أشكر طرفتك وأشكر محبتك وكل سنة وانت طيب أخي الحبيب مرة أخرى.
وأما الأستاذ عبود فكالعادة يسيء فهمي، حتى لو كان هو اللي عازم وحساب المشاريب عنده.. حكمتك يارب!
طبعا الكتب عاليه ليست ثقافة سطحية أبدا.. دي بالعكس كنوز يا أستاذ بمعنى الكلمة، احنا ح نهرج وللا إيه؟ ده هي دي خلاصة الحضارة العربية كلها ـ إذا اتفقنا نسميها حضارة! يعني حاجة كده بتاع 800 سنة مثلا من تاريخ البشرية ده كان أجمل وأفكه ما طلع خلالها!
إنما أنا بقول إن ثقافتي أنا هي اللي "سطحية" بالكتب دي.. من أيام ما كنت بتشاقى "شقاوة مراهقة".. بل حتى اعتبرت ذكرها الآن مجرد "منظرة فارغة"! يعني... أصل أنا في البداية قلت السطر ده ح يعدي.. أهو بيني وبين ياسر.. إنما بعد التقييم العزيز من جنابك وتسجيلك للإعجاب سرا وجهرا قلت لا.. ما بدهاش.. كده بقا لازم نعكس اتجاه المركب.. على الأقل منعا للحسد.
فأبدا لا ثقافة رفيعة ولا يحزنون بل ثقافة سطحية.. وفي النهاية حتى لو رفيعة فعلا مش مهم. زي ما قال الحكيم وذكرت سابقا: "كل معرفـة قيــد" ـ فقط معرفة الله هي المعرفة الوحيدة التي تحرر الإنسان!
على أي حال شاكرين يا باشا ع المشاريب طول عمرك أبو الكرم!
(بس بمناسبة الكرم: مش كان المفروض يا متر ناكل حاجة قبل ما نشرب؟؟؟)