الحد الفاصل بين الوهم والحقيقة فى عقل الانسان

[GoGo No Way]

جميل بس أنآ كآن قصدى على تطويع آلشخص نفسه لذكريآته وأفكآرهـ أو حتى خلقهآ من آلعدم ...
يعنى مش عن طريق آخر هيوحيله بيهآ او يزرعهآ فى عقله



بآلمنآسبة أنآ مش فآهمة نقطة " كل ذرة فى حد ذآتهآ تحوى آلكون كله "
إعتقدت إن فيرونيكآ جآبتهآ على لسآن متصوف وإنهآ فكرة فلسفية
بس ردكـ آلآخير شقلبلى آلدنيآ

بالنسبة ان الانسان يوحى بيها لنفسه اه دة ممكن وهناك طرق عده بس الى اعرفه مش بس بيخلى العقل يصدق .. كمان بيخلى الحاجة حقيقية و ممكن تتنفذ فعلا شبيه ليها فى المستقبل "بسبب قانون الجذب وكدة " المهم فيه كذا حاجة


وبالنسبة لحكاية كل حاجة فى الكون دية مش فاهم المشكلة فى ايه بصراحة بس عموما المسئلة مش فلسفية بس .. دية كمان علمية ..

 

[GoGo No Way]

وبالمناسبة الكلام دة مرتبط بكلام نظرية الاوتار الفائقة ونظرية الكم لاينشتاين بحيث فى نظرية الكم يمكن ان تكون الذرة فى مكانين فى نفس اللحظة

هههههه المشكلة ان المواضيع كلها مرتبطة ببعضها ... الامر معقد جدا

 

[خادم البتول]

شقاوة:
زي ما توقعت، فعلا هي "الكبدة" السبب. أنا أعرف إن فيها حديد وبتساعد في نمو المخ وزيادة الذكاء عموما.

نظرية بوهم ياريت كان ينفع أتكلم فيها، كان زماني اتكلمت بالفعل، لأني فعلا مش كنت قاصد أعمل تشويق أو Teaser ولا حتى بحب الأسلوب ده. المسألة باختصار إنها متخصصة أوي، فالموضوع ح ياخد شرح كتير جدا. المشكلات اللي بتعالجها النظرية هي نفسها محتاجة شرح طويل قبل ما نقول النظرية بتحل إزاي كل المشكلات دي. لكن الخلاصة باختصار إن العالم الحقيقي مالوش أي علاقة بالعالم اللي احنا شايفينه بعنينا!! وبالفعل بوهم اتكلم على الهولوغرام وكان من أول العلماء اللي ساعدوا في التفسير ده. عموما دي مش أغرب نظرية في الفيزياء، لأن زي ما ذكرت امبارح فيه نظريات خيال علمي، لكن بالرياضة والمعادلات مظبوطة تماما وبالتالي معترف بيها وطلابها على مستوى العالم بياخدوا فيها درجات ماستر ودكتوراه!!)

مش يمكن نلاقى ربنا جواها: الكلام ده في "إنجيل توما".. صحيح هو بشكل عام مرفوض لكن فيه فقرات رائعة، منهم فقرة بتقول بالضبط المعنى ده. حسب الذاكرة كان السيد المسيح بيقول للتلاميذ إنه في كل مكان: ارفعوا هذا الحجر تجدوني تحته، شقوا هذا الخشب تجدوني داخله، وهكذا.. فقرة في غاية الجمال. ربنا بالفعل في كل شيء!


فيرونيكا:
سعيد بمشاركتك وبوجودك عموما، وأعتقد إنك أحد الصواريخ القادمة. أخر صاروخ شفته وهو داخل المنتدى وتنبأت له بالنجومية كان واحدة اسمها "سيكريت فلاور".. تعالي شوفي النهارده عقبال أملتك بقت إيه! لكن انتي مدرسة مختلفة. قبل ما تكملي عشرين رسالة كنتي بالفعل "مثـبـّـتـة" واحد امبارح في قسم الأسئلة وفي النهاية حتى وصفتيه "حشرة"! ^_^ مش عارف مع الرسالة الألف ممكن تعملي إيه! :smile01


إيملي:
أنا مش قاصد أرد على كل واحد باسمه لكن طبعا مقدرش أشوف سمو الأميرة بدون إلقاء التحية . إجابة سؤالك ـ في رأيي الشخصي ـ نعم، ممكن.. من أول "هل الإتسان قادر..." الإجابة في رأيي نعم، قادر، بس الإنسان ده بيتحرك على حافة الجنون، وغالبا بيتجنن بالفعل. بلاش التجارب دي لو سمحتي.


جوجو:
شوف يا جوجو احنا ممكن نتفق، بس بردو ماتنفيش تماما الاحتمال إنك كائن فضائي.. يعني دايما افتكر الاحتمال ده.. وبعدين حتى لو اتفقنا في كل شيء، مش يمكن احنا الاتنين نطلع كائنات فضائية؟ :smile01 (تلاتة طبعا إذا حسبنا فيرونيكا )

بالنسبة لاختراق الحيطة إحنا مش محتاجينه أصلا. إذا عايز تدخل أو تخرج من مكان مقفول إنت ببساطة بتبعت عقلك للمكان اللي انت عايزه وبالتالي بتكون في لحظة واحدة بالفعل دخلت أو خرجت (عقليا). السؤال هو انت عايز إيه من الانتقال في المكان بالشكل ده؟ لو مثلا اتنين بيحبوا بعض أوي فهم بالفعل بيزوروا بعض بالطريقة دي، ولذلك بيحسوا ببعض، وبيفهموا بعض، وحتى بيساعدوا بعض أحيانا، كل ده عن بعد. مثال تاني لا يقل شيوعا لما الماما "قلبها ياكلها" فجأة على ابنها اللي في آخر الدنيا، ويطلع بالفعل إنه كان مريض أو تعرض لحادث، ده نفسه بيكون نتيجة اتصال عابر للقارات حصل بالفعل بين الابن والأم، لكن لأنه خارج نطاق الحواس الطبيعية فاحنا بنستقبله كـ"إحساس" داخلي.. وكل ده طبعا غير دائرة تليفزيونية كاملة وستالايت عجيب اسمه "الأحــلام"!

بنفس المنطق فالجميع ـ حتى أونلاين ـ كلهم بالفعل في حالة اتصال عقلي مع بعض، بدرجة أو بأخرى وحسب ضبط وتردد كل واحد فيهم. بالتالي لما واحدة زي شقاوة مثلا تكون متعصبة، أو روز تكون حاسة باغتراب، أو إيملي تكون موجوعة، أو دونا تكون بتتألم، أو بنت النور حزينة، أو لارا خايفة.... الجميع بيتأثر، الجميع بلا استثناء بيتأثر، بدرجات مختلفة، حتى لو كنا غير واعيين بكده. بالتالي لو خدنا مجموع العقول اللي في المكان كله وقدرنا نشوفها كـ"عقل واحد" كبير، نقدر بسهولة نفهم ليه وإزاي الموقع "ككل" بيكتئب ويحزن ويسكت، أو بالعكس يفرح ويبتهج وينشط.

ثم بنفس المنطق لو خدنا العالم ككل: اللي بيأثر هنا بيأثر هناك، واللي بيأثر في أي مكان بينعكس في كل مكان. وكـ"عقل واحد" من مجموع كل العقول أصبح مفيش فرق بين صديقك وعدوك.. لأن حتى لو كان عدوك هو اللي بيتألم: إنت كمان على مستوى أعمق من مستويات وجودك بتتألم!

عشان كده تحديدا أول درس كان "المحبة"، أول فضيلة كانت "الغفران"، وأول تعليم هو "لا تقاوموا الشر بالشر...... بل اغلب الشر بالخير"!

عشان كده تحديدا كانت صيغة الخطاب المسيحي بتتجاوز أي حدود أو جغرافيا: "أنتــــم نــــــور العـــــالم"!

أبسط، أبسط فعل محبة بتعمله مع أخوك أو أختك هنا في الحقيقة بينعكس بالفعل شعاعه في "كل" العالم! أقل ألم تمنعه هنا فإنت في الحقيقة بتخفف بيه "كل" الألم! وأصغر قلب تقدر تسعده هنا في الحقيقة بيشفي ـ ولو بدرجة بسيطة ـ أحزان "كل" البشر!

* * *
​

في الختام سامحوني يا أخوتي أنا مش ح اقدر أستمر في التوبيك ده، لأن بعد الرسالة دي إذا ماقدرناش كلنا نرجّع صاحبة التوبيك ـ واللي تركت المكان كله وهي حاسة بالحزن والاغتراب ـ يبقا أنا رسالتي ماوصلتش.. ولا حرف منها وصل.. بالتالي مفيش داعي لتضييع الوقت!

ربنا يفتح عيون الجميع، ويفرح قلوبهم، ويبارك أيامهم. في سلام الرب دائما آمين.

* * *
​

 

[GoGo No Way]

كلامك مظبوط جدا .. وهعلق على حاجة واحدة بس .. :

في الختام سامحوني يا أخوتي أنا مش ح اقدر أستمر في التوبيك ده، لأن بعد الرسالة دي إذا ماقدرناش كلنا نرجّع صاحبة التوبيك ـ واللي تركت المكان كله وهي حاسة بالحزن والاغتراب ـ يبقا أنا رسالتي ماوصلتش.. ولا حرف منها وصل.. بالتالي مفيش داعي لتضييع الوقت!

ربنا يفتح عيون الجميع، ويفرح قلوبهم، ويبارك أيامهم. في سلام الرب دائما آمين.

[/SIZE

فعلا اويدك .. وكلامك هنا مظبوط اوى اوى اوى ... وان شاء الله " ترجع "

وبفرح ومحبة ....

 

[sha2awet 2alam]

اعتذر لصاحبة الموضوع عن تخريبنا لموضوعها

انا كل ما افقد الامل فى المنتدى دة و اقول مش هيصحى تانى .. الاقى نقطة نور فى وسط عتمة .. الاول كانت ايميليا اللى ابهرتنا بذكائها " اميرة المنتدى " .. و بعدها خادم البتول " سارق قلوب العذارى " :smil15: .. و اخيرًا فيرونيكا .. قريب هيبقى ليكى مكانة كويسة فى المنتدى

و انت كمان يا جوجو .. لو مطردتش :new6: هتبقى حاجة كبيرة .. دماغك حقيقى نضيفة .. بس لو تصلح حروف العربى اللى بتطير منك دى

شقاوة:
زي ما توقعت، فعلا هي "الكبدة" السبب. أنا أعرف إن فيها حديد وبتساعد في نمو المخ وزيادة الذكاء عموما.

نظرية بوهم ياريت كان ينفع أتكلم فيها، كان زماني اتكلمت بالفعل، لأني فعلا مش كنت قاصد أعمل تشويق أو Teaser ولا حتى بحب الأسلوب ده. المسألة باختصار إنها متخصصة أوي، فالموضوع ح ياخد شرح كتير جدا. المشكلات اللي بتعالجها النظرية هي نفسها محتاجة شرح طويل قبل ما نقول النظرية بتحل إزاي كل المشكلات دي. لكن الخلاصة باختصار إن العالم الحقيقي مالوش أي علاقة بالعالم اللي احنا شايفينه بعنينا!! وبالفعل بوهم اتكلم على الهولوغرام وكان من أول العلماء اللي ساعدوا في التفسير ده. عموما دي مش أغرب نظرية في الفيزياء، لأن زي ما ذكرت امبارح فيه نظريات خيال علمي، لكن بالرياضة والمعادلات مظبوطة تماما وبالتالي معترف بيها وطلابها على مستوى العالم بياخدوا فيها درجات ماستر ودكتوراه!!)

تؤ الكبدة فيها حديد اة .. بتساعد على تصليح الانيميا .. و لو مفيش انيميا النمو بيبقى سليم .. و يوصل الدم لاجزاء الجسم بالتساوى و حسب الحاجة .. لكن هى مش بتساهم بصورة مباشرة فى نسبة الذكاء .. اخيرًا لقيت مجال بعرف فيه اكتر منك :smil15:

طبعًا كلامك المختصر مأشبعنيش .. بس هعديها .. بقالى اكتر من 10 سنين بفكر فى الموضوع ملقيتش اجابات اصلا .. و يوم ما الاقى اطمع فى كل التفاصيل ؟؟ ميصحش :t19:

عندى تعليق كبير اوى فى الموضوع دة و اسئلة كتير نظرًا لانى مش متعمقة فى الموضوع دراسيًا كل ما عندى اسئلة و تفكير شخصى بحت .. بس مش هقوله دلوقتى لسببين .. اولهم ارهاقى الشديد .. ثانيهم انك مش هتكمل اجابات لرجوع صاحبة الموضوع المستخبية .. فهتضامن معاك و هحاول ارجعها

 

[Desert Rose]

ازيكو ؟ انا كنت سبت الموضوع لجوجو علشان يكمله بس لقين ان مش من الذوق انى اسيب مشاركاتكم الجميلة جدا واللى انا استفدت منها كتير بدون رد وخصوصا انها موٌجهه ليا
فهحاول ارد عليها
شكر للجميع :flowers:

 

[Desert Rose]

ياهلا :smile01 انا جيت :smile01

منورة حبيبى :flowers:

نتكلم بقا .. موضوعك عجبنى جدًا و خصوصًا موضوع الذاكرة الوهمية .. صدق أو لا تصدق كلنا عندنا ذاكرة وهمية من أيام الطفولة البريئة .. ذاكرة خلفتها مجرد ايحائات لحاجات عمرها ماحصلت ابدًا .. حتى و لو كانت صغيرة طبعا و دة اغلبها .. لان الكبير منها فى الغالب بيتسبب فى امراض نفسية .. و اظن ان اغلبنا المفروض مستقر نفسيًا - مع انى بدأت اشك - المهم .. من ابسط المواقف اللى حصلت معايا انا شخصيًا .. انى كانت عندى ذاكرة قوية جدا و مصدقاها جدًا و شبه واقعية بالنسبة لى ان والدتى بتاكل نوع معين من الاكل و انا صغيرة و بنهزر و ناكله سوا و نتخانق عليه بهزار و مين ياكله الاول شغل عيال يعنى .. و اتضح اما كبرت ان والدتى عمرها ما داقته ولا جت جنبه .. كل ما فى الامر انهم قالولى بس ماما بتحبه فكوليه - بيستغلو سذاجتى - فكنت انا باكل زى الشاطرة .. و تخيلت ان كل المواقف و الحوارات على الشئ دة حصل و هو ولا الهوا :smile01 .. الموضوع بالنسبة لى بسيط و ااما اكتشفته مفيش مشاكل عادى عيلة و ضحكو عليها :smile01 .. لكن المشكلة بقا لو الذاكرة الوهمية جات فى موقف كبير و ترسخ فى الذهن .. زى اغتصاب او قسوة او كره او غيره ..

اشكرك ياشقاوة على تشجيعك
ايوة , انا كمان كان عندى ذكرى وهمية عن انى توهت وانا صغيرة وقصة طويلة كده ولما حكيتها لماما قالتلى الكلام ده عمره ما حصل ولا انتى عمرك توهتى مننا , وانا كنت متأكده انها حصلت بس بعدين اكتشفت ان القصة كان فيه فى تفاصيلها اجزاء حقيقية واتحكتلى ومعرفش مين اوحالى انى توهت فى اليوم ده فأنا بقا كونت ذكرى عن موضوع التوهان ده بالتفاصيل كمان وهى محصلتش

و انا داخلة موضوعك .. كان عندى تخيل تانى خالص للمحتوى .. يمكن عشان هو سؤال عندى انا .. هو احنا اصلا حقيقة ولا وهم ؟؟ مش وارد حياتنا تكون مجرد حلم بينتهى بموتنا و نرجع لطبيعة مش عارفة ايه هى طبعًا نكمل بيها حياة أخرى ؟؟ مش وارد منكونش حقيقيين أساسا و ميكونش فيه كل اللى بيحصل و كل اللى بنحسه مجرد شوية اوهام بيفوقنا منها الموت ؟؟ اسئلة ساذجة و غريبة بس شغلتنى فى فترة من فترات حياتى

لا خالص اسئلتك مش ساذجة , ديه اسئلة فلسفية كبيرة وعلمية كمان
وعايزة اقولك ان فيه ناس فعلا مؤمنة بأن اللى احنا عايشينه ده مش حقيقى وانما حلم او وهم
انا كان ليا زميل فى الشغل كان مؤمن بالحكاية ديه لدرجة ان كل مشكلته كانت انه نفسه يفوق من الحلم ده ( الحياة يعنى ) علشان يعيش بقا فى الواقع الحقيقى او الحقيقة

بصى , موضوع الفرق بين الواقع والوهم او الحلم ده موضوع كبير اوى ومعقد
يعنى بيٌقال مثلا اننا بندرك الحقيقة او العالم حوالينا بالحواس الخمسة بتاعتنا , فاللى احنا بندركه من العالم او الوجود حوالينا هو موجود طول ما احنا قادرين ندركه بالحواس الخمسة
لكن لو حصل ان الحواس ديه توقفت عن العمل او جزء منها توقف بيصبح العالم اللى حوالينا مش موجود بالنسبالنا doesn't exist

زى لما بننام مثلا , زى ما نكون بنتنقل من عالمنا ده الى عالم تانى , ولما تكونى بتحلمى مثلا وانتى نايمة ويجى حد يصحيكى بتحسى احساس ان زى ما تكونى اتنقلتى من عالم كنتى فيه لعالم تانى تماما

فزى ما وانتى نايمة بتكونى بتحلمى بحلم وانتى جوه الحلم متأكدة تماما انه حقيقى والناس اللى انتى شايفاهم فى الحلم بيكونوا حقيقين تماما بالنسبالك لدرجة انك لو انت سألتيهم وانتى فى الحلم انتو حقيقين ؟ هيقولولك اه احنا حقيقين , لدرجة انى اوقات من كتر ما انا ببقا مصدقة الحلم ومتفاعله معاه لو حلم وحش بصحى اقول الحمد لله انه كان حلم لانى ببقا مقتنعة انه حقيقى فعلا

ففيه فلاسفة بيقولوا ان ممكن الحياة ديه كمان تكون حلم وان الاحداث والناس اللى حواليكى هما ال projection of your mind يعنى نتاج عقلك انتى , وانتى مصدقة انهم حقيقين وهما مصدقين انهم حقيقين
واعتقد ان فيه فلسفة بتقول فيما معناه ان الحلم وانت نايم حلم قصير والحياة حلم طويل ده الفرق بينهم

يعنى الخلاصة ان my reality is not your reality يعنى اللى انا شايفاه حقيقى وواقعى ممكن يكون مش حقيقى وواقعى بالنسبالك
لاننا بندرك العالم من حوالينا بال perception بتاعنا بالادراك بتاعنا
فأدراكى للعالم وللاحداث مختلف عن ادراكك وعلشان كده عالمى غير عالمك وواقعى غير واقعك
فوصلوا انه مفيش حاجة اسمها reality فى المُطلق انما هى subjective يعنى خاضعة لطريقة ادراك كل واحد .

 

[Desert Rose]

اعتذر لصاحبة الموضوع عن تخريبنا لموضوعها

لا حبيبتى اسعدتنى مشاركتك عن الهولوجرام , بالرغم انى مش متعمقه فيه وبحاول اقرا عنه اكتر لانها فكرة شدتنى جدا

انما هو فكرته زى ما انتى قولتى ان الحياة والكون واحنا عبارة عن صورة ثلاثية الابعاد , يعنى عامله زى
computer simulation تقريبا ترجمتها مٌحاكاه بالكمبيوتر
يعنى الحياة والكون زى ما تكون simulation معمول بالكمبيوتر او virtual reality مش عارفه اترجمها بالعربى سامحونى

بمعنى ان المادة اللى احنا بنشوفها صلبة قدامنها ومٌحددة فى المكان هى فى الحقيقة عبارة عن جزئيات بتتحرك فى الفراغ الكونى
يعنى احنا عبارة زى ظل على شاشة
او زى ما بيتقولوا اننا مجرد quantum fluctuation فى الفراغ , بردو مش عارفه اترجمها بدقة للعربى

المهم , الحكاية بتاعت ال computer simulation ديه فكرتنى بفيلم للعبقرى الباتشينو اسمه Simone وهو اختصار ل Simulation 1
قصة الفيلم ان الباتشينو مخرج سينمائى ابتدا يفشل فقرر انه يخترع ممثله على برنامج كمبيوتر هى مش موجودة اصلا فى الحياة
وخلاها تمثل وتعمل مقابلات تلفزيزنية , وتطلع على المسرح تغنى وترقص وعمل منها نجمة من خلال برنامج computer simulation وسماها Simone الفيلم ده عبقرى جدا وقريب شوية من اللى احنا بنقوله .

انا مش عارفه اشرح الفكرة اوى بالعربى , صعب جدا ,فممكن اقول كلام مش دقيق علميا اوى , لان كل اللى قريته عن الموضوع كان بالانجليزى بس .

 

[Desert Rose]

معرفتش اقيمك على المشاركة ديه .هعلق بس على حاجات بسيطة فيها لانى مقدرش اضيف حاجة بعدك , انت عارف كده .

مثلا: "ملكوت السماء" الذي هو "داخلكم": ده نفسه هو حالة الإفاقة من "حلم" العالم. ولأنه مجرد حلم بالتالي مشكلاته كلها (ماذا نأكل أو ماذا نشرب أو ماذا نَلبس) كلها بتتحل في جملة واحدة: اطلبوا ملكوت الله وهذه كلها تزاد لكم! فيه بالشكل ده متوازيات كتيرة جدا. المشكلة إن الناس بتفهم كلمة "الوهم" خطأ أصلا. لما بنقول "وهم" الناس بتفكر في عالم شبحي، سراب، بمعنى إننا مثلا ممكن نعدي من الحيطان. ده مش معنى الوهم. بالعكس: الوهم عشان نصدق إنه حقيقة لازم يكون مادي وصلب ومحسوس. إنما المقصود بالوهم هو ببساطة إن ظاهر الأشياء غير حقيقتها تماما، وده العلم بالفعل أثبته. كل المادة اللي حوالينا هي في الحقيقة مش مادة، وإنما طاقة. أكتر من كده الطاقة دي نفسها في حالة تشكل مستمر!! المشكلة اللي خلت آينشتين شخصيا يشد شعره هي كالتالي: لما انتي تبصي على الكمبيوتر اللي قدامك ده يظهر كأنه كمبيوتر، مادة ملموسة ومحسوسة، لكن لو سيبتي الكمبيوتر ودخلتي المطبخ شوية الكمبيوتر فوريا يتحول لطاقة. بتختفي الإلكترونات والذرات نفسها. لو بصيتي تتشكل مادة، لو مشيتي يتحول طاقة! يعني هي مادة وللا طاقة؟ يعني هي ذرات وللا موجات؟ ساعتها آينشتين ـ طبعا في حالة ذهول ـ قال جملته الشهيرة "ربنا مابيلعبش زهر".

تعرف انى مرات فكرت فيها كده فعلا , اقصد حياتنا المسيحية
فكرت ان اللى احنا عايشينه ده مش الحقيقة , الحقيقة هنعيشها بعد انتقالنا مع رب المجد يسوع , ساعتها ديه هتكون هى الحياة اللى بجد وممكن وقتها نكتشف اننا كنا بنحلم طول الوقت اللى عشناه على الارض
قد ايه الفكرة ديه على الرغم من انها تبان خيالى علمى الا انها مٌحررة من هموم كتير , واوهام حياتيه كتير شاغلين نفسنا بيها وهى فى الاخر مش الحقيقة اللى ربنا عايزنا نعيشها

طبعا أنا باختصر جدا جدا لكن في النهاية قصدي أقول: مش معنى إن الفكرة غريبة ـ أو إن اللي بيؤمن بيها وثنيين كفرة ـ إننا نرفضها كده على طول. خلينا ناخد الأمور عموما بفهم وبراحة شوية أيها الأحباء عشان احنا دلوقت بقينا بالفعل خارج التاريخ . لذلك أنا قررت أجاوبك هنا، مش على الخاص، ورغم إني ما شرحتش الحقيقة كتير لكن يكفي إن الناس مبدئيا تفتح الأفق شوية وتبتدي على الأقل تقرا وتبحث وتتعلم، بدل ما احنا قاعدين في العشة متخيلين إن عندنا دايما كل الإجابات.

لا , مش كل اللى بيقولوه الملحدين او الوثنيين الكفرة الزنادقة يبقا نرفضة خالص
لان انا اؤمن ان الله بيدى استنارات لكل انسان مهما كان انتمائه الفكرى او الدينى لغاية ما يوصل لقمة الاستنارة والمعرفة الروحية فى الرب يسوع المسيح

لازم نتوقف عن وضع labels للناس ووضعهم فى قوالب جامدة والحكم عليهم نهائيا , الناس مش labels الناس كائنات حية بتتعامل وتتفاعل مع الله بطرق احنا منعرفهاش ومش نفهمها لانها طرق الله الغير محدودة
احنا مش خارج التاريخ ياخادم البتول , احنا مدخلناش التاريخ اصلا علشان نخرج منه , للاسف .

 

[Desert Rose]

ايوه ما هو اللي مش فاهمه ازاي صورة تتأثر ؟؟
مش الهولوجرام ده ضوء في الاساس ؟؟
اسف لتعبك

انا حاولت فى ردى على فيرونيكا اوضح نظرية الهولوجرام زى ما انا فاهماها , ده كلام مٌبسط وممكن نبقا نتوسع فيه بعد كده اذا حبيتوا .
وفيرونيكا وجوجو كمان شرحوها بطريقة جميلة

 

[Desert Rose]

موضوع مميز وشيق كآلعآدة روزآ

أفتكر إنى مريت بحآجة زى دى فعلاً .. فى مرحلة كآن عندى إقتنآع تآم إنى سقطت فى أولى إبتدآئى وعدتهآ
وسيطرت عليآ آلفكرة وإديهآ عيآط

أفتكر بعدهآ إن مآمت زميلة ليآ هى إللى فتحت قدآمى آلموضوع دآ .. إزآى وليه مش فآكرة بردو ...!​

ميرسى حبيبى :Love_Mailbox:
اه , انا كمان كان عندى اقتناع شديد انى توهت وانا صغيرة . وحكيت القصة فى ردى على شقاوة

وعندى سؤآل صغير .. هى آلحيل آلنفسية أو آلدفآعية ممكن تكون ذكريآت وهمية بآلشكل دآ ، مش قصدى طبعاً عن آلتهيؤآت ..
بس هل آلإنسآن قآدر - لو أرآد وبإدرآكـ منه - إنه ينشئ ذكريآت وعآلم وهمى من صنعه مش عن طريق آلإيحآء ..؟

ممكن الانسان يوحى لنفسه ساعات بحاجات ويكون منها ذاكرة وهمية

انا هحكى قصة توضح دور الايحاء الخارجى والداخلى للانسان فى صنع الذاكرة الوهمية
القصة ديه مأخوذة من موقع False Memory Foundation

هى قصة واحدة ست عندها 38 سنة كانت لسه منفصلة عن جوزها وبتعيش حالة اكتئاب وحزن
قررت انها تروح تشوف طبيبة نفسية , بالفعل راحت والطبيبة قعدت تحاول تعمل معاها جلسات استرجاع الذاكرة
واوحت ليها ان كل مشاكلها النفسية نابعة انها اتعرضت للتحرش الجنسى على ايد والدتها وهى صغيرة
طبعا المريضة رفضت الفكرة فى الاول لكن مع الحاح الطبيبة والايحاء خضعت للفكرة وبالفعل قدرت تفتكر حادثة التحرش بيها من والدتها
وطبعا لما افتكرت القصة ديه ( اللى هى وهمية اصلا ) بعتت جواب لوالدها ووالدتها تقولهم انها اكتشفت او افتكرت اللى حصل وانها زعلانة منهم ومش عايزة تشوفهم تانى ( الموضوع بجد ممكن يبقا مٌدمر لصاحبه )

المهم فضلت كده مقاطعه والدها ووالدتها وهى حاسة احساس غريب من جواها ان فيه حاجة غلط وان التفاصيل بتاعت الحادثة مش دقيقة اوى فى عقلها
المهم قررت انها تبطل تشوف الدكتورة ديه وتروح لواحدة تانية
الكتورة الجديدة مش جابت ليها اى سيرة عن اغتصاب , لكن هى المريضة ابتدت من تلقاء نفسها تحكى ليها عن حادثتين تحرش هى بالفعل اتعرضت ليهم وهى صغيرة على ايد رجالة مش والدتها
وقدرت تفتكر التفاصيل بدقة
الدكتورة قالتلها بما انك قدرتى تفتكرى الحادثتين دول بدقة من غير اى سؤال او ايحاء منى يبقا دول حصلوا فعلا اما حكاية تحرش والدتك بيكى ممكن يكون محصلش

المهم فى خلال جلسات العلاج هى ابتدت تحكى للكتورة ديه عن علاقتها بوالدتها , وانها كانت علاقة مضطربة اصلا والدتها كانت ست صارمة وشديدة جدا
فالمريضة ديه قدرت تكتشف ليه هى صدقت اصلا الايحاء ان والدتها اتحرشت بيها وصنعت منه ذكرى وهمية , لانها فى الاساس بتحمل مشاعر غضب مدفونة ناحية والدتها من زمان نتيجة لانها كانت شديدة معاها
فخرجت مشاعر الغضب من والدتها ديه فى قصة التحرش الجنسى الوهمية

فممكن الذاكرة الوهمية تتكون نتيجة ايحاء خارجى واستعداد نفسى داخلى وايحاء ذاتى ايضا , داخل الشخص لصنع الذكرى الوهمية ديه زى اللى حصل فى القصة .











​

 

[Desert Rose]

ثم بنفس المنطق لو خدنا العالم ككل: اللي بيأثر هنا بيأثر هناك، واللي بيأثر في أي مكان بينعكس في كل مكان. وكـ"عقل واحد" من مجموع كل العقول أصبح مفيش فرق بين صديقك وعدوك.. لأن حتى لو كان عدوك هو اللي بيتألم: إنت كمان على مستوى أعمق من مستويات وجودك بتتألم!

عشان كده تحديدا أول درس كان "المحبة"، أول فضيلة كانت "الغفران"، وأول تعليم هو "لا تقاوموا الشر بالشر...... بل اغلب الشر بالخير"!

عشان كده تحديدا كانت صيغة الخطاب المسيحي بتتجاوز أي حدود أو جغرافيا: "أنتــــم نــــــور العـــــالم"!

احنا فعلا , مٌتصلين ببعض بشكل لا نتخيله
وده تقريبا فكرة الهولوغرام على ما انا فاكره او فاهمه
ان لو فيه صورة هولوغرام لتفاحة مثلا وقسمنا الصورة لنصين فى النصين بتوع الصورة هتظهر التفاحة ككل as a whole مش مقسومة لنصين
بمعنى ان الاشياء اللى احنا بنشوفها منفصلة عن بعضها فى العالم وفاكرين انها منفصلة تماما عن بعض هى فى الحقيقة غير كده ده هى مٌتصلة لدرجة ان كل حاجة تحمل كل حاجة بداخلها

اعتقد ان كان فيه تجربة للالكترونات واكتشفوا ان كل الكترون بيتحرك وهو عارف تماما الالكترون التانى هيعمل ايه ويتصرف ازاى حتى لو كانوا بعيد عن بعض جدا
وكأن كل الكترون يحتوى الاخر ككل جواه
علشان كده كل الكترون بيبقا عارف الالكترون اللى زيه هيتصرف ازاى ويتحرك ازاى

وبوهم أكد على التجربة ديه ان كل الكترون عارف التانى هيتصرف ويتحرك ازاى علشان هما اصلا مش مفصولين عن بعض وان الفصل ده عبارة عن وهم .

علشان كده الكتاب المقدس بيأكد مثلا على شركة المؤمنين وعلى المحبة زى ما انت قولت , لاننا فى الحقيقة كلنا وحدة واحدة كبشر حتى وان كنا نبان مٌنفصلين .

 

[Veronicaa]

ايوه ما هو اللي مش فاهمه ازاي صورة تتأثر ؟؟
مش الهولوجرام ده ضوء في الاساس ؟؟
اسف لتعبك

الهولوغرام ليس مجرد ضوء كما قد نفهمه بل هو انعكاس للعالم الحقيقي يعني خاضع لبعض القوانين الفيزيائية.. الموضوع كبير يحتاج للكثير من التفاصيل ويخضع للكثير من القوانين الفزيائية كنظرية الكم... لا يمكن شرح موضوع كهذا بمجرد مشاركة يلزم كتب لذلك وفي النهاية هناك صعوبة في الفهم ايضا :a82:

فيرونيكا:
سعيد بمشاركتك وبوجودك عموما، وأعتقد إنك أحد الصواريخ القادمة. أخر صاروخ شفته وهو داخل المنتدى وتنبأت له بالنجومية كان واحدة اسمها "سيكريت فلاور".. تعالي شوفي النهارده عقبال أملتك بقت إيه! لكن انتي مدرسة مختلفة. قبل ما تكملي عشرين رسالة كنتي بالفعل "مثـبـّـتـة" واحد امبارح في قسم الأسئلة وفي النهاية حتى وصفتيه "حشرة"! ^_^ مش عارف مع الرسالة الألف ممكن تعملي إيه! :smile01

هنطرد قبلها اكيد
اشكرك لكلامك اللطيف حقيقي

انا كل ما افقد الامل فى المنتدى دة و اقول مش هيصحى تانى .. الاقى نقطة نور فى وسط عتمة .. الاول كانت ايميليا اللى ابهرتنا بذكائها " اميرة المنتدى " .. و بعدها خادم البتول " سارق قلوب العذارى " :smil15: .. و اخيرًا فيرونيكا .. قريب هيبقى ليكى مكانة كويسة فى المنتدى

ميرسي شقازة حبيبتي
وانا فعلا سعيدة بالانضمام لاصدقاء لطفاء ومثقفين مثلكم

 

[Veronicaa]

بمعنى ان المادة اللى احنا بنشوفها صلبة قدامنها ومٌحددة فى المكان هى فى الحقيقة عبارة عن جزئيات بتتحرك فى الفراغ الكونى
يعنى احنا عبارة زى ظل على شاشة
او زى ما بيتقولوا اننا مجرد quantum fluctuation فى الفراغ , بردو مش عارفه اترجمها بدقة للعربى

هذا لانه لا يوجد شيء اسمه صلب اصلا!! كل شيء مكون من ذرات... والذرة جزئها الاكبر عبارة عن فراغ... يشبه العلماء الذرة بملعب في وسطه حبة ارز (النواة)
وما بين الملعب وحبة الارز مجرد فرااااااغ
من ابلغ ما قرات في هذا الموضوع قول ماركس تشاون: "اذا تم ازالة الفراغ في الذرات سيمكن حينها وضع جميع البشر في قطعة سكر"

اشكرك على الموضوع الجميل ومشاركة الاعضاء الغنية, استفدت منهما كثيرا

 

[خادم البتول]

الحقيقة يا روز انتي بذلتي مجهود غير عادي في مجموعة الرسايل الأخيرة وأنا مشفق على جهدك الكبير والرائع ده.. أشكرك عن نفسي، وأعتقد بالنيابة عن الجميع كمان، ربنا يعوض تعبك . ثانيا أنا كمان مندهش إنك طلعتي موسوعة في الموضوع، وواضح جدا إنك قريتي كتير جدا فيه، وكمان دخلتي إلى حد كبير في الفيزياء، فأنا فعلا مندهش وسعيد بيكي جدا.. شابوه يا قمر.

شخصيا معنديش أي تعليق، لأننا متفقين أو حتى متطابقين تقريبا في الرؤية كلها، من أول وهم الانفصال لحد فيلم آل باتشينو! أعتقد جوجو وفيرونيكا كمان بيتفقوا معانا، وده طبيعي لأن كل الأفكار دي ليها أساس علمي واحد ومشترك.

بالتالي أعتقد مش فاضل بالنسبة لي غير تعليق سريع على رسالة شقاوة الأخيرة. عندي بس سفرية صغيرة في الزمن زيارة لـ 2113 وبعدين أرجع أقرا تاني واكتب على رواقة.. وطبعا أعتذر عن تأخيري.

 

[خادم البتول]

مبدئيا ح نفوّت إنه "سارق قلوب العذارى" دي، لأن كلام ف سرك العذارى هم اللي سرقوا قلبه، وقطـّعوه وشووه وكلوه كمان. آآآآآآه، على رأي المثل: يا قلب يا كتاكت يا ما انت مليان وساكت! :smile01

تؤ الكبدة فيها حديد اة .. بتساعد على تصليح الانيميا .. و لو مفيش انيميا النمو بيبقى سليم .. و يوصل الدم لاجزاء الجسم بالتساوى و حسب الحاجة .. لكن هى مش بتساهم بصورة مباشرة فى نسبة الذكاء .. اخيرًا لقيت مجال بعرف فيه اكتر منك :smil15:

ده بس عشان أشجعك يا شقشق.. لازم اسيبلك فرصة كده أو اتنين عشان يبقا عندك أمل وما تتعقديش نهائي. :smil15:

فكرتيني بقول انجليزي مأثور ـ ذكي جدا ـ بيقول:

I'm not young enough to know everything
لست صغيرا بما يكفي لأعرف كل شيء.
​

وطبعا المعنى واضح. "معرفة كل شيء" ده مجرد وهم لا نجده إلا عند الصغار فقط. لكن كل ما الإنسان بينضج ويزداد علمه بيعرف إنه بالعكس مش عارف غير قطرات من العلم، وأحيانا مش عارف حاجة خالص! :smile01

طبعًا كلامك المختصر مأشبعنيش .. بس هعديها .. بقالى اكتر من 10 سنين بفكر فى الموضوع ملقيتش اجابات اصلا .. و يوم ما الاقى اطمع فى كل التفاصيل ؟؟ ميصحش :t19:

لا طبعا يا قمرتنا من حقك تعرفي كل شيء وبالتفصيل.. بس محتاجة وقت ومحتاجة تقري كتير أوي طالما عايزة تعرفي وتفهمي كل شيء في الموضوع ده. يعني بنتكلم في "كتب" كاملة مش مجرد رسالة في منتدى. لكن على أي حال أنا قررت أعمل المرة دي خلاصة (وده اللي أخرني على فكرة سامحيني).

كبداية عشان نعمل تركيز للأمور شوية: احنا في التوبيك ده بنتكلم لحد دلوقت في 3 أفكار، ظاهريا وحتى دراسيا منفصلة لكنها طبعا مرتبطة: بنتكلم في العالم كوهم أو حلم، بنتكلم في الهولوغرام أو الهولوجرام، بنتكلم في العقل ودوره وإمكاناته.

عشان مانتوهش تاني خلينا مبدئيا نقول إيه هو الهولوجرام؟ هو ببساطة نوع من التصوير بالليزر. على الكريدت كارت وكتير من الكروت والهويات بنلاقي مربع فضي صغير، عليه صورة مغبشة وغالبا مش واضحة أوي. المربع ده هو صورة هولوجرامية بالفعل، بس عشان نشوفها لازم نشوفها في ضوء ليزر، أما في الضوء العادي بنشوف بس الآثار الخفيفة والغَبَش اللي بيبان ده. سؤال: إيه الفرق بين الصورة العادية وصورة الهولوجرام؟

أول فرق إن الهولوجرام صورة ثلاثية الأبعاد. في الصورة العادية لو انتي اتصورتي بوشك كالعادة (يمكن انتي بالذات تكوني بتتصوري بضهرك.. الله أعلم :smile01)، لو انتي اتصورتي بوشك مقدرش في الصورة أشوف ضهرك. في الهولوغرام نقدر.. نقدر نلف الصورة ـ أو نلف احنا حواليها ـ ونشوفك من كل ناحية. بالتالي انتي بتكوني مش واقفة في الصورة، إنما كأنك واقفة فوق الصورة، كتمثال من ضوء.

تاني فرق إن الصورة العادية لما نقطعها بتنقطع نصفين، إنما الصورة الهولوجرام لما نقطعها بنلاقي في كل نصف الصورة كلها كاملة. لو قطعناها أربع أرباع بيطلع عندنا أربع صور كاملة من نفس الصورة الأصل، بدون أي نقصان.

​

بالتالي في النظريات الحديثة، مش بس في الفيزياء إنما حتى في البيولوجي وغيره، بدأ العلم ينتبه إن الكون فيه تقريبا نفس الخصاص زي الهولوجرام. أولا إن كل ده ثلاثي الأبعاد، وثانيا إن الجزء بطريقة أو بأخرى فيه صورة الكل. مثال: من شعرة واحدة من رأس إنسان، بل من أصغر خلية، ممكن نحصل على الـ DNA ونعرف كل المعلومات الخاصة بصاحب الشعرة أو الخلية دي. لكن الأمثلة في الفيزياء كانت بالتأكيد أوضح، خاصة فيما دون الذرة (فيزياء الكوانتم). حتى على مستوى الشكل: دوران الإلكترونات حول النواة داخل الذرة يشبه كتير دوران الكواكب حول الشمس، وكله يشبه دوران الشمس حول المجرة، وهكذا. الثورة الحقيقية بدأت لما بدأ بعض العلماء يقولوا إننا صورة هولوجرام ثلاثي الأبعاد بالفعل. يعني انتقلنا من المعنى "المجازي" إلى المعنى "الحرفي"! لكن عشان فعلا نحسم الأمر ده اتفجّر سؤال "الحلم": هل احنا أصلا في عالم حقيقي، بالمعنى المعروف للكلمة، أم في حلم، مجرد "حالة عقلية"؟

أول وأهم وأخطر حقيقة إننا ـ حتى الآن ـ مفيش عندنا دليل علمي واحد على وجود الكون! ليه؟ لأن ببساطة كل اللي بنشوفه، اللي بنسمعه، اللي بنشمه، اللي بندوقه، واللي بنحسه ـ يعني إجمالا كل شيء ـ ليس أكثر من إشارات كهربية وكيمائية داخل المخ. يعني بالضبط زي الحلم!

نضيف على كده مشكلة فيزياء الكوانتم الأولى: إن الجسيمات أحيانا تسلك كجسيمات وأحيانا تسلك كموجات (ربنا مابيلعبش زهر). إمتى تسلك كجسيمات وتاخد شكل المادة اللي نعرفها؟ لما تكون تحت الملاحظة، يعني باختصار لما تكون في نطاق العقل البشري! يعني تاني العقل!

طبعا ولعت خناقة.. ليه؟ العلماء الملحدين والماديين عموما مش عايزين يسمعوا سيرة العقل دي خالص.. يقطع العقل وسنينه.. بيجيبلهم حساسية ودمامل. وده ببساطة طبعا لأنهم لحد دلوقت مش عارفين يحلوا ألغازه. إنما لما توصل كمان تقوليلهم إن الكون نفسه مرتبط بالعقل ـ أو بالأحرى بالوعي ـ بيركبهم العصبي. بالتالي بدأت مقاومة عنيفة داخل الأكاديميا والعلم نفسه. لكن على جانب آخر بدأت كمان تجارب جديدة تماما من نوعها على العقل والوعي والوعي الفائق، وبدأوا يجيبوا رهبان يدرسوهم، وبدأت تدريجيا نتائج مذهلة تتراكم.

​

في الأجواء دي بقا ظهر بروفيسير بوهم، تلميذ آينشتين، وراح بكل قوته وتقله العلمي واقف في صف نظريات العقل والوعي وأفكار الهولوجرام. لكن بوهم حتى تجاوز كل ده، ببساطة لأنه لغى "المكان" نفسه! هل عارفة يعني إيه تلغي المكان؟ هل تقدري حتى تتخيليها؟ لما نقول نظرية بوهم فالجملة اللي فوق دي ـ سعادتك ـ هي أسهل جملة قالها في حياته!


بالتوازي مع كل ده ـ في بداياته تقريبا ـ كان فيه قوات أمريكية في لبنان والميليشيات والمقاومة كل يوم يضربوا فيها، وإشي سيارات مفخخة وإشي عمليات انتحارية وكانت أمريكا ملهلبة. فمجموعة من اللي شغالين على "الوعي" قرروا يعملوا تجربة ميدانية في لبنان. ليه؟ كان عندهم نظرية: لو احنا فعلا هولوجرام، ولو الكل ممكن يكون في الجزء ـ زي ما شرحنا ـ إذن... خدي بالك بقا أوي أوي من اللي جاي ده: إذن أي تغيير في الجزء يؤدي بالضرورة لتغيير في الكل!

التجربة نفسها لم تكن أقل غرابة.. التجربة كانت نوع من الصلاة.. عن طريق رهبان عقلهم متدرب على التأمل والتركيز، كل دورهم إنهم يركزوا في فكرة السلام والهدوء في لبنان، وبدأو يمسكوا تايمر ويراقبوا كل شيء، وتدريجيا يزودوا عدد الرهبان المشتركين في الصلاة دي ويشوفوا النتايج.

الله يسامحك يا شقاوة احنا لسه ما قلناش حاجة وشوفي كتبنا أد إيه؟ :smile01

المهم يا ستي التجربة دي نجحت، وبوضع عدد معين تم احتسابه على "موجة" السلام والهدوء، سادت بالفعل لبنان كلها حالة السلام والهدوء! بمجرد ما وقف التركيز وانتهت التجربة، اشتعلت المقاومة تاني. طيب إزاي؟ نعيد تاني. عادوا.. نفس الكلام! طيب نروح حتة تانية.. راحوا.. نفس الكلام!


إذن مش بس فيه تواصل عقلي، لأ، ده كأن فيه بالفعل مبدأ هولوجرامي عام العقل بيشتغل بيه! الجزء ممكن بالفعل يأثر على الكل! هنا تحديدا بدأ ظهور آينشتين جديد في علوم العقل: د. دين رادين...

​

دكتور رادين ده هارد ساينس، مش بيهزر.. ده بقا شغل كمبيوتر ورياضة وأرقام.. سألهم يعني إيه الكلام ده؟ يعني إيه "عقل الجزء بيأثر على عقل الكل" دي؟ عمنا رادين ده عشان يفهم راح فاتح 60 مركز مراقبة على مستوى العالم (أنا باكتب طبعا من الذاكرة لكنهم غالبا 60 أو أكتر)، وكل المراكز دي بتعمل "سكان" بطريقة معقدة جدا، مهمتهم يسجلوا بشكل متواصل ليلا ونهارا وبدون توقف جميع الداتا العقلية الشعورية على مستوى العالم (الحروب، الصراعات، العنف والجرائم، حالات الانفعال العام زي ماتشات الكرة، الأفلام الجماهيرية، حالة الخوف عند هبوط البورصة، إلخ إلخ إلخ). الداتا دي كلها تدخل عنده على كمبيوتر تاني ماستر بيجمعها ويترجمها ببرامج معقدة وفي سلسلة طويلة بحيث تعطيه إجمالي "صورة العقل العالمي" إذا جاز التعبير. أكتر من كده رادين عمل هو بنفسه المقياس، الستاندرد، بحيث يقدر يبص في أي لحظة يقولك العالم "عقليا" في حالة هدوء وسلام، ولا بالعكس خوف وترقب! وطبعا ـ غني عن الذكر ـ كل ده بشروط علمية صارمة.

رادين قعد سنين بيراقب.. لحد فجأة لاحظ ظهور حالة خوف وترقب أعلى من الطبيعي في قياسات شهر معين.. الشهر اللي بعده القياسات زادت، بلغت تقريبا أعلى نقطة.. الشهر اللي بعده القياسات تضاعفت وقفزت بشكل غير طبيعي، وكأن أجزاء أكبر من "العقل العالمي" أو العقل الجمعي تدريجيا بتدخل حالة توتر وترقب. ثم ختاما قفزة صاروخية في القياسات!لو مثلا أعلى نقطة عادة بنوصلها هي 10، في الأسبوع ده تحديدا القياسات كانت 100.. شكل التشارت والرسوم كان بالفعل مخيف.. رادين وفريقه كانوا مذهولين: فيه إيه في العالم؟؟؟ لكن فورا عرفوا الإجابة: ده تحديدا كان الأسبوع اللي تم فيه فجأة ضرب وتدمير برج التجارة العالمي ـ أحداث 11 سبتمبر الشهيرة ـ واللي من بعدها بالفعل تغير وجه العالم!!!

* * *
​

طبعا أنا ممكن أقعد أحكي كده لمدة أسبوع كمان، فلنكتفي إذن وأعتذر عن الإطالة.. دي على الأقل الخلفية العامة لكل اللي بنقوله.. فيه زي بوهم ده ورادين ده عشرات بل مئات حاليا بيشتغلوا في نفس الموضوع، والمعامل في الغرب بالفعل لا تنام. الحقيقة إن الأسئلة اللي عندنا النهارده بالعكس أكتر من الإجابات.. لكن فيه نظريات.. بعضها أقوى من بعض، لكن أقواها جميعا هي بلا شك النظريات اللي بتربط بين العلم والتجارب الحديثة، وبين المذاهب الروحية والديانات القديمة. لكن عموما اللي نقدر النهارده نقوله وبكل ثقة وبألف برهان علمي حقيقتين أساسيتين: أولا إن العالم ليس كما نراه ونعرفه على الإطلاق، وثانيا إن جميع البشر في حالة اتصال عقلي مستمر!

عشان كده المرة اللي فاتت ذكرت المحبة والغفران ولا تقاوموا الشر بالشر. الكلام ده طلع معناه أعمق وأعجب بكتيييير جدا مما احنا كنا فاهمين. المسألة مش مجرد أخلاق حميدة وفضائل مسيحية. المسألة تتعلق بطبيعة وجودنا ذاته وتركيبنا وتركيب العالم كله!

* * *

ميرسي ليكي يا شقشق.. على حاجات كتير .. وفي انتظار رسالتك الموعودة. :16_4_10:



​

* * *​

 

[Desert Rose]

خادم البتول , لو قدرت هبقا ارجع ارد على مشاركتك الاخيرة
بس انا عايزة اقولك على حاجة , انت عارف من ضمن الحاجات اللى كان مفروض اتكلم عنها هنا هى تجارب توحيد النوايا اللى انت اتكلمت عنها فيما يسمى صورة العقل العالمى او النبض العام او زى مابيقولوا مجازا نبض الشارع
وان فيه تجارب بتتعمل فعلا لتوحيد النوايا بتاعت مجموعة من الناس ناحية هدف معين زى السلام مثلا او وقف الحروب وبتنجح فعلا
فى تهدئة الاوضاع حتى لو الاشخاص المشتركين بعيد جدا عن بعض فى المسافة

متهيألى كمان فيه موقع بس مش فاكره اسمه انت ممكن تجيب منه دلوقتى ال chart بتاعت صورة العقل العالمى حاليا بس متهيألى بتبقا متأخرة 10 دقايق بس ممكن نشوفها لحظة بلحظة علشان نعرف النبض الانسانى العالمى او الشعور الانسانى العام فى العالم كله دلوقتى
للاسف مش فاكرة اسم الموقع

ليا عودة اذا ربنا اراد .

 

[Desert Rose]

وعلى فكرة انا لسه مبتدية جديد فى ال quantum physics يعنى لا موسوعة ولا اى حاجة خالص
ورغم انها بتشدنى الا انى مقدرش اقول انى بحبها اوى معرفش ازاى :dntknw:
بس هى بحر واسع وعايزة تركيز

 

[خادم البتول]

..............
متهيألى كمان فيه موقع بس مش فاكره اسمه انت ممكن تجيب منه دلوقتى ال chart بتاعت صورة العقل العالمى حاليا بس متهيألى بتبقا متأخرة 10 دقايق بس ممكن نشوفها لحظة بلحظة علشان نعرف النبض الانسانى العالمى او الشعور الانسانى العام فى العالم كله دلوقتى
للاسف مش فاكرة اسم الموقع

ليا عودة اذا ربنا اراد .

ميرسي جدا يا جميل على المعلومة الحلوة دي.
لا أنا شخصيا معرفش إن فيه موقع للحكاية دي.. بس ياريت لو تعرفي تجيبيه يبقا رائع.

بالنسبة للكوانتم طبعا ده تخصص كبير.. وأنا شخصيا مش متعمق أوي كمان لكن أخدت بس بقدر احتياجي. وبعدين كتب عن كتب تفرق..

وفي انتظارك طبعا :16_4_10:

* * *

 

[GoGo No Way]

تمام تمام تمام ... اولا كويس انك رجعتى ...

ثانيا كلام كتير و اضطريت اقراه كله هههه بس طبعا مفيد .. ...... وتمام تمام ........ و بكرر وبزيد ان الكلام دة الى اتخدت فيه تريقة لما جيت المنتدى فى الاول لان هو دة الى مبنى عليه علم الطاقة والنوايا " خير \ شر " و حاجات كتير ههههههه بس الى حصل بقى .........

ههههههههههه
المهم بالنسبة ان تجربة النوايا دية بالفعل اعرف ناس اصحابى كل فترة بيعملو تأمل بيركزوا فيه طاقة كبيرة .. طاقة سلام ويرسلوها لسوريا مثلا او لبنان او مصر وهكذا ....

ودة الى مبنى عليه برضو قانون الجذب .. الى هو رفع ترددات معينة فى الجسم الانسان وتاثيرها فى الكون كامل و تنفيذ الفكرة والكلام دة ..

وبالنسبة للعربى بتاعى ... احمدوا ربنا انى بكتب معاكو بالعربى علشان من فترة طويلة بقيست اشتغل فرانكو بس

و يعنى و كلام مظبوط عن الهولوغرام والعقل والوهم والحقيقة والحلم ..

اه صحيح افتكرت بالنسبة للاحلام احنا بالفعل مبنبقاش فى العالم دة بتبقى فى عالم اخر فى نظرية الاوطار الفائقة والعوالم المتوازية ... و الى بيكون واعى فى الحلم هنا بيقدر يتحكم ويعمل الى عايزو ودة بيبقى فى العالم بتاعنا دة عن طريق التأمل وحالات العقل " الفا .. بيتا ...... الخ "

و كلام افلام كدة ..... من الاخر مش بحب اكتب كتير .. بحب اجيب من الاخر ..... ...

ومنتظر الباقى منكوا ......

متابع