*******************سلام و نعمة******************
الحلقه الاولى .................
"تو يـــــــــــــــــــــــــــــــــت"
- جبوره
- ايواااااااااااه
- انزل
- جاى اهو
"ينزل جبوره وفى ايده سندويتش بيدألج على السلم وجبوره اسمه اصلا محمد جابر وتخين واسمر شويه وشعره دايما متنعكش"
- بتاكل ايه ياد تانى
- ده سندوتش محشى امى عاملاهولى
- يبنى هتبقى من كتر الاكل......... توييييييييييييييت عبالولا
- نازل اهو
" ينزل عبد الله الشهير بـ عبالولا ولد قصير اوى ورفيع يعنى "
- يبنى مش بابا قالك بلاش عبالولا دى ؟
- ماتقوله يا عبد الله زى ما هم مسمينه وخلاص "ده جبوره"
- وانت مالك انت ماتخليك فى السندوتش يا جبوره استنى لما ننده الواد بكار.................توييييييييييييييييت بكاااااااااااااااااااااااار
- ايوه خارج اهو
" اشمعنى ده اللى قال خارج؟ ............... لانه ساكن فى الدور الارضى لانه ابن بواب العماره وده مش عامل اى فرق فى التعامل بينهم .............. اهو خرج اهو طويل ونوبى ودايما هدومه قديمه بس نضيفه ومكويه علطول ..........واسمه حسن على فكره"
حسن : ازيكوا يا رجاله
لماضه : اهلا بكار عم الشباب
عبالولا : ازيك يا حسن
لماضه : ايه يا عم نت وهو احنا هنقضيها سلامات ولا ايه؟ يلا نلعب اى حاجه .......... ها هتلعبوا بلى ولا كوره؟
جبوره : بلى
لماضه: يبقى نلعب كوره يلا بينا اتنين على اتنين ............ انا وبكار
عبالولا : لا يا عم وتسيبلى جبوره اعمل بيه ايه ؟
لماضه : يا عم مانت عامل زى القرد ولعيب
عبالولا : لا يا عم انا وبكار يا دوبك حلو اوى كده انت لعيب اكتر مننا
لماضه: خلاص نلعب بلى ................
جبوره : ماشى يا زعيم
" نسيب العيال ويلعبوا بالبلى ونتفرج على الحاره كويس .......... حارة "سعيد كيله" مين هو محدش عارف بس هى اسمها كده بيقال انه زعيم كان اللى جنب عرابى علطول لما راح للخديوى بس كان خاين ويقال انه كان باشا مع سعد زغلول فى الثوره واتنفى معاه بس كلهم رجعوا من المنفى الا هو انما على الارجح الروايه الاكثر تصديقا انه كان من الظباط الاحرار والمفروض كان يبقى معاهم فى مجلس قيادة الثوره بس مكنش فيه كرسى زياده فمنضمش ليهم على وعد انهم لما يجيبوا كرسى هيدخلوه معاهم فى المجلس ............. المهم من ابرز معالم الحاره ............. بقالة ايه؟ لازم تكون الامانه طبعا بتاعة عم سعدون ..........وبيت زعزع المتسول اللى على وصول دلوقت وهو الملاذ الاخير لشلة لماضه وصديق شخصى للماضه ............... طب وفين الاذيه؟ المكان الخصب لاذية الناس شاكر الحلاق فى محله المتواضع صالون الباشاوات وبقيت الناس هتتعرفوا عليهم فى القصه"
عبالولا : يا لماضه لمستها بايدك مرتين
لماضه : انا ؟ طب ما لمستها ده الهوا يبنى
جبوره : يا عم وانا مالى انا
لماضه : مش انت اللى عمال تنفخ؟
جبوره : ان انفخت ولا جيت يمتها؟
بكار : انا شايفك وانت بتلمس البليه يا لماضه
لماضه : اه يا عم لمستها وهلعب تانى
عبالولا : عافيه يعنى؟
لماضه : اه عافيه ........... فاكر السكوتر؟ النظام هيبقى عافيه من هنا ورايح
بكار : على ايه خد يا عم بليه من عندى وخلى عبالولا هو اللى يلعب......... ماشى؟
لماضه : لا يا عم محدش هيبقشش عليا
بكار : يا عم خدها هو انت ضامن لو لعبت تانى هتكسب ولا لا؟
لماضه : لا يا عم
بكار : خدها انت يا عبالولا وسيبه يلعب تانى
عبالولا : هاتـ........
لماضه : هاتها هاتها ان اهاخدها وامرى لله
جبوره : زعزع ......زعزع
زعزع : يا رب يا كريم
لماضه : ماتسيبك يا عم من الافلام دى انت دخلت الحاره خلاص
زعزع : يبنى بسبح بحمده
لماضه : وبيحبك التسبيح معاك يعنى فى الحتت الزحمه؟ طالما غاوى اوى كده ولا عمرى شفتك بتصلى
زعزع : يا عم خلاص هتيجوا اكملكوا الحكايه؟
لماضه : اه طبعا ...................طب يا رجاله يلا بينا ؟
بكار : طب لما نخلص .........
لماضه : لا انا قلت يلا ........ احسبوها بالعقل نروح مع زعزع يادوبك نكمل حكاية الجنيه ونروح ننام احسن خلاص يادوبك....... ماشى؟
بكار : لا يا عم انا عاوز اكمل لعب
لماضه : واد يا جبوره انت مع مين ياد؟
جبوره : معاك يا زعيم
لماضه : وانت يا عبالولا؟
عبالولا : والله حسب ............. هتدينى الدكش الاصفر؟
لماضه : اديهولك وتيجى؟
عبالولا : اجى
لماضه : خد اهو .......... ايه يا بكار جاى معانا ولا هتلعب لوحدك؟
بكار: جاى يا عم
" نلاحظ ان لماضه ممكن يضحى بكل عزيز وغالى عشان زعامته متروحش على عكس عبالولا اللى يضحى باى حاجه فى سبيل مصلحته او انه ياخد الزعامه من لماضه ............. اما جبوره المغلوب على امره والانتيم بتاع لماضه فهو عنده مشكله ان دماغه بتوجعه من التفكير ..... اه بجد وبيجيله صداع فعلا فهو سلم حكاية التفكير واتخاذ القرارات للماضه وبدون مناقشه ........... اما بكار اللى كان عقله اكبر من سنه غير طامع فى الزعامه بس هيعمل ايه فى وجود اغلبيه مطلقه؟"
لماضه : ارغى يا عم وصدعنا
زعزع : وقفنا فين امبارح؟
لماضه : لما جابتلك التفاحه
بكار : لا يبنى لما العسكرى جه
لماضه : طب ماهيا هيا
بكار: ازاى يعنى؟
لماضه : ماهى جابتله التفاحه وبعدين قالتله هجيبلك توت ومش اوانه والفيلم ده وفى الاخر خوفته لما قالها انه متجوز قام نده للعسكرى ........... ايه بأه فرقت اوى؟
بكار : اه كان هيحكى كل ده تانى؟
لماضه : خلى بالك يا بكار لولايا كان زمانك لسه بتلعب بلى فى الحاره لوحدك .......... اسكت باه ......... متقول
زعزع : جه العسكرى بيقولى بتزعق ليه يا جدع انت؟ قلتله الحقنى الجنيه دى هتموتنى قالى فين دى؟ قلتله محدش بيشوفها ولا يسمعها الا انا المهم اخر كلام اخدنى وبيتنى فى الحجز
لماضه : يا واد
زعزع : فى سرى طبعا .............. المهم عملت شوية قلبان كده فى المساجين وطلعت الصبح القط رزقى ورجعت اخر النهار...........
" زعزع اسلوبه فى الحكايه مثير جدا يشد اى حد بجد مع ان العيال كانوا عارفين ان كله تخاريف بس كان ساعات بيقوم يقف او يعلى صوته او يوطيه اوى حسب ملابسات الموقف "
لماضه : يلا يا رجاله كفايه كده اتاخرنا
جبوره : لا يا عم انا عاوز اسمع بقيت الحكايه
" ودى فى المرات النادره اللى بيعترض فيها جبوره على احد قرارات لماضه عشان كده كان لازم عقاب فورى وحاسم"
لماضه : يعنى انت يا جبوره مش عاوز تمشى معايا وعاوز تقعد تكمل الحكايه؟
" وهو باصصله نظره ناريه وبيضغط على كل حروف الكلام مؤكدا"
جبوره : نروح يعنى؟
لماضه : اه نقوم نروح " بنفس النظره "
جبوره : اه انا افتكرتك بتقول هنقعد
لماضه : يلا بينا يا جدعان عشان ننام اصل احنا عندنا قلبان فى البيت ................. اى اوامر يابو الزعازيع؟
زعزع : سلام يابو اللمض
" بيقوموا غصب عنهم طبعا كلهم وكل واحد هيروح على بيته .......... لماضه بره البيت نص اللى جواه يعنى حوه البيت لماضه حقيقى انما بره بيراعى انه زعيم برده ............................ بالليل باه............."
- بابا
- همممم
- اتاخر شويه
- حاضر
- .................
- هفففففف
- بابا
- هاتنى انا جوا احسن هقع
- حاضر
................................
- بابا
- ايه تانى
- اتاخر شويه الحيطه ساقعه
- حاضر
- هفففففففف
- ايه تانى يابنى حرام عليك
- انت نايم جنبى ليه منمتش جنب ماما؟
- علشان ماما لسه مخلفه وتعبانه
- وايه يعنى؟
- خالتك نايمه جنبها علشان لو عازت حاجه
- طيب وهو خالتـ.....
- يابنى نام بأه ورايا شغل الصبح
- حاضر
- هااااااااااااااااوم
- بابا
- ايه تانى؟
- هو ماما خلفت اختى ازاى؟
- آآآآآآآآآآآ لقيناها على المخده
- يا سلااااااااااااااااااام
- ايه يابنى؟
- اصل عبالولا قاللى انه مامته لما خلفته لقته فى الدولاب
- آآآآآآآآآآ ........ ماهو كل واحد بيتخلف بطريقه غير التانى
- وانا منين بأه؟
- احنا لقيناك تحت السرير
- اه طب وليـ..........
- يابنى بأه ابوس ايدك ورايا شغل الصبح
- حاضر
- .................................
- بابا
- ايه يابنى بس
- هو انا هروح الحضانه امتى؟
- بعد بكره
- طيب وهو لما اروح المدرسه بأه مفيش لعب؟
- لا طبعا مذاكره بس
- اه يعنى اخر يوم لعب بكره
- اه
- طيب بكره بأه اروح عند جبوره فى البيت
- ماشى
- يابنى منا قلت ماشى اعملك ايه تانى
- شكرا يا بابا يا حبيبى( بوسه)
- شكرا نام بأه
- حاضر
- ......................
- بابا
- يابنى حرااااااااااام سيبنى انام
+++++++++++++++++++++++++++++++++++++++++++++++++++++++++++++
الحلقه التانيه
قوم يبنى باه
- هى الساعه كام؟
- عشره
- طب حد يصحى حد بدرى كده؟
- اه عشان تتعود تصحى بدرى عشان متغلبنيش من بكره
- انا كده هتعود ابيع لبن مش اروح مدرسه
- يبنى بطل غلبه باه وقوم
" قام قعد على السرير"
- خالتو احسبيها بالعقل انتى عارفه انى سواء متعود أولأ .... كده كده هغلبك فى الصحيان بدرى..... ماتسيبينى انام واكسبى فيا ثواب وخلاص؟
- يوه مش عارفه امك بتتعامل معاك ازاى بس
- بالشبشب مش كفايه مخلانيش انام وفوت عليا ميعاد الشغل
- يابا ليه كده متخليك محضر خير
- اخرس واسمع كلام خالتك وقوم
- حاضر يا فتاح يا عليم بس محدش بأه يقعد يقولى روح هات جرجير من تونس والكلام الفاضى ده ...... انا هصحى بس مش هعمل حاجه
- طيب نسيبك تنام ونمشورك زى ماحنا عاوزين طول النهار؟
- اممممممممم ....... لا يا عم انا صحيت وخلاص هنفطر ايه باه يا خالتو؟
- عاملالك اللى انت بتحبو عشان مسمعش نفسك
- يعنى عامله ايه يعنى؟
- شوف انت بتحب ايه وهتلاقينى عملتهولك
- مش عارف قولى باه
- اللانشون اللى انت بتحبه و...
- مش بحب اللانشون
- يبنى مش انت اللى قايلى هاتيه من امبارح؟
- اه منا كنت بحبه امبارح
- طب عاوز تاكل ايه؟
- اى حاجه اى حاجه وخلاص مش مهم
- طيب قوم يلا اغسل وشك
(لماضه مش بيحب يغسل وشه ابدا)
- لازم يعنى؟ ايه الحكمه من كده يعنى هو انا كنت نايم فى طينه؟
- يوه انت كل حاجه كده؟ ......... قوم عشان عاملالك مفاجأه
- ايه هى؟
- لما تغسل وشك الاول
- طب افرضى غسلته وماعجبتنيش المفاجأه بتاعتك؟
- قوم ياد بأه متخلينيش اقوملك (ابوه)
- حاضر حاضر .......... اصطبحنا بزعيق امال بقيت اليوم هيبقى عامل ازاى
(دخل الحمام طرطش ميه بس على وشه وخارج ماسك الفوطه ال يعنى بينشف وشه)
- ادينى غسلته اهو فين بأه المفاجأه؟
- شوف بابا جابلك ايه امبارح
- ايه ده وفرحانه اوى؟
- ايه يبنى ليه ؟
- حد يصحى حد من النوم على بدلة الاعدام؟
- يبنى ده لبس المدرسه
- ماهو اعدام ....... صحيان بدرى ونوم بدرى واتصلب انا طول النهار على دكه خشب وواجب ووجع دماغ ملوش آخر
- تعالى بس ......... ده بابا جايبلك كمان برايه بتنور
- بتنور ليه بأه هو انتوا ناويين تخلونى اذاكر فى الضلمه؟ نهايته والاستيكه مش بتنور ليه؟
- يبنى هو فيه استيكه بتنور؟
- يعنى هو كان فيه برايه بتنور
(لماضه كانت عاجباه جدا حاجات المدرسه بس طبعا مقالش عشان مياخدوش عليه وبكده دايما يطالبهم بالاحسن ......... وعجبته البرايه لدرجة انه قعد يبرى الاقلام كلها لغاية ما خلصت )
- امشى انا بأه يا بابا؟
- لا يا عم كل يوم يا كوره يا بلى (عبالولا)
- يعنى هم نزلوا العاب جديده يا فصيح؟
- الزعيم اللى هو الزعيم بجد لازم يكون عنده افكار جديده
-فكرتك ايه باه يا عبالولا؟ (بكار)
- نصطاد عصافير
- هههههههههههههه ادى يا عم اللى عاوز يعمل زعيم اونطه عصافير ال ازاى يا فتك انت بأه؟ (لماضه)
- يا عم معايا نبله جلد رايقه بصوا أهى (ويطلع النبله من جيبه)
"طبعا النبله كانت بدائيه جدا خشب على شكل حرف Y وبين الطرفين حتة استك عريض"
- ايه ده دى حلوه اوى .... جليبها منين ياد؟ (جبوره)
- بتقول ايه يا جبوره الكلب؟ عاجباك النبله اوى؟ طب منا ممكن اعمل واحده
- مفيش وقت احنا نروح نصطاد وكل واحد يضربله كام طلقه (بكار)
- حلو الكلام .......... يلا بينا (عبالولا من غير ما يستنى رأى لماضه فى اهانه واضحه)
- يلا انا هروح بس عشان خاطر جبوره نفسه يصطاد انما انا مش بحب غير صيد البط وانت طالع
- منا فاهم الله يرحمه كان بيصطاد ديناصورات (عبالولا)
- احنا هنصطاد ولا نلعب كوره احسن؟
- يلا يا عم نروح الشجره اللى فى بيت امنا الغوله فيها عصافير بالهبل
- يلا بينا
" امنا الغوله دى عندها بيت بالجنينه بتاعته ...... ست كبيره عجوزه اوى وكعادة العيال دايما بيخافوا من اى حد عجوز"
- انا هبدأ
- ليه يعنى يا لماضه مبدأش انا؟ مش انا صاحب النبله؟
(ودى فى عرف العيال غلطه لا تغتفر انه يقول على حاجه بتاعته او انه هو الى جايبها ........ وفرصه ذهبيه للماضه لا يمكن يضيعها)
- ماشى يا عم ما هى عشان بتاعتك هتذلنا بأه .......... اه علشان معناش نبله زيك ماهو..........
- خلاص بكار اللى يبدأ
- وانا متنازل عن حقى لجبوره (بكار)
- ماشى (جبوره)
- وجبوره متنازل عن حقه ده ليا .... ولا ايه يا جبوره؟
- اه ماشى يا لماضه العب انت
- ايه يا عم ده احنا هنهرج (عبالولا)
- خلاص هلعب انا (بكار)
" نسيب العيال مع لعبهم ونشوف كل واحد فيهم ظروفه ايه باه ........ جبوره ابوه نسخه مكبره منه يعنى برده جسمه ضخم اوى ومش بيعرف يفكر وبيشتغل فى مستوددع انابيب اما عبالولا ده طالع لابوه بالمللى قصير وسوسه كده برده وبيشتغل مكوجى وبكار قلنا ابوه بواب العماره بتاعتهم طب والمصيبه الكبيره؟ ده الوحيد اللى مش طالع لابوه .......... ابوه كمسارى اتوبيس ومعروف عنه الاحترام والدقه اوى ......... يدوبك العيال خلصوا لعب وطلعوا على بيوتهم واحنا مع لماضه"
-
- كل ده بره- كنت فين يله لحد دلوقتى
- بصى يا خالتو دلوقتى ماما نايمه طول اليوم هى واختى وبابا بره وانتى بتتفرجى على التليفزيون انا اجى اعمل ايه؟ ما تخليكى محضر خير مره بأه
- ماشى يا لمض يلا عشان تنام اكمن انت صاحى بدرى وهتصحى بكره بدرى
- يووووووووه هنام بدرى باه والقرف ده ( مع انه هيموت وينام )
- هتنام غصب عنك
- ماشى بس بكره تصحينى بالراحه .......... ماشى؟
- يلا على السرير ياخويا
- لوحدى كده؟ انتى اول مره تنيمى عيال صغيره ولا ايه؟
- اعملك ايه يعنى؟
- مين هيحكيلى الحدوته؟
- تعالى يا ممل
" فى السرير خالته نامت جنبه .......... "
- بس بصى باه من اولها لحسن مانا نايم مش عاوز حكايات قديمه
-- كان ياما كان فيه واحد اسمه على بابا
- نعم يختى؟ دى كل البشر عارفينها ....... ده انا لو خلفت واد بكره هتكسف احكيهاله ليكون سمعها فى بطن امه ....... ده حتى الـ......
- اخرس بأه
- اهو اما نشوف
- كان فيه واد وحش اسمه عبالولا
- ايوه ايوه ايوه .......... هى دى قولى تانى والنبى
- ههههههههههههههههه
يا خالتو ومش هنطق تانى
- كان فيه واد وحش اسمه عبالولا
- بس كده مش عاوز اسمع تانى .......... روحى انتى اتفرجى على التليفزيون واعملى اللى على مزاجك
- يعنى هتنام؟
- ده انتى جيتى على مزاجى طحن ............. بس بالراحه عليا الصبح عشان بقوم مزاجى مش رايق
- حاضر تصبح على خير يا حبيبى
- وانتى من اهله يا خالتو
++++++++++++++++++++++++++++++++++++++++++++++++++++++++++++++
- قوم يبنى بأه هو من اولها غلب كده
- ما تقولى لنفسك هو انا اللى بغلبك ولا انتى اللى مغلبانى؟
- حظك ان ابوك راح الشغل خلاص والا لو كان هنا كنت بقيت زى الفار
- يووووووووووووه ليه بس السيره د عالصبح ماشى هقوم بس مغسلش وشى والقرف ده ....ماشى؟
- ماشى يخويا ان شالله عنك ما غسلته خلى الواد عبد الله يبقى نضيف وحلو وانت ......
- حد فى الحمام؟
"انا الاستاذ سلطان وهفضل معاك يخويا انت وهو طول السنه ومش عاوز اسمع نفس اى كلب فيكوا ولما اقول على حاجه تتسمع مفهوم؟"
- اه ده شكله يوم باين من اوله
- بتقول ايه يا كلب؟
- لا يا بيه ده انا بقول الاسم تانى علشان احفظه اصل سمعى ضعيف
- احفظ يخويا .......قول يبنى انت وهو : ألف .....
- بسسسست ....واد يا جبوره ...انت يا حمار
- ايه؟
- انت بتقول معاهم؟
- مانت مقلتليش اعمل ايه طيب
- امك عاملالك سندوتشات ايه؟
- طعميه
- سخنه؟
- آه
- انت يا كلب مش قلتلك اسكت؟
- يا بيه ده انا بسأله الالف دى تتكتب ازاى اصلى نظرى ضعيف
- لو سمعت صوتك تانى انت او اى كلب فيكوا هطلعه بره
(وهنا لماضه أيقن انه خارج بره خارج بره لا محاله فقال يوضب لصحبه لانه استحاله يقعد ساكت ...هو عارف نفسه علشان كده مش بيضايق لما حد يقوله لماضه)
- بسسسسسسسست انت يا جبوره الكلب بتقول معاهم برده؟
- طب اعمل ايه طيب؟
- وكمان بتزهق عليا طب ودينى لاربيك......بص ادى الواد اللى جنبك كتف
- هو عملى ايه؟
- اديله وانت ساكت
- حاضر
- آى ....بيزقنى يا استاذ
- بتزقه ليه يا واد يا عجل انت؟
- ..............(لماضه مقالوش ليه ففضل ساكت)
- اياك تتنفس بعد كده .......قول ياد انت وهو جيم
- بسسسست واد يا جبوره
- ايه تانى؟
- الزق الواد اللى قدامك على قفاه
- وهو عمل ايه هو كمان؟
- زى ما الاولانى عمل
(وهو كان لسه جبوره هيفكر الاولانى عمل ايه ويربط الاحداث ببعضها؟ دى ميزه مش موجوده عنده زينا بس زى ما ربنا اخد منه نعمة التفكير والعقل لكن اعطاه جسم ضخم ووفره فى الصحه تفوق اقرانه بمراحل لذلك كان القفا بتاعه قفا.....يعنى قفا محترم )
- آآآآآآآآآآآآآى
- شفتك يا عجل بشرفى لاربيك.......اطلع بره
( بدون نقاش طلع جبوره بره علطول وهنا اتنفذت خطة لماضه كامله انما هو هيطرد ازاى مش مهم هوكده كده مش هيقعد ساكت ......ورنت فى دماغه كلمة جبوره "الطعميه سخنه")
- يعنى مش كفايه مش بتقول معاهم وسايبك لا ده انت كمان بتاكل فى حصتى .....ايامك سوده اطلع بره يله
- اصلى عيان ولازم آخد الدوا قبل الاكل
- طب وهو فين الدوا؟
- فى البيت اخدته ونزلت ونسيت افطر
- اطلع بره يله
(وطلع بره بس هو كان لسه هيدور على جبوره؟ لا طبعا لانى جبوره كان واقف قدام الباب مش عارف يروح فين)
- يلا بينا يا معلم جبوره؟
- على فين؟
- نلعب فى الحوش
- لا يا عم انا عاوز اقعد جوه فى الدفا مع العيال
(مشهد يسجله التاريخ وهو اعتراض جبوره على احد قرارات لماضه لذلك كان لازم لماضه ياخد قرار سريع قبل ما يفلت الزمام من ايده ......)
- طب خلاص متعيطش هندخل ونعتذر للاستاذ سرطان ده .......وهاكلك عقله بكلمـ...
- تاكل عقل مين يله؟ ده انا اكل عقل عشره زيك
- يا بيه ده هو اللى بيقول
- وربنا لاعدلك واخليك تبقى قاعد زى الجزمه فى حصتى ....خش ياد يا عجل انت اقعد مكانك وانت يا لمض هات حاجتك وتعالالى
- حاضر
(وهو بيجيب حاجته ....... نظرة شماته لا تغتفر من عبالولا كانت اول مسمار فى نعشه)
- اقعد هنا جنب البت دى قدامى
- يا بيه انا مش هشوف كده
- ليه يخويا مانت قدام اهو
- اصلى عندى طول نظر فمش بشوف الا من بعيد
- انشالله عنك ما شفت .....اترزع هنا .......قول يبنى انت وهو زرع
- زرع
- اكتبوا ورايا بأه
- هى ورايا دى تتكتب ازاى يا بيه؟ (لماضه طبعا)
- يعنى اكتب زى منا هكتب يا خفيف
- حاضر
- ممكن برايه لو سمحت؟ (دى البنوته اللى جنبه )
- اتفضلى
- ميرسى
(وهنا اتغير شكل لماضه تماما سواء داخليا او خارجيا .......طب داخليا وماشى طبعا اصطنع الرقه وهو طول عمره اللى كان بيعوز منه حاجه كان بيحدفهاله او يقوله ماتجيبها انت ....انما خارجيا؟ اترفعت حواجبه فى طيبه وابتسامه رقيقه وصوته نعم حتى ودانه كانت واقفه لفوق فى شقاوه واستعداد لخوض اى معركه كلاميه دلوقت اخدت وضعها الطبيعى)
- انت يبنى انت وهو كل واحد يكتب اسمه وهلف عليكوا واياك حد يغش من اللى جنبه انا شايفكوا كلكوا
- هو انتى اسمك ايه؟
- (ضحكت ضحكه طفوليه ) هكتبه وانت تقراه ....ماشى؟
- ماشى ("يادى البطء لسه هستنى كل ده ده انا كنت اروح السجل المدنى اشوفها اسهل" ده لماضه بيقول لنفسه)
- اهو اقراه
- ايه ده ؟ يا ستى انا لسه واكل الله يخليكى انا عاوز اسمك
- يبنى اسمى بسمله
- آآآآآآآآه وانا محــ....
- لا اكتبها وانا هقراها برده
- (يادى التوريطه السوده دى) بسسست كابتن
- نعم
- انت اسمك ايه؟
- متولى
- طب واللى جنبك؟
- سلامه
- ايه يا عم الاسامى دى .....دى اتلغت من سنة اربعين ....طب مفيش محمد جنبك؟
- اه اللى قاعد هناك ده
(وبعد ما لماضه نقل اسمه الاول كان استحاله طبعا يلاقى حد اسمه شوقى بس هو اتصرف)
- تعالالى يا عم اللمض .....فين بقيت اسمك يخويا؟
- الصفحه مكفتش
- طب ما تصغر خطك؟ او تكتب فى الصفحه اللى بعدها؟
- ما تعديها بأه هو انت متزنقتش وانت صغير يا بيه؟
- اتزنقت يخويا .....هو رمانى الرميه السوده دى الا الزنقه .....نهايته قول اسمك كله
(الفسحه فى عرف الاطفال افراج مؤقت من حبس زنزانة الفصل.....علشان كده تلاقى عيال كتير بتلعب اى حاجه وعيال تانيه بتجرى بدون هدف .....بتجرى وخلاص لمجرد الاحساس بالحريه)
لماضه : بصوا يا رجاله ....احنا دخلنا على مرحله جديده ف حياتنا ولازم يبقى لينا العاب جديده تناسب المرحله دى
عبالولا : يعنى هنلعب البلى ازاى؟
لماضه : لا بلى هنلعبه ازاى على الرمل ده؟ انت حمار يبنى
عبالولا : ماهو ممكن فى الفصل يا ذكى ماهو الفصل بلاط
لماضه : (وقد لمعت عيناه فهى فرصه ذهبيه للنيل من عبالولا) خلاص اللى عاوز يطلع الفصل تانى مع عبالولا يروح
بكار : لا طبعا فصل ايه قول يا لماضه اللعب اللى عندك
لماضه : هنلعب كهربا
جبوره : لا يا عم انا ابويا قالى متلعبش فى الكهربا
لماضه : اخرس انت واعمل زى ما هنعمل انت هتسمع كلام ابوك وتكسر كلامى ولا ايه؟
جبوره : لا طبعا
عبالولا : (فى صحوه مفاجئه وقد لمعت عيناه وابتسم ابتسامة شيطان) هو انت بتفهم حاجه يا لماضه؟ انت يبنى ملكش لازمه انا ممشيك معايا علشان تشيلى الشنطه بس
لماضه : انت اتجننــ....
بسمله : ممكن العب معاكوا؟
(وهنا بانت خطة عبالولا لاحراج لماضه قدام البنوته)
عبالولا : لا طبعا مش بنلعب بنات معانا
لماضه : لا هتلعب
عبالولا : خلاص هى اللى تجرى ورانا لانها جايه اخر واحد ولا ايه يا عم بكار
بكار : المفروض طبعا
(كان لازم لماضه يلاقى حل سريع لاستعادة هيبته المفقوده قدام بسمله بس بالنسبه للماضه كان عارف ان اللى هيجرى هيتعذب ومش هيسلك مع العيال دى واستحاله كان يضحى بحاجه زى كده حتى لو كان ابوه......وهنا اثبت لماضه ان عقله جهنمى بجد.....)
لماضه : طب وانا هجرى بدالها وجبوره هيجرى بدالى ...عد من واحد لعشره يا جبوره
جبوره : (فى تلقائيه وبدون تفكير) واحد اتنين تلاته.....
(بعد الفسحه كانواحصتين بسرعه كده وفى المرواح......)
لماضه : يلا يا رجاله اتكلوا انتوا على الله لانى مش جاى معاكوا
بكار : ليه يا عم ماتيجى؟
لماضه : اصلى هوصل بسمله (ونظرة تشفى لا بأس بها لعبالولا)
بكار : طب هنشوفك المغربيه؟
لماضه : لا اصلى هروح للواد سعيد كيله انا وجبوره لانه كان عاوزنى فى حاجه.... اشوفكوا بكره فى المدرسه ....سلام
(سعيد كيله ......صرح من صروح المنطقه الشامخه واساس من اساساتها الراسخه ابن الحج عثمان كيله الفران الوحيد فى المنطقه وسعيد اكبر من لماضه بسنتين بس مدخلش مدارس لان ابوه مش شايف للمدرسه فايده مباشره لان الواد بيمسك الفرن كويس جدا لوحده فلازمة المدرسه ايه بأه؟ هيعلموه طريقه جديده للعجن مثل؟ والغريب ان سعيد كان مبسوط جدا بانه مش رايح مدارس ولا وجع قلب لانه كان نوع فريد من نوعه بين اقرانه .....سعيد بيه كيله كان نصاب محترف ...مكنش حرامى ابدا هو بس كان نصاب بس.... لان فيه فرق كبير اوى بين الاتنين وهنعرف ازاى)
- يا اهلا يا اهلا بالرجاله
- اهلا بيك يا معلم سعيد
- اتفضلوا اتفضلوا
- خليك واقف يا جبوره
- يا عم ما تسيب الراجل يقعد؟
- لا ده البودى جارد بتاعى ميقعدش المهم خير يا معلم سعيد؟
- (تلفت سعيد حوله ونظر خلفه مع انه قاعد فى ركن اصلا) عمليه جديده
- لا يا عم فاكر اخر مره؟
- مش ربنا ستر وطلعت سليم؟
- اه بس الواد جبوره يا عينى اللى اتبهدل الراجل كان لابس حزمه ميرى وجبوره معرفش يقعد اسبوع.........المهم امتى وفين يا معلم؟
- على يوم الاتنين تعدى عليا زى دلوقت اقولك على الخطه
- باذن الله .......سلامو عليكو......يلا يله
(فى البيت لماضه بيستحمى وصوته جايب اخر الدنيا)
- عااااااااااااااااااااشقه وغلبانه والنبىىىىىىىىىىىىى
- شكلك كده فيه حاجه ياد
- ليه بس يا خالتو؟
- اول مره تستحمى من غير ما تطلع عينى معاك
- اه بعمل نيو لوك
- يا رب دايما كده النضافه دى
- خالتو ابقى اكويلى المريله باه احسن متكسره شويه من الجنب
- نعم؟ لا ده فيه حاجه باه
- وصحينى قبل سبعه علشان الحق استحمى
- تانى؟
- اه انا قررت ابقى نضيف بأه ......مش انتى اللى عاوزه كده؟ ولا ارجع معـ...
- لا خلاص كده حلو اوى...... استر يا رب عاللى هيحصل بكره
+++++++++++++++++++++++++++++++++++++++++++++++++++++++++++++++++
(اتى يوم الاتنين سريعا)
"صباح الخير يا عم الحج........بسمله هنا؟"
- بسمله مين؟
- بنتك يابا
- ايوه طب انت مين؟
- انا محمد صاحبها فى المدرسه
- الله هى بسمله دخلت المدرسه؟
- ايه يا عم الحج انت كنت مسافر ولا ايه؟ .......احنا تالت يوم دراسه اهو
- وكمان الدراسه بدأت؟
- بابا ......ماما عايزاك جوه ......يلا بينا يا محمد
- طب سلام باه يا عم الحج ومتبقاش تفطر فول بعد كده
"وفى الطريق للمدرسه......"
- هو باباكى ماله؟
- مش عارفه هو مكانش كده بس ماما لما اخدته للدكتور اتصنت عليهم وسمعته بيقولها
انه عنده انصفام فى الشخصيه
- يعنى ايه يعنى؟
- ماهو ماما سألته كده برده وقالها انه بقى اتنين
- طب ماحلو اوى كده
- ازاى بأه؟
- اخلى واحد يروح المدرسه ويعمل الواجب والتانى يلعب براحته .......بس كده
هحتاج واحد تالت يجيب طلبات البيت
- ما يمكن هو راح للدكتور عشان كده
- الله الله .....هو احنا جينا فى وقت مش اللى هو ولا ايه؟ (ده
عبالولا....ومعاه طبعا الشله كلها)
لماضه : لا عادى تعالى نروح كلنا مع بعض......ماهى مدرسة طه حسين بقت تلم اصلها
(وهو ينظر لعبالولا شذرا)
بسمله : اه صحيح مين طه حسين ده يا محمد؟
( مأزق آخر .....ماهو لماضه اكيد ميعرفش واستحاله يقول معرفش بس هو اتصرف)
لماضه : ده كان لعيب كوره زمان ......بس حريف اوى
عبالولا : لا ده كان مؤلف كبير يا عم المفتى انت
لماضه : وانت ايش عرفك انت يا خبير؟
عبالولا : استاذ سلطان قالها لما انت اطردت بره امبارح يخويا
بكار : اه صح
لماضه : ماهو كان لعيب كبير وبعد ما اعتزل بقى مؤلف
عبالولا : ازاى بأه اذا كان استاذ سلطان بيقول انه كان اعمى
لماضه : ماهو اصله كان حريف اوى فكانوا بيحطوله جرس كده شابك فى الكوره
عبالولا : جرس؟؟؟؟؟؟؟؟ انت عبيط يبنى جرس ازاى؟ والكوره هتجرى ازاى بأه مع
الجرس ده؟
لماضه : اه جرس اصلها كانت كوره ليف.....عارف الليف؟ (وهو ينظر لعبالولا مهددا
وضغط اوى على كلمة ليف)
عبالولا : لا طبعا كلامك صح كانوا بيحطوله جرس
(وهنا الموقف واضح جدا ان لماضه ماسك زله لعبالولا جامده اوى وبانت اوى لما ضغط
على كلمة ليف ومن احمرار وش عبالولا لما سمع الكلمه..........المهم وصلوا
المدرسه واخد كل واحد مكانه فى الفصل)
- كل واحد يطلع ورقه فاضيه قدامه
- ليه يا بيه هنلمع الدكه؟
- لا يا خفيف انا عاملكوا امتحان
- هو احنا لحقنا ناخد حاجه يا بيه؟
- مزاجى كده وبطل كلمة يا بيه دى
- حاضر يا باشا
- ولا دى كمان
- حاضر يا سلطان
- نعم يخويا؟
- طب اقول ايه بس يا بيه؟
- قول يا استاذ زى كل الناس ما بتقول يا لماضه انت
- حاضر
- كل واحد يكتب بسم الله الرحمن الرحيم فى وسط السطر ويكتب اسمه رباعى والارقام
من واحد لحد عشره
(وهنا لماضه بص بصه خبيثه اوى لعبالولا وقال للاستاذ ........)
- واللى اسمه صعب يعمل ايه يا استاذ؟
- صعب ازاى يعنى؟
- يعنى لو واحد اسمه الرابع ابو الليف مثلا؟
( طبعا العيال قعدوا يضحكوا بصوت عالى ومبالغه واضحه كشأن الاطفال كلهم )
- بس ياد انت وهو ........ انت اسمك كده يبنى؟
- لا يا بيه بس انا حبيت ....
- يبقى تخرس وتكتب اسمك بس وملكش دعوه بحد
- حاضر يا بيه
- تعالالى بأه يا حلو انت ......طبعا كاتب كله صح عشان غاششهم ....اسمك محمد
شوقى عبده ايه يخويا؟
- ممممم
- نعم؟
- ترمس بس ابوس ايدك متعليش صوتك
- طب لما انت كده بتتريق على الناس ليه؟
- اخر مره يا باشا والله
- وتقعد زى الجزمه فى حصتى؟
- لا طبعا ده انا اغير الاسم اسهل
- طب يا لمض .......اطلعلى على السبوره واكتبلى من واحد لعشره على ماشوف زمايلك
(وبعد فتره.....)
- واحد اتـ....عشره صح انما ايه اللى تحتها دى؟
- خمسه فى سته يساوى تلاتين
- هو انا قلتلك اكتبها؟
- لا دى من عندى
- طب امسحها
- يا باشا ما تخليها عشان لو محدش عارف يعنى
- طب يا اما تمسحها يا اما تكتب اسمك بالكامل
- مسحتها يا باشا
(وخلص اليوم بسرعه وجه المعاد المنتظر مع سعيد كيله للعمليه الجديده......)
- قول يا عم سعيد .....وخليك واقف احمى ضهرى يا جبوره
(سعيد بص حواليه وقال بصوت واطى اوى)
- الحلوه اتكلمت
- يا راجل؟
- اه والله
- طب اللون ؟
- احمر زى عرف الديك
- والحجم؟
- متعرفش تمسكه بايد واحده
- طب ماهو نفس المشكله موجوده من ساعة التوت برده ......درويش الكلب مبيتنقلش
- متقلقش عندى خطه بس يلا بينا
(ايه الحكايه بأه؟ ان شجرة التفاح اللى فى جنينة امنا الغوله طرحت ......طب
والمشكله فين؟ ان فيه غفير متعين من الحكومه عشان يحرس حنفية المياه العموميه
......اللذيذ فى الموضوع ان الحنفيه نفسها اتشالت خلاص والمواسير دخلت الحاره
والميه فى كل بيت والحكومه شالت الحنفيه بس نسيت تشيل الغفير وهو بيروح يقبض
شهر بعد شهر من البوسته وكأى مواطن مصرى محترم بيروح مكان جديد فهو بيفرض نفسه
على المكان والناس اللى فيه وبيعتبر نفسه واحد منهم وكمان بيعمل لنفسه دور يعنى
عمل اوضه خشب كده جنب بوابة الفيلا واعتبر نفسه بوابها ......... لذلك هو تطوع
بانه يقوم بالحراسه الليليه للفيلا وكمان للحاره كلها مع تأدية بعض الخدمات
مدفوعة الاجر لاهل الحاره)
- بص يا عم الخطه سهله اوى
- قول يا خط الصعيد
- احنا نصوت ونقول حريقه .....طبعا درويش هيطلع يجرى عشان يطفيها ندخل جوه
بسرعه وجبوره يرفعنا على كتفه نطلع الشجره نجيب اللى نقدر عليه وننزل بسرعه قبل
ما درويش يرجع
- حلو اوى بس دى هى الخطه بتاعة المره اللى فاتت يا سعيد ساعة التوت لما
اتقفشنا
- لا يبنى احنا ساعتها قلنا غريق
- مانت كنت حمار برده يا سعيد اوى وممشينا وراك هو احنا جنبنا بحر ولا ترعه حتى
عشان تقول غريق؟
- يا عم مشى حالك مش دخلت على درويش وطلع جرى وهو بيقلع الجلابيه؟
- اه عديها بس ده هيرجع يا عم لما ميلاقيش حاجه ويقفشنا زى المره اللى فاتت
- لا هعمل حسابى فى دى
- بس ده عارف اصواتنا كلنا
- عامل حسابى فى دى برده .........مش بقولك خطه متخرش الميه؟ (وبأعلى صوت عنده
) ....... جمجمه
(جمجمه ....علم من اعلام الحاره ......وعلامه من علاماتها المميزه ...... زيهم
فى السن بالظبط ولكنه غيرهم كلهم ومش معاهم فى الشله ولا مع اى شله تانيه لانه
كائن متفرد وحيد زى الصرصار اللى بيصفر كده .....جمجمه اتولد راسه كبيره جدا
-ومازالت- حتى قيلت اقاويل كتير اوى عن اللى حصل اثناء ولادته لكن لا مجال
لذكرها هنا.....اول ما اتولد العيال سموه ابو راسين وبعدها شوية اسامى زى دماغه
والهيد وشاكوش لكن رسيوا على جمجمه فى الاخر ......وجمجمه له رونق خاص جدا
مبيتكلمش مع حد نهائيا مع انه صوته جهورى جدا بالنسبه لسنه او بالنسبه للاطفال
بوجه عام ......جمجمه ملوش اى حد فى الدنيا غير جدته اللى بتنسى كتير حتى صارت
معرفة اسم جمجمه الحقيقى درب من دروب الخيال واتعود انه بيعمل اى خدمات لاهل
الحاره والمقابل معروف بليه او شلن والدفع مقدما ولو كان الزبون له تجارب ناجحه
معاه يبقى ممكن الدفع مؤخرا ......المهم الارض انشقت وظهر منها جمجمه متعرفش جه
منين)
- جمجمه عاوزينك فى شغل
- ............
- عاوزك تروح اخر الحاره من الناحيه التانيه ولما تسمع صفارتى اول مره تقول
حريقه باعلى صوتك وتانى مره اصفر تقول ماسورة الميه ضربت
(مد ايده مفروده معناه انه قبل المهمه وقادر على تنفيذها ........وبالفعل سعيد
حطله بليه فى ايده اصل الشله كلها سوابقها مع جمجمه لا تسر)
- جاهزين يا رجاله؟
- على بركة الله
- يلا بينا توييييييييييييييييييييييييييييييييت
(ودوى صوت جمجمه الجهورى مع صدى لا بأس به فى الحاره.....حريقه حريقه واندفع
طوفان اسمه درويش بجلابيته الزرقا المعتاده نحو مصدر الصوت....وهنا اندفع
الثلاثه لماضه وجبوره وسعيد جوه الجنينه ليأكلوا ما لذ وطاب من التفاح )
- لماضه احدفلى واحده
- طب ما تطلع يا جبوره؟
- منا طلعتكوا انتوا....انما انا مين هيطلعنى؟
- وانا مالى سيبنى آكل بأه
- سعيد ....سعيد... هات واحده
- يا عم انا متشعلق بايد وباكل بايد
- طب شوفوا مين هينزلكوا بأه
- وله يا جبوره .....انا مكنتش اعرف انك عيل وبتزعل من الهزار كده خد يبنى
واحده اهى
- يا عم انت بتدينى واحده مقطوم منها؟ ما تجيب واحده سليمه الله
- خد انت هتعيط .....نرمى المقطوم منها دى باه
- لا هاتها هاتها حرام برده
(بعد ما أكلوا وملوا جيوبهم كمان)
- صفر يا عم خلينا نروح
- تويييييييييييييييييييييييييت
(صوت صمت استمر كتير)
- تويييييييييييييييييييييييييييييييييييييييييييييت
(صوت صمت برده)
- ايه يا عم سعيد الواد فين؟
- مش عارف ماهو بيطلع مع ادان العشا بالظبط .......هو العشا ادنت؟
- اه دى الدنيا ليل خالص هى ادنت يا جبوره؟
- اه واحنا بناكل
- طب ماقلتش ليه يا عجل انت؟
- هو انت سألتنى؟
- طب هنعمل ايه فى الوقعه السوده دى؟ ....يادى الليله اللى مش باينلها ملامح
امنا الغوله فتحت باب الفيلا من صفارتك انت يا عم يللى فاكر نفسك قطر انت
.....هنعمل ايه؟ فكروا بسرعه كده انهى اخف امنا الغوله ولا جزمة درويش؟
**********************سلام و نعمة*****************:smil12:
