الصداقة بين الجنسين(joyce-عجايبى)

[joyce]

تعالوا نشارك مع بعض.
زمالة...... أم صداقة؟
هل يمكن أن تتطور علاقة الزمالة أو الصداقة وتتحول إلى حب؟
هل هناك صداقة بين الجنسين؟ما الفرق بينها وبين الحب؟

 

[blackguitar]

هل يمكن أن تتطور علاقة الزمالة أو الصداقة وتتحول إلى حب؟

ممكن طبعا يتطور الزماله والصداقه الى حب وده شىء بيحصل كتير

هل هناك صداقة بين الجنسين؟ما الفرق بينها وبين الحب؟

مشكله مجتمعنا انه مش معترف بوجود هذا النوع من الصداقه وهو الصداقه بين الولد والبنت مع العلم ان احيانا فيه صداقات بين الجنسين بتبقى افضل من صداقات الجنس الواحد
وطبعا فيه فرق كبير اوى بين الصداقه والحب الرومانسى
بمعنى ..............

الصداقة : هو ميول للمصارحه و اهتمام برأى الآخر او بمعنى اصح ان صديقتى دى بتكون فهمانى وفاهمه انا عاوز اقول ايه وتدينى رايها فالمشاكل اللى بتواجهنى او العكس وده مش معناه ميول عاطفى من ناحيتها او ناحيتى .....بس هتكون زيها زى صديقى مع اختلاف الجنس

الحب : ده غنى عن التعريف واكتر حاجه بتميز الحب عن الصداقه غيرة الحب وحب الامتلاك فى الحب اللى معتقدش انها موجوده فالصداقه ...
والحب هنا هو المشاعر بين طرفين .....ودى مش بتبقى موجوده غير لشخص واحد فى الفتره الحاليه ولا يمكن ان تتجزأ على عده اشخاص
بعكس الصداقه .....ممكن يكون ليا كذا صديقه ولكن حبيبه واحده
ولا تعارض - فى وجهه نظرى - بين مشاعر الحب الرومانسى والصداقه لان لكل منهم مكان معين فالفكر والقلب لا يأخذ احدهم مكان الآخر
وانا اقول الحب الرومانسى هنا لانى معترف ان الصداقه مهما كانت نوع من انواع الحب ولكن ليس الرومانسى

 

[ميرنا]

لا يا بلاك موضحتش بردو الفرق بين الصداقه والحب كفايه

 

[blackguitar]

طيب وضحى يا ميرنا وجهه نظرك

 

[artamisss]

انا ظهرت موضوع الحب والصداقه تانى علشان تقدروا تتناقشوا هنا وتعملوا استفتاء هناك على ايهما تفضل

 

[الرائحة الذكية]

بصى موضوع الصداقة بين الجنسين يختلف من شخص الى اخر ومن بيئة لاخرى
و بعض الخدام و الكهنة معقدين فى موضوع الاختلاط بالرغم من أن هدف سيدنا الأنبا موسى من إختلاط الشباب المسيحى بالشابات المسيحيات هو أساس فكرة الاختلاط فى إجتماع الشباب بعد ما كان كل نوع بيحضر لوحده. و هدف سيدنا من هنا الحد من ظاهرة أسلمة بعض شبابنا علشان يتجوزوا مسلم أو مسلمة. و ده هدف رائع من أب حكيم زى سيدنا الأنبا موسى.
للأسف بعض الخدام و الكهنة ما فهموش قصد الفكرة من الاختلاط بين الشباب و الفتيات، و إعتبروا ده حالة طوارئ لما يحصل. و بيترعبوا لو شافوا شاب و شابة بيكلموا بعض.

بالنسبة للصداقة بين الجنسين ممكن تكون موجودة لو كانوا على مستوى المسئولية و فاهمين الموضوع صح و كل شئ فى النور. يعنى الأهل عارفين و سامحين بالصداقة اللى من النوع ده. و إنهم ما يتكسفوش يكلموا بعض فى التليفون قدام أهلهم و ما ياخدوش التليفون فى حتة بعيد علشان يتكلموا. و صداقتهم يكون بابها مفتوح علشان مزيد من الأصدقاء.

