منتديات الكنيسة

العودة   منتديات الكنيسة المدونات مجرد أفكار

Rating: 2 votes, 5.00 average.

ذكريات المدرسة غير السعيدة

وضعت 05-01-2016 في 06:29 AM بواسطة +إيرينى+

كنت تلميذة ذكية جدا

يعتمد تفوقى على شرح المدرس

لو لم يشرح : رسبت

لو شرح تفوقت

فلم يكن أحد فى البيت يساعدنى

أبى الذى يعمل مهندس ينزل من البيت (7صباحا) قبل أن أذهب الى المدرسة و يعود بعد عودتى (4~5مساء) بساعات منهك القوى

و أمى التى تعمل طبيبة تاخد يومين نوباتجية فى الاسبوع لتحسين الدخل فتبدأ 2 ظهرا لتعود تانى يوم الثامنة صباحا

و باقى الايام تنزل للعمل معى تقريبا عدا يوم الأحد و تعود فى حدود 2~3 العصر

لا يوجد حل سوى الاعتماد عل نفسى
وضعت في قسم غير محدد
المشاهدات 17597 التعليقات 143 تعديل الكلمات الدلالية
Total Comments 143

التعليقات

  1. Old Comment
    الصورة الرمزية +إيرينى+
    فى تانية ابتدائى كنت فى مدرسة خاصة

    اسمها مدرسة التعاون

    كان الناظر اسمه فهمى

    و من الواضح أنه لا تعاون و لا فهم

    ما علينا

    كانت المُدَرِسة (المُعَلِمة) بتقول عن نفسها ان على راسها ريشة

    لأن فيه خصلة شعر فى مركز شعرها لونها فاتح

    و كانت بتفرج زمايلها على الريشة (الخصلة)

    هذه المُعَلِمة فى يوم طلبت من كل الفصل ان نفتح صفحة 7 فى كتاب الحساب

    ففتحت صفحة 7

    و اخذت تصحح لكل التلاميذ هذه الصفحة

    و جاء الدور عليا

    الصفحة فارغة ليس بها إجابات

    فانهالت عليا بالشخط و النطر

    ثم رفعتنى من شعر رأسى (الذى كان وقتها طويل)

    و مسحت بيَّ الأرض (بجسمى)

    فكان الألم فى رأسى من شد الشعر و الألم فى جسمى من زحفى على الأرض

    كنت اصرخ و اصرخ حتى تركتنى

    ظللت أبكى اليوم كله بكاءً مرًا

    فأنا الابنة المدللة لم أُضرب من قبل

    فما هذا الذى يحدث ؟؟

    رجعت الى البيت شعرى منكوش و مريلتى متسخة جدا و متشحتفة بكاء

    طبعا أمى سألتنى فحكيت لها

    تانى يوم أمى ذهبت معى الى المدرسة

    و اشتكت المُعَلِمة للناظر فهمى الذى بدوره استدعى المُعَلِمة

    فاسرعت مجاوبة : بنتك بليدة

    أمى : حتى لو بليدة تضربيها ليه ؟؟

    لا أتذكر باقى الحوار

    كل ما أتذكره إن ماما فى الآخر اتفقت معاها إنها تدينى درس خصوصى فى البيت

    و إذ فجأة فجأة : بقيت الأولى عل المدرسة كلها

    لا تخرج قبل أن تقول سبحان الله _ له فى خلقه شئون
    وضعت 06-01-2016 في 07:15 AM بواسطة +إيرينى+ +إيرينى+ غير متصل
  2. Old Comment
    الصورة الرمزية +إيرينى+
    فى تالتة ابتدائى و فى ذات المدرسة

