المرأة بين ماتحب ان تكون ومايجب ان تكون( الصراع النفسى )

[Desert Rose]

نظرا لحالتى النفسية السيئة اللى بمر بيها حاليا فحبيت طبعا انكد عليكو:t33: :t33: تذكرت دراسة قرأتها عن مرض العصاب عند المرأة
للتعريف بمرض العصاب هو ( يصبح الإنسان مريضا بالعصاب إذ صادف صعابا في التكيف مع هدوئه الداخلي أساسا أو مع علاقاته بالأخرين أو الاثنين معا . أن الشخصية الإنسانية في محاولتها للتكيف مع الضغوط داخل النفس وخارجها تستخدم أعراضا نفسية أو جسمية "

اعراض مرض العصاب اعتقد معظم الفتيات مروا ببعض منها ان لم يكن كلها
مثلا : كأبة بدون اسباب واضحة
خمول وكسل ورغبة فى النوم
صداع مستمر
معظم النساء بيرجعوا سبب هذة الاعراض اما للحمل والولادة او الدورة الشهرية مثلا
لكن الدراسة بتقول ان اعراض مرض العصاب ( مرض نفسى ) تزيد بين الفتيات المتعلمات والعاملات عن الفتيات الغير متعلمات
تفتكروا ايه اللى يخلى هذا المرض ينتشر بين المتعلمات عن غير المتعلمات ؟ مع العلم ان مرض العصاب لايعطل عن العمل ولا يعطل المرأة عن اداء واجباتها وروتينها اليومى وممكن المرأة تعيش وتموت دون ان يدرى احد ولا هى تدرى انها مصابة بهذا المرض النفسى

حاولت انى احلل هذة الظاهرة ( على فكرة هذة الدراسة دراسة مصرية اتعملت على سيدات مصريات )
ولقيت ان المشكلة اللى بتخلى المرأة تصاب بهذا المرض هو عدم توافقها وارتياحها النفسى بين ما تحب هى ان تكون وبين مايجب او مايتوقع منها الاخرون ان تكون
يعنى المجتمع والاهل والاسرة يتوقعوا من البنت انها علشان تكون طبيعية وتعيش حياة طبيعية لازم تتجوز ولما تتجوز لازم تخلف ولما تخلف لازم تكون ام وزوجة صالحة والام والزوجة الصالحة هى اللى لازم تيجى على نفسها لابعد الحدود علشان يتقال عليها امرأة فاضلة ( لازم يدوها صبغة دينية ايضا )

لكن ولا حد بيسأل نفسه لا فى المجتمع ولا فى الاسرة البنت ديه نفسها عايزة ايه ؟ عايزة تعمل ايه فى حياتها ؟ يمكن هى مش عايزة تتجوز ؟:w00t: صدمة كبيرة بالنسبالهم يعنى ايه بنت مش عايزة تتجوز ؟؟؟؟؟ كل البنات by default عايزين يتجوزو
طيب يمكن هى عايزة تجوز بس مش دلوقتى :w00t: بردو نفس الصدمة يعنى ايه مش دلوقتى كل البنات عندهم استعداد للجواز فى اى وقت
يمكن هى اتجوزت بس مش مستعدة للامومة دلوقتى
ليه ؟؟؟؟؟؟؟ يعنى ايه مش مستعدة للامومة دلوقتى ؟ المفروض البنت ام فى جميع اوقات حياتها والام مدرسة
والامومة شئ ممتع وجميل ( والسيدات بيضحكوا ويكدبوا على بعض ويصوروا لبعض ان الامومة رحلة كلها متعة وجمال وانا لا انكر انها فيها متعة لكنهم مش بيقولو الحقيقة كاملة انها فيها تعب واكتئاب وحزن وضغط وفيه حاجة اسمها اكتئاب ما بعد الولادة وعلشان كده بتسمعو عن امهات قتلوا اطفالهم والناس تقول ديه ام ديه ؟ هى ام لكنها تعانى فى صمت ومحدش مصدق انها محتاجة مساعدة ويخلوها تحس بالذنب لما تحس بالضيق والاكتئاب من اولادها وكأن المفترض انها تفضل تنزف طول الوقت من غير الشعور بالتعب ولو للحظات )

وهكذا تجد المرأة نفسها فى صراع بين ما تحب هى ان تكون وما يجب ان تكون علشان باقى المجتمع يفرح ويتبسط انها لم تخرج عن الدور المرسوم وان كل حاجة تمام وان الامن مستتب
ولما فكرت ليه المرض ده بيزيد بين المتعلمات ؟ يمكن المشكلة فى تعليم الفتيات ؟ ( بلاش نعلمهم بقا ادى اللى اخدناه من التعليم )
لان فى رأيى المرأة المتعلمة بتنفتح مداركها اكتر على حقوقها وعلى مايمكن ان تكون عليه خارج نطاق المرسوم لها من المجتمع
فهى تعانى هذا الصراع الداخلى بين احلامها الشخصية وبين تأدية دورها المرسوم لها مسبقا من يوم ولادتها من جانب اسرتها وباقى المجتمع
للموضوع بقية ( اعتبروها فضفضة )

 

[Desert Rose]

وحتى تستمر المرأة فى لعب الدور المرسوم لها من المجتمع يستمر المجتمع فى ضخ مجموعة من الاكاذيب فى عقل المرأة حتى تصبح فى النهاية مغسولة الدماغ تماما جاهزة لعملية البسترة :t33::t33:

اول خدعة :

(المرأة تحقق ذاتها فى زوجها واطفالها )​

انا لاانكر روعة الاسرة واهميتها ولا انكر جمال الحياة العائلية الاسرية المسيحية الحقيقية لكن هل فعلا تكتفى المرأة نفسيا بتحقيق ذاتها من خلال نجاح زوجها واطفالها فقط ؟
انا كنت فاكرة كده
بس قابلت سيدات كبار فى السن متزوجات وسعيدات فى حياتهم مع ازواجهم واطفالهم ازواجهم ناجحين وابنائهم ايضا ناجحين ولا يوجد مشكلة ظاهرية
الا انه فى ساعة فضفضة تلاقى الواحدة من دول تقول يا انجل تعرفى لما كنت فى سنك كان نفسى اعمل واعمل واسوى واروح واجى بس ها الزمن بقا يابنتى
اقولها حضرتك عندك زوج ممتاز وابناء ممتازين دول مش كفاية ؟
تقولى يابنتى زوجى وابنائى رائعين لكن مازالت احلامى التى لم تتحقق عايشة جوايا قالولى الزمن هينسيكى لكن واضح ان الانسان مش بينسى احلامه ابدا ويفضل جوايا شئ ناقص مش عارفه اكمله .​

للموضوع بقية ​

 

[+إيرينى+]

تسجيل متابعة لروعة الموضوع

أنا بدأت أشك إنى عندى مرض العصاب :fun_oops:

 

[Samir poet]

متابعين شكلوموضوع شيق
كلةاثارة ودم اكشن
مووووووت صراع
مصامى دماء فيلم رعب
ربنا يسترها
هههههههههههههههه
وميرسيةليكى ومنتظرين الباقى

 

[النهيسى]

متابع​

 

[Desert Rose]

تسجيل متابعة لروعة الموضوع

أنا بدأت أشك إنى عندى مرض العصاب :fun_oops:

ايرينى شكرا لمتابعتك وشكرا على التقييم الجميل
هههههه لامتخافيش كلنا عندنا نفس المرض مش انتى بس :new6:

 

[Desert Rose]

متابعين شكلوموضوع شيق
كلةاثارة ودم اكشن
مووووووت صراع
مصامى دماء فيلم رعب
ربنا يسترها
هههههههههههههههه
وميرسيةليكى ومنتظرين الباقى

ميرسى ياسمير
بس مفيش دم ولا حاجة ديه مجرد فضفضة نسائية ههههه
شرفت وشكرا على التقييم

 

[Desert Rose]

متابع​

شكرا استاذى لمتابعتك تشرفنى طبعا

 

[Samir poet]

ميرسى ياسمير
بس مفيش دم ولا حاجة ديه مجرد فضفضة نسائية ههههه
شرفت وشكرا على التقييم

احكلى احكلى:66::66:
قولى قولى:close_tem:close_tem
علشان لما يجى يوم :act19::act19:
الدور عليا فى الجواز سعتها:bomb::bomb:
مش هخلى مراتى او عروستى المستقبلية
مشهخلى المرض دا يفرق بينى وبينها:new8::new8:
عادى مستعداخليها تنكد عليها :love45::love45:
هههههههههههههههههههههههه

 

[Desert Rose]

طيب نكمل باقى الاكاذيب وانا بعتذر انى مقدرتش احطهم بتسلسل معين لان زى ماقولتلكم انها فضفضة فاللى بيجى على بالى بقولة

الخدعة الثانية

(البنت لازم تتجوز )​

الزواج خطوة مهمه فى حياة اى انسان واول مصمم ومشرع لزواج على الارض هو الله نفسه فالزواج فى حد ذاته ليس المشكلة انما المشكلة فى نظرة الناس لزواج البنات
من اول مابتتولد البنت ويعرف الاب والام انهم عندهم بنت واول حاجة يفكروا فيها هو جوازها ومش هما بس لالالالالالالالالالا ده كل العائلة فتلاقى مثلا فى معموديتها ولا حتى عيد ميلادها الاول بتكون ايه التهانى المرسلة من الاهل والاقارب للاب والام بمناسبة معمودية بنتهم او عيد ميلادها ( عقبال ماتجوزيها وتفرحى بيها ) طيب ولو متجوزتش مش هتفرح بيها ولا هتدفنها ولا هعمل فيها ايه ؟:thnk0001:​

وهكذا بتتربى البنت من صغرها ان هدفها الاسمى واقصى سعادتها وكل احلامها فى الحياة هى انها تلاقى العريس الكويس المناسب الجاهز
وكل فعال وتصرفات وتوجهات البنت من اول ما توصل سن 20 سنة مثلا او اقل فى بعض الاماكن هى موجهه ناحية هدف واحد وهوالجواز فهى بتتعلم علشان تتجوز ( الاهالى مش بيعلمو بناتهم تعليم عالى ايمانا منهم بأهمية التعليم وان العلم نور ولا ان طموح البنت كده وهى عايزة تتعلم والكلام الفاضى ده :new6: لا خالص هما بيعلموها لانه كل ماعليت درجتها التعليمية كل ما عليت فرصتها انها تتباع اسرع واحسن فى سوق الرقيق قصدى سوق الزواج ) وبتاكل علشان تتجوز وبتلبس علشان تتجوز وبتحط مكياج علشان تتجوز وبتخرج علشان تتجوز وبتروح الكنيسة والاجتماعات وممكن تخدم كمان علشان تتجوز وممكن كمان تتشتغل علشان تتجوز فكل حاجة بتعملها يجب لها ان تصب ناحية الاتجاة والتوجه والهدف الاعظم وهو الجواز
طيب السؤال هنا ؟ افرض انها حبت تعمل حاجة خارجة عن الاطار المرسوم والخطة الموضوعة له فى كيفية اصطياد عريس مناسب فى الوقت المناسب ؟ :thnk0001: ها ؟ يعنى ايه بقا تخرج عن المألوف ؟
يعنى مثلا عايزة تكمل تعليمها بره ؟:w00t: الصدمة
تكمل تعليمها بره وتسافر من غير عريس ؟ لالالالالالالالا
نشوف العريس الاول وتتجوزى وبعدين تعملى اللى انتى عايزاه
مش لما يابنتى تشوفى نصيبك هيبقا فين ؟بس انا عندى فرصة كويسة انى اتعلم واشتغل بره :w00t: مفيش بنت طبيعية تفكر فى اللى انتى بتقولى عليه ده اى بنت طبيعية لازم يكون هدفها الاول والاخير هو الجواز ولازم تعمل كل حاجة ممكنة وغير ممكنة علشان تحقق هذا الهدف العظيم
وهكذا تكون الفتاة بين الصراع الازلى المرهق بين احلامها ورغباتها الشخصية فى اختيار طريق ومسار اخر لحياتها غير الزواج او ربما مجرد تأجيل لفكرة الزواج وليس الاستغناء عنها كليا وبين ما يتوقع منها الاهل والمجتمع ان تفعله وهو ان تتزوج
وهكذا تخضع الكثير من الفتيات لضغط الاهل والمجتمع وتتخلى عن احلامها الخاصة من اجل الحلم العام الموضوع لها مسبقا من يوم ولادتها وهو الزواج
والمشكلة ان الاهل والمجتمع يقنعوها ان قمة سعادتها وقمة سعادة البنت فى الجواز ( هذة خدعة اخرى هنتكلم عنها ) فيقنعوها انها مهما اتعلمت ومهما اشتغلت لن تحقق السعادة النفسية الكبرى الا لما تتجوز لان نفسية البنت كده ( ياسلام كلهم بقو سيجموند فرويد دلوقتى وفاهمين نفسية البنت ) ​

وهكذا تفضل البنت فى صراع ملاحقة او الحصول على العريس اللقطة
بيقولوا ( اهالينا يعنى ) ان الدنيا اتغيرت الحمدلله عن زمان واتطورت ومفيش بنت دلوقتى ( على حد كلامهم ) حد بيجبرها على الجواز :w00t: انا اللى اتصدمت بقا دلوقتى
امال عملية الضغط النفسية اللى بتم عليها علشان تتخلى عن احلامها الشخصية من اجل الزواج ده مش اجبار ؟انها تتخلى عن المعلوم من اجل المجهول اللى سيأتى فى المستقبل وربما لايأتى اصلا ده مش اجبار يامتعملين يابتوع المدارس ؟
البنت دلوقتى بتقدر ترفض العريس اللى متقدم وتقول لا لو معجبهاش ده قمة حرية الاختيار :w00t:
ليه هو المفروض انها تقول اه على طول الخط ؟ وبعدين هى مش حرية الاختيار تتضمن حرية اختيار الشخص وحرية اختيار التوقيت
البنت عندنا بتختار الشخص بمنتهى الحرية ؟لا هى بتعقد فى بيت باباها منتظرة المعروض عليها وتقول اه او لا عليه
طيب بتختار التوقيت ؟ يعنى ممكن بنت تقول لا انا مش عايزة ومش مستعدة للجواز دلوقتى ؟ عارفين هيقولو عليها ايه ديه بنت مش طبيعية مريضة معقدة اكيد حاجة حصلتلها ولا عملت مصيبة عقدتها من الجواز يمكن باباها بيضرب مامتها قدامها :new6: اصل مش ممكن كل البنات جاهزين للجواز طول الوقت ( هكذا يعتقدوا )
وطبعا مش عايزين ننسى ان البنت من اول ماتوصل سن العشرين فهى فى صراع مع الزمن لان المجتمع محدد ليها مدة صلاحية معينة تصلح فيها للجواز وتكون اختياراتها وفرصتها احسن فيها لكنها لو تخطت هذا السن طبعا بتكون صلاحيتها انتهت وفرصتها قلت وممكن تضطر انها تقبل بأى جوازة والسلام ( لانها بردو لازم تتجوز لانه عندهم انها تكون عايشة فى جحيم مع شخص غير مناسب ليها بردو افضل 100 مرة من انها تكون عايشة سعيدة ومكتفية مع نفسها من غير جواز ) ما احنا قولنا هما فاهمين نفسية البنت اكتر مننا هما عارفين ان قمة سعادة وراحة اى بنت النفسية هى فى الجواااااااااااااااااااااااااااااز
الجواز والسلام
وهكذا تصاب البنت بصراع نفسى بين شخصيتها الحقيقية وهويتها الحقيقية ( المتمثلة فى احلامها الشخصية لان الاحلام هى التى تحدد وترسم هويتنا الحقيقية ) وبين الاحلام او الاهداف المفروضة عليها من المجتمع والشخصية المفروضة عليها من المجتمع وهى شخصية الزوجة مما يسبب لها اعراض مرض العصاب ​

للموضوع بقية ​

 

[Desert Rose]

طيب نكمل
التخريفة التالتة اللى بغسلوا بيها دماغ البنات هى :

( قمة سعادتك فى الزواج ) ​

طيب البنت الحمدلله خضعت لكلام الاهل والمجتمع وتخلت عن احلامها وطموحاتها الشخصية علشان تحقق طموحات الاهل وطموحات المجتمع ككل ( ما هو المجتمع عندنا كله بيتدخل فى حياة البنت ) واقتنعت ان قمة سعادتها فى الجواز وانها مهما وصلت مش هترتاح غير لما تجوز
طيب الحمدلله ربنا فك عقدتها واتجوزت ها ايه حصل ؟...... ولاحاجة
بتفوق البنت على الصدمة الكبرى ( بعد انتهاء شهر العسل طبعا والكلام الحلو الخروج والهدايا ) ان الزواج مسئولية كبيرة مش مجرد فستان ابيض وشهر عسل وكلام حب
وان الجواز حياة عادية زى اى حياة لكن اللى بيختلف فيها انها بتشارك حياتها مع شخص اخر وكمان بتشيل مسئولية شخص اخر واحيانا اشخاص اخرين فى حالة وجود اطفال
اشخصيا اعرف كتير من البنات اصابوا بصدمة شديدة بعد الجواز وكرهوا الجواز كله بعد ما كانوا هيموتوا عليه قبل ما يتجوزوا
هذة الصدمة النفسية تحدث عندما تتخلى عن احلام اليقظة ( التى يبثها فى عقلك المجتمع والمحيطين حولك عن روعة شئ معين ) وتلامس ارض الواقع بحقيقتها وقسوتها ​

فالصدمة تكون شديدة وتزداد شدتها وحدتها كلما كانت احلامك وتوقعاتك كبيرة ووردية فعندما تلامس قدمك ارض الواقع تحدث الهزة النفسة العميقة داخل كيان الانسان وتتحطم احلامك الوردية امام عينيك على صخرة الواقع
عندتا يهتمو ان البنت تجوز قبل ما القطر يفوتها , طيب حد بيهتم يعلمها يعنى ايه جواز ؟ يعنى ايه مسئولية ؟ يعنى ايه زوج ؟ يعنى ايه اطفال
طول النهار بيتكلمو عن الجواز الجواز وجواز البنت ولازم تتجوز حد بيهتم يهيئها نفسيا للنقلة الكبيرة اللى هى داخلة عليها
حد بيبطل كدب عليها ( وخصوصا من السيدات والبنات اللى حواليها ) ويقولها حقيقة الزواج انه مش مجرد فستان ابيض وشهر عسل ؟
مفيش حد
علشان كده تدخل البنت مؤسسة الزواج وتصدم بالواقع والمسئولية الملقاه عليها فتصاب ايضا بأعراض مرض العصاب نتيجة للصدمة والتناقض بين الاحلام والتوقعات الوردية وبين الواقع
وتصدم اكثر لمعرفتها انها تخلت عن احلامها الشخصية من اجل حلم الزواج على امل ان الزواج سيجعلها اكثر سعادة مما كانت ستشعر بها اذا تخلت او اجلت فكرة الزواج وحققت احلامها الشخصية ​

​

 

[Samir poet]

تمام عندك حق بس بعد اذنك غيرى لون لون الخط والحجم بتاعو معلش علشان عينا وجعتنى منو دا طبعا بعد اذاك لو مش حابةتغير لون الخط وجحمو مفيش مشكلة
​

 

[Desert Rose]

التخريفة الرابعة

( الامومة رحلة ممتعة )
​

طيب البنت اتجوزت اهى واتصدمت الحمد لله وعملت اللى المجتمع عايزها تعمله ( هل المجتمع هيسكت على كده ؟) لالالالالالالا هى لسه مكملتش الدور المرسوم ليها فى الحياة هى عملت نصه انها بقت زوجة لسه النص التانى انها تبقى ام

وزى طبعا ما علماء النفس الموجودين والمنتشرين بكثرة فى مجتمعنا اللى بيقولو وبيأكدوا ان كل البنات جاهزة فى اى وقت للجواز فهما بردو بيقولوا ويأكدوا انى اى واحدة متجوزة هى جاهزة فى اى وقت انها تكون ام
وعلشان كده بيسألوا من الشهر الاول من الجواز ها مفيش حاجة جاية فى السكة ؟؟؟؟:new6:

طبعا هما لايعترفوا ابدا ان الامومة محتاجة استعداد نفسى وتهيئة وبيكدبوا على ابعض ( السيدات ) بأنهم بيصوروا للبنت ان الامومة ديه رحلة كلها متعة وجمال وروعة ( انا لاا انكر ان الامومة رائعة وهى ممتعة فعلا ) ولكن علشان اتكلم عن تجربة وانقلها بصدق لازم اقول التجربة بكل جوانبها بحلوها ومرها
فبيبتدوا يبثو الاكاذيب فى عقل البنت ان قمة سعادتها اللى لسه جاية انها تكون ام بغض النظر اذا كانت مستعدة نفسيا دلوقتى ولا لا لان الاستعداد النفسى للامومة هو اللى بيحدد اذا كانت هتستمتع بالتجربة والامومة ولا لا
لكن محدش مثلا بيقولها ان احساسك بطفلك وحبك ليه امر فى بعض الاحيان لايحدث من اول ساعة بعد الولادة لكنى اعرف سيدات الموضوع اخد معاهم وقت علشان يبتدوا يشعروا بعاطفة الامومة ناحية الطفل هى بتحبه وبتعتنى بيه لكن مشاعر الامومة الفياضة اللى بيعقدوا يحكو عنها من اول ماشافت ابنها او بنتها او حتى من قبل ماتشوفه ديه بتاخد وقت مع عدد لابأس به من السيدات وطبعا الوقت بيطول كل ما كانت البنت اصلا غير مستعدة وغير مهيأة للامومة فى الوقت الحالى
فبيعتبر طفلها وقتها شخص دخيل على حياتها لم تكن هى مهيئة للاستقباله
محدش من السيدات دول مثلا بيقول اى حاجة عن اكتئاب ما بعد الولادة post partum depression وده مرض حقيقى على فكرة واعرف ناس اخد معاها سنة بحالها علشان تخف منه مع العلاج بالادوية وهو اكتئاب فعلى فيه كل اعراض مرض الاكتئاب
وعلشان كده بتسمعو عن امهات قتلوا اطفالهم بعد الولادة وممكن تقتل نفسها كمان ويقولو عليها ديه ام ديه ؟ لا هى ام وام جدا ومش مجنوة لكنها مريضة وتعانى فىصمت من مرض حقيقى لكن محدش مصدق لان الكل متوقع ان الام ديه لازم تكون سعيدة جدا فى قمة سعادتها بعد الولادة ومش مفروض تحس بأى ضيق او تعب او كأبة والا كده تبقا ام مش كويسة وام قاسية
لا احد يتكلم مثلا ولا يذكر الآم الرضاعة الطبيعية , الرضاعة الطبيعية مؤلمة جدا وخصوصا فى الاول انا شوفت ناس بتصوت وتبكى من كتر الآلم وناس توقفت عن الرضاعة الطبيعية ولجأت للصناعى لعدم قدرتها على تحمل الم الرضاعة وطبعا اللى من حواليها مش هيسكتوا انتى ام انتى؟ ازاى مش عايزة ترضعى ابنك رضاعة طبيعية وهكذا تصاب هى بشعور قاتل بالذنب لانها مش قادرة ترضع طفلها طبيعى ولا احد يعترف ان الرضاعة الطبيعية شاقة ومؤلمة وغير محتملة فى بعض الاوقات رغم انها مفيدة جدا للام وللطفل
وهكذا تصاب البنت بأعراض العصاب نتيجة للصراع النفسى الداخلى بين ماتشعر به من ضيق وتعب واكتئاب ورغبة فى بعض الاوقات بالابتعاد عن اطفالها لتهدئة اعصابها وبين مايتصوره او ما يضعه لها المجتمع والسيدات من حولها عن ان الام لا تتعب ولا تكل ولا تمل ولا تكتئب ولا تضيق ابداااااااااااا من اطفالها
فتصاب بأعراض العصاب نتيجة لشعورها المميت بالذنب انها ام سيئة ولا تحب اطفالها بالقدر الكافى

​

 

[+GOSPEL OF TRUTH+]

انا بقي قررت قراراين او تلاته

اولهم اولع في المجتمع العجيب دا بجاز

ثانيا احاول احقق احلامي او هرمي نفسي من البلكونه

ثالثا ما اسمعش كلام حد حتي لو قالوليي يا عانس يا كركوبه هعيط شويه و هنسي كالعاده بعد كل مره يتقال لي فيها الكلام دا....

 

[Desert Rose]

تروث الحلول بتاعتك الصراحة احلى من بعض :fun_lol:
ولايهمك من كلام الناس هما كده كده مش هيبطلو كلام

 

[Kerlos-love-Jesus]

بعيدا عن اي رغي مطول

المرأة العربية ليها حلين عشان تعيش حياة سليمة

1- تسافر برة البلاد العربية ، بس مش مع جوزها الشرقي المتشدد
2- ترضى باللي هي فية وتسكت

أي حل غير دة تعب ليها

 

[Desert Rose]

نكمل
الخدعة الخامسة

( المرأة الفاضلة تبذل دون انتظار مقابل ) ​

الكتاب المقدس تكلم عن المرأة الفاضلة وعن صفاتها وهى صفات رائعة جدا ياريت الواحد يقدر يوصلها
لكن لاننا مجتمع بيحب ياخد نص الكلام على حسب مزاجه فتم تأويل فكرة المرأة الفاضلة فى الكتاب المقدس الى الفكرة التى تخدم فكر المجتمع الانانى الذى يحاول فقط ان يحصل من المرأة على ماتستطيع ان تقدمه دون النظر الى احتياجاتها
فتم بث فكرة ان المرأة والزوجة والام الفاضلة هى التى تعطى وتعطى وتعطى وتنزف دون انتظار مقابل ودو ان تحصل على مقابل وان مجرد طلبها للمقابل او انتظارها له ينفى عنها صفة انها امرأة فاضلة ​

لكن تعالوا نبص كده على فكر الكتاب المقدس الحقيقى عن المرأة الفاضلة واذا كانت فعلا اخدت مقابل ولا لا ​

بصوا الكتاب بيقول ايه ؟
امرأة فاضلة من يجدها لان ثمنها يفوق اللالئ
بها يثق قلب زوجها ​

ايوووة هنا مربط الفرس زى مابيقولوا بها يثق قلب زوجها الكتاب بيسأل مين يجد المرأة الفاضلة لانها تفوق اللالئ
ثم يقول فى السطر اللى بعده على طول انه بها يثق قلب زوجها وبعد كده بيستمر الكتاب فى سرد صفات وافعال تلك المرأة الفاضلة
بس البداية كانت فين ؟ان زوجها او من حولها اعطوها الثقة انها ستكون فاضلة ولذلك هى اصبحت فاضلة
فاقد الشئ لا يعطيه ومفيش حد بيعرف يدى من غير ماياخد
طيب هى اخدت مقابل على فضلها ولا لا
الكتاب بيقول
يقوم اولادها ويطوبونها زوجها ايضا فيمدحها ​

الزوج والابنا معترفين بفضلها وبيمدحوها على افعالها معاهم
يبقى اخدت مقابل معنوى علشان كده قدرت تستمر فى فضلها ​

لكن الناس عندنا عملت تأويل للكلام ان المرأة الفاضلة بحس الكتاب هى اللى تعطى وتعطى وتعطى حتى النزيف بدون شكوى بدون الم بدون انتظار مقابل بدون كلمة مدح بدون كلمة شكر بدون ثقة فيها بدون اعتراف بجميلها وفضلها وكأنها by default اتخلقت بس علشان تعطى وتنزف دون ان تأخذ ​

وهكذا تصاب البنت بالصراع الداخلى بين مفهومها ( اللى فهمته من المجتمع ) عن صورة المرأة الفاضلة( التى تتعب ولا تشتكى ابدا ) وبين احتياجها النفسى الطبيعى للشكوى اوقات للبكاء اوقات للابتعاد اوقات للمدح اوقات للثقة اوقات للحب اوقات للاعتراف بتعبها ومجهودها اوقات وللصراخ اوقات اخرى ​

مما يؤدى بها الى الشعور بالذنب اذا كلت او ملت او اشتكت من تأديه دورها كزوجة وام ​

 

[Desert Rose]

بعيدا عن اي رغي مطول

المرأة العربية ليها حلين عشان تعيش حياة سليمة

1- تسافر برة البلاد العربية ، بس مش مع جوزها الشرقي المتشدد
2- ترضى باللي هي فية وتسكت

أي حل غير دة تعب ليها

ميرسى :new8::new8: نورت الموضوع

 

[Kerlos-love-Jesus]

ميرسى :new8::new8: نورت الموضوع

شور انا منور

 

[Desert Rose]

وانا هعرف ده اكتر منك ازاى ؟ مش انتو الحكومة وعارفين كل الكلام ؟:fun_lol:

حلولك صح مش عندى اعتراض عليها غير انها تقبل وتسكت
طيب ليه متقولش تعترض يمكن الحال يتغير ؟