إيرينى+ غير متصل
  17. Old Comment
    الصورة الرمزية paul iraqe
    يا باشمهندسة

    الذي اعرفه في مرحلة الاعدادية والثانوية (هنا في بغداد ) خصوصا للبنات - كانت توجد لديهم احتفاليات او نشاطات مدرسية كبيرة وكثيرة جدا

    مثلا - اعمال يدوية
    حياكة
    رسم
    تطريز

    اعمال طبخ وتففن في صناعة الحلويات والمعجنات


    هل كانت لديكم في هذه المرحلة هكذا نشاطات ؟

    واذا كان الجواب نعم

    فأي النشاطات كنتي متميزة فيها ؟

    وشكرا
    وضعت 25-04-2016 في 09:29 AM بواسطة paul iraqe paul iraqe غير متصل
  18. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة paul iraqe View Comment
    يا باشمهندسة

    الذي اعرفه في مرحلة الاعدادية والثانوية (هنا في بغداد ) خصوصا للبنات - كانت توجد لديهم احتفاليات او نشاطات مدرسية كبيرة وكثيرة جدا

    مثلا - اعمال يدوية
    حياكة
    رسم
    تطريز

    اعمال طبخ وتففن في صناعة الحلويات والمعجنات


    هل كانت لديكم في هذه المرحلة هكذا نشاطات ؟

    واذا كان الجواب نعم

    فأي النشاطات كنتي متميزة فيها ؟

    وشكرا

    المفروض ان فيه حصة نشاط طبعا

    بس ما كناش بنعمل حاجة

    أنا حتى لا أتذكر هذه الحصص

    _______________

    بالنسبة لى أنا كنت بأرسم حلو

    أو بمعنى أصح : كنت بأعرف أنقل

    يعنى لو جبت لى صورة مثلا

    و طلبت منى أنقلها : ح أنقلها

    بس كانت المشكلة الوحيدة عندى فى النقل : إن كان بينطبع المود بتاعى على الصورة

    يعنى لو حد أنا بأحترمه : بتطلع الصورة فيه طابع الاحترام

    حد مش طايقاه : بيطلع شكله مكشر أو بشع لكن ملامحه صحيحة

    و ديه كانت مشكلتى

    فلو كان حد يطلب منى إنى أنقل صورته على ورقة كبيرة : كنت بأعتذر


    وضعت 26-04-2016 في 06:35 AM بواسطة +إيرينى+ +إيرينى+ غير متصل
  19. Old Comment
    الصورة الرمزية +إيرينى+
    جاء يوم امتحان الجبر و امتحان الرسم (فى يوم واحد)

    الحقيقة الامتحان جه سهل جدا

    بس كان العيب الوحيد الل فيه : إن أول مسألة كانت هى الل فيها التريكة

    يعنى هى المسألة الصعبة الوحيدة

    فطبعا : البنات لما حاولوا فى المسألة الأولى و اخدت منهم وقت و ما عرفوش يحلوها : أغمى عليهم

    و تانى يوم الجرائد كتبت عن الحكاية ديه

    الصراحة أنا فى الأول وقفت فى ايدى المسألة

    سيبتها و حليت باقى الامتحان فى نص ساعة

    و رجعت لذات المسألة تانى و مخمخت فيها

    و حلتها

    لكن غلطت غلطة بسيطة جدا (نقصونى عليها نص درجة)

    ___________

    أتذكر أيضا نظرة مشرف اللجنة إلىَّ جيدا

    عندما رأى أنى الوحيدة فى اللجنة الل خلصت الامتحان و هادية جدا
    -------------------------

    طلعت من الامتحان قابلت بنت عمى (الل أبوها موجه) فى الحوش لاقيتها شبه منهارة

    قولت لها : إهدى عشان تحلى الرسم

    قالت لى باكية : ح أسقط يا ايرينى ح أسقط

    وضعت 26-04-2016 في 07:00 AM بواسطة +إيرينى+ +إيرينى+ غير متصل
  20. Old Comment
    الصورة الرمزية +إيرينى+
    كنت أحلم أن أصبح مُعَلِمة

    لم أحلم أبدا و لم أكن أريد أن أكون مهندسة

    لم تعجبنى الهندسة : لأنى وجدتها وظيفة ثقيلة الحمل على النساء (متأثرة بوظيفة أبى الشاقة)

    لم يعجبنى الطب أيضا و بالأخص النبتجيات و الاستقبال (متأثرة بوظيفة أمى)

    أحببت أن أكون حرة

    أحببت ألا أتحمل مسئولية شىء سوى مسئولية الحصص

    تمنيت أن أكون مُعَلِمة لأحصل على أجازة الصيف و أجازة نصف العام التى لا يحصل عليها أحد من الذين يعملون بالوظائف الاخرى

    هذا ما تمنيته

    و لكن

    جاءت نتيجة الثانوية العامة مخيبة لآمالى

    فأصبح مجموعى أعلى بكثير من كلية التربية

    كان مجموعى 338/400 = 84.5%

    أيامها كان المجموع دا كبير

    كان فى يولية 1992

    بدأت أضع رغباتى و كدت أكتب أول رغبة : كلية التربية جامعة الاسكندرية

    إلا أن أبى و أمى تحولا الى أمنا الغولة

    و قاما ووقفا قصاد حلمى الجميل

    لأجد أبى يمسك بورقة الرغبات و يبدأ هو (و ليس أنا) فى وضع رغباته و رغبات أمى

    يومها كنت فى غاية الأسى

    و بدأت الرغبات فى وضع كليات القمة فى الأول و كانت آخر رغبة هى كلية التربية

    حلمى أصبح فى الأسفل

    و كان أول حلم أدفنه فى حياتى

    كانت أول سنة يدخلوا فيها البرمجة (الكمبيوتر) فى التنسيق

    و يبدو إن كان فيه لخبطة فى البرنامج

    كلية الهندسة جامعة الاسكندرية قبلت من 338.5

    يعنى أعلى من مجموعى ب 0.5 درجة

    فأصبحت فى كلية الهندسة جامعة طنطا

    و لأنه كان يوجد خطأ فى الكمبيوتر

    تم إرسال خطاب من كلية الفنون الجميلة جامعة الاسكندرية بقبولى فيها

    لم يعد للأمر أهمية بالنسبة لى (جميع الكليات ليست حلمى )

    ثم أعلنوا فى الجرائد أنه يوجد خطأ ما

    و يمكنك التعديل

    فتم تحويلى الى كلية الهندسة جامعة طنطا (أوتوماتيك)

    ثم قال لى أبى : ستذهبين يوميا من الاسكندرية الى طنطا (حوالى ساعة و نص بالقطار دا غير المواصلات الداخلية)

    فأجبته : كماااااااااااااااان ؟؟

    وجدنى أبى فى منتهى التعاسة

    و لكنى بطبيعتى أرضخ للأمر الواقع سريعا

    فقدم أبى طلبا فى كلية الهندسة جامعة الاسكندرية للموافقة على تحويلى من طنطا : تم الموافقة على طلبه بسبب أن الفرق نصف درجة فقط

    و بدأت حياتى الجامعية

    و انتهت مرحلة المدرسة


    ______________

    إبنة عمى : رسبت و عادت الثانوية العامة مرتين و دخلت كلية تربية نوعية

    أخيها التوأم : دخل كلية زراعة و عاد الثانوية العامة مرتين و دخل فنون جميلة قسم عمارة

    وضعت 27-04-2016 في 07:42 AM بواسطة +إيرينى+ +إيرينى+ غير متصل
 

الساعة الآن 08:33 PM.



دعم خاص من vBulletin لمنتديات الكنيسة
©2000 - 2018، Jelsoft Enterprises Ltd
جميع حقوق الطبع محفوظة لمنتديات الكنيسة