يا ريت كل الشباب يحكم الروح القدس اللى فى داخله علشان يعرف إذا كان الجنس الآخر ده صديق فعلا ولا حاجة تانية. الروح القدس جوانا هو اللى بيعلمنا و يذكرنا و يبكتنا. لا تطفئوا الروح. بس لازم كمان ما أكونش بأعثر الآخرين بصداقتى للجنس الآخر. بولس الرسول كان عنده إستعداد ما ياكلش لحم لو كان حيعثر أخوه رغم إن أمل اللحم ما يعتبرش عيب ولا خطية.

صدقونى كل واحد فينا عارف الصح و الغلط من غير ما يسأل لأن إذا ما كانش الروح القدس بيقودك يبقى على الأقل الناموس الطبيعى حيعرفك. مثال: القطة لو أكلتها بإيدك حتاكل قدامك، لكن لو خطفت الأكل من وراك حتجرى تاكله بعيد. إذا كانت القطة عارفة تعمل إيه قدامك و تعمل إيه من وراك يبقى إنت مش عارف صح ولا غلط؟؟؟!!!!

وانا اسفة للاطااااالة

 

[ميرنا]

انا لحظت حاجه انى محدش بيرد على الموضوع نفسه كلو بيدخل فى موضيع بره الاسئله اللى قدمنا يعنى انا كمان كان نفسى اسئل علشان دا يا بلاك مش عارفه ارد

لكن يا ناردين دا موضوع تانى اللى بتتكلمى عليه مش رد على الاسئله انتى اتكلمتى عن الصداقه بس

 

[الرائحة الذكية]

لكن يا ناردين دا موضوع تانى اللى بتتكلمى عليه مش رد على الاسئله انتى اتكلمتى عن الصداقه بس

انا فعلا اتكلمت فى جزئية واحدة بس اللى هى الصداقة بين الجنسين لكن بقية الاسئلة انا شايفة انهم اتكلموا عليها

 

[artamisss]

انا شخصيا بشجع الصداقه بين الجنسين لكن فيما فوق سن ال20 للجنسين
علشان يبقى فى نضوج فى الفكر وواعيه اكتر

 

[ramyghobrial]

مستحيييييل نعيش من غير الاتنين
وصعب نوضح الاتنين بكلام يتكتب

 

[ميريت]

انا من رايي انه سهل اوي علاقات الصداقه تتقلب لحب بدون اي مقدمات
كدا مره واحده من غير احم ولا دستور
لانه مدام هما اصدقاء يبقا عارفين عن بعض كل حاجه
وسهل جدا العلاقه تتطور
فيه صداقه بين الجنيسن
وموجوده واستحاله اي طرف من الاتنين يفكر ف التاني
لانهم بيعبترو نفسهم اخوات
بس لو حد فكر ف كدا
بينهي العلاقه بين الاتنين
يا اما بيحولها لقصه حب جباره
دا رايي

 

[mary]

معلش يا جماعة أنا يمكن رأى يعتبره البعض رجعى لكن ده من وجهة نظرى المناسب
مفيش صداقة كاملة ممكن تكون بين الجنسين (رجل وإمراة) لأن فيه ميل جنسى طبيعى بين الجنسين علشان كده أفضل إن يكون هناك علاقة زمالة بس فى حدود الشغل أو الدراسة لكن التداخل زيادة عن اللزوم يعنى الخروج مع بعض كثير أو معرفة بعض الأسرار الشخصية لكل منهما أو الإنفراد بعيد عن جو الشلة كلها أمور غير محببة لأن نتيجتها التحول من الصداقة لعاطفة الحب بين الطرفين وبتظهر خطورتها لو أحد الطرفين مرتبط مثلاً أو كليهما

 

[artamisss]

مش حكايه راى رجعى يا مارى لكن فى نقطه هنا لازم نوضحها
الجنسين لو اتربوا مع بعض بفكر الاخوووووووووووووة او اتربوا بنفس الاسللوب الاخووووووووة والصداقه والتفريق فى المعامله بي ن الصداقه والحب اعتقد هاتفرق فى تنشئه جيييييييل باكمله

 

[joyce]

من الطبيعى أن يكون فى علاقة زمالة فى سنوات الدراسة وتكون هذه العلاقة فى إطار المجموعة . أما الصداقة بين الزميل وزميلته فمن الصعب أن تظل تحت مسمى الصداقة كما هى فى الحال فى الصداقات بين نفس الجنس.
فالفتاة لا يمكن أن تتحدث فى كل أمورها الخاصة والشخصية بحرية إلا مع فتاة مثلها وكذلك الشاب أيضا.

