عبود عبده عبود
مفصول لمخالفة قوانين المنتدى
- إنضم
- 14 يوليو 2010
- المشاركات
- 16,645
- مستوى التفاعل
- 4,598
- النقاط
- 0
طريقة شى السمك البورى البحرى ..
عزيزتى حواء كيف توفرين من ميزانية البيت (ثلاثة) جنيهات ؟
بدلاً من ترك السمك للشى عند السماك وأرهاق ميزانية البيت بثلاثة جنيهات كاملة
يمكنك شى السمك فى البيت بطريقة سهلة جداً ومريحة جدا جدا ..ولكن قبل أن نبدأ فى الشرح تعالى لنتعرف كيف تفرقين بين البورى البحرى والبورى مزارع ؟ ما هو مش اى حاجة يعبيها لك البياع تجيبيها وتيجى على رأى المثل
( الحاجة تقول نيني نينى لغاية ما ييجى الموكوس ويشترينى )
( يُحذف السؤال لعدم التشتيت – الأدارة )
نعود للمقادير :
نص كيلو "ردة"
كيلو سمك بورى بحرى طازج
صفيحة لزوم الشوى
ان لم يكن عندك صفيحة للشوى وصى عم (عادل) الزبال يجيبها لك معاه الصبح وهو بيشيل الزبالة ...
( لاتنسى أعطيه خمسة جنيهات تمن الصفيحة )...
طبعا الصفيحة فى منتهى القذرة ..هاتى طبق عميق أو لو كان الحوض عندك متسع بما يكفى أملأيه بالمياه الساخنة لدرجة الغليان ( وخدى بالك علشان أيدك ما تتلسعش ) ..أنقعى الصفيحة القذرة داخل المياه الساخنة وأتركيها مدة خمس دقائق ..بعدها ..
أرفعى الصفيحة من الحوض ...
حاسبى ...أتلسعتى يا فالحة م المية السخنة ؟؟ ...
ضعي أصابعك الملسوعة داخل الفريرز بسرعة قبل ما تورم ...لمدة دقيقتان ..
نعود للصفيحة القذرة بعد أن طهرتها المياة الساخنة ...
هاتى شوية رابسو وسلك مواعين وأدعكى بخفة الصفيحة من الوجهين حتى تنظف ...
طبعا الصفيحة لها حواف مدببة ولابد من تهذيبها ..
هاتى الشاكوش الصغير من دولاب العدة اللى فى البلكونة واثنى حروف الصفيحة على الحوض وأطرقى على الحواف طرقاً خفيفاً حتى تنثنى من الداخل ..بعدها مررى بأصابعك على الحواف للتأكد من أنه لا يوجد حرف مدبب يعورك فى ايدك ...
حاسبى ياغشيمة ...أتعورتى يافالحة ؟
بسرعة قطنة مع صبغة يود على الجرح علشان ينضف ..وبعدها بلاستر طبى مقاوم للمياه علشان مايقعشى منك وأنتى بتغسلى المواعين ع الحوض ..
ما عندكيش بلاستر ؟!
حطى حاجة عليكى بسرعة وأنزلى للدكتورة "منى" اللى فى الصيدلية اللى تحت البيت خليها تلف لك صباعك كويس ..
وما تنسيش تسأليها عن "صلاح" أبن طنط "أمينة" اللى كان"بيرجع" امبارح عمل أية فى الأسهال ...
:
:
أستنى قبل ما تنزلى ...
:
:
رجعى الشاكوش لدولاب العدة اللى فى البلكونة قبل ما "البيه" بتاعك يرجع ويفتح جاعورته ...
كفاية كده مع الدكتورة "منى" ..مش وقت السؤال عن " ميك آب " دلوقتى ..
ورانا سمك عايزين نشويه ...ما تنسيش تحاسبيها على البلاستر أديها تلاتة جنيه
وأنتى طالعة بقى ماتنسيش تعدى على أبلة " فتحية " عشان تسألى عن الواد أبنها اللى مسكوه أمبارح فى شارع محمد نجيب ..
أنتى عارفة طبعا انه أتمسك بحرز حشيش... لكن أعملى نفسك هابلة وصدقيها أنه أتمسك علشان ثورجى وناشط سياسى على الفيس بوك ..
أية عزمتك على فنجان قهوة مع سيجارة " بلومونت " ؟!..
مافيش مانع
أنا مستنيكى خلصى ونكمل مع بعض (( طريقة شى السمك البورى فى المنزل ))
خلصنا القعدة مع أبلة " فتحية " شربنا فنجان قهوتنا وسجرنا وأطمئنينا على الواد فتحى الحشاش خلاص ؟
نرجع بقى لطريقة شى السمك البورى البحرى فى المنزل ..
حطى الصفيحة ع النار لغاية ما تحمر كويس ...بتاخد من ساعة لساعة الا ربع ..
يييييه أنبوبة البوتجاز فضيت ؟؟ ...
هو فيه حد بيستخدم أنابيب دلوقتى ؟ فين بتوع الغاز الطبيعى ما دخلوش عندكم لية ؟
مش مهم ...أبعتى هاتى أنبوبة جديدة ...
أندهى على عم (جمال) البواب خليه يشيل الأنبوبة الفاضية يغيرها لك ...وأديله خمستاشر جنيه ...علشان هيشتغلك ويقولك أنه أشتراها م السوق السودة ...
وما تنسيش ...
:
:
:
:
:
شيعى بقى معاه كيلو السمك البورى يشويهم عند السماك وأعطيه ستة جنيه ..
تلاتة عشان المشوار بتاعه ...
وتلاتة جنيه عشان شوى كيلو السمك ...
أى أسئلة وأستفسارات عن طريقة الشوى المذكورة أعلاه أنا تحت أمركم ...
