ليلة امبارح
روحت اقفل باب الأوضة
مشهد كل يوم يتعاد
كلو عناد
وكالمعتاد
شوفت صورتك
وانا كلي جراح
سامعك بتقولي ارجعلي هسامحك
استنى هقولك
تعالى نتكلم
دة محدش كلمني ومات
ومتتعبش تعلي في صوتك
انا بسمع كل الاصوات
ارجعلي وصدقني هترتاح
وبكل عنادي وكالعادة
بقفل بابي واديك ضهري
انا شايل هم وبزيادة
انا مش ناقص هم في عمري
كلام اية اللي هقولو ؟
وبأي وش هوريك وشي
انا منك مكسوف
ميت من الخوف
هعمل اية قدامك لو قولت صالحني ؟
استنى ياربي
هو انت ازاي مسامحني ؟
ازاي ف عنادي وضهري ف وشك مني قرييب ؟
اما انت غريب !
ازاي بتقولي تعالى وارتاح
اما انت عجيب
دة انا فاكر اخر مرة سألتك
واتاخر ردك
انا مسامحتش
لومتك وعاتبتك ورجعت جلدتك
دة انا حاسس اني ظلمتك
مسامحني ازاي ؟
ولية ؟
رد وقولي بتحبني على اية ؟
انا تعبت من كسفتي منك
مش عايز منك
حاجة ليا
استنى هكرهك فيا
:
اوعى تفكر اني مش قادر ارجع عشان تعبان
لاااااااء
انا اصلي جبان
عارف هرجع هصلي واعيط ومعاك هاحلف بوجودي
بعدها بيومين لا ساعتين
هخلف ف وعودي
وهمشي
وارجع واغلط واحزن واتعب
والمشهد يتعاد
بكل عناد
هقفل باب اوضتي في وشك
من الاخر كل عياطي ودموعي قدامك
مكنتش حقيقة
انا كنت بغشك
قولي بأة
دة منظر واحد يتحب ؟
انا لولا سامع صوت دقاتو
كنت حلفت اني معنديش قلب
هروح ابص لصورتك
يمكن حسيت اني ولا استاهل
واديتني ضهرك
ريحني من لوم نفسي
وقولي مش هسمعلك
اية دة ياربي ؟
انت بتبكي ؟
مين اللي بيشكي ؟
بقولك ماستهلشششششش
انا بجرح فييييييك
انت دموعك لية مش غالية علييييك
لية بتعذبني بحبك ليا
ماستهلوش
انا حتى جماااااااااااد
بس هقولك
المشهد مش هيتعاد
مش هقفل باب اوضتي في وشك
انا راجع وحياتي اهي في ايدك
بس اوعدني تكون في امان
مبقولش عشان مش واثق في رجوعك
بس انا حتى بعد دموعك
لسة جبان .
ـــــ
كٌتبت بالدموع
1/3/2011
مشهد حقيقي .
التعديل الأخير: