الحد الفاصل بين الوهم والحقيقة فى عقل الانسان

[sha2awet 2alam]

بما انى انسان رخم .........

مبدئيا هرد على الاسئلة الى موجهه لخادم البتول .. بمعلوماتى انا ولما هو يجى يبقى يرد بقى .. يعنى من الاخر انا هرخم مش اكتر ..

لا خالص .. انا بقول السؤال و اللى عنده اجابة ينزل بيها بس يكون نفسه طويل :smile02

باختصار مفيد .. بالنسبة للصلاة وان دة نتيجة للصلاة ..

فدة لما بيحصل من ناس غير مسيحين برضو بتنجح عن طريق التأمل بسبب اعطاء اوامر للعقل الكونى لتنفيذ حاجة ....... وكل دة طبعا بأذن ربنا ... يعنى انت تقديرى تطيرى .. دة مينفيش ان ربنا هو الى اداكى الموهبه دية .......... بمعنى اخر موهبة موجودة لكل انسان متعمق فى ذاته

المشكلة يا جوجو ان كلامك نظريًا ماشى .. لكن ايه اثباته بالتجربة اذا كانت التجربة اصلا على رهبان ؟؟ نعرف منين بقا الكلام دة ؟؟

بالنسبة لشىء اخر و هو الهولوغرام وان احنا صورة ... فالموضوع مش بالسهوله دية .. مبدئيا هناك عوالم اخرى وفيها ناس موازية لينا .. غير كدة ان داخل اصغر ذرة فينا فيها الكون كله يعنى ملهوش دعوة انى انا مجرد صورة ..... الفكرة ان كل حاجة فينا هى فى الكون كله بمعنى اخر ,, مقوله على بن ابى طالب " وتحسب انك جرم صغير وفيك انطوى العالم الاكبر "

وفيه كلام بالنسبة لكلامك دة ان انا ايه ذنبى وكدة .....

فيه كلام علماء قالوه ان الانسان بيتحمل على عاقله الى هيقوله قبل ما يقوله ب 6 ثوانى .. بمعنى اخر ان احنا مجرد كومبيوتر او ماتركس ... نفس الفكرة ...... ودة برضو مينفيش وحدانية ووجود الله باى شكل من الاشكال.....

انا فاهمة اللى بتقوله و مقولة على ابن ابى طالب اظن انك كتبتها فى اول الموضوع وفهماك .. و كان فيه فيلم انيماشن مش فاكرة اسمه ان الفيل بيكلم ناس موجودين على نقطة مية على زهرة تقريبًا حاجة كدة :smile02 .. رجعنا لنفس الكلام .. معنى وجود صورة يعنى فيه اصل .. لو انا صورة معقدة مبسطة اى حاجة .. ليه اتحاسب اصلا و لو انا كمبيوتر مع انه بعيد عن موضوعنا برضه اتحاسب ليه ؟؟

الفكرة ان المفترض العلم و الدين و المنطق التلاتة يتكاملو ولا يتنافو سويًا .. فلو حصل حاجة تخل بالقانون دة .. يبقى اكيد فيه حاجة غلط .. ربنا يكون الغلط فى الفهم او الربط .. او فى النظرية نفسها !! الله اعلم

ونفسى حد يبلغ عن مشاركة سيئة ... نفسى بجد مش هزار .. " عايز اطرد "

طب شد حيلك ادينى سبب ابلغ عنك عشانه :smile02 .. و بعدين مبلغتش عن اللى شتمونى هبلغ عنك انت ؟؟
و بعدين ايه نفسى دى ؟؟ حد قالك اننا فى برنامج ما يطلبه المستمعون :smile02
:smile02

شقشق ـ أجمل وهم منور يا جميل. أنا كتبت بالفعل كتير جدا النهارده، وكتبت ليكي.. بالتالي كفاية عشان ماتزهقيش مني.. ح ارجع لك إن شاء الله تومورو.. رسالتك كالعادة بتفتح آفاق وبتحرك أفكار كتير. فيه جزء مش عارف إزاي أجاوبه أصلا . على أي حال حبيت بس أقولك ميرسي جدا على الرسالة الحلوة دي.. جوجو كمان بيقول بالفعل كلام أنا عايز أقوله، بس محتاج أقرا رسالته تاني. ليلة سعيدة ليكي وللجميع. :16_14_21:

* * *

هههههههههههه انا شخصيًا مش هزهق منك متقلقش .. لكن لو انت زهقت منى دى حاجة تانية .. و حتى لو زهقت برضه هتجاوب :smile02 انت اتدبست و اللى كان كان

فى انتظارك خد وقتك و فكر و اقرا و اعصر الكتب و هاتلى الخلاصة .. انا كسولة بحب المختصر المفيد

 

[GoGo No Way]

مين جاب سيرة الهولوغرام اصلا يا ناس ههههههههههه

بالنسبة للكلام بتاع نظرى وعملى والكلام دة مين قالك ان مفيش عملى ..

بالنسبة للصورة ... انا هقول على قد الى اعرفو جايز يكون فيه حاجة كدة ومعرفش .....

الفكرة ان الانسان فيه الكون ككينونة عمليه ولكن الانسان مفهوش الكون ككينونه روحية .. بمعنى ان الانسان مفهوش الانسان لكن فيه الكون كله .. ازاى متساليش اهو رخامة كدة ولو مش عجبك اخبطى دماغك " ارجو التبليغ "

بصراحة انا مش عارف الرد على كلامك او يمكن انا فهمو غلط او يمكن انتى اصلا فهمتى غلط ....

بس عموما احنا مش اصل وصورة .. كل الانسان اصل وصورة مع بعض ... بالنسبة لحكاية تنزيل المعلومات زى الكمبيوتر الصراحة معرفش .....

بالنسبة للفيلم كان كون كامل عايش جوة وردة ومظنش دة ليه دعوة بالحوار " بس عموما الفيلم اثر فيا جامد انا قصرت يجى 4 سم ولا حاجة كدة ........."

بس ومنتظر توضيح برضو علشان فهمى على قدى

 

[خادم البتول]

شقاوة رجعت .. تكبييييييييييييييييييييير :smile02
يعنى مش هتبطل تظلمنى ؟؟ اعوذ بالله منك راجل .. انا بدخل كل يوم .. امبارح بس مدخلتش .. روز تقولى انى بطلت ادخل المنتدى خالص و انت تقولى بح و فينيتو ؟؟ اتقو ربنا فيا شوية :vava:
هههههههههههههههههههه حلوة لو العالم وهم ما بالك بشقاوة .. انا اكيد حلم احلى من انى ابقى واقع :08: اجمل وهم :08: الله عليا :smile02

الله عليكي!

كل واحد ليه رقصته الخاصة.. واللي فوق ده رقصتك اللي محدش يعرف يرقصها غيرك! لما أشوفها مينفعش أدخل معاكي قافيه.. لازم اسكت واتبسم وارجع بضهري في الكرسي وانا باقول: الله عليكي!

المهم نيجى للمشاركة الاصلية و الجرنال اللى كتبتهولى و فعلا بامانة انا سعيدة بيك لدرجة انى فكرت فى موضوع .. نعمل موضوع منفصل و نخليه شقاوة تسأل و خادم البتول يجيب :lightbulb: و اعصرك لحد ما اجيب اخر معلوماتك .. معلش انا طماعة مبشوفش عند حد علم غير اما اخد منه على أد ما اقدر اشيل فابقى قولى رأيك فى الاقتراح .. لانى الاسئلة الجاية ناوية اشدك فى اتجاه تانى بس مترتب على كلامكم

أنا اللي سعيد بيكي، ربنا يباركك. أي سؤال بعيد أو ح يشتت الموضوع هنا افتحيله توبيك عادي وح ادخل كمشارك عادي.. اقتراحك جميل طبعا، بس أنا عموما عندي تحفظ على أي "وان مان شو" والمفروض انتي بالذات عارفه كده! وعموما يا صديقتي القاعدة الأولى في "العزف المنفرد" هي إنه يكون قصير ـ مهما كان جميل ـ وإلا ضاع اللحن الأصلي وفقدنا الهارموني والأوركسترا وهجرتنا جميعا "روح الموسيقى"!

​

تعليقى هيبقى على جزأين :

مش عارفة الكلام دة يبدو غير منطقى .. ليييييه ؟؟
انا افهم ان المشاعر عدوى و تعود...........
افهم اننا مرتبطين على مستوى غير مرئى شعوريًا.........
لكن ... التركيز فى سلام مكان ما يسود سلام حقيقى ؟؟؟

في الجزء الأول تجاوزي ـ مؤقتا ـ عن البعد الروحي والصلاة والرهبان وكل ده. دي تعبيرات وتوصيفات مني، حسب رؤيتي، لكن مش المقصود إنك تاخدي المسألة من المنظور الديني.. والرهبان ـ اللي هم بوذيين غالبا ـ بيستعينوا بيهم عموما في التجارب دي لأنهم أكتر فئة على وجه الأرض بتعمل تدريبات عقلية وبتمارس جلسات تأمل وتركيز قوي، غالبا من طفولتهم. يعني مثلا لو انتي عايزة تعملي تجارب تكشف لك عن القوة العضلية عند الإنسان أو عن قوة التحمل الجسدي الأقصى، في الحالة دي ح تجيبي بتوع كمال أجسام أو ملاكمة وزن تقيل تعملي التجارب معاهم. بالمثل: في تجارب العقل بنجيب الناس اللي عندها "عضلات عقلية". مين؟ غالبا رهبان بوذيين أو أساتذة يوجا.

يفضل السؤال: إزاي بيحصل التأثير عن بعد؟

هنا نيتدي مرحلة "النظريات" و"النماذج"، وأهم وأقوي وأقدم نظرية بتقول ببساطة إن "الأفكار" ليها "طاقة". نوع من الطاقة اللي لسه أجهزتنا ما وصلتش لمستوى الحساسية المطلوبة بحيث إنها تقيسها، لكن آثار الطاقة دي موجودة تقريبا في كل مكان. بالتالي إحنا فعليا عايشين في بحر من الطاقة العقلية، لكنه بحر بيتحرك غالبا بشكل عشوائي. بالتالي لو قدرنا نجمع ونركز الطاقة دي، زي ما بيحصل في التجربة، ممكن بالتالي نعمل تغيير، لأننا هنا واعيين أولا بالطاقة وثانيا بنركزها وبنوجهها بشكل عمدي ومقصود.

وزي الكهرباء: مش إديسون وتسلا اللي اخترعوها من 100 أو 150 سنة.. الطاقة الكهربية موجودة من أول الخليقة.. لكن إديسون وتسلا وغيرهم هم اللي قدروا يفهموها ويستغلوها ويضعوا قوانينها. كذلك: احنا دلوقت في مرحلة إديسون وتسلا بالنسبة لطاقة الأفكار والمشاعر.

(في نفس السياق: ليه على سبيل المثال "الحب" دلوقتي بقا بارد ومالوش طعم وقوة زي زمان؟ أسباب بالطبع كتير، لكن من ضمن الأسباب الطاقة: زمان على سبيل المثال كان الحبّيبة يكتبوا الجوابات بخط إيدهم، يلونوها، يعطروها، وساعات يحطوا فيها ورد، أو يحطوا دموع، أو حتى يوقعوا الجواب بدمهم، يعني باختصار كانوا بيركزوا كمية طاقة هايلة في "الجواب الغرامي". الظرف لما يوصلك مش كان فيه بس رسالة حب، وإنما كان فيه "طاقة" حب حقيقية ومركزة. الظرف كان فيه "سحر" بمعنى الكلمة. تعالي بقا النهارده: أصبح "إيميل" مش جواب غرامي، أو يمكن حتى "مسدچ" على موبايل! "خط الإيد" الإنسانية بقا حروف على شاشات وكل الحروف شبه بعضها. مفيش تقريبا فرق بين رسالة من "دكتور الأسنان" ورسالة من "حبيب العمر"! بالكتير ممكن "العاشق" يلون الكلام أكتر ويحط "سمايلي" وشوية ورد ":16_4_10:". لكن حتى ده مش "حقيقي". كله مزيف وبالتالي رخيص. كله "بارد". كله زجاج وكله ديجيتال. بالتالي ضاع العطر.. وضاع الدمع.. وضاع الدم.. ومع الوقت وتراكم كل الأسباب ضاع الشوق.. ضاع الحنين.. ضاعت اللهفة.. ضاعت الفرحة.. وضاع الحب! ولما ضاع الحب ضاع كل شيء.. قيسي على كده كل شيء.. كل شيء فقد "طاقته".. فقد سحره.. قوته وحرارته وتأثيره.. كل شيء من اللعب للشغل.. من الصنعة للغنوة.. ومن الشعر للصلاة)!


آخر حاجة قبل ما أسيب الجزء ده: مفيش أي تعارض بين موضوع "الطاقة العقلية" وتوجيهها وبين "الدور الإلهي" في حياتنا. بالعكس يمكن "الفهم" يقربنا أكتر لربنا. الجزء ده ليه شرح مفصل، بس بما إن عندنا لسه كلام كتير خلينا نأجل ده ولو مؤقتا عشان الاختصار. حبيت بس أعمل على الأقل إشارة.

حاجة كمان : مش العقل العالمى دة نتاج عالم بحاله و انسان او اتنين او مئات حتى لا يساوو شيئًا وسط مليارات البشر .. ازاى اقدر احكم ان التجربة المطبقة على العدد الصغير نسبيًا مهما كان عددهم بالنسبة لعدد البشر كلهم " صحيحة " .. عشان اقدر احكم على الاقل لازم يبقى التجربة تتم على عدد لا يقل عن نصف او ثلثين البشر لاثبات ان فعلا تلك الفكرة هى توجه العقل العالمى كله أو معظمه و بالتالى نتايج التجربة تكون نتيجة تفكير العقل العالمى

لا طبعا يا قمراية ده "علم". عشان كده لازم تقري الكلام ده بالتفصيل، لأن فعلا التبسيط أحيانا بيكون مُخل. عدد البشر بالفعل محسوب وفيه أرقام ونسب. أنا لا أذكر دلوقتي الرقم بالظبط لكنهم حسبوا ده نفسه، بمعنى إننا مثلا ـ مثلا ـ لكل مليون محتاجين 500 يعملوا حالة التركيز دي عشان يتحقق الأثر. لذلك بعد التجارب دي تأسست بالفعل مؤسسة خيرية دورها تجميع الناس من كل دولة حسب عدد سكانها، بحيث يجندوا العدد المطلوب بالظبط لإحداث الأثر ونشر السلام في الدولة دي، وهكذا. كل ده غير تجارب التركيز الجماعي على الإنترنت: كانوا مثلا يعلنوا عشوائي عن تجربة لصالح أهل التبت، مثلا، واحنا ندخل نسجل في الموقع وناخد التوقيت والتعليمات بالظبط، وبعدين لما ييجي الوقت المتفق عليه كل الناس اللي سجلت دي تبتدي تركز حسب الإرشادات، وهكذا. كان لازم كمان في التجارب دي حساب العدد.... أسئلتك جميلة طبعا بس زي ما قلتلك هو الموضوع نفسه يمكن كبير شوية أو فيه تفاصيل كتير.