    كانت المُدَرِسة (المُعَلِمة) قصيرة و طخينة و سمرا

    كنت دائما أشعر أنها دادة أو بوابة

    كان شكلها وحش و حركتها بطيئة كانت مملة

    كانت تجلس طوال الحصة على كرسى عند باب الفصل بتعمل تريكو أو كروشيه

    ما فيش شرح

    مستوايا إنحدر لمرحلة الصفر

    صفر فى العربى

    صفر فى الحساب

    صفر فى الانجليزى

    و الكحك كان يملأ الشهادة

    جاءت أمى تقابلها ففتحت أمامها كشف به جميع أسماء التلاميذ و درجاتهم

    المُدَرِسة (المُعَلِمة) : شايفة بنتك ؟؟ كله كحك

    أمى : ما كاتش كدة السنة الل فاتت

    المُدَرِسة (المُعَلِمة) : شايفة دعاء ؟؟ شايفة التفوق ؟

    و أخذتنى أمى و ذهبنا الى البيت و بدا عليها الضيق

    و ظللت (أنا) طوال السكة خافضة رأسى الى الأرض

    كنت أشعر إنى خزلت أمى (الطبيبة) أمام الدادة
    وضعت 07-01-2016 في 05:53 AM بواسطة +إيرينى+ +إيرينى+ غير متصل
  3. Old Comment
    الصورة الرمزية grges monir
    منتظر باقى المعاناة التعليمية
    طيب سؤال
    لما كان على ايامك كدة وتقولى ايام غير سعيدة
    دلوقتى العيال تقول اية
    المراحل النهائية فى جميع الشهادات حاليا لاتذهب للمدرسة اطلاقا
    وضعت 07-01-2016 في 10:40 AM بواسطة grges monir grges monir غير متصل
  4. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة grges monir View Comment
    منتظر باقى المعاناة التعليمية
    طيب سؤال
    لما كان على ايامك كدة وتقولى ايام غير سعيدة
    دلوقتى العيال تقول اية
    المراحل النهائية فى جميع الشهادات حاليا لاتذهب للمدرسة اطلاقا
    دليل ان المدارس ما بقالهاش قيمة
    وضعت 08-01-2016 في 05:03 AM بواسطة +إيرينى+ +إيرينى+ غير متصل
  5. Old Comment
    الصورة الرمزية +إيرينى+
    فى سنة تالتة ابتدائى فى مدرسة التعاون

    سكننا فى شقة جديدة

    كان فى وشها مدرسة حكومة

    بابا قرر نقلى أنا و اخواتى الى هذه المدرسة الحكومة

    و لأن سنى كان صغير تم قبولى فى المدرسة بشرط إنى أنزل سنة

    فأصبحت فى تانية ابتدائى (لتانى مرة )

    لما نجحت و دخلت تالتة ابتدائى

    كانت بتدينى مُعَلِمة (مُدَرِسة) قصيرة

    و الجزء الأسفل من جسمها مليااااااااااااااااان جدا عن الجزء العلوى

    كانت بتعمل أوصة على أورتها من الناحية اليمين

    الأوصة كانت بتغطى الحاجب اليمين

    و كان شعرها طوييييييييييييييييييييييييييييييل

    كانت بتلفه كحكة حوالين راسها من وراء و كانت الكحكة كبيييييييييييييييييييييييرة جدا

    كانت خمرية

    أعطيتها لقب ( نجاة القصيرة) - كان إسمها نجاة

    لكن يا منجى من هذه النجاة

    يتبع


    وضعت 08-01-2016 في 06:00 AM بواسطة +إيرينى+ +إيرينى+ غير متصل
    Updated 08-01-2016 at 06:03 AM by +إيرينى+
  6. Old Comment
    الصورة الرمزية +إيرينى+
    كنت بأطلع الأولى على الفصل

    و لا أعلم لماذا كانت نجاة هذه تضربنى عمال على بطال

    كانت العصاه فى يدها أطول من جسمها

    كرهت حياتى بسببها

    لغاية لما فى يوم سمعت أمى و هى بتحكى مع أبى و بتقول له

    اقتباس:
    أنا بأشوف المدرسات و هن بيضربوا العيال

    بين كل عصاه و التانية العيل يقعد يفرك إيديه و يتحايل إنها ما تضربهوش

    تكون هى ريحت إيديها تقوم تنزل عليه بالضربة التانية أقوى من الأولى

    مع إن العيل لو مد إيديه بسرعة الضربة ح تبقى أخف دا غير إن إيديه ح تبقى نملت شوية
    هوووووووووووووووووووب نزل عليا الوحى

