مسابقة اجمل قصيدة ( الجزء الثانى)

ههههههههههههههههههه
شغالين تريقة لية ياعيال ع خبو هارتى؟
انطلقى ياهارتى
وياجبل لايهزك ريــــــــــــــح
لوووول
​

وميرسى دون دونتى ع المسمارين
الهى ربنا يحدف ف وش مانجو حتة بتلو كدة متشفية
هههههههههههههههههه
​

بسم الشعب
بسم القلم الحر
بسم الله القوي

ه ش ا ر ك
بحاجه قديمه عزيزه علي هارتي
​

ســلام ونعمــه

أتمنــي تكــون المسابقه شعريه بحتــه وليست مجرد كلمات ومشاعر مقفاه

بنعمــة ربنا هشــارك معاكم بمجموعه من قصائدي اختاروا افضلهم

دخولي في هذه المسابقه ليس كنوع من التحدي ولا المنافسه بل كنوع من المشاركه
واكتساب خبرات من اخوتي الشعراء المشاركين

فلنبـــــــــــــــــــــــدأ

▼
▼
▼
▼
▼
▼
▼
​

◄◄◄◄◄◄◄ دعـــــــــــــــوه ►►►►►►►

لو تعبان مش لاقي الراحه ... وألف سؤال محتاج لصراحه
شر الدنيا يعذب فيك
والأبواب مقفوله ف وشك ... تبكي لوحدك مين بيحسك
ياللا معانا مد إيديك
أنت يارب تشيل احمالنا ... ياللي شايلنا ف نن عنيك
يا يسوع قربك كل احلامنا.. وانت ناقشنا علي كفيك

وانت يا عايش بس لبكره ... تبكي الماضي وتقول ذكري
سايب عمرك منك يجري
تبكي حزين والبسمه دموع ... دا يسوع قلبه عليك موجوع
والخوف جوالك عمال يسري
قوله يارب تهت بضعفي ... انا مش قادر ارجع تاني
مد ايديك علشان تشفي .. تكسر كل قيود منعاني

المكسور هيداوي جراحه ... وهترجعله تاني افراحه
اصله وعدنا ولازم يوفي
مهما يكون يكون الجرح مالينا .. كل تجارب بتقوينا
ومهما الضعف النعمه بتكفي
وهنتكلم كده ونقول ... والألحان تنشدها أغاني
خلي البسمه اليوم عنواننا ... راح لحياتنا تبقي معاني



ـــــــــــــــــــــــــــــــــــــــــــــــــــــــــــــــــــــــــــ
​

◄◄◄◄◄◄◄ مـيـــن الأعمــــي ؟؟!!! ►►►►►►►

عمر ما كان الضي عنين
ولا الضلمه دي قلب حزين
ماشي في طريق مش عارفه لفين
والعكاز ف ايدي انكسر
خطوه تقيله وبرضو بعافر
جوايا يصرخ انا مش قادر
ورغم دا كله لسه بكابر
وكبريائي فيا اتحفر
يبقوا عنين من غير لازمه
اصلي بصيرتي هي العمياء
وانت يا اعمي ما انتاش اعمي
نور القب ليك البصر


ـــــــــــــــــــــــــــــــــــــــــــــــــــــــــــــــــــ
​

◄◄◄◄◄◄◄ الفــرح معـــاه ►►►►►►►

لمــا الدنيـا بشوفها ... دايمـا اسود لونها
اعرف إني بعيد... عن أحضان اللي خالقها
وأكيد ويايا فتور ...خلاني ما اشوفش النور
لكــن الفــرح معــاه...وحده هيدي ســرور

كتير يا إلهنا بنرفض ... عملك فينا ونبعد
ويا كلام إبايس... والأزيد ليه بنعبد
وأنت تفضل تبكي ... علينا وإحنا بنشكي
منك لشيطان العالم... وكلام الشر بنحكي

ياربي ملك إيديك ... أحلامنا كياننا وفيك
كل أمال محطوطه... وعيوننا بتنظر ليك
ماضينا الحاضر وحدك... ياللي ناقشنا ف كفك
والجاي معاك أهو فرح...لما نسيبه لشخصك


​

◄◄◄◄◄◄◄ تبقي مذله الشكوي لغيرك ►►►►►►►

تبقي مذله الشكوي لغيرك :: ياللي حياتنا من فيض خيرك
ف نن عنيك أنت شايلنا::ومستقبلنا يكون تفكيرك
وبتشفي جروح وياها آهات:: وبتسمع لصراخ المظلوم
لما بنبكي علي اللي مات:: تقول دا شهيد ف سمايا اليوم

انا مش خايف :: لأني عارف
إنك دايما يارب شايف

نازله دموعنا وآدي إيدينا:: ليك مرفوعه يارب الكون
انت سامعنا وروحك فينا :: بيطمننا مهما يكون
وترجع حق كنيسه مظلومه :: وبعدلك يكون للظلم حدود
يارب يا سامع آه مكتومه :: عايزين حكمك انت يسود


​

◄◄◄◄◄◄◄ سحابة ذكريات ج1►►►►►►►

::سنه ورا سنه وسنين بتفوت
صوت بيعلا وصوت بيموت
وناس احساسهم جوه قلوبهم
اعلي كتير من مليون صوت
هي الكلمه كلمة رحله
نيجي نقولها بشكل جديد
فيها النعمه ويا الرحمه
فيها نجدد المواعيد

رحله خلصت ورحله جايه
رحله عدت ف غمض عنيا
بس الرحله دي مش عاديه
عرفت انا فيها معني الحنيه
كنا بنحكي زي اصحاب
ليل ونهار عايشين مع بعض
ويمكن اكتر م الأصحاب
ما نسيبش بعض غير علي وعد

وعد اشوفه ف الإنجيل
قوة ربنا جيل ورا جيل
لما عامود ينور بالليل
لما الشعب يعدي البحر

كنت بقوله يارب حنيين
انت حاببني ويومي يبين
وقبلها صلبك المك حبك
انت عظيم يا إلهي حنيين
رحلة عمري يارب معاك
من دلوقتي لحد سماك
ولا جات مره اتخليت عني
دا قبل ما انادي عليك بلقاك

بس بجد يارب انا عشت
آيه لروحي وليك شهدت
عمر بحاله يارب الكل
ومهما بضل تقولي سامحت
وذكريات ما تتنسيش
مهما حصلي ما تتمحيش
علشان انت عمري دا كله
وبيك انا بتحرك واعيش


ـــــــــــــــــــــــــــــــــــــــــــــــــــــــــــــــ
​

◄◄◄◄◄◄◄ سحابة ذكريات ج4►►►►►►►

يمكن كانت تجربه صعبه
حسيت انا فيها بإحساس الغربه
عرفت انا فيها معني الآه
حتي الآه كانت صعبه
كان جوايا حزن شديد
ليه يارب ؟؟؟ هو انا بعيد؟؟؟؟
انت عارفني وانا تعبت
ليه تظلمني هو انت بعيد؟؟؟
سامعني اكييييييييييييييييييد؟؟؟؟
انا تعبان وعايش ف زمان
ماهواش زمني ومش هنفعله
دي وصاياك وانا حافظها
عارف ديني وانا بسمعله
كل يوم بقرأ الإنجيل
عمري ما بغلط إنسان طاهر
بفضل اصلي طول الليل
وغيري نايم ماهواش قادر
انااااااا قديس.......
....................لالالالا اقل شويه
لسه هعمل معجزات
وتبان علي ايدي البركات
وتيجي الناس تبوس علي ايدي
وووووووووووووووووووو

لكن الحقيقه
لكن الحقيقه مش كده
دايما بنقول كلام زي دا
وبننسي مراحمه لينا
ونفتكر مشاكلنا المتعقده

بنعيش دور الضحيه
وكأننا ف مسرحيه
بنأدي دورنا وبإتقان
ونجيبها دايما ع المسيحيه
انا مظلوم مش واخد حقي
كل الناس عماله تنقي
انا مظلوم والبركه ف ديني
وياما بيقولوا كلام ف حقي

والغريبه والأصعب......

إني بتكلم عن ربنا
هو فعلا هنا
وهجيبلنا حقنا
والأصعب بسمع صوته
ليا فتره بخبط عليك ومش بتفتح
هو انت مش بتزهق
ولا يوم هزهق لحد ما تفتح

طاب دا انا مكسوف وعليك بتتريق
وانا مستني لحد ما تفتح
قطع قلبي صوت بكاك
قلت دا ابني هو هناك
قالوا دا سابك سيبك منه
قلت انا هجري عليك والقاك
عايز اتعشي ياخي معاك
اما عشاك دا عزومه عليا
بس فعلا دا كتير
دا بجد حب كبير
اطلع من سفينتي يارب
دا انا انسان حقير
فعلا
محدش غيرك بيفكر فيا
قبل ما انادي بتجري عليا
بتشفي جراحي المتداريه
بتكلمني وبحنيه
يمكن هي حكاية غريبه
يمكن هي قصه عجيبه
قصة حبه للإنسان
والإحسان والرحمه اكيده


ـــــــــــــــــــــــــــــــــــــــــــــــــــــــــ

​

◄◄◄◄◄◄◄ سحابة ذكريات ج7 ►►►►►►►

يا يسوع مهما فضلت بدور
بعيد عن حضنك انا بتحير
والمفاهيم ومعاني تتغير
لكن فيك انا بلقي الحب
واختبارات من جوه القلب
ورحله تمجد اسم الرب

رحله لحضنك انا همشيها
وف أشعاري دي هحكيها
واكتب ليك يا يسوع فيها
وذكرياتي و ترنيمات

عمري ضاع ولقيته معاك
اصل انا وطني يبقي هناك
ع السحاب هنروح وياك
ومعاك نفرح ف السماوات
عمري ياربي شاف النور
كان جوايا ظلام وشرور
لما عرفتك جوه ف قلبك
شلتني ع الأكتاف وتدور
بيا الدنيا ويعدي والعمر
والايام تكتب حكاويها
عن أيام العشره معاك
وكلام الدنيا ما هيكفيها

اصله كلام فوق الإحساس
ابلغ من كلمات الناس
تعرف
تعرف لما لحظه تحس
جواك حاسس نور الشمس
والأحزان غابت واليأس
ورحك طايره من جواك
ودقة قلبك تاخدك منك
ولحظات تنسي اوقات انك
عايش هنا برضو ف الأرض

شوفتوا العشره حلوه ازاي
لما تسلم عمرك ليه
وتقول عمري دا كله الجاي
يا يسوع ليك انا بهديه
وتفضل ذكري عايشه فيك
لما تتوه علي طول تناديك
دي اختباراتها اتحفرت فيك
ويا الحب ويا يسوع

رحله عاشتها الروح ف سحابه
رحله بتحكي علي اللي فات
فيها سؤال وفيها إجابه
ويا سحابة ذكريات
ف وقت شبابك اذكر ربك
نادي بإسمه ف كل الأرض
خليه وحده يملك قلبك
تلقي حياه وتشوف المجد
يا يسوع انت الحياه
والطريق اللي مشيناه
ولحد سماك ف الرحله معاك
نلقي الإحسان والرحمه كمان


ــــــــــــــــــــــــــــــــــــــــــــــــــــــــ
​

◄◄◄◄◄◄◄ إلي فتــاة أحــلامــي ►►►►►►►

أنا شفت فكي غيرهم
أفكارك غير أفكارهم
عايشين هما بمشاعرهم
وحواديت وخفة دم
أنا منك اتعلمت
ولا جيت ف يوم ندمت
ومهما أنا إتألمت
كلامك يشيل الهم

ــــــــــــــــــــــــــــــــــــــــــــــــ
​

اشكركم كلكم وبالتوفيق لكل الموجودين

ربنا يعوضكم



​

يا أ عبود لما شاركت بال 8 قصايد علي اساس ان الموضوع يتقيم علي بعضه

وما عنديش مانع اشارك بواحده بس ولو عايزينها بعيد عن دول كمان اوكي برضو​