نقطة كمان : ماذا لو .. تواجد مجموعتين فى تجربة واحدة .. لاحدهم هدف التركيز على سلام منطقة ما .. و الاخرى هدفها التركيز على الارهاب و خراب نفس المنطقة السابقة .. فايهم تكون له ال سيطرة الفكرية ؟؟ و ايهم ستأتى نتائجه اكثر فعالية ؟ و على اى اساس تكون نتيجة ما و ليست الاخرى ؟؟

أكتر من عامل. مش فاكر تجربة محددة بالشكل ده بس من فهمي العام للنظريات دي ـ وكمان من الواقع نفسه ـ أقدر أقولك أكتر من عامل وأكتر من متغير. يعني مثلا في مصر: لو أخدنا الطاقة العقلية لمجموعة الرهبان اللي بيصلوا دلوقتي في الصحراء، مع الطاقة العقلية لمجموعة "اللي مايتسموش" اللي عايزين يخربوها، هو ده بالظبط اللي انتي بتسألي عليه. يعني النموذج ده بالفعل موجود حتى لو احنا مش واعيين بكده. فيه بالفعل "حرب طاقات" إذا جاز التعبير، بنعيشها يوميا في واقعنا. لذلك فيه عوامل كتير بتحسم النتيجة النهائية، ومن ضمن العوامل احنا نفسنا. طاقاتنا العقلية احنا نفسنا ممكن تحسم النتيجة لصالح الفريق ده أو ده. لذلك القديس بولس الرسول قال "الإيمان والرجاء والمحبة": دي أنواع الأفكار وبالتالي الطاقات اللي لازم تكون في عقلنا بالذات في وقت الحرب والصراع. لكن للأسف العكس عادة هو اللي بيحصل وكتير بيقعوا في الخوف والشك والبغض، وده اللي بالعكس ضدنا، وده اللي الطرف الآخر عايزة بالتحديد عشان ينتصر!

بمجرد ما تفقدي محبتك هو بالفعل انتصر. بمجرد ما ترسلي طاقة بغض ـ حتى لو ضده ـ الطاقة دي بتروح لحسابه هو، بالتالي مجموع طاقة البغض تدريجيا يزيد وطاقة المحبة في المقابل تقل، والنتيجة إن البغض اللي يغلب، يعني هو اللي ينتصر!

.....................................​

 

[خادم البتول]

النقطة التانية و المشكلة التانية .. و لاننا فى اول الموضوع قولنا ان العالم كله وحدة واحدة و التفكير كله واحد او يمكن انا دماغى اللى مفتوحة على بعضها .. نطت فى دماغى فكرة سخيفة اوى

لو كان طبقًا لنظرية الهولوجرام العالم كله وهم .. و مجرد اسقاط لوجود آخر .. و اننا لا وجود لنا .. فمعنى كدة ان الانسان نفسه بما انه جزء من العالم .. الانسان وهم .. و اذا كانت حياتنا وهم و محاكاة لواقع آخر .. فلا ارادة لنا .. اية حرية تكون لصورة ؟؟ و اية ارادة تكون لصورة ؟؟ .. و اذا لم يكن لنا ارادة و حرية فى افعالنا .. فعلى أى اساس سنحاسب ؟؟ انا ليه ادخل جهنم لو كل حياتى وهم ؟ و ماليش ارادة فيها ؟؟

الفقرة دي عندي عليها أكتر من تحفظ وفيها إلى حد ما مزج بين العلم والفلسفة والروحيات. ده طبعا عشان احنا هنا بنعمل تبسيط شديد للأمور. لكن خليني أكون علمي ودقيق جدا معاكي، للأمانة أولا، ولأننا ممكن ناخد مثلا الفلسفي على إنه علمي وبالتالي نعثر أو نُعثر غيرنا.

أولا الهولوجرام علميـــا مالوش دعوة بمسألة "الوجود" و"الإرادة" وكل المعاني دي. الهولوجرام "فيزياء" بحتة، سببها ظواهر فيزيائية معينة غير مفهومة في "الثقوب السوداء". سلوك الطاقة والضوء والجاذبية إلخ عند الثقوب السوداء مالوش فيزيائيا غير حل واحد: إن الكون هولوجرام، يعني "يبدو" ثلاثي الأبعاد إنما هو الحقيقة "صورة" ثنائية الأبعاد. زي ما قلت في مشاركة سابقة: انتي هنا مش في الصورة، انتي في صور الهولوجرام بتظهري فوق الصورة كتمثال من ضوء. الصورة نفسها ثنائية (زي الجزء الفضي في الكريدت كارت)، بس انتي نفسك فوق الصورة ثلاثية الأبعاد.

ده بالتالي معناه إنك بالفعل وهم، وكل شيء وهم، أو بالكتير "إسقاط". الكون بكل ما فيه هو في الحقيقة "لوحة"، ثنائية الأبعاد، مكانها أصلا مش هنا خالص وإنما في نقطة أبعد من خيالنا، على بعد ما يسمي بـ"الأفق الكوني"، أو "الأفق الضوئي".

هنا ينتهي كلام العلم.

وزي ما قلت قبل كده: رغم إن دي نظرية تبدو غريبة لكنها ليست الأغرب في عالم الفيزياء. فيه حاليا بالفعل نظريات "خيال علمي". مش عايز أفتح في ده طالما مفيش احتياج ليه. إنما بأكده عشان بس اقول: مش لازم نتخض أوي لما نلاقي نظرية غريبة. نعم، فيه لسه أغرب. ونعم، ممكن أوي تكون الحقيقة أغرب من الخيال.

* * *
​

بعد ما انتهى الجزء العلمي ممكن بقا براحتنا نتكلم فلسفة ودين. مبدئيا في ضوء الهولوجرام، وباعتبارها نظرية صحيحة، انتي لسه مش "عدم"، انتي لسه موجودة في "اللوحة" الأصلية للكون. الفرق هو فقط فهمك انتي لنفسك. "انتي الحقيقية" مش هي دي اللي انتي شايفاها. "انتي الحقيقية" تختلف كلية عن "الانعكاس" أو "الإسقاط" أو "تمثال الضوء" الهولوجرامي اللي انتي فاكراه حقيقتك. الكلام ده موجود بالفعل في الفلسفة من مئات بل حتى آلاف السنين! نظرية الهولوجرام بس بتدعمه.

من هنا نفهم بشكل أوضح فكرة الحلم: إنتي الحقيقية بتحلمي بالعالم، بما في ذلك بتحلمي بنفسك أو بجسدك داخل الحلم.

لكن فكرة الحلم كلها على بعضها مجرد "موديل" أو "نموذج" للشرح.

موديل تاني بيقرب الصورة باستخدم فكرة ألعاب الكمبيوتر: "إنتي الحقيقية" بتلعبي على الكمبيوتر لعبة اسمها "ماتريكس"، مثلا، وفي اللعبة دي ح تاخدي دور "شقاوة". بالتالي مشكلة الإنسان إنه بس بينسى الحقيقة دي.. إنه بيصدق إن هو بس الشخصية اللي في الحلم، مش "الحالم"، أو إن هو بس الشخصية اللي في اللعبة، مش اللاعب.

من هنا تبتدي المأساة: لما تنسي إنتي مين ـ انتي الحقيقية ـ وتصدقي إنك بس شقاوة، العالم في لعبة "ماتريكس" مليء بالمغامرات والمشكلات والحيل والفخاخ والرعب، وبالتالي انتي بتشعري وبتعيشي كل أنواع الخوف والحزن والآلام والدموع. ليه؟؟ ببساطة لأنك مصدقة الوهم!! لأنك صدقتي اللعبة وهي مش أكتر من خداع على شاشة هولوجرام! صدقتي الفيلم وهو مش أكتر من فيلم انتي بتلعبي فيه دور! صدقتي "الماتريكس" اللي انتي عايشة فيها!

* * *
​

أخيرا المرحلة التالتة إنك تربطي كل اللي فوق ده ـ العلم والحكمة أو العلم والفلسفة ـ بعقيدتك وبالكتاب المقدس. هل اللي فوق ده موجود عندك في الكتاب، ولو بالرمز؟ هل "انتي الحقيقية"، مثلا، هي اللي بنسميها "الروح"؟ هل "ملكوت السماء" يتحقق بالخروج من ماتريكس الوهم؟ هل ده هو المعنى الأعمق لعبارة "لستم من العالم"؟ هل ده هو حل التنافض: "من طلب أن يخلص نفسه يهلكها، ومن أهلكها يحييها"، حتى بدون "من أجلي" ـ حسب تعبير القديس لوقا ـ وكأن المعنى "من طلب أن يخلص نفسه (الوهمية) يهلك (روحه)، ومن أهلكها (الوهمية) يحييها (الحقيقية)؟ ليه "أحبوا أعداءكم"؟ إزاي "اغلب الشر بالخير"؟ إيه قوانين الطاقة وازاي بتتحرك، معانا أو ضدنا؟ هل ممكن نعيد قراءة النصوص الخاصة ـ زي الصلاة الوداعية ـ مرة تانية في ضوء الرؤية دي؟ هل ممكن نعيد قراءة كل الكتاب المقدس في ضوء الرؤية دي؟

هنا المرحلة التالتة دي جهد شخصي ودراسة طويلة ومستمرة على 3 محاور: العلم ـ الفلسفة ـ الدين. لذلك ممكن هنا نكتفي، خاصة إننا بالفعل طولنا جدا. لكن في النهاية زي مانتي شايفة: الموضوع مالوش علاقة بالإرادة والحرية ومشروعية الدينونة أو العقاب. الموضوع كله يتعلق بالسؤال الخالد: من أنت؟ ما هو الإنسان؟

* * *
​

 

[sha2awet 2alam]

بس ومنتظر توضيح برضو علشان فهمى على قدى

هتفهم قصدى فى ردودى على الخادم .. دة احنا هنبدع :new6:

و برضه مفيش تبليغ :smil15:

 

[GoGo No Way]

وماله وماله iam w8ing

 

[sha2awet 2alam]

كل واحد ليه رقصته الخاصة.. واللي فوق ده رقصتك اللي محدش يعرف يرقصها غيرك! لما أشوفها مينفعش أدخل معاكي قافيه.. لازم اسكت واتبسم وارجع بضهري في الكرسي وانا باقول: الله عليكي!

رقص يا فاسق :new6: خسئت :smil15:

أنا اللي سعيد بيكي، ربنا يباركك. أي سؤال بعيد أو ح يشتت الموضوع هنا افتحيله توبيك عادي وح ادخل كمشارك عادي.. اقتراحك جميل طبعا، بس أنا عموما عندي تحفط على أي "وان مان شو" والمفروض انتي بالذات عارفه كده! وعموما يا صديقتي القاعدة الأولى في "العزف المنفرد" هي إنه يكون قصير ـ مهما كان جميل ـ وإلا ضاع اللحن الأصلي وفقدنا الهارموني والأوركسترا وهجرتنا جميعا "روح الموسيقى"!

الكلام دة اما يكون مجرد عازف .. مش مايسترو

وزي الكهرباء: مش إديسون وتسلا اللي اخترعوها من 100 أو 150 سنة.. الطاقة الكهربية موجودة من أول الخليقة.. لكن إديسون وتسلا وغيرهم هم اللي قدروا يفهموها ويستغلوها ويضعوا قوانينها. كذلك: احنا دلوقت في مرحلة إديسون وتسلا بالنسبة لطاقة الأفكار والمشاعر.

فهماك .. قصدك ان الطاقة اكتشاف مش اختراع

(في نفس السياق: ليه على سبيل المثال "الحب" دلوقتي بقا بارد ومالوش طعم وقوة زي زمان؟ أسباب بالطبع كتير، لكن من ضمن الأسباب الطاقة: زمان على سبيل المثال كان الحبّيبة يكتبوا الجوابات بخط إيدهم، يلونوها، يعطروها، وساعات يحطوا فيها ورد، أو يحطوا دموع، أو حتى يوقعوا الجواب بدمهم، يعني باختصار كانوا بيركزوا كمية طاقة هايلة في "الجواب الغرامي". الظرف لما يوصلك مش كان فيه بس رسالة حب، وإنما كان فيه "طاقة" حب حقيقية ومركزة. الظرف كان فيه "سحر" بمعنى الكلمة. تعالي بقا النهارده: أصبح "إيميل" مش جواب غرامي، أو يمكن حتى "مسدچ" على موبايل! "خط الإيد" الإنسانية بقا حروف على شاشات وكل الحروف شبه بعضها. مفيش تقريبا فرق بين رسالة من "دكتور الأسنان" ورسالة من "حبيب العمر"! بالكتير ممكن "العاشق" يلون الكلام أكتر ويحط "سمايلي" وشوية ورد ":16_4_10:". لكن حتى ده مش "حقيقي". كله مزيف وبالتالي رخيص. كله "بارد". كله زجاج وكله ديجيتال. بالتالي ضاع العطر.. وضاع الدمع.. وضاع الدم.. ومع الوقت وتراكم كل الأسباب ضاع الشوق.. ضاع الحنين.. ضاعت اللهفة.. ضاعت الفرحة.. وضاع الحب! ولما ضاع الحب ضاع كل شيء.. قيسي على كده كل شيء.. كل شيء فقد "طاقته".. فقد سحره.. قوته وحرارته وتأثيره.. كل شيء من اللعب للشغل.. من الصنعة للغنوة.. ومن الشعر للصلاة)!

مش فاهمة مالك و مال دكاترة الاسنان بتخبط فيهم ليه :fun_lol: خاف على عمرك و متجيبش سيرتهم .. و صدقنى الميل و خطوط الكيبورد سُترة ميعرفش قيمتها غير الدكاترة :new6:

عندى اعتراض على ان الحب ضاع .. لا يا سيدى موجود .. و بقوة كمان :blush2: يمكن اختلفت صورته بس هو نفسه مختفاش .. يوم ما الحب يختفى العالم كله هيختفى و يفتُر

آخر حاجة قبل ما أسيب الجزء ده: مفيش أي تعارض بين موضوع "الطاقة العقلية" وتوجيهها وبين "الدور الإلهي" في حياتنا. بالعكس يمكن "الفهم" يقربنا أكتر لربنا. الجزء ده ليه شرح مفصل، بس بما إن عندنا لسه كلام كتير خلينا نأجل ده ولو مؤقتا عشان الاختصار. حبيت بس أعمل على الأقل إشارة.

نأجلها ماشى .. نتغاضى عنها خالص تؤ .. تُأجل و تُنظر لاحقًا

لا طبعا يا قمراية ده "علم". عشان كده لازم تقري الكلام ده بالتفصيل، لأن فعلا التبسيط أحيانا بيكون مُخل. عدد البشر بالفعل محسوب وفيه أرقام ونسب. أنا لا أذكر دلوقتي الرقم بالظبط لكنهم حسبوا ده نفسه، بمعنى إننا مثلا ـ مثلا ـ لكل مليون محتاجين 500 يعملوا حالة التركيز دي عشان يتحقق الأثر.

انت بتتكلم فى حاجة و انا بتكلم على حاجة تانية .. انت تقصد النسبة و التناسب بين العدد المؤثِر و العدد المؤثَر عليه .. زى ماقولت مثلا لكل مليون محتاجين 500 يركزو .. لكن انا اقصد ان عشان نقول العقل العالمى بالمعنى العمومى له يفترض ان يكون اكثر من النصف او ثلثى عدد العالم يفكرون فى فكرة واحدة لاستطيع تعميم الفكرة و يكون تعميمى صحيحًا بان العقل العالمى يفكر فى كذا مثلا .. فهمتنى ؟؟

أكتر من عامل. مش فاكر تجربة محددة بالشكل ده بس من فهمي العام للنظريات دي ـ وكمان من الواقع نفسه ـ أقدر أقولك أكتر من عامل وأكتر من متغير. يعني مثلا في مصر: لو أخدنا الطاقة العقلية لمجموعة الرهبان اللي بيصلوا دلوقتي في الصحراء، مع الطاقة العقلية لمجموعة "اللي مايتسموش" اللي عايزين يخربوها، هو ده بالظبط اللي انتي بتسألي عليه. يعني النموذج ده بالفعل موجود حتى لو احنا مش واعيين بكده. فيه بالفعل "حرب طاقات" إذا جاز التعبير، بنعيشها يوميا في واقعنا. لذلك فيه عوامل كتير بتحسم النتيجة النهائية، ومن ضمن العوامل احنا نفسنا. طاقاتنا العقلية احنا نفسنا ممكن تحسم النتيجة لصالح الفريق ده أو ده. لذلك القديس بولس الرسول قال "الإيمان والرجاء والمحبة": دي أنواع الأفكار وبالتالي الطاقات اللي لازم تكون في عقلنا بالذات في وقت الحرب والصراع. لكن للأسف العكس عادة هو اللي بيحصل وكتير بيقعوا في الخوف والشك والبغض، وده اللي بالعكس ضدنا، وده اللي الطرف الآخر عايزة بالتحديد عشان ينتصر!

هو دة بالظبط اللى كنت بقصده .. لو تعارض طاقتان فكريتان .. لايهما الغلبة ؟؟ هل للعدد فقط .. بمعنى لو الكارهون اكثر ستعم البغضة و الخوف و المشاعر السلبية ؟؟ أم فيه عوامل اخرى ؟؟ لو فيه ياريت تقولهالى

بمجرد ما تفقدي محبتك هو بالفعل انتصر. بمجرد ما ترسلي طاقة بغض ـ حتى لو ضده ـ الطاقة دي بتروح لحسابه هو، بالتالي مجموع طاقة البغض تدريجيا يزيد وطاقة المحبة في المقابل تقل، والنتيجة إن البغض اللي يغلب، يعني هو اللي ينتصر!

انا اعرف ان نفى النفى اثبات .. و تجميع الطاقة بيبقى حسب اتجاهها .. فهل بغض البغضة يحسب فى ميزان الطاقة لصالح الحب ؟؟ ولا لا ينطبق عليه ؟؟

ده بالتالي معناه إنك بالفعل وهم، وكل شيء وهم، أو بالكتير "إسقاط". الكون بكل ما فيه هو في الحقيقة "لوحة"، ثنائية الأبعاد، مكانها أصلا مش هنا خالص وإنما في نقطة أبعد من خيالنا، على بعد ما يسمي بـ"الأفق الكوني"، أو "الأفق الضوئي".

و هو دة اللى انا بتكلم فيه .. و فهمتك .. و بما ان الانسان جزء من الوهم دة .. فبالتالى يكون الانسان " بصورته الكونية او الارضية التى نراها بالعين المجردة " هو الاخر وهم .. صحيح احنا صورة لاصل موجود فى مكان ما .. لكن لازلنا صور ..

من هنا نفهم بشكل أوضح فكرة الحلم: إنتي الحقيقية بتحلمي بالعالم، بما في ذلك بتحلمي بنفسك أو بجسدك داخل الحلم.

انا فاهمة كل دة .. و لازلت شايفة الامر غير عادل .. لانه ببساطة فى اى فيديو جيم بيقولك جيم اوفر و تلعب تانى .. تقدر تقفل اللعبة و تكمل حياتك عادى ! .. لكن تتوقف حياتى الاخرى على مجرد حلم ؟؟ .. بعد استيقاظى سأفيق فى راحة الملكوت او عذاب الجحيم الابدى كنتيجة لافعال فى حلم !

هنا المرحلة التالتة دي جهد شخصي ودراسة طويلة ومستمرة على 3 محاور: العلم ـ الفلسفة ـ الدين. لذلك ممكن هنا نكتفي، خاصة إننا بالفعل طولنا جدا. لكن في النهاية زي مانتي شايفة: الموضوع مالوش علاقة بالإرادة والحرية ومشروعية الدينونة أو العقاب. الموضوع كله يتعلق بالسؤال الخالد: من أنت؟ ما هو الإنسان؟

فعلا ماهو الاجابة عن " من هو الانسان " هتحدد مشروعية العقاب و الدينونة و حقيقة حرية ارادته من عدمها ...

فبالتالى هسألك " من هو الانسان ؟؟ " :2:

انت اللى جيبته لنفسك :flowers:

 

[GoGo No Way]

مع فقرة الرخامة

انت بتتكلم فى حاجة و انا بتكلم على حاجة تانية .. انت تقصد النسبة و التناسب بين العدد المؤثِر و العدد المؤثَر عليه .. زى ماقولت مثلا لكل مليون محتاجين 500 يركزو .. لكن انا اقصد ان عشان نقول العقل العالمى بالمعنى العمومى له يفترض ان يكون اكثر من النصف او ثلثى عدد العالم يفكرون فى فكرة واحدة لاستطيع تعميم الفكرة و يكون تعميمى صحيحًا بان العقل العالمى يفكر فى كذا مثلا .. فهمتنى ؟؟

الفكرة فى الطاقة نفسها والى بتجلبو ... صاحبى السلام طاقتهم عاليه مبدئيا لانهم بيشحنوا نفسهم ديما بالطاقة فى الحب و ووووو ....... عموما الانسان بيجلب الى بيفكر فيه و صانعى السلام هدفهم واضح و الاشرار ايضا ولكن اذا كنت تقصدى تطبيق عملى ففى ناس مش بتركز فكرتها يعنى الاشرار فى الكون ممكن نكون احنا الى افكارنا مثلا سلبية .... لكن اذا كان هناك تركيز للشر سيحدث الخير والشر معا .. يعنى مثلا مدينة هيحصل فيها السلام فى جزء الى بيضم اصحاب الطاقة الايجابية و عدم سلام فى المنطقة الاخرى .. بالرغم مثلا ان مش هما الى طلبوا ولا الايجابى ولا السلبى ولكن هكذا يكون الجذب من الكون

انا اعرف ان نفى النفى اثبات .. و تجميع الطاقة بيبقى حسب اتجاهها .. فهل بغض البغضة يحسب فى ميزان الطاقة لصالح الحب ؟؟ ولا لا ينطبق عليه ؟؟

لموخذه ايه الى دخل دة فى دة .. يعنى الكراهيه + كراهيه = حب !! ... الطاقة لا يوجد فيها نفى ولا يوجد سلبى وايجابى عمليا ولكن ستظل دائما طاقة ... يعنى مثلا لما نحسب حاجة فى ببناء عمارة " انا معرفش بصراحة لكن مجرد تخمين هههههههه " مش هنقول هنحفر نيجاتيف 5 متر و بعد كدة نطلع 50 متر ..

لا بتتقال هنحفر 5 متر وبعد كدة هنطلع 50 متر !! مش معنى اننا حفرنا لتحت يبقى الرقم بالنيجاتيف " بصراحة دة فتى من عندى اظن انكم اهل العلم هههههههه "

و هو دة اللى انا بتكلم فيه .. و فهمتك .. و بما ان الانسان جزء من الوهم دة .. فبالتالى يكون الانسان " بصورته الكونية او الارضية التى نراها بالعين المجردة " هو الاخر وهم .. صحيح احنا صورة لاصل موجود فى مكان ما .. لكن لازلنا صور ..

ان احنا نكون صورة دة مينفيش ان الكينونة هى الاصل .. بمعنى ان الانسان الى بيعلى بتردداته بيختفى مثلا .. مثال اخر .. عارفه فيلم ماتركس عارفه الواد الى تنى المعلقه .. عارف ازاى .. مجرد انه عالى الترددات بتاعتها وخلاها خارج النطاق الزمكانى

ودة بينطبق عليه الانتقال من مكان الى اخر بالجسد ..... يعنى الى بيتأمل وبيعلى بتردداته بيوصل للحقيقة ولكن سيظل هو هو الكائن " الكينونة واحدة "

وبالنسبة للحلم ... احنا فى حلم نظريا بالنسبة للفلسفة لكن عمليا احنا اهو كائنات مش مجرد حلم ولكن مش دية الحقيقة .. بمعنى اخر دة اختبار ولكن مش كل الحقيقة ظاهرة فيه .. لازم تجتازه علشان توصل للحقيقة ....

يعنى الفكرة ان مثلا لما تتحكم فى الحلم " حلم واعى " و عرفت تطير ووقعت .. دة بياثر على الجسم الفزيائى وفعلا الجسم بيتوجع فترة ... يعنى الى بيحصل فى الحلم بياثر خارجه لانك صاحب الافعال ..!!!


واهو حاجة كدة بسيطة " جرعة بسيطة من الرخامة موقتا "

 

[Desert Rose]

الموضوع اتوسع اوى فى نقط متقدمة , فأنا مش عارفه ومش هينفع ارجعه تانى للمسار الاصلى او الترتيب الاصلى بتاعه, but its okay كملوا نقاش انا سعيدة بالنقاش الجميل ده


شقاوة , ليا ردود على اسئلتك اذا انتى حبيتى ارد عليها , او لو مش عايزة ارد ومكتفية بالردود الجميلة الشاملة اللى اتقدمت من الجميل خادم البتول والجميل جوجو قوليلى .

ليا عودة للموضوع اذا كان ينفع واذا ربنا اراد

 

[خادم البتول]

يا سلاااااااام أشكرك يارب!
كنت لسه بفكر فيكي وكنت لسه بقول شقاوة دخلت في الغميق.
قوم من كرم ربنا عليا لقيت قدامي الاتنين مع بعض: روز... بتقول نقط متقدمة! :flowers:


أرجوكي ارجعي ورجّعي التراك لأني كده كده عندي فترة سكون أجمّع فيها "طاقة" . وبعدين أنا أصلا عايز اسمع ردودك يا سمو الأميرة. شقاوة بتسألني عشان أنا اللي برغي كتير بس (غير طبعا إنها بتحب تتلامض عليا وتنكشني بشكل خاص )! لكن جديا أنا لسه لحد النهارده باروح اقرا اللي بيكتبوه ناس اقل منك بكتير ـ حسب تقديري لمستواكي واللي هو الحقيقة أدهشني. بالتالي أحب وبصدق تشاركينا أفكارك ورؤيتك وتديني أنا كمان فرصة أتعلم منها. وبشكل عام ياريت نكسر إنه يكون حوار ثنائي بس، ياريت عدد أكبر من الناس عموما يشارك سواء بالأسئلة أو بالإجابات. وحتى إذا أصحاب الإجابات اختلفوا يتناقشوا: ده نفسه ح يفيدهم ويفيد الجميع ويثري التوبيك ككل.

مشكلة شقاوة ـ حسب مانا شايف، وحسب مانا عادة بواجه مع الناس ـ إنها داخليا قلقانة من وضع ربنا ودوره في التصميم ككل، وده منطقي جدا لأن في نقطة معينة بيتفرع بالفعل الطريق: فرع بيلغي ربنا نهائيا، وده للأسف اللي معظم الناس بتمشي فيه (وده كمان بالمناسبة الفرع اللي في نهايته مجموعة العلوم السرية القديمة والمفقودة اللي كان زمان اسمها "السحر"، بس احنا دلوقتي طبعا بنديها أسامي أكثر قبولا وأكثر أناقة)، وفرع تاني بالعكس تماما: بيثبت ربنا كليا (وده في نهايته حاجة تانية أكبر وأقوى من أي شيء نعرفه أو حتى نتخيله: الروح القدس).

لكن ده ـ كما هو واضح ـ مستوى التخصص الدقيق، يعني ما بعد الماستر والدكتوراه، بينما احنا هنا لسه بنتكلم في مستوى دون البكالوريوس أو حتى أقل. كل المطلوب في المستوى ده هو إننا بس نقول الإنسان انتبه لأفكارك ومشاعرك، ونقوله كفاك غرور واجتراء على الوحي اللي انت أصلا لسه مش فاهمه تماما، وأخيرا نقوله ـ ولو بدون شرح ـ إنك لا شيء، مجرد وهم، عشان كده اللي بيروح السما التالتة ويشوف ويفهم بيرجع يقولنا: أحيا ـ لا أنـــا ـ بل المسيح يحيا فيّ!


رسالتي الجاية هي الأخيرة لأني بالفعل على سفر. لسه مش عارف ح ارد فيها كالعادة على كل الأسئلة تفصيلا وللا أكتفي المرة دي بإشارات.. غالبا ح تكون إشارات، لكن خلينا نشوف ربنا ح يبعت إيه. ميرسي شقاوة على الحوار الشيق جدا :16_4_10:، وميرسي روز على التوبيك الجميل كالعادة، وطبعا في انتطار رؤيتك وأفكارك! :16_4_10:

* * *
​

 

[Desert Rose]

لا بالعكس , انا سعيدة بالحوار والنقاش الثنائى الجميل بينك وبين شقاوة واستفدت منه كتير واكيد الكل استفاد
علشان كده بقول ياريت تستمروا فيه , مفيش مشكلة
لان بالنسبالى , اكيد طبعا مش هقدر اضيف اصلا بعد كلامك
الحاجة التانية ان انا شايفه ان من الصعب او مستحيل فى نظرى انى ارجع الموضوع لترتيبه الفكرى الاصلى , انا مش عارفه

 

[خادم البتول]

لا بالعكس , انا سعيدة بالحوار والنقاش الثنائى الجميل بينك وبين شقاوة واستفدت منه كتير واكيد الكل استفاد
علشان كده بقول ياريت تستمروا فيه , مفيش مشكلة
لان بالنسبالى , اكيد طبعا مش هقدر اضيف اصلا بعد كلامك
الحاجة التانية ان انا شايفه ان من الصعب او مستحيل فى نظرى انى ارجع الموضوع لترتيبه الفكرى الاصلى , انا مش عارفه

معلش هو التوبيك ده كان غريب شوية من أول ما بدأ، غير طبعا التجارب اللي مر بيها.

خدي نفسك وبالهداوة.. يوم أو اتنين وح تعرفي ترجّعيه ان شاء الله للتراك الأصلي زي ما كان في دماغك. ميرسي يا أميرتنا على تقديرك ومتابعتك، وطبعا تقدري تضيفي وبالفعل بتضيفي كتير وكل يوم. :flowers:


* * *

​

 

[geegoo]

الموضوع اتوسع اوى فى نقط متقدمة , فأنا مش عارفه ومش هينفع ارجعه تانى للمسار الاصلى او الترتيب الاصلى بتاعه, but its okay كملوا نقاش انا سعيدة بالنقاش الجميل ده


شقاوة , ليا ردود على اسئلتك اذا انتى حبيتى ارد عليها , او لو مش عايزة ارد ومكتفية بالردود الجميلة الشاملة اللى اتقدمت من الجميل خادم البتول والجميل جوجو قوليلى .

ليا عودة للموضوع اذا كان ينفع واذا ربنا اراد

حمدا لله علي السلامة

 

[Desert Rose]

خدي نفسك وبالهداوة.. يوم أو اتنين وح تعرفي ترجّعيه ان شاء الله للتراك الأصلي زي ما كان في دماغك
​

مفتكرش اقدر , انا حاولت ومش عارفه ارجعه تانى للترتيب بتاعه , هو مكانش ترتيب بمعنى ترتيب وتسلسل , انما كانت مجرد افكار ليها علاقة بالعقل البشرى , انما احنا دخلنا فى منحنيات مش هينفع اخرج منها بعد كده هيحصل تشتيت جامد
فأنا بقول كملوا نقاش , والموضوع مفتوح ليك او لجوجو او لآى حد بيحب الحاجات ديه وقرا فيها قبل كده انه يكمل الموضوع بالشكل اللى هو عايزه وشايفه
بالنسبالى انا مش قادرة ارجعه تانى للى كان فى بالى .

 

[Desert Rose]

حمدا لله علي السلامة

الله يسلمك ياجيجو

 

[sha2awet 2alam]

مع فقرة الرخامة



الفكرة فى الطاقة نفسها والى بتجلبو ... صاحبى السلام طاقتهم عاليه مبدئيا لانهم بيشحنوا نفسهم ديما بالطاقة فى الحب و ووووو ....... عموما الانسان بيجلب الى بيفكر فيه و صانعى السلام هدفهم واضح و الاشرار ايضا ولكن اذا كنت تقصدى تطبيق عملى ففى ناس مش بتركز فكرتها يعنى الاشرار فى الكون ممكن نكون احنا الى افكارنا مثلا سلبية .... لكن اذا كان هناك تركيز للشر سيحدث الخير والشر معا .. يعنى مثلا مدينة هيحصل فيها السلام فى جزء الى بيضم اصحاب الطاقة الايجابية و عدم سلام فى المنطقة الاخرى .. بالرغم مثلا ان مش هما الى طلبوا ولا الايجابى ولا السلبى ولكن هكذا يكون الجذب من الكون





لموخذه ايه الى دخل دة فى دة .. يعنى الكراهيه + كراهيه = حب !! ... الطاقة لا يوجد فيها نفى ولا يوجد سلبى وايجابى عمليا ولكن ستظل دائما طاقة ... يعنى مثلا لما نحسب حاجة فى ببناء عمارة " انا معرفش بصراحة لكن مجرد تخمين هههههههه " مش هنقول هنحفر نيجاتيف 5 متر و بعد كدة نطلع 50 متر ..

لا بتتقال هنحفر 5 متر وبعد كدة هنطلع 50 متر !! مش معنى اننا حفرنا لتحت يبقى الرقم بالنيجاتيف " بصراحة دة فتى من عندى اظن انكم اهل العلم هههههههه "




ان احنا نكون صورة دة مينفيش ان الكينونة هى الاصل .. بمعنى ان الانسان الى بيعلى بتردداته بيختفى مثلا .. مثال اخر .. عارفه فيلم ماتركس عارفه الواد الى تنى المعلقه .. عارف ازاى .. مجرد انه عالى الترددات بتاعتها وخلاها خارج النطاق الزمكانى

ودة بينطبق عليه الانتقال من مكان الى اخر بالجسد ..... يعنى الى بيتأمل وبيعلى بتردداته بيوصل للحقيقة ولكن سيظل هو هو الكائن " الكينونة واحدة "

وبالنسبة للحلم ... احنا فى حلم نظريا بالنسبة للفلسفة لكن عمليا احنا اهو كائنات مش مجرد حلم ولكن مش دية الحقيقة .. بمعنى اخر دة اختبار ولكن مش كل الحقيقة ظاهرة فيه .. لازم تجتازه علشان توصل للحقيقة ....

يعنى الفكرة ان مثلا لما تتحكم فى الحلم " حلم واعى " و عرفت تطير ووقعت .. دة بياثر على الجسم الفزيائى وفعلا الجسم بيتوجع فترة ... يعنى الى بيحصل فى الحلم بياثر خارجه لانك صاحب الافعال ..!!!


واهو حاجة كدة بسيطة " جرعة بسيطة من الرخامة موقتا "

عندى ردود بس صاحبة الموضوع حست انه بدأ يفلت منها و من الفكرة الاصلية .. فن stop لحد كدة .. و برضه مفيش رخامة :a63:

الموضوع اتوسع اوى فى نقط متقدمة , فأنا مش عارفه ومش هينفع ارجعه تانى للمسار الاصلى او الترتيب الاصلى بتاعه, but its okay كملوا نقاش انا سعيدة بالنقاش الجميل ده


شقاوة , ليا ردود على اسئلتك اذا انتى حبيتى ارد عليها , او لو مش عايزة ارد ومكتفية بالردود الجميلة الشاملة اللى اتقدمت من الجميل خادم البتول والجميل جوجو قوليلى .

ليا عودة للموضوع اذا كان ينفع واذا ربنا اراد

ياسلام ؟؟ ياريت تنطقى يا شيخة .. قولى اى حاجة انا راضية منك باى اجابة بس انطقى :t32:

سبق و قولتلك انا طمااااااعة .. و العلم اللى فى دماغ حد واحد مش بيكفينى ولا اتنين ولا عشرة .. لو عندك اى اضافة او حتى اعادة صياغة للكلام اللى اتقال بشكل اخر باسلوبك الخاص قوليه .. اللى متابعين الموضوع اكيد مش كلهم نفس المستوى العلمى ولا الذكاء فممكن يفهمو بطريقة و طريقة تانية لأ .. عشان كدة احب اسمع الموضوع الواحد بمليون طريقة و يتعرض بمليون اسلوب .. لعل و عسى اللى مفهمش من المرة الاولى يفهم من التانية او التالتة و هكذا

متبعاكى بس انطقى انتى :smil12:

مشكلة شقاوة ـ حسب مانا شايف، وحسب مانا عادة بواجه مع الناس ـ إنها داخليا قلقانة من وضع ربنا ودوره في التصميم ككل، وده منطقي جدا لأن في نقطة معينة بيتفرع بالفعل الطريق: فرع بيلغي ربنا نهائيا، وده للأسف اللي معظم الناس بتمشي فيه (وده كمان بالمناسبة الفرع اللي في نهايته مجموعة العلوم السرية القديمة والمفقودة اللي كان زمان اسمها "السحر"، بس احنا دلوقتي طبعا بنديها أسامي أكثر قبولا وأكثر أناقة)، وفرع تاني بالعكس تماما: بيثبت ربنا كليا (وده في نهايته حاجة تانية أكبر وأقوى من أي شيء نعرفه أو حتى نتخيله: الروح القدس).

* * *
​

شقاوة معندهاش مشاكل ولا بيفرق معايا العلم يطلع فى الاخر مع مين ولا ضد مين .. انا دماغى مهوية فوق ما تتخيل :yahoo: .. كل ما فى الامر انى مش عايزة حد يفهم اننا بندعو للالحاد لا قدر الله :smil12: و بما اننا فى منتدى تبشيرى فبحاول ربط العلم بالدين و ننظر له نظرة عامة و شاملة .. فيكون حتى العلم اللى بنتكلم فيه بيخدم قربنا لربنا ..

لكن لو طلعنا على منتدى علمى و بس .. يبقى نقول اللى نقوله .. مفيش رقابة مفيش حدود حتى لو وصلنا للجنون

استمتعت بمناقشتك جدًا .. و اكيد مش هتبقى اخر مناقشة باذن المسيح شكرًا انك انت اللى نبهتنى على وجود الموضوع اساسًا لانى مكنتش شوفته و اهو كانت فرصة حلوة للكلام معاك

 

[Veronicaa]

غبت بومين فوجدت الاعضاء كتبوا جرائد في الموضوع
حقيقي شكرا كثير روز على الموضوع وشكرا لكل من شارك لاني استفدت كثيرا من الردود

حبيبتي روز كنت مشغولة هذه الفترة بالامتحانات اشكرك جدا لانك افتكرتيني برسالة على بروفايلي.. تسلمي
للاسف مش قدرت ارد لانو لحد الان لا املك خاصية ارسال الرسائل.. لك مني كل محبة..

 

[GoGo No Way]

استاذه روز روز روز .... هههههههه اهلا بعودتك مرة اخرى ... فى تقديم البرنامج التعليمى العلمى الدين .. " العلم والايمان " هههههههه مبدئيا رجعى الموضوع ودة هيكون كويس لان كل الى بنتكلم فيه مربوط بالموضوع بشكل او باخر فانتى غيرى الطريق خالص وانا هحاول ارجعه تانى عناد ههههههههه ههههههههه لالا بجد رجعى واعملى الى عايزة وشقلبيه واكتى وجهه نظرك واعملى اى حاجة ...

بالنسبة لعم " خادم البتول " براحة علينا يا عم الحج ولا انت علشان بقيت عالى مش هتتكلم تانى هههههههه .. لالا ان شاء الله منتظرين منك كل حاجة و بالتوفيق وربنا معاك

شقاوه .. عندك حق فى كل حاجة قولتيها عن الموضوع او روز او خادم ....ما عدا حاجة واحدة .. ان الموضوع هيكون علمنى " عناد " لحد ما اطرد ههههههههههه لالا .. ان شاء الله نتكلم عادى ونربط كل حاجة كدة بالراحة جدا ...

انا احتمال مخشش بكره علشان الامتحانات ... صلولى ..

 

[Desert Rose]

اشكركم جميعا :flowers::flowers:, ليا عودة للرد اذا الله راد على رأى اللبنانيين :flowers:

 

[Desert Rose]

لكن ... التركيز فى سلام مكان ما يسود سلام حقيقى ؟؟؟ قد تكون صدفة مثلاً .. و دة الاكثر منطقية بالنسبة لى .. لكن .. و خد بالك من لكن دى .. لو الموضوع واخد بُعد روحى و التركيز دة مقصود به صلاة .. خصوصًا انه صادر من رهبان .. فاقول اة اتجمعو ركزو و رفعو طلبات و صلاة خاصة من اجل سلام منطقة ما .. فكان الرد الالهى بحلول السلام .. و مكانتش صدفة و وارد تكرارها مرات و مرات

الفاصل فى الموضوع دة .. تفسير معنى تركيز اللى ذكرتها فى القصة .. و ديانة الرهبان و لو كانو مسيحيين و صلاة ... ليه فسرناها بموضوع العقل العالمى و مفسرناهاش نتيجة طبيعية للصلاة ؟؟ و استجابة الهية ؟؟

عندى رد سريع على النقطة ديه ياشقاوة لانها لفتت نظرى وبعد كده اذا ربنا اراد انى ارجع للموضوع تانى هرد على باقى المشاركة

فيه متشككين بيشككوا فى موضوع توحيد النوايا ده , لكن بما ان فيه نتايج ايجابية ظهرت على ارض الواقع يبقا الموضوع يستحق الدراسة والفحص اكتر والاهتمام والتجربة للتأكيد على نتايجه
وبعدين على فكرة , توحيد التأمل والنية ممكن انا وانتى ومليون شخص نعمله مع بعض واحنا بعيد عن بعض فى المكان خالص فتقدرى تقولى ان نطاق تطبيق الفكرة واسع جدا ومش مرتبط لا بزمان ولا مكان

طيب نيجى بقا للجزء المهم بتاع ليه مش اعتبرناها رد او استجابة الهيه
عايزة اقولك ياشقاوة انها فى كل الاحوال استجابة الهيه وكلامنا ده لا ينفى تدخل الله واستخدامه اصلا للطاقات الايجابية ديه من الحب والسلام والخير
مش لازم يكون المتأملين دول مسيحيين علشان الرب يستجيب لتأملاتهم فى الحب والخير والسلام من اجل العالم
عارفه ليه ؟ لان الله هو نفسه الحب والخير والسلام هو اللى قال ان افكارى من نحوكم افكار سلام لا شر
فالله موجود فى اى مكان ومع اى حد ومستجيب ومتفاعل مع اى حد ماشى معاه على نفس الموجه اللى هى موجة السلام والخير والمحبة
ويكون الشخص ده بيطلب فعلا الحب والخير والسلام والهدوء للاخرين بقلب صادق

مشكلتنا اوقات ياشقاوة اننا بنقولب الله , نقولبه جايه من القولبه بنحطه فى قوالب محددة فالله موجود بس عندنا احنا , فى بيوتنا احنا بس , مش بيسمع غير لينا احنا
وده من خلال اللى انا شوفته على ارض الواقع مش صح . الله لا يٌحد فى تعاملاته مع البشر . الله يُظهر ذاته للجميع , لانه سامع الصلاة اليه يأتى كل بشر زى ماقال الكتاب .