مالوش لازمة الكلام

alaakamel30 · 20 أبريل 2010

عيون الناس بترمينى
بمليون سهم
ماترموش بيدى
أبصلك ولا تردى
ولا تصدى
ولا تمدى ايدين العون
مضمون سكوتك تأييد لحكم غيابى
بينفينى خارج حدود قلبك
يا مين يدلنى إزاى اغير جلد قلبى
وأرش عليه شوية صبر
لأجل ما يحسش بيكى
مادمتى قدرتى تدى لفجرنا ضهرك
والزيف صبح مُهرك
بيدوس فى سكته أخضر و يابس
على قلبك سواد كابس
والواد اللى كان بيرسمك فجر
الليل شرب الوانه
واللوحة ماكملتش
لو شوفتيه فى يوم مهموم
أوعى يدور فى بالك
تسأليه مالك
مالوش لزوم البكا ع الهالك
مالكيش دعوة بشلال الدم الهادر
من قلبه يقول برىء
معادشى الطريق
بيتحمل مداولة
ولولا نص رغيف الحزن
المتغمس بكلمة حبيبى
مكانشى يبقى نصيبى
أعيش عريان حقيقى
متكتف بقيود الظلم
ماسك صولجان الحزن
متربع فوق عرش الغم
أهز فى جذع الهم
فيسقط مر فى ريق الحلم
ويسم فى بدن الشوق الفايض
ويقايض
الفرحة بمليون دمعة
تفر وتتبخر
أتأخر
كتير فرحى
وأنتى كنتى أخر امل
فى سلة اوهامى
مبقاش قدامى
غير أنى ارحل وبسلام
مالوش لازمة الكلام

Dona Nabil · 20 أبريل 2010

الله عليك يا علاء
استمتعت بكل كلمه لا بكل حرف نقشته هنا
ربنا يباركلنا فى موهبتك الجميله

alaakamel30 · 20 أبريل 2010

اهلا دونا
شكرا ليكى كتير على مجاملتك الرقيقة
مرورك اسعدنى جدا
هناك موضوع فى المنتدى العام للاخت اسميشيل بعنوان سوق عكاظ
ياريت تشاركينا فيه
اكيد مشاركتك هتعمل اثراء للموضوع
سلام المسيح معاكِ

Dona Nabil · 20 أبريل 2010

alaakamel30 قال:
اهلا دونا
شكرا ليكى كتير على مجاملتك الرقيقة
مرورك اسعدنى جدا
هناك موضوع فى المنتدى العام للاخت اسميشيل بعنوان سوق عكاظ
ياريت تشاركينا فيه
اكيد مشاركتك هتعمل اثراء للموضوع
سلام المسيح معاكِ

هاجى ايه انا جنب الاساتذه اللى بيشاركوا فى الموضوع
لكن حاضر يا علاء اكيد هشارك
وميرررسى على ذوقك
ربنا يبااركك

asmicheal · 20 أبريل 2010

تسجيل قراءة اولى

ربنا يفتح علينا
ونفهم بعد القراءة العاشرة
ونرد فى القراءة الحادية عشر

alaakamel30 · 20 أبريل 2010

asmicheal قال:
تسجيل قراءة اولى

ربنا يفتح علينا
ونفهم بعد القراءة العاشرة
ونرد فى القراءة الحادية عشر

تصدقى هتخلينى أعند معاكى واكتبلك حاجة تفهميها على 2020
هههههههههههه ربنا يعينك

alaakamel30 · 20 أبريل 2010

dona nabil قال:
هاجى ايه انا جنب الاساتذه اللى بيشاركوا فى الموضوع
لكن حاضر يا علاء اكيد هشارك
وميرررسى على ذوقك
ربنا يبااركك

أساتذة مين بس يا أستاذة
إحنا غلابة بننفس عن نفسنا بكلمتين خايبين
المسيح يحافظ عليكِ دونا

besm alslib · 20 أبريل 2010

كلام اقل ما يقال عنه انه رائع

ماسك صولجان الحزن
متربع فوق عرش الغم
أهز فى جذع الهم
فيسقط مر فى ريق الحلم
ويسم فى بدن الشوق الفايض
ويقايض
الفرحة بمليون دمعة
تفر وتتبخر
أتأخر
كتير فرحى
وأنتى كنتى أخر امل
فى سلة اوهامى
مبقاش قدامى
غير أنى ارحل وبسلام
مالوش لازمة الكلام

مالوش لازمه الكلام

احسن منعيش تاني باوهام

اوهام عشقك واعيش تاني بظلمك

واكرر وهم عشتو وهو وهم حبك

ما دمت خلاص بايع

وقرارك بقى واقع

فليه من تاني نتكلم

وليه نكرر ونتالم

ونسمح تاني باننا نعيش في احلام

اعذرني لكن مالوش لازمه الكلام

بصراحه كتاباتك دايما مبهره وتستحق المتابعه

شكرا اخي على ابداعاتك

وبانتظار جديدك باستمرار

alaakamel30 · 20 أبريل 2010

يا سلام يا سلام
احنا معانا موهبة هنا ومش عارفين
اختنا الكريمة بسم الصليب
انتى بتكتبى عامى بشكل جميل وعندك القدرة على المساجلة
جميل تواصلك ورائع حضور ذهنك وسرعة بديهتك
أشكرك على المرور ومجاملتك الرقيقة
سلام المسيح اترك لكِ

asmicheal · 20 أبريل 2010

مش عارفة هتستحمل مداخلتى
ولا هتبطلك كتابة لحد سنة 20200

هههههههههههههههههههههههههههههههههه

بس لولا ان الكلام عجبنى
وجدا
لولا انى شرحت قصيدتك التشريح الجنائى دة

هههههههههههههههههههههههههه

عيون الناس بترمينى

بمليون سهم
ماترموش بيدى
أبصلك ولا تردى
ولا تصدى
ولا تمدى ايدين العون
مضمون سكوتك تأييد لحكم غيابى
بينفينى خارج حدود قلبك

اية القسوة دى
ان كانت من تحب لا تشعر بما تعانية
وتكون اول من يتعاطف معك
ويصدقك
ويصدق القول والفعل معك
يبقى فين المحبة

يا متر
وان كل الناس اصدرت احكامها عليك
ففى قلب من تحب انت الدنيا فى واحد
تستميت دفاعا عنك
الحب بالذات بيبان بالمواقف الصعبة
اما فى كل وقت فالمجاملة والمداهنة لزقت حياتنا كلها
بالفاظ بلا معانى
بلا افعال
بلا عمق
كان الناس اكتفت بالكلام

يا مين يدلنى إزاى اغير جلد قلبى
وأرش عليه شوية صبر
لأجل ما يحسش بيكى

الحب بوجهة نظرى الغلبانة
ليس ان تتغير لترضيك او ترضيها
انما الحب بجد ان تحتوى اخطائك وتغفر خطاياك
وترقى بك للافضل
تنزع اشواك الشر داخلك
وترسى مملكة الشفافية والنقاء والخير فيك

الحب ان تقبل الاخر وتحترمة بعيوبة التى تراها وتعرفها
فالحب الاعمى شهوة تافهة تطل عليها نيران التجارب تفنيها وتهلكها
انت مش هتحب مامور قسم يا متر
انت هتحتوى روح ونفسية واحساس
تحتوى ولست تملك
وبالاحتواء تتحقق الملكية
بغير اختلاط ولا امتزاج ولا تغيير

الحب الحقيقى يحررك لاقصى حدود ويسمح لك ان تكون بطبيعتك

لا تغير ولا تذوق ولا تعدل لتحافظ علية

مادمتى قدرتى تدى لفجرنا ضهرك
والزيف صبح مُهرك
بيدوس فى سكته أخضر و يابس
على قلبك سواد كابس

فعلا دة سواد اسود كابس
اذ
مادام احد طرفى العلاقة الانسانية
بصفة عامة وليس المحبين بصفة خاصة

قادر على الانفصال بذاتة
واعطاء ظهرة للاخر
اذا
فليس هناك حب حقيقى

لان الحب امتزاج لكيان واحد بجسدين متكاملين
متالفين
وليس كيانين يتصلوا لينفصلوا لاثنين

واعتقد دة دور الروح القدس
لذلك دائما
لا اصدق اى حب خارج اطار الروح القدس
لان اى حب مهما كان قويا
ليس لة قدرة الاستمرار كيان واحد بجسدين الا باللة لة كل المجد

اى حب خارج هذا الاطار هو عبث او شهوة او علاقة مؤقتة
وليس حياة حقيقية

والواد اللى كان بيرسمك فجر
الليل شرب الوانه
واللوحة ماكملتش
لو شوفتيه فى يوم مهموم
أوعى يدور فى بالك
تسأليه مالك
مالوش لزوم البكا ع الهالك
مالكيش دعوة بشلال الدم الهادر
من قلبه يقول برىء
معادشى الطريق
بيتحمل مداولة

رسم الاوهام نور الحقيقة بيدوبة
مهما كان ابداعة وتفانين الوانة

ولولا نص رغيف الحزن
المتغمس بكلمة حبيبى
مكانشى يبقى نصيبى
أعيش عريان حقيقى

هية كلمة غموس
(حبيبى) دى عمرين يوهبوا لبعض
مش كلمة ولا قاموس اغانى
واللى يتغطى بكلمة بلا عمق ولا حياة فكانة مش متغطى
هو بيقضى ايام اوقات لكن لا يمكن يكون يحيا حياة بجد

ولا اية يا متر

متكتف بقيود الظلم
ماسك صولجان الحزن
متربع فوق عرش الغم
أهز فى جذع الهم
فيسقط مر فى ريق الحلم
ويسم فى بدن الشوق الفايض
ويقايض
الفرحة بمليون دمعة
تفر وتتبخر
أتأخر
كتير فرحى

الروعة كلها بتلك الفقرة رغم نزيف الالم المغموس بمرارة تجارب مرة المطروح على ارضية التشاؤم
النابت نزيف احباط والم

وأنتى كنتى أخر امل
فى سلة اوهامى
مبقاش قدامى
غير أنى ارحل وبسلام

مالوش لازمة الكلام

مين امل اخت فيرونيكى وايمان
حضرتك ماشى ابجدى

هههههههههههههههههه

اخر امل بيكون باخر نفس
واللى يحط املة باى انسان
كانة يبيع عمر الابدية بوهم

قصيدة تنزف واقعية
مولمة محبطة
ما لوش لازمة الكلام بقى

ههههههههههههههههههههههههههههه

TULiP TO JESUS · 22 أبريل 2010

يااااااااااااااااااااااااااااااة يا استاذ علاء
روووووووووووووووووعة مع كمية الالم ونزف المشاعر اللي فيها قصيدتك انما اقولك كما قال نزار
ادخلتني مدن الاحزان وانا في حاجة اليها
احلا تقيم لاقوي معاني واحلا تشبيهات
في انتظار ابداعك دايما

alaakamel30 · 22 أبريل 2010

اختنا الكريمة راجعة ليسوع
لا اعلم كيف أبدأ وكيف أنتهى
ولكن كل الشكر على تقييمك الذى لا استحقه
جميل هو مرورك ورائعة هى كلماتك
سلام المسيح

alaakamel30 · 22 أبريل 2010

بس لولا ان الكلام عجبنى
وجدا
لولا انى شرحت قصيدتك التشريح الجنائى دة

طيب تسمحيلى اشرح مشاركتك انتى كمان هههههههههههه
على فكرة انا درست التشريح فى الدراسات العليا يعنى أستاذ هههههههههههه

اية القسوة دى
ان كانت من تحب لا تشعر بما تعانية
وتكون اول من يتعاطف معك
ويصدقك
ويصدق القول والفعل معك
يبقى فين المحبة

