و فى آخر زيارة
كان حوار من نوع آخر
برضوا على الكورنيش
أحب يا ايرينى أكون صريح معاكى برضوا عشان تعرفى كل حاجة عنى
احكى
انتى عارفة ان كل الشباب قبل الجواز يعنى بيبقى ليهم علاقات كدة
مش فاهمة : ايه علاقات كدة ديه ؟؟
يعنى علاقات مع ستات
ستات !
ايوة عادى
و للتوضيح اكثر : تقصد علاقات جنسية ؟
أيوة عادى
عادى !
كل الشباب كدة قبل الجواز و بيتوبوا بعد الجواز
كلهم ؟
أيوة طبعا
هو من امتى انت بتقابل الستات دول ؟
من اولى كليه
أولى ! يعنى 18 سنة مثلا
أيوة
لغاية النهاردة ؟
لا من أربع شهور
بجد ؟
اشمعنى يعنى أربع شهور دا زهد يعنى ؟
لا عشان أنا خطبتك
بس إحنا مخطوبين من 3 شهور مش من 4 !! _ وانت قولت ان الشباب بيتوبوا بعد الجواز مش بعد الخطوبة
طب سؤال : هو ليه انت بتحكى لى الحكاية الغريبة ديه ؟ _ انا كان لا يمكن اعرفها _ بتقولها ليا ليه ؟
يعنى صراحة
سؤال تانى معلش : هو انتوا بتلاقوا الستات دول فين ؟
سكوووووووووووووووووت دامس
(رجعنا للسكوت تانى)
طب سؤال يعنى : انت بتقول ان كل الشباب كدة صح ؟؟
صح
يعنى اخوية انا كدة ؟
اكيد
و أبوية؟
أكيد
استحااااااااااااااااااااااااااالة
لا انتى بس الل خام
خام !
هم تلاقيهم مش بيحكوا لك
أيوة أيوة افتكرت لما أختك قالت على أخوك الصغير لما خطب : كويس عشان يتوب
و انا الل باحسب ح يبطل سجاير
طب انا ح اقولك على حاجة
انا ح احكى لابوية الحكاية ديه ممكن ؟
اه طبعا عادى
بس اعتقد و الله اعلم انه ح يفك الخطوبة دايركتلى
لا يمكن يا بنتى : كل الشباب كدة
معلش طب ح اسألك سؤال معلش
هو الل الواحد اتربى عليه فى الكنيسة من عفة و طهارة : دا ايه ؟
يا بنتى الشاب الل ما لوش علاقات قبل الجواز : مش راجل
مش راجل ! أها دا يبقى الرُسُل كلهم مش رجالة بأة
دول رُسُل : إحنا مالنا
و الرهبان مش رجالة ؟؟
دول رهبان : إحنا مالنا
هم اترهبنوا و هم فى الكلية ؟؟ _ ما انت بدأت علاقات من أيام الكلية _ كانوا بيعملوا إيه من سن البلوغ لغاية الرهبنة ؟؟
سكوووووووووووووووووووووووت دااااااااااااامس
سؤال تانى معلشى : هو انت تعرف الستات دول ؟
سكوووووووووووووووووووووووت دااااااااااااامس
طب سؤال تانى : هو انت ما خفتش من الايدز ؟
ما فيش ايدز فى مصر
معلومة غلط حضرتك _ فى عنبر مخصوص فى مستشفى (كذا فى اسكندرية) لمرضى الايدز
بجد ؟ و الله اول مرة اعرف
و احنا فى السكة للبيت قولت له : روح انت بأة عشان اتكلم مع أبوية و اشوف ايه
ماشى
باى
باى
يتبع