    قولت فى نفسى المرة الل جاية لما ح إنضرب من نجاة مش ح أديها فرصة تريح إيدها

    ح آخد العشر عصياااااااااااااااااااان ورا بعض

    و قد كان

    طلعتنى برة و نزلت عليا كانت ترجع بذراعها و هى ممسكة العصا الى الخلف و تنزل على يدى بكل قوتها (لن أنسى هذا اليوم ما حييت)

    1-2-3-4-5-6-7-8-9

    جيت فتحت ايدي عشان آخد ال 10

    لاقيت دراعها وجعها جدا لدرجة إنها هى اللى بكت

    و جلست على كرسيها رامية رأسها على الترابيزة باكية بشدة

    و إذ فجأة إثنتين من زميلاتى فى الفصل ( رشا و مها ) يقومان بحنية ليطبطبا عليها

    آه يا جذم - هو مين الل إنضرب ؟؟

    من يومها و أنا قررت ألا أذاكر و ألا أؤدى فروضى

    حتى وصلت الى مستوى العشرون على الفصل بدل من الأولى

    و لم يعيرنى الترتيب أى إهتمام

    و هى أيضا من يومها تركتنى فى حالى و لم تضربنى مرة أخرى

    حتى إنى لم أقوم بعمل واجب نص السنة

    ضربت كل من لم يعمل الواجب عدا أنا

    لا أعلم لماذا حدث ذلك
    وضعت 08-01-2016 في 06:25 AM بواسطة +إيرينى+ +إيرينى+ غير متصل
  7. Old Comment
    الصورة الرمزية +إيرينى+
    دخلت رابعة ابتدائى

    كانت بتدينى العربى و المواد الاجتماعية : أبلة فوزية

    أبلة فوزية كانت قصيرة و طخينة و خمرية

    كانت بتلبس جيبات قصيرة ضيقة بفتحة من الخلف لتساعدها على المشى

    كنا نرى ساقيها العلويين من خلال هذه الفتحة

    عندما كانت تجلس كانت ترى ركبتيها بوضوح

    كانت لديها سيقان مبقلظة حتى أنى أعطتها لقب سرى : أبلة كوارع

    كان وجهها مربع

    كل ملامحها واضحة : عينان كبيرتان - أنف مضغوط - أما الفم فكان خديها السمينان يضغطان عليه فكان مكرمش

    كان شعرها قصير ناعم مجعد كانت بتعمل فرق على الجنب

    الشعر كان ملزق فى راسها حوالين الفرق

    أما باقى الشعر كان هايش

    شعرها كان خفيف : كنت تقدر تشوف فروة راسها بين خصل شعرها

    يتبع
    وضعت 10-01-2016 في 05:52 AM بواسطة +إيرينى+ +إيرينى+ غير متصل
  8. Old Comment
    الصورة الرمزية +إيرينى+
    فى رابعة ابتدائى بدأنا ناخد مادة الدين

    فى حصة الدين نذهب نحن المسيحيين مع أبلة جميلة تحت التاندة فى الحوش و السقعة عشان ناخد دين

    ما فيش فصل مخصوص
    ____________________________

    فى يوم غابت أبلة جميلة و كنا عندنا دين

    طبعا جلسنا (المسيحيين) فى الفصل مع زملائنا المسلمين

    و أمرتنا أبلة فوزية أن نربع إيدينا و ما نفتحش بؤنا بكلمة

    و كانت الحصة عن الآية القرآنية : وَأَعِدُّوا لَهُمْ مَا اسْتَطَعْتُمْ مِنْ قُوَّةٍ وَمِنْ رِبَاطِ الْخَيْلِ تُرْهِبُونَ بِهِ عَدُوَّ اللَّهِ وَعَدُوَّكُمْ وَآخَرِينَ مِنْ دُونِهِمْ لَا تَعْلَمُونَهُمُ اللَّهُ يَعْلَمُهُمْ ۚ وَمَا تُنْفِقُوا مِنْ شَيْءٍ فِي سَبِيلِ اللَّهِ يُوَفَّ إِلَيْكُمْ وَأَنْتُمْ لَا تُظْلَمُونَ

    و بدأ شرح أبلة فوزية

    مين يا ولاد عدو الله ؟؟ عدو الله يا ولاد هم الكفار _ طب بأة مين شاطر يقول لى مين هم الكفار ؟؟ هم الذين لا يشهدون الشهادتين

    يبقى يا ولاد ح نعد على أد ما نقدر من قوة لمييييييييييييييييييييين ؟؟

    التلاميذ : عدو اللااااااااااااااااااااااااااااااه

    أبلة كوارع : و مين هو عدو اللاااااااااااه ؟

    التلاميذ : الكفااااااااااااااااااااااااااااااار

    أبلة كوارع : الكفار يا ولاد هم الل ما بيشهدوش الشهادتين - فهمتوا يا ولاد ؟؟

    التلاميذ : أيوة

    فوضعت يدى على فمى _ فوجدت أبلة كوارع تنظر اليَّ و تحملق _ فنظرت إليها أنا الأخرى و أنا واضعة يدى على فمى
    و ظلت تحملق و ظللت أنا أحملق فيها
    و فجأة ضرب جرس الحصة

    علمت يومها : أنهم لا يحبوننا مهما قالوا أو فعلوا
    وضعت 10-01-2016 في 06:09 AM بواسطة +إيرينى+ +إيرينى+ غير متصل
  9. Old Comment
    الصورة الرمزية +ماريا+
    صحيح التعليم بايظ من زمان
    ودلوئتى باظ اكتر
    على رأى حمايا بعد ايام الملك مفيش تعليم
    وضعت 10-01-2016 في 04:24 PM بواسطة +ماريا+ +ماريا+ غير متصل
  10. Old Comment
    الصورة الرمزية ياسر رشدى
    ذكرك للتفاصيل بتاعة المدرسات فكرتني بالمدرسه الاعدادي اللي كنت فيها وكانت مختلطة وكان فيه مُدرسة رسم رائعة الجمال والديسك بتاعي كان لازق في ضهر المكتب بتاعها
    ودايما كانت بتلبس جوب لغاية الركب .. والمكتب بقي مكانش ليه مراية من قدام يعني اللي يوطي شوية يشوف الكرسي بتاع الميس ...
    وانا كنت شقي بطبعي .. مش عايز اقولك كم الاساتيك اللي كنت بوقعها عشان اوطي اجيبها من علي الارض هههههههههههههههه

    لغاية ف مرة بصتلي وقالتلي ياولد عيب كده بقالك فتره وانا مطنشة اومال لما تكبر هاتعمل ايه .. ههههههههههه
    كانت مفاجأة ومعرفتش ارد

    دا غير زميلتي نشوي بقي ...
    كملي وانا هابقي ارخم في مذكراتك شوية
    ملحوظة : المدرسة اللي مكنتش بتضربك ع الواجب اكيد عشان انتي مسيحية ومش عايزاكي متفوقة بقي زي المسلمين ... الخبيسة ههههههه
    وضعت 11-01-2016 في 03:31 AM بواسطة ياسر رشدى ياسر رشدى غير متصل
  11. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة +ماريا+ View Comment
    صحيح التعليم بايظ من زمان
    ودلوئتى باظ اكتر
    على رأى حمايا بعد ايام الملك مفيش تعليم
    أنا بأحكى يا ماريا عشان ما حدش يقول التعليم باظ

    دا يعنى على أساس إنه كان مظبوط قبل كدة ؟؟



    وضعت 11-01-2016 في 06:08 AM بواسطة +إيرينى+ +إيرينى+ غير متصل
  12. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة ياسر رشدى View Comment
    ذكرك للتفاصيل بتاعة المدرسات فكرتني بالمدرسه الاعدادي اللي كنت فيها وكانت مختلطة وكان فيه مُدرسة رسم رائعة الجمال والديسك بتاعي كان لازق في ضهر المكتب بتاعها
    ودايما كانت بتلبس جوب لغاية الركب .. والمكتب بقي مكانش ليه مراية من قدام يعني اللي يوطي شوية يشوف الكرسي بتاع الميس ...
    وانا كنت شقي بطبعي .. مش عايز اقولك كم الاساتيك اللي كنت بوقعها عشان اوطي اجيبها من علي الارض هههههههههههههههه

    لغاية ف مرة بصتلي وقالتلي ياولد عيب كده بقالك فتره وانا مطنشة اومال لما تكبر هاتعمل ايه .. ههههههههههه
    كانت مفاجأة ومعرفتش ارد


    اقتباس:
    المشاركة الأصلية كتبت بواسطة ياسر رشدى View Comment

    دا غير زميلتي نشوي بقي ...
    كملي وانا هابقي ارخم في مذكراتك شوية
    ملحوظة : المدرسة اللي مكنتش بتضربك ع الواجب اكيد عشان انتي مسيحية ومش عايزاكي متفوقة بقي زي المسلمين ... الخبيسة ههههههه
    خبيثة بالثاء مش بالسين

    وضعت 11-01-2016 في 06:11 AM بواسطة +إيرينى+ +إيرينى+ غير متصل
  13. Old Comment
    الصورة الرمزية +إيرينى+
    فى يوم تانى

    حصة أبلة فوزية

    بنت من فصل تانى بتخبط على باب الفصل و بتقول : أبلة جميلة عايزة ميشيل ييجى ياخد كراسات الدين

    فقام ميشيل بدون إستئذان من أبلة فوزية متجهًا صوب باب الفصل خارجًا الى أبلة جميلة

    فإنفعلت أبلة فوزية : إنت ولة ميشيل يا ولة

    الولد وقف مش عارف بتنادى ليه

    قالت : ماشى من غير استئذان يا كلب ؟؟

    و أمسكت برأسه و هاتك يا خبط رأسه فى سيف السبورة (اللى بيسقط عليها الطباشير) و عندما تركت يدها _ كان الولد يترنح و كاد أن يسقط فعلا

    لن أنسى هذا الموقف و بالاخص بعد موقف أعدوا

    تانى يوم جه ميشيل المدرسة و معاه أبوه و لا أعلم ما الذى حدث داخل حجرة الناظر

    لكن عندما بدأت حصة أبلة فوزية

    بدأتها بالاعتذار الى ميشيل

    فى داخلى : لم أستوعب الاعتذار _ كان يجب أن تأخذ عقوبة ما
    وضعت 11-01-2016 في 06:21 AM بواسطة +إيرينى+ +إيرينى+ غير متصل
  14. Old Comment
    الصورة الرمزية +إيرينى+


    فى يوم فى رابعة ابتدائى فى الفسحة

    سألتنى بنت إسمها رشا فى رابعة أول_ ديه غير رشا الل طبطبت على نجاة- (أنا كنت فى رابعة تانى)

    و قالت : إنتى كدة و لا كدة ؟؟

    كدة الأولانية : كانت بتعمل بالسبابة فى اليد اليمنى مع السبابة فى اليد اليسرى شكل صليب

    كدة التانية : كانت بتعمل كانت بتعمل بالسبابة و الوسطى فى اليد اليمنى مع السبابة و الوسطى فى اليد اليسرى شكل صليب برضوا


    فسألتها : إيه الفرق

    قالت لى :الأولانية صليب و التانية صليب عليه علامة غلط

    قولت لها مع إنى شايفة الاتنين صليب بس يعنى طالما إنك شايفة الأولانى صليب و التانى لأة يبقى أنا كدة و عملت بصوابعى السبابة علامة الصليب

    فنظرت إليَّ بنظرة إحتقار و هى تنظر من أعلى الى أسفل بعينيها على وجهى و عوجت شفايفها فى ذات نفس الوقت


    قولت فى سرى : هى ديه إستطاعتها من قوة




    وضعت 12-01-2016 في 07:34 AM بواسطة +إيرينى+ +إيرينى+ غير متصل
  15. Old Comment
    الصورة الرمزية +إيرينى+
    سأحكى موقف فى تالتة ابتدائى ثم أعود مرة أخرى لرابعة ابتدائى (افتكرته)

    كنت أنا و جاكلين و جيهان (قريبة الناظر "محمد الشيخ") نجلس بجوار بعضنا فى التختة

    جيهان عل الحرف - جاكلين جنب الحيطة _ أنا فى النص

    أبلة نجاة طلبت من الفصل كله عدم الكلام و الهدوء لأنها عايزة تستريح شوية

    قامت جاكلين عايزة تكلمنى - حازآها الكلمة أوى

    قامت مطلعة ورقة و كتبت لى فيها كلام _ خطها وحش جدا - ما فهمتش هى كاتبة ايه

    قومت ناقلة نفس الكلام فى ورقة تانية و اديتهولها

    قامت جيهان طلبت منى الورقتين

    إديتهم لها بدافع انها ح تكتب لى ترجمة خط جاكلين

    اوم ايه بأة

    أخدت الورقتين و اديتهم لأبلة نجاة

    اللى بدورها دب فيها الروح بعد ما كان شكلها شبه الميتين

    و قالت كل واحدة فيكم تجيب ولى أمرها بكرة و الل مش ح تجيب ولى أمرها ح تنضرب 10 عصيان

    رجعت البيت و حكيت لأمى - الل سألتنى هى عايزانى ليه _ حكيت لها القصة _ سألتنى كتبتى ايه فى الورقة - قولتلها ما اعرفش انا نقلت نبش الفراخ بتاع جاكلين

    المهم أمى جت تانى يوم

    مامة جاكلين ما جاتش و لا باباها

    قامت أبلة نجاة ضربت جاكلين 10 عصيان

    لما رجعت البيت سألت ماما : إيه المكتوب فى الورق

    قالت لى مكتوب ياحمارة يا جحشة

    قولت لها : انا ما اعرفش طبعا

    قالت لى : ما أنا قولتلها كدة برضوا


    منذ ذاك اليوم : لما يخاطب لسانى المدعوة جيهان
    وضعت 13-01-2016 في 05:28 AM بواسطة +إيرينى+ +إيرينى+ غير متصل
  16. Old Comment
    الصورة الرمزية +إيرينى+
    نرجعوا لرابعة ابتدائى

    كانت أبلة فوزية كل يوم بتدخل بعصاية طوييييييييييييييييييييييلة جدا

    كانت بتضرب البنات على كف اليد بالعصا

    و كانت بتمد الصبيان على القدمين

    كانت بتستظرف و هى داخلة علينا فى الحصة الأولى و فى يدها العصا الطويلة و فى عز الشتا و الدنيا بترخ برة و الجو تلج و تقول : مين عايز يتدفا ؟؟

    قصدها مين عايز ينضرب فيتدفا

    كانت حصتها بتصيبنى بالتوتر العصبى

    و لأنها كانت بتدي عربى و مواد احتماعية : كانت بتدخل الفصل كتير

    شكرت ربنا إن أبى و أمى مسيحيان

    لأنى كنت حابقى معاها فى حصة الدين كمان

    قررت فى يوم الهروب من حصتها

    لكن الى أين أذهب ؟؟

    الى دورة المياه ؟؟ : ريحتها وحشة لن أتحمل

    الى فصل تانى ؟؟ : لا مش ح ينفع

    الى أين ؟؟

    واحدة معايا فى الفصل - اسمها وسام كانت أشطر منى بكتييييييييييييير

    و مع كدة كانت بتنضرب بالعشر عصيان من أبلة فوزية

    المهم

    وسام اقترحت عليا إن أنا و هى و واحدة تالتة نروحوا الى مسجد المدرسة فى حصة أبلة فوزية

    لعمل لوحة نشاط

    و قالت لى : لو جيتى معانا ما حدش ح يفكر إننا فى المسجد

    راقت لى الفكرة جدا

    و ذهبت معهم بعد الفسحة مباشرة

    و جلسنا الى أن إنتهت حصة أبلة فوزية ثم رجعنا الى الفصل

    فى أثناء الحصة كانت أبلة فوزية تبحث عنا فى كل مكان

    و بالأخص أنا : لا أعلم لماذا !!

    و انتظرتنى عندما عدت

    و سألت : كنتوا فين ؟؟

    احنا التلاتة : فى المسجد

    فضلت تبحلق فى وجهى بتعجب و أنا فضلت برضوا أبحلق لها

    هى : بتعملوا إيه ؟؟

    إحنا التلاتة : النشاط


    كان نفسها تضربنا طبعا

    لكن كان فيه سبب منعها

    السبب فى المشاركة الل جاية
    وضعت 14-01-2016 في 05:36 AM بواسطة +إيرينى+ +إيرينى+ غير متصل
  17. Old Comment
    الصورة الرمزية +إيرينى+
    أبلة فوزية سألتنا : تحبوا تتمدوا منى و لا تنضربوا من ناظر المدرسة (كان ضربه مبرح)

    البنتين التانيين : هاتك يا عياط و معلش يا ابلة معلش و النبى

    أنا بقى مش مممكن اتحايل على حد قومت قلعت الجذمة

    نظرت إلىَّ و ضحكت

    لأنى أعرف أنها لا تمد البنات

    و ظللت تضحك و تضحك و لم تستطيع امساك نفسها عن الضحك

    ثم قالت : حسابكم معايا بعدين

    بس ما عملتش حاجة
    وضعت 15-01-2016 في 06:22 AM بواسطة +إيرينى+ +إيرينى+ غير متصل
  18. Old Comment
    الصورة الرمزية paul iraqe
    بصراحة يا باشمهندسة ايريني انا متعجب كثيرا جدا على ايام مدرستك

    انا واخي الاكبر مني تخرجنا من مدرسة القديس يوسف هنا في بغداد

    كانت مدرسة اهلية ومسيحية - مستواها التعليمي اكثر من ممتاز

    رغم انها كانت غالية كثير جدا قياسا للمدارس الحكومية والتي كانت

    مجانية -

    عموما كل اللي حصل معاكي محصلش معي او مع اخي الكبير

    كانوا معنا طلاب وطالبات مسلمين - لكن وبكل صدق اقوا كانت المدرسة

    والمعلمين والمعلمات وحتى الراهبات كانوا يعاملوهم معاملة ممتازة جدا

    وخصصوا لهم مدرس دين اسلامي لهم


    شكرا جزيلا لمجهودكم الخاص - وسابقى متابع
    وضعت 15-01-2016 في 04:55 PM بواسطة paul iraqe paul iraqe غير متصل
  19. Old Comment
    الصورة الرمزية grges monir
    تنفعى سينارست يا هندسة
    اسلةبك مشوق
    تقريبا انتى وعبود نفس المدرسة
    منتظرين باقى الحكاية
    ويارييييت تبقى بالتفصيل الممل وبلاوش كروتة
    وضعت 15-01-2016 في 09:59 PM بواسطة grges monir grges monir غير متصل
  20. Old Comment
    الصورة الرمزية +إيرينى+
    اقتباس:
    المشاركة الأصلية كتبت بواسطة paul iraqe View Comment
    بصراحة يا باشمهندسة ايريني انا متعجب كثيرا جدا على ايام مدرستك

    انا واخي الاكبر مني تخرجنا من مدرسة القديس يوسف هنا في بغداد

    كانت مدرسة اهلية ومسيحية - مستواها التعليمي اكثر من ممتاز

    رغم انها كانت غالية كثير جدا قياسا للمدارس الحكومية والتي كانت

    مجانية -

    عموما كل اللي حصل معاكي محصلش معي او مع اخي الكبير

    كانوا معنا طلاب وطالبات مسلمين - لكن وبكل صدق اقوا كانت المدرسة

    والمعلمين والمعلمات وحتى الراهبات كانوا يعاملوهم معاملة ممتازة جدا

    وخصصوا لهم مدرس دين اسلامي لهم


    شكرا جزيلا لمجهودكم الخاص - وسابقى متابع
    يمكن عشان كنت مدرسة خاصة

    المدارس الحكومية غير كدة

    استنى بس باقى الحواديت
    وضعت 17-01-2016 في 04:58 AM بواسطة +إيرينى+ +إيرينى+ غير متصل
 

الساعة الآن 03:03 AM.



دعم خاص من vBulletin لمنتديات الكنيسة
©2000 - 2017، Jelsoft Enterprises Ltd
جميع حقوق الطبع محفوظة لمنتديات الكنيسة