يا متر
وان كل الناس اصدرت احكامها عليك
ففى قلب من تحب انت الدنيا فى واحد
تستميت دفاعا عنك
الحب بالذات بيبان بالمواقف الصعبة
اما فى كل وقت فالمجاملة والمداهنة لزقت حياتنا كلها
بالفاظ بلا معانى
بلا افعال
بلا عمق
كان الناس اكتفت بالكلام

أنا لا اؤمن بالحب الصادق الكامل
نعم هناك حب لا انكر ذلك ولكن كل انواع الحب مبنية على التبادل العطائى بمعنى عطاء وأخذ، ولا يوجد حب يعطى فقط حتى حب الأم لأطفالها،وبذلك يكون الحب ناقص تحكمه الأنا وتسيطر عليه الرغبات والأهواء.
ولذلك قال يسوع (أحبوا بعضكم بعضا كما احببتكم أنا)
لو وجد يسوع حب فى هذة الحياة كامل لأمرنا فى الآية السابقة بإتخاذ هذا الحب كنموذج،أنظرى عزيزتى ليعقوب ..لقد عمل أربعة عشر عاما فى حقل خاله ليفوز بمن احببها قلبه ولكن رغم ذلك لم يقول يسوع احبوا بعضكم كما أحب يعقوب راحيل بل قال كما احببتكم انا.
فى اعتقادى الراسخ ان الحب الكامل هو الحب الإلهى فقط أما كل ما يدور بيننا من علاقات حميمية ما هى إلا إنعكاس لقبس من نور الحب الإلهى ولكنه أبدا لم و لن يكون بنفس مقدار الصدق والبذل

الحب بوجهة نظرى الغلبانة
ليس ان تتغير لترضيك او ترضيها

عفوا انا لم أتطرق فى كلماتى إلى التغيير

لا اصدق اى حب خارج اطار الروح القدس
لان اى حب مهما كان قويا
ليس لة قدرة الاستمرار كيان واحد بجسدين الا باللة لة كل المجد

اى حب خارج هذا الاطار هو عبث او شهوة او علاقة مؤقتة
وليس حياة حقيقية

ربما يكون كلامك صحيحا ولكنك أسقطتى شيئا مهما من ذاكرتك
أنا ما زلت أعيش فى الحياة المدنية وليس فى صومعات الرهبان
قولك فيه كثير من المثالية ولكنى إنسان خاطىء،لو توصلت للحب الذى يقوده الروح القدس سأوجه كل مشاعرى تجاه الله لأنه الوحيد الذى يستحق وسألتحق بأول دير للمتوحدين.

رسم الاوهام نور الحقيقة بيدوبة
مهما كان ابداعة وتفانين الوانة

تبقى الاوهام احلاما مشروعة للرسم
حتى نكتشف زيف الأصل المرسوم

واللى يتغطى بكلمة بلا عمق ولا حياة فكانة مش متغطى
هو بيقضى ايام اوقات لكن لا يمكن يكون يحيا حياة بجد

عذرا..ابدا لم اتغطى بالكلمات
ولكنى احيانا كنت أنام بين جفونهن

الروعة كلها بتلك الفقرة رغم نزيف الالم المغموس بمرارة تجارب مرة المطروح على ارضية التشاؤم
النابت نزيف احباط والم

عفوا كلماتى لا تنزف إحباط ولكنها محاكاة للواقع بكل تفاصيله
العيب ليس فى كلماتى ولكن العيب فى واقعنا
نحن لا نعيش فى ملكوت رومانسى غلافه الخير وباطنه المحبة المطلقة
انظرى عزيزتى ماذا يقول الله عن ملكوته:
(وسيمسح الله كل دمعة من عيونهم والموت لا يكون فيما بعد ولا يكون حزن ولا صراخ ولا وجع فيما بعد لان الامور الاولى قد مضت)
فقط فى هذا المكان سيتحول حزنى إلى فرح

اخر امل بيكون باخر نفس
واللى يحط املة باى انسان

انا قلت أخر امل فى سلة اوهامى
أما أملى فى الله ليس بوهم

كده خالصين هههههههههههههههههههه
أشكرك اختنا الكريمة لتكبدك عناء الكتابة والرد
سعيد جدا بحوارك البناء
أدام الله وجودك فى منتدانا وخارجه بكل خير
سلام المسيح

asmicheal · 22 أبريل 2010

alaakamel30 قال:
طيب تسمحيلى اشرح مشاركتك انتى كمان هههههههههههه
على فكرة انا درست التشريح فى الدراسات العليا يعنى أستاذ هههههههههههه

كده خالصين هههههههههههههههههههه
أشكرك اختنا الكريمة لتكبدك عناء الكتابة والرد
سعيد جدا بحوارك البناء
أدام الله وجودك فى منتدانا وخارجه بكل خير
سلام المسيح

:download:

لا مش خالصين
فية كام نقطة محتاجة تعقيب
لان لباقة حضرتك العالية وذكائك
غطت على معنى
احب توضيحة

أنا لا اؤمن بالحب الصادق الكامل
نعم هناك حب لا انكر ذلك ولكن كل انواع الحب مبنية على التبادل العطائى بمعنى عطاء وأخذ، ولا يوجد حب يعطى فقط حتى حب الأم لأطفالها،وبذلك يكون الحب ناقص تحكمه الأنا وتسيطر عليه الرغبات والأهواء.
ولذلك قال يسوع (أحبوا بعضكم بعضا كما احببتكم أنا)
لو وجد يسوع حب فى هذة الحياة كامل لأمرنا فى الآية السابقة بإتخاذ هذا الحب كنموذج،أنظرى عزيزتى ليعقوب ..لقد عمل أربعة عشر عاما فى حقل خاله ليفوز بمن احببها قلبه ولكن رغم ذلك لم يقول يسوع احبوا بعضكم كما أحب يعقوب راحيل بل قال كما احببتكم انا.
فى اعتقادى الراسخ ان الحب الكامل هو الحب الإلهى فقط أما كل ما يدور بيننا من علاقات حميمية ما هى إلا إنعكاس لقبس من نور الحب الإلهى ولكنه أبدا لم و لن يكون بنفس مقدار الصدق والبذل

:download:

فلماذا خلق اللة حواء لادم ؟
اليس بالاحرى كان يكتفى بالحب الكامل الى اللة لة كل المجد

لضعف بشريتنا
وليس لقلة محبتنا
نحتاج للحب الناقص البشرى لكن بوجود وفاعلية روح اللة القدوس

ويوجد من استطاع فى ذبيحة حب
تقديم كل الحب الى اللة
بالتسامى بكل المشاعر الى اصل الحب كلة اللة لة المجد
بالرهبنة

لاحظ انى لا اناقش الزواج والرهبنة
انما احسست ان منطق حضرتك ان الحب العطائى
محتاج تعقيب

عفوا انا لم أتطرق فى كلماتى إلى التغيير

:download:

فعلا حقيقى انا اللى استفضت فى نقطة
بعيدة عن مقصدك

ربما يكون كلامك صحيحا ولكنك أسقطتى شيئا مهما من ذاكرتك
أنا ما زلت أعيش فى الحياة المدنية وليس فى صومعات الرهبان
قولك فيه كثير من المثالية ولكنى إنسان خاطىء،لو توصلت للحب الذى يقوده الروح القدس سأوجه كل مشاعرى تجاه الله لأنه الوحيد الذى يستحق وسألتحق بأول دير للمتوحدين.

:download:

الحياة المدنية ليست مبرر
ان تكون اقل من الحياة الرهبانية
اب الرهبان بالعالم كلة
الانبا انطونيوس
فى احد المرات وقف امام اللة يسالة بحب
مين يا ربى يحبك اكتر منى

فاعطاة اللة عدة امثلة
+الانبا بولا اول السواح
+امراتين متزوجتين وتعامل كل منهما الاخرى وازواجهن بطريقة ارضت اللة اكثر من رهبنة الراهب

+ رجل طبيب متزوج متصدق بحب بطريقة ارضت اللة ليضعها مثالا لراهب ترك العالم بكل ما فية ليهب نفسة الى اللة لة كل المجد

تبقى الاوهام احلاما مشروعة للرسم

حتى نكتشف زيف الأصل المرسوم

:download:

ولية الزيف ما يكونش بالرسام
وليس بالمرسوم

عذرا..ابدا لم اتغطى بالكلمات
ولكنى احيانا كنت أنام بين جفونهن

عفوا كلماتى لا تنزف إحباط ولكنها محاكاة للواقع بكل تفاصيله
العيب ليس فى كلماتى ولكن العيب فى واقعنا
نحن لا نعيش فى ملكوت رومانسى غلافه الخير وباطنه المحبة المطلقة

:download:

احمممممممممممممممم
لا يوجد ملكوت رومانسى نصنعة نحن بخيرنا وصدقنا ووضوحنا
نحن من نصنع واقعنا
وليس العكس
بدليل فى كل زمان
ومن وسط مدن كاملة مليئة بالشر يخرج اللة
لنا امثال
نوح /ايليا / يوحنا المعمدان

انظرى عزيزتى ماذا يقول الله عن ملكوته:
(وسيمسح الله كل دمعة من عيونهم والموت لا يكون فيما بعد ولا يكون حزن ولا صراخ ولا وجع فيما بعد لان الامور الاولى قد مضت)
فقط فى هذا المكان سيتحول حزنى إلى فرح

:download:
طبعا لازم يكون كدة
الكمال الحقيقى لن ولم يستعلن الا بالابدية
لانة لو كمل بالارض فما حاجتنا للابدية

انا قلت أخر امل فى سلة اوهامى
أما أملى فى الله ليس بوهم
:download:

ربنا يقوى ايمانك

استمتعت بقصيدتك
واثارت بالفعل عميق تاملى

شكرا لك برنس الواقعية
استاذ علاء كامل

عادل نسيم · 22 أبريل 2010

أخي الحبيب علاء كامل
شكراً للشعر العفوى السهل الجميل النابع من القلب وكلامه مواويل والساكن بالقلب مع النفس الطويل
بارك الرب في شاعرنا الكبير

alaakamel30 · 23 أبريل 2010

عزيز النفس والخاطر
أخى الكريم عادل نسيم
مرورك أسعد مهجتى وأضاء ثناياى
شكرا لك على كلماتك الرقيقة
سلام المسيح

marmora jesus · 23 أبريل 2010

التشبيهات جميلة جدا
وخيالك الواسع ساعدك ترسم صورة حقيقية وجذابة
رغم صعوبة الوصف والكلام
بجد موهبتك فوق الرائعة
تسلم ايدك
ربنا يفرح قلبك دايما

alaakamel30 · 23 أبريل 2010

أختنا الكريمة أ/أسميشيل
أه و أه من المرأة خاصةٍ إذا كانت تتحلى بقدر كبير من الجدل والذكاء
ولى هنا تعقيبا على تعقيبك

فلماذا خلق اللة حواء لادم ؟
اليس بالاحرى كان يكتفى بالحب الكامل الى اللة لة كل المجد

عفوا لا مجال للمقارنة بين حواء كمعين نظير لأدم قبل السقوط وحواء الأن، نعم خلق الله الإنسان على صورته ومثاله يجمع بين حناياه قبس عظيم من هذا الحب الإلهى ولكن هل أستمر هذا الحب بين اول شريكين فى البشرية..بالطبع لا وأدلتى فى الآتى بيانه:
أولا: بعد السقوط فقد الإنسان الحب مع جميع صفات الكمال التى خلق عليها فى طبيعته الاولى
ثانيا: راجعى موقف حواء بعد السقوط،فيقول الكتاب أنها أكلت أولا ثم اعطت رجلها ليأكل وبما انها اكلت اولا فالطبيعى أن عينيها تفتحت على الشر اولا وقبل إغواء ادم بالأكل ولكن فقدان طبيعتها الاولى وتمكين الشر من جسدها جعلها تأبى ان تعيش السقوط وحدها فأغوت ادم ليأكل ولذلك قال الوحى انها أكلت اولا ومن ثم اعطت لرجلها.
ثالثا: راجعى موقف ادم بعد السقوط،حينما واجهه الله بفعلته القى بالذنب على شريكته ومحبوبته وإن كان محقا فى إتهامه لها إلا أنها تعد تضحية بشريك لا يوجد غيره وخيانة لإنقاذ نفسه.
أخيرا ومن جميع ما سبق ما نعيشه بعد السقوط من مشاعر وتفاعلات وجدانية لا يمت بصلة من قريب او بعيد لمحبة الإنسان قبل السقوط،فلا يجوز لنا التشبيه او المقارنة او القياس عليها.

ويوجد من استطاع فى ذبيحة حب
تقديم كل الحب الى اللة
بالتسامى بكل المشاعر الى اصل الحب كلة اللة لة المجد
بالرهبنة

عفوا ما قدمه المسيح على عود الصليب هو فقط ما يمكن أن نطلق عليه ذبيحة حب،أما كل ما هو دون ذلك من رهبنة وإستشهاد وغيره ما هو إلا محاولات لتتبع خطى المسيح ولكن ابدا لن تكون الذبيحة البشرية على مقدار أو سمو ذبيحة المسيح وإلا ما كان هناك سبب جدى للتجسد.

الحياة المدنية ليست مبرر
ان تكون اقل من الحياة الرهبانية

حتى فى حياة الرهبان مازال الجسد عائق لسمو النفس
مازالت البذور فى وسط الشوك
ويحضرنى هنا مقولة القديس أغسطينوس( لنهتم بموت النفس بإنفصالها عن الجسد)

احمممممممممممممممم
لا يوجد ملكوت رومانسى نصنعة نحن بخيرنا وصدقنا ووضوحنا
نحن من نصنع واقعنا
وليس العكس
بدليل فى كل زمان
ومن وسط مدن كاملة مليئة بالشر يخرج اللة
لنا امثال
نوح /ايليا / يوحنا المعمدان

عفوا ولكن إثنان من ثلاثة شخصيات ذكرتيهم كأمثلة لم يكن للنساء فى حياتهم وجود ههههههههههههه
بالطبع أنا امزح لكسر جدية الحوار

أشكرك جدا جدا
لأنك سمحتى لى بإخراج مكنونات سطرت فى حوار راقى و مشوق

سلام المسيح لاختنا الكريمة

alaakamel30 · 23 أبريل 2010

marmora jesus قال:
التشبيهات جميلة جدا

وخيالك الواسع ساعدك ترسم صورة حقيقية وجذابة
رغم صعوبة الوصف والكلام
بجد موهبتك فوق الرائعة
تسلم ايدك

ربنا يفرح قلبك دايما

شكرا مرمورة على مرورك الكريم ومجاملتك الرقيقة
وجزيل الشكر على دعائك بالفرح
سلام المسيح

+Nevena+ · 23 أبريل 2010

عاجبني جدا اسلوب حضرتك
بجد انت شاعر متميز جدا
كتاباتك ليها طبع مختلف
استاذي
احيك علي كل حرف رسمته بلوحتك هنا
واسجل اعجابي ومتابعتي

يسوع يبارك عمل يديك
تقبل مروري وتحياتي

مالوش لازمة الكلام

عضو نشيط

خادمة الرب

عضو نشيط

خادمة الرب

احبك ربى ياقوتى

عضو نشيط

عضو نشيط

لتكن مشيئتك

عضو نشيط

احبك ربى ياقوتى

اسيرة حب يسوع

عضو نشيط

عضو نشيط

احبك ربى ياقوتى

عضو مبارك

عضو نشيط

* NO SENSE *

عضو نشيط

عضو نشيط

عضوة ح الغلاسه