 

[REDEMPTION]

+

لكل منا وجهة نظر عن الصداقه ... فما اجده انا انه ليس صداقه قد يجده شخص اخر ان هذاا هو مفهوم الصداقه لديه ... ولكن ... اود ان اقول .. انه لا توجد صداقه بالمعنى الذى اعرفه انا .. بين الجنسين ... لانه كما تفضلت الاخت مارى وقالت .. ان لكل طرف ميول طبيعبه وغريزيه تجاه الاخر .. ميول جنسيه ... وعندما ناقش نيافة الانبا موسى موضوع الاختلاط والصداقه بين الطرفين .. قال انه ينبغى لنا اولا ان نتحدث عن الغريزه الجنسيه ، طالما سنتحدث عن الصداقه بين الشاب والفتاه ... والسؤال الذى يطرح نفسه الان .... لماذا انا اريد ان اصادق الفتاه ؟؟ ... ما الهدف ؟؟ ... هل استطيع ان اتحدث معها فى كل امور حياتى بلا خجل او حياء ؟ ... وهل اذا وقعت فى خطية الزنا مثلا .. هل استطيع ان اذهب اليها واخبرها ؟؟ ..

صديقى هو رفيقى ... هو من يسأل عنى بأستمرار وأسأل عنه ... هو من استطيع ان اذهب اليه حتى بعد منتصف الليل .. اجلس معه ... احدثه بلا تحفظ .. او حرص ... صديقى هو من لا اجد اى حرج من اجلس معه فى غرفه مغلقه .. او فى الطريق العام او فى اى مكان فى العالم ... صديقى هو ذلك الشاب الذى لا توجد لدى اى غريزه جنسيه (( طبيعيه )) تجاهه ...

هو من اخذه بالاحضان عندما اكون غائبا عنه او هو ايضاً .. صديقى .. هو كتلة من المشاعر والارتياح تستقر بداخلى ... ولا افكر ابدا كيف اتحدث معه .. وماذا اقول .. وما هى المواضييع التى لا يجب ان احدثه فيها .. صديقى هو من اجده فور ان احتاجه ... اجده بجوارى .. فى مشاكلى .. فى ازماتى .. فى افراحى ... ترى .... هل تستطيع الفتاه ان تكون كل ذلك ؟؟!!!

فالحقيقه يا اصدقائى اننى اجد ان العلاقه التى تسمى صداقه بين شاب وفتاه ... هى فى الواقع قصة حب خفية .. ستنكشف عاجلا ام اجلا ..او هى علاقه اثمة على وشك ان تبداء ... ولكن من الممكن ان تكون هناك علاقة زماله .. كزماله فى العمل .. او الجامعه .. الخ ... وهذه لها حدود واضحه جدا ... و فرق شاسع بين الاثنين ...

وللحديث بقيه ان شاء الله ..

 

[artamisss]

معرفش عجبنى الموضوع وحبيت اطلعه تانى على الشاشه ياريت الكل يشارك

 

[فراشة مسيحية]

طبعآ فية صداقة صادقة بين الجنسين

و دة عن تجربة شخصية

لى أصدقاء كثر من الشباب مثل صموئيل ع و صموئيل ف و مدحت و وائل و مايكل و مينا و سامى و باسم و امير و مارتن و مارك

دول اصدقائى الولاد .. و صدقونى لو قلتلكم انهم لغاية الآن نتصل ببعضنا و نسلم على بعضنا فى الأعياد برغم اننا انهينا دراستنا من 4 سنين ولكن الصداقة موجودة حتى الآن برغم ان اغلبيتهم اتجوزوا السنة اللى فاتت لاكن صداقتنا مستمرة و جيدة جدآ جدآ و عرفونى على زوجاتهم و أصبحنا نتصل و نسلم على بعضنا من فترة لأخرى و فى الأعياد نتسابق ان نعيد على بعضنا و رغم اننا اصبحنا كل منا فى بلد اخرى بعيدة عن الثانية الا اننا مرتبطين ببعضنا جميعآ ..

و صديقى صموئيل ع قبل أن يخطب طلب منى ان أقابل هذة الفتاة و بعدين اقلة رايى فيها يعنى يرتبط بها ام لا و بالفعل عملنا رحلة و تقابلت معها و كانت شخصية رائعة و قلتلة يا صمول اتكل على الله راح فرح و خطبها و تزوجها و الآن لديهم يوسف سنة و شهرين ..

و فية صداقة بتنتهى بقصة حب و دة برضة عن تجربة شخصية

فأنا مخطوبة و خطيبى كان صديق لى فى الجامعة و كان صديق لكل اصدقائى اللى ذكرتهم
و يعلم أنى أكلمهم و أسلم عليهم و هو ايضآ يكلم أصدقائى البنات و يسلم و يعيد عليهم منهم من سافر خارج مصر و اتصالنا اصبح بالرسائل SMS و منهم موجود فى مصر و نتصل بهم أيضآ ..

كنا مجموعة جميلة جدآ و مازلنا اصدقاء مهما فرقتنا الظروف عن بعضنا

فالصداقة شىء جميل و رائع و الصداقة الصادقة النابعة من القلب بمحبة أخوية .. هى التى تدوم الى الآبد​

 

[emy]

الموضوع حلو اوى اعتقد ان الصداقه مختلفه بمعناها عن مفهوم الزماله ومختلفه ايضا فى حدودها عن الزماله بحيثوا ان العلاقه بين الولد والبنت بيحدها العادات والتقاليد فبتتحط تحت مفهوم الزمايل اما الصداقه بتاخد حدود اكبر شويه عن الزمايل ودى بتعتبر فيما بين البنت والبنت والولد والولد مع احترامى لراى الفراشه بس اختلاف الراى لا يفسد باود قضيه
ايمى

 

[REDEMPTION]

+

سلام ونعمه ..

الاخت العزيزه فراشة مسيحيه

كلامك بالفعل جميل وواقعى .. ولكن لا يمكن أن نصف تلك العلاقة التى تحدثتى عنها بانها علاقة صداقة ..

فالكلمة لها معانى كثيرة .. وكبيرة .. هذا على الاقل فى مفهومى أنا ..

فمن الممكن أن نقول أنها علاقة أخوية فى المسيح .. أو علاقة زماله قويه مترابطة .. او أى مسمى آخر غير الصداقة


و كما قولت أنا فى السابق :

لكل منا وجهة نظر عن الصداقه ... فما اجده انا انه ليس صداقه قد يجده شخص اخر ان هذاا هو مفهوم الصداقه لديه

فسيتبقى هذا الامر دائماً مدى الحياة .. فقد أرى أنا ان حديثى مع فتاة - حتى لو كان حديث فيه بعض الحريه والراحه - لا يمكن أبداً ان يندرج تحت علاقة الصداقة .. فطالما لازلت أقول (( فيه بعض الحريه )) إذاً لم يصل الأمر إلى مفهوم الصداقة لدى

تحياتى

 

[فراشة مسيحية]

كلامك بالفعل جميل وواقعى .. ولكن لا يمكن أن نصف تلك العلاقة التى تحدثتى عنها بانها علاقة صداقة ..

فالكلمة لها معانى كثيرة .. وكبيرة .. هذا على الاقل فى مفهومى أنا ..

فمن الممكن أن نقول أنها علاقة أخوية فى المسيح .. أو علاقة زماله قويه مترابطة ..

صح كلامك على فكرة ..

فهى زمالة مش صداقة يعنى ممكن اقول لصحبتى حاجة انا مقدرش اقلها لزميلى ..

بس اتصالنا ببعض لغاية دلوقتى يعتبر أخوة فى المسيح لأننا كلنا مسيحيين

و فية فرق اكيد من علاقتى بيهم و علاقتى بالبنات ..

صح جدآ كلامك REDEMPTION و أشكرك على التوضيح ​