شقشق: مبدئيا أنا ح اسيب كل حاجة وعايز أعرف هو إيه اللي كانوا بيخلوكي تاكليه وانتي صغيرة؟ P:
(غالبا هو ده السبب)! :smile01
الفكرة بتاعتك مش بعيدة عن الموضوع ولا حاجة، أعتقد روز كانت ح توصل ليها لو مدينا الخط على استقامته، بس هي كانت يادوب لسه بتسخـّن بحكاية الذاكرة الوهمية. ثانيا سؤلك مش ساذج أبدا.. إننا "وهم" وإننا بنعيش مجرد "حلم": "السذاجة" دي بالفعل حكمة أو فلسفة هندية قديمة اسمها "ڨيدانتا"، وخاصة مدرسة "أدڨيتا ڨيدانتا"، ودي بالفعل بيؤمن بيها حرفيا "ملايييييين" البشر
. أدلة المدرسة دي قوية جدا والعدد اللي بيؤمن بيها ضخم جدا والاكتشافات العلمية الحديثة اللي بتأكدها كل يوم في ازدياد، لدرجة إن البعض بدأ بالفعل يعمل دراسات مقارنة مع الكتاب المقدس ويشوفوا الكلام ده ينفع مسيحيا وللا لأ؟ المدهش إنهم في النهاية مش بس بيقولوا مفيش تعارض، إنما بيأكدوا إن ده معنى ورمز أساسي في كلمات السيد المسيح وبيتكرر في كل البشارات تقريبا! يعني انت يا كتكوت "سذاجتك" دي فيه ناس واخدين فيها دكتوراه أصلا، ناس شاب شعرها وهي بتدرسها أو على الأقل بتؤمن يقينا بيها. مثلا: "ملكوت السماء" الذي هو "داخلكم": ده نفسه هو حالة الإفاقة من "حلم" العالم. ولأنه مجرد حلم بالتالي مشكلاته كلها (ماذا نأكل أو ماذا نشرب أو ماذا نَلبس) كلها بتتحل في جملة واحدة: اطلبوا ملكوت الله وهذه كلها تزاد لكم! فيه بالشكل ده متوازيات كتيرة جدا. المشكلة إن الناس بتفهم كلمة "الوهم" خطأ أصلا. لما بنقول "وهم" الناس بتفكر في عالم شبحي، سراب، بمعنى إننا مثلا ممكن نعدي من الحيطان. ده مش معنى الوهم. بالعكس: الوهم عشان نصدق إنه حقيقة لازم يكون مادي وصلب ومحسوس. إنما المقصود بالوهم هو ببساطة إن ظاهر الأشياء غير حقيقتها تماما، وده العلم بالفعل أثبته. كل المادة اللي حوالينا هي في الحقيقة مش مادة، وإنما طاقة. أكتر من كده الطاقة دي نفسها في حالة تشكل مستمر!! المشكلة اللي خلت آينشتين شخصيا يشد شعره هي كالتالي: لما انتي تبصي على الكمبيوتر اللي قدامك ده يظهر كأنه كمبيوتر، مادة ملموسة ومحسوسة، لكن لو سيبتي الكمبيوتر ودخلتي المطبخ شوية الكمبيوتر فوريا يتحول لطاقة. بتختفي الإلكترونات والذرات نفسها. لو بصيتي تتشكل مادة، لو مشيتي يتحول طاقة! يعني هي مادة وللا طاقة؟ يعني هي ذرات وللا موجات؟ ساعتها آينشتين ـ طبعا في حالة ذهول ـ قال جملته الشهيرة "ربنا مابيلعبش زهر".
طبعا بعد كده اكتشفوا حاجات أعجب وأغرب عن سلوك المادة نفسها، وظهرت نظريات أغرب من الخيال العلمي لتفسير كل ده، لحد ما ظهر تلميذ آينشتين: العبقري ديفيد بوهم. ده بقا جت له فكرة غريبة: إنه يسيب المعمل ويروح المعبد! ده بالتالي اللي سافر وقابل رهبان ودرس الحكمة القديمة في العالم كله وبدأ يعمل ربط عشان يفهم السر، وفي النهاية حط هو نفسه نظريته (حاجة كده لسه قدام العالم 100 سنة عشان فعلا يفهمها)!
لكن مش بس بوهم وإنما عموما.. عموما البشرية حاليا بتشهد أول وأجمل وأعظم لقاء بين العلم والدين، والعلم والروحيات بشكل عام.. ولأول مرة النهارده ممكن نقرا "فيزياء" لكن نحس إننا بنقرا "شعر"! ولأن "لكل فعل رد فعل، مضاد في الاتجاه" ده تحديدا كان سبب رئيسي في ظهور موجة الإلحاد! وطبعا "الميديا" العالمية مفهوم ح تروّج لمين ـ أكيد مش لتجارب معملية بتأكد وجود عقل أعلى أو خالق للكون، على سبيل المثال. بالعكس الميديا ح تروج إما للإلحاد، وإما لمادة ومحتوى "ديني" يؤدي بالضرورة وبشكل غير مباشر للإلحاد!
(يُراجع على سبيل المثال قنوات الحافظ والناس وغيرها في هذا الركن الإسلامي من العالم)! :smile01طبعا أنا باختصر جدا جدا لكن في النهاية قصدي أقول: مش معنى إن الفكرة غريبة ـ أو إن اللي بيؤمن بيها وثنيين كفرة ـ إننا نرفضها كده على طول. خلينا ناخد الأمور عموما بفهم وبراحة شوية أيها الأحباء عشان احنا دلوقت بقينا بالفعل خارج التاريخ
. لذلك أنا قررت أجاوبك هنا، مش على الخاص، ورغم إني ما شرحتش الحقيقة كتير لكن يكفي إن الناس مبدئيا تفتح الأفق شوية وتبتدي على الأقل تقرا وتبحث وتتعلم، بدل ما احنا قاعدين في العشة متخيلين إن عندنا دايما كل الإجابات. * * *
وبعدين سامحيني إني ماشاركتش في "الرقص"، أنا كده كده كنت حاسس إني ح اشارك في "الوهم"، فلو شاركت كمان في الرقص، وفيه قبل كده "الشيطان"، يبقا هاتريك، والمباحث طبيعي قالبين المنطقة بيدوروا ع المتعهد اللي ورا الشحنة دي كلها، بالتالي كنت ح البسها. من ناحية تانية الرقص ماكانش ناقص: أنا فجأة لقيت كله بيطحن، وشفت "حبو تتحدث عن نفسها" الإصدار الجديد، شوية و"أوريجانوس" جاب منشور من الكنيسة، وكده كده "الملكة هيلانة" جوا ودي ست طيبة بس أنا عارف إنها بتشيل سلاح عادة.. فأنا قلت أحسن أحترم نفسي وخليني بره.. يا بنتي احنا بعد اللي شفناه ده نشكر ربنا اللي جت على قد كده. :smile01